Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka Nipāta
10. Kakudha Vagga

Sutta 100

Kakudha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[122]

[1][pts] Evaɱ me sutaɱ:|| ||

Ekaɱ samayaɱ Bhagavā Kosambīyaɱ viharati Ghositārāme.|| ||

Tena kho pana samayena Kakudho nāma Koliyaputto āyasmato Mahā Moggallānassa upaṭṭhāko adhunā kāla-kato aññataraɱ mano-mayaɱ kāyaɱ upapanno||
tassa eva-rūpo atta-bhāva-paṭilābho hoti,||
seyyathā pi nāma dve vā tiṇi vā Māgadhakāni gāmakkhettāni.|| ||

So tena atta-bhāva-paṭilābhena n'eva attānaɱ no paraɱ vyābādheti.|| ||

Atha kho Kakudho deva-putto yen'āyasmā Mahā Moggallāno ten'upasankami.|| ||

Upasaŋkamitvā āyasmantaɱ Mahā Moggallānaɱ abhivādetvā eka-m-antaɱ aṭṭhāsi.|| ||

Eka-m-antaɱ [123] ṭhito kho Kakudho deva-putto āyasmantaɱ Mahā Moggallānaɱ etad avoca:|| ||

"Devadattassa bhante eva-rūpaɱ icchāgataɱ uppajji:|| ||

'Ahaɱ bhikkhu-Saŋghaɱ pariharissāmi' ti.|| ||

Saha cittuppādā ca bhante Devadatto tassā iddhiyā parihīno' ti.|| ||

Idam avoca Kakudho deva-putto,||
idaɱ vatvā āyasmantaɱ Mahā Moggallānaɱ abhivādetvā padakkhiṇaɱ katvā tatth'ev'antara-dhāyi.|| ||

Atha kho āyasmā Mahā Moggallāno yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisidi.|| ||

Eka-m-antaɱ nisinno kho āyasmā Mahā Moggallāno Bhagavantaɱ etad avoca:|| ||

"Kakudho nāma bhante,||
Koliyaputto mam upaṭṭhāko adhunā kāla-kato aññataraɱ mano-mayaɱ kāyaɱ upapanno,||
tassa eva-rūpo atta-bhāva-paṭilābho,||
seyyathā pi nāma dve vā tiṇi vā Māgadhakāni gāmakkhettāni.|| ||

So tena atta-bhāva-paṭilābhena n'ev attānaɱ no paraɱ vyābādheti.|| ||

Atha kho bhante Kakudho deva-putto yen'āhaɱ ten'upasankami.|| ||

Upasaŋkamitvā maɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho bhante Kakudho deva-putto maɱ etad avoca:|| ||

'Devadattassa bhante, eva-rūpaɱ icchāgataɱ uppajji:

"Ahaɱ bhikkhu-Saŋghaɱ pariharissāmi" ti|| ||

Saha cittuppādā ca bhante Devadatto tassā iddhiyā parihīno" ti.'|| ||

Idam avoca bhante, Kakudho deva-putto.

Idaɱ vatvā maɱ abhivādetvā padakkhiṇaɱ katvā tatth'ev'antara-dhāyi" ti.|| ||

"Kiɱ pana te Moggallāna,||
Kakudho deva-putto cetasā ceto paricca vidito||
'Yaɱ kiñaci Kakudho deva-putto bhāsati,||
sabbaɱ taɱ tath'eva hoti no aññathā'" ti?|| ||

"Cetasā ceto paricca vidito me bhante Kakudho deva-putto||
'Yaɱ kiñaci Kakudho deva-putto bhāsati,||
sabbaɱ taɱ tath'eva hoti no aññathā'" ti.|| ||

Rakkhass'etaɱ Moggallāna vācaɱ.|| ||

Rakkhass'etaɱ Moggallāna vācaɱ.|| ||

Idāni so mogha-puriso attanā va attānaɱ pātu-karissatiti.|| ||

 


 

Pañc'ime Moggallāna Satthāro santo saŋvijj'amānā lokasmiɱ.|| ||

Katame pañca?|| ||

[124] Idha Moggallāna, ekacco sattā aparisuddhasīlo samāno||
'parisuddhasīlo'mbhi' ti paṭijānāti,||
'parisuddhaɱ me sīlaɱ||
pariyodātaɱ asaɱkiliṭṭhan' ti.|| ||

Tam enaɱ sāvakā evaɱ jānanti:|| ||

'Ayaɱ kho bhavaɱ Satthā aparisuddhasīlo samāno||
"parisuddhasīlo'mhī" ti paṭijānāti,||
"parisuddhaɱ me sīlaɱ||
pariyodātaɱ asaɱkiliṭṭhan" ti.|| ||

