Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
Pañcaka-Nipāta Gilāna Vagga

Sutta 127

Vapakāsa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[145]

[1][olds] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Pañcahi bhikkhave dhammehi samannāgato bhikkhu nālaɱ Saŋghamhā vapakāsituɱ.|| ||

Katamehi pañcahi?|| ||

Idha, bhikkhave, bhikkhu asantuṭṭho hoti itiritarena civarena,||
asantuṭṭho hoti itaritarena piṇaḍa-pātena,||
asantuṭṭho hoti itaritarena senāsanena,||
asantuṭṭho hoti itaritarena gilāna-paccaya-bhesajja-parikkhārena,||
kāma-saŋkappa-bahulo ca viharati.|| ||

Imehi kho bhikkhave pañcahi dhammehi samannāgato bhikkhu nālaɱ Saŋghamhā vapakāsituɱ.|| ||

 

§

 

Pañcahi bhikkhave dhammehi samannāgato bhikkhu alaɱ Saŋghamhā vapakāsituɱ.|| ||

Katamehi pañcahi?|| ||

[146] Idha, bhikkhave, bhikkhu santuṭṭho hoti itaritarena civarena,||
santuṭṭho hoti itaritarena piṇḍa-pātena,||
santuṭṭho hoti itaritarena senāsanena,||
santuṭṭho hoti itaritarena gilāna-paccaya-bhesajja-parikkhārena,||
nekkhamma-saŋkappa-bahulo ca viharati.|| ||

Imehi kho bhikkhave pañcahi dhammehi samannāgato bhikkhu alaɱ Saŋghamhā vapakāsitun ti.|| ||


Copyright Statement