Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka Nipāta
14. Rāja Vaggo

Sutta 131

Paṭhama Cakkānuvattana Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[147]

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Pañcahi bhikkhave aŋgehi samannāgato rājā cakka-vatti dhammen'eva cakkaɱ pavatteti,||
taɱ hoti cakkaɱ [148] appati-vattiyaɱ kenaci manussa-bhūtena pacc'atthi-kena pāṇinā.|| ||

Katamehi pañcahi?|| ||

3. Idha, bhikkhave, rājā cakka-vatti atth'aññū ca hoti,||
Dhamm'aññū ca,||
matt'aññū ca,||
kāl'aññū ca,||
paris'aññū ca.|| ||

Imehi kho pañcahi aŋgehi samannāgato rājā cakka-vatti dhammen'eva cakkaɱ vatteti,||
taɱ hoti cakkaɱ appati-vattiyaɱ kenaci manussa-bhutena pacc'atthi-kena pāṇinā.|| ||

 

§

 

4. Evam eva kho bhikkhave pañcahi dhammehi samannāgato Tathāgato arahaɱ Sammā-sambuddho dhammen'eva anuttaraɱ Dhamma-cakkaɱ pavatteti,||
taɱ hoti cakkaɱ appati-vattiyaɱ samaṇena vā brāhmaṇena vā devena vā mārena vā brahmunā vā kenaci vā lokasmiɱ.|| ||

Katamehi pañcahi?|| ||

Idha, bhikkhave, Tathāgato arahaɱ Sammā-sambuddho atth'aññū,||
Dhamm'aññū,||
matt'aññū,||
kāl'aññū,||
paris'aññū.|| ||

Imehi kho bhikkhave pañcahi dhammehi samannāgato Tathāgato arahaɱ Sammā-sambuddho Dhammen'eva anuttaraɱ Dhamma-cakkaɱ pavatteti,||
taɱ hoti cakkaɱ appati-vattiyaɱ samaṇena vā brāhmaṇena vā devena vā mārena vā brahmunā vā kenaci vā lokasmin" ti.|| ||


Copyright Statement