Mayaɱ c'eva kho pana gihīnaɱ āroceyyāma,||
nāssassa manāpaɱ.|| ||

Yaɱ kho pan'assa amanāpaɱ,||
kathannu mayaɱ tena samudācareyyāma?|| ||

Sammannati kho pana civara-piṇḍa-pāta-sen'āsana-gilāna-ppaccaya-bhesajja-parikkhārena.|| ||

Yaɱ tumo karissati,||
tumo'va tena paññāyissatī' ti.|| ||

Eva-rūpaɱ kho Moggallāna,||
Satthāraɱ sāvakā silato rakkhananti.|| ||

Eva-rūpo ca pana Satthā sāvakehi sīlato rakkhaɱ paccāsiɱsati.

 

 

Puna ca paraɱ Moggallāna,||
idh'ekacco Satthā aparisuddhājivo samāno||
'parisuddhājivo'mhi' ti paṭijānāti,||
'parisuddho me ajivo||
pariyodāto asaɱkiliṭṭho' ti.|| ||

Tam enaɱ sāvakā evaɱ jānatti:|| ||

'Ayaɱ kho bhavaɱ Satthā aparisuddhājivo samāno||
"parisuddhājivo'mh" iti paṭijānāti,||
"parisuddho me ājivo||
pariyodāto asaɱkiliṭṭho" ti.|| ||

Mayaɱ c'eva kho pana gihīnaɱ āroceyyāma,||
nāssassa manāpaɱ.|| ||

Yaɱ kho pan'assa amanāpaɱ,||
kathannu mayaɱ tena samudācareyyāma?|| ||

Sammannati kho pana civara-piṇḍa-pāta-sen'āsana-gilāna-ppaccaya-bhesajja-parikkhārena.|| ||

Yaɱ tumo karissati,||
tumo'va tena paññāyissati" ti.|| ||

Eva-rūpaɱ kho Moggallāna||
Satthāraɱ sāvakā ājivato rakkhanti.|| ||

Eva-rūpo ca pana Satthā sāvakehi ājivato rakkhaɱ paccāsiɱsati.

 

 

Puna ca paraɱ Moggallāna,||
idh'ekacco Satthā aparisuddha-Dhamma-desano samāno||
'parisuddhadhamma-desano'mhi' ti paṭijānāti,||
'parisuddho me Dhamma-desanā||
pariyodātā asaɱkiliṭṭhā' ti.|| ||

Tam enaɱ sāvakā evaɱ jānanti:|| ||

'Ayaɱ kho bhavaɱ Satthā aparisuddha-Dhamma-desano samāno||
[125] "parisuddha-Dhamma-desanomhi" ti paṭijānāti,||
"parisuddhā me Dhamma-desanā||
pariyodātā asaɱkiliṭṭhā" ti.|| ||

Mayaɱ c'eva kho pana gihīnaɱ āroceyyāma,||
nāssassa manāpaɱ.|| ||

Yaɱ kho panassa amanāpaɱ,||
kathannu mayaɱ tena samudācareyyāma?|| ||

Sammannati kho pana civara-piṇḍa-pāta-sen'āsana-gilāna-ppaccaya-bhesajja-parikkhārena.|| ||

Yaɱ tumo karissati,||
tumo'va tena paññāyissati" ti.|| ||

Eva-rūpaɱ kho Moggallāna||
Satthāraɱ sāvakā Dhamma-desanato rakkhanti.|| ||

Eva-rūpo ca pana Satthā sāvakehi Dhamma-desanato rakkhaɱ paccāsiɱsati.

 

 

Puna ca paraɱ Moggallāna,||
idh'ekacco Satthā aparisuddha-veyyā-karaṇo samāno||
'parisuddhaveyyā-karaṇo'mhi' ti paṭijānāti,||
'parisuddhaɱ me veyyā-karaṇaɱ||
paridotaɱ asaɱkiliṭṭhan' ti.|| ||

Tam enaɱ sāvakā evaɱ jānanti:|| ||

"Ayaɱ kho bhavaɱ Satthā aparisuddha-veyyā-karaṇo samāno||
"parisuddhaveyyā-karaṇo'mhi" ti paṭijānāti,||
"parisuddhaɱ me veyyā-karaṇaɱ||
pariyodātaɱ asaɱkiliṭṭhan" ti.|| ||

Mayaɱ c'eva kho pana gihīnaɱ āroceyyāma,||
nāssassa manāpaɱ.|| ||

Yaɱ kho panassa amanāpaɱ||
kathannu mayaɱ tena samudācareyyāma.|| ||

Sammannati kho pana civara-piṇḍa-pāta-sen'āsana-gilāna-ppaccaya-bhesajja-parikkhārena.|| ||

Yaɱ tumo karissati,||
tumo'va tena paññāyissati" ti.|| ||

Eva-rūpaɱ kho Moggallāna||
Satthāraɱ sāvakā veyyā-karaṇato rakkhanti.|| ||

Eva-rūpo ca pana Satthā sāvakehi veyyā-karaṇato rakkhaɱ paccāsiɱsati.

