Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka Nipāta
13. Gilāna Vaggo

Sutta 123

Dūpaṭṭhāka-Gilāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[143]

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Pañcahi bhikkhave dhammehi samannāgato gilāno dūpaṭṭhāko hoti.|| ||

Katamehi pañcahi?|| ||

Asappāya-kāri hoti.

Sappāye mattaɱ na jānāti.|| ||

Bhesajjaɱ na paṭisevitā hoti.|| ||

Atthakāmassa gilānūpaṭṭhākassa na yathā-bhūtaɱ ābādhaɱ āvīkattā hoti:|| ||

"Abhi-k-kamantaɱ vā abhi-k-kamatī" ti.|| ||

"Paṭikkamantaɱ vā paṭikkamatī" ti.|| ||

"Ṭhitaɱ vā ṭhito" ti.|| ||

Uppannānaɱ vā sāririkānaɱ vedanānaɱ dukkhānaɱ tippānaɱ kharānaɱ kaṭukānaɱ asātānaɱ amanāpānaɱ pāṇaharānaɱ anadhivāsaka-jātiko hoti.|| ||

[144] Imehi kho bhikkhave pañcahi dhammehi samannāgato gilāno dūpaṭṭhāko hoti.|| ||

 

§

 

Pañcahi bhikkhave dhammehi samannāgato gilāno sūpaṭṭhāko hoti.|| ||

Katamehi pañcahi?|| ||

Sappāya-kāri hoti.|| ||

Sappāye mattaɱ jānāti.|| ||

Bhesajjaɱ paṭisevitā hoti;|| ||

Atthakāmassa gilānūpaṭṭhākassa yathā-bhūtaɱ ābādhaɱ āvīkattā hoti:|| ||

"Abhi-k-kamantaɱ vā abhi-k-kamatī" ti.|| ||

"Paṭikkamantaɱ vā paṭikkamatī" ti.|| ||

"Ṭhitaɱ vā ṭhito" ti.|| ||

Uppannānaɱ vā sāririkānaɱ vedanānaɱ dukkhānaɱ tippānaɱ kharānaɱ kaṭukānaɱ asātānaɱ amanāpānaɱ pāṇaharānaɱ adhivāsaka-jātiko hoti.|| ||

Imehi kho bhikkhave pañcahi dhammehi samannāgato gilāno sūpaṭṭhāko hotī ti.|| ||


Copyright Statement