 

 

Puna ca paraɱ Moggallāna,||
idh'ekacco Satthā aparisuddhañāṇa-dassano samāno||
'parisuddhañāṇa-dassan'omhi' ti paṭijānāti,||
'parisuddhaɱ me ñāṇa-dassanaɱ||
pariyodātaɱ asaɱkiliṭṭhan' ti.|| ||

Tam enaɱ sāvakā evaɱ jānanti:|| ||

"Ayaɱ kho bhavaɱ Satthā aparisuddhañāṇa-dassano samāno||
"parisuddhañaṇadassano'mhi" ti paṭijānāti,||
"parisuddhaɱ me ñāṇa-dassanaɱ||
pariyodātaɱ asaɱkiliṭṭhan" ti.|| ||

Mayaɱ c'eva kho pana gihīnaɱ āroceyyāma,||
nāssassa manāpaɱ.|| ||

Yaɱ kho panassa amanāpaɱ,||
kathannu taɱ mayaɱ tena samudācareyyāma.|| ||

[126] Sammannati kho pana civara-piṇḍa-pāta-sen'āsana-gilāna-ppaccaya-bhesajja-parikkhārena.|| ||

Yaɱ tumo karissati,||
tumo'va tena paññāyissati" ti.|| ||

Eva-rūpaɱ kho Moggallāna,||
Satthāraɱ sāvakā ñāṇa-dassanato rakkhanti.|| ||

Eva-rūpo ca pana Satthā sāvakehi ñāṇa-dassanato rakkhaɱ paccāsiɱsati.|| ||

Ime kho Moggallāna,||
pañca Satthāro santo saŋvijj'amānā lokasmiɱ.

 


 

Ahaɱ kho pana Moggallāna,||
parisuddhasīlo samāno||
'parisuddhasīlo'mhi' ti paṭijānāmi,||
'parisuddhaɱ me sīlaɱ||
pariyodātaɱ asaɱkiliṭṭhan' ti.|| ||

Na ca maɱ sāvakā sīlato rakkhanti.|| ||

Na c'āhaɱ sāvakehi sīlato rakkhaɱ paccāsiɱsāmi.|| ||

 

 

Parisuddhājivo samāno||
'parisuddhājivo'mhi' ti paṭijānāmi,||
'parisuddho me ājivo||
pariyodāto asaɱkiliṭṭho' ti.|| ||

Na ca maɱ sāvakā ājivato rakkhanti.|| ||

Na c'āhaɱ sāvakehi ājivato rakkhaɱ paccāsiɱsāmi.|| ||

 

 

Parisuddhadhamma-desano samāno||
'parisuddhadhammadeno'mhi' ti paṭijānāmi,||
'parisuddhā me Dhamma-desanā||
pariyodātā asaɱkiliṭṭhā' ti.|| ||

Na ca maɱ sāvakā Dhamma-desanato rakkhanti.|| ||

Na c'āhaɱ sāvakehi Dhamma-desanato rakkhaɱ paccāsiɱsāmi.|| ||

 

 

Parisuddhaveyyā-karaṇo samāno||
'parisuddhaveyyā-karaṇo'mhi' ti paṭijānāmi,||
'parisuddhaɱ me veyyā-karaṇaɱ||
pariyodātaɱ asaɱkiliṭṭhan' ti.|| ||

Na ca maɱ sāvakā veyyā-karaṇato rakkhanti.|| ||

Na c'āhaɱ sāvakehi veyyā-karaṇato rakkhaɱ paccāsiɱsāmi.|| ||

 

 

Parisuddhañāṇa-dassano samāno||
'parisuddhañāṇa-dassano'mhi' ti paṭijānāmi,||
'parisuddhaɱ me ñāṇa-dassanaɱ||
pariyodātaɱ asaɱkiliṭṭhan' ti.|| ||

Na ca maɱ sāvakā ñāṇa-dassanato rakkhanti.|| ||

Na c'āhaɱ sāvakehi ñāṇa-dassanato rakkhaɱ paccāsiɱsāmiti.|| ||

Kakudhavaggo pañcamo|| ||


Contact:
E-mail
Copyright Statement