Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka Nipāta
15. Tikaṇḍaki Vaggo

Sutta 142

Ārabhati Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[165]

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. Pañc'ime bhikkhave puggalā santo saŋvijj'amānā lokasmiɱ.|| ||

Katame pañca?|| ||

3. Idha, bhikkhave, ekacco puggalo ārabhati ca vippaṭisāri ca hoti,||
taɱ ca ceto-vimuttiɱ paññā-vimuttiɱ yathā-bhūtaɱ na-p-pajānāti,||
yatth'assa te uppannā pāpakā akusalā dhammā aparisesā nirujjhanti.|| ||

4. Idha pana bhikkhave ekacco puggalo ārabhati,||
na vippaṭisāri hoti,||
taɱ ca ceto-vimuttiɱ paññā-vimuttiɱ yathā-bhūtaɱ na-p-pajānāti,||
yatth'assa te uppannā pāpakā akusalā dhammā aparisso nirujjhanti.|| ||

5. Idha pana bhikkhave ekacco puggalo nārabhati,||
[166] vippaṭisāri hoti,||
taɱ ca ceto-vimuttiɱ paññā-vimuttiɱ yathā-bhūtaɱ na-p-pajānāti,||
yatth'assa te uppannā pāpakā akusalā dhammā aparisso nirujjhanti.|| ||

6. Idha pana bhikkhaveva ekacco puggalo nārabhati,||
vippaṭisāri hoti,||
taɱ ca ceto-vimuttiɱ paññā-vimuttiɱ yathā-bhūtaɱ na-p-pajānāti,||
yatth'assa to uppannā pāpakā akusalā dhammā aparisso nirujajhanti.|| ||

7. Idha pana bhikkhave ekacco puggalo nārabhati,||
vippaṭisāri hoti,||
taɱ ca ceto-vimuttiɱ paññā-vimuttiɱ yathā-bhūtaɱ na-p-pajānāti,||
yatth'assa te uppannā pāpakā akusalā dhammā aparisso nirujjhanti.|| ||

 

§

 

Tatra, bhikkhave, yvāyaɱ puggalo ārabhati ca,||
vippaṭisāri ca hoti,||
taɱ ca ceto-vimuttiɱ paññā-vimuttiɱ yathā-bhūtaɱ na-p-pajānāti,||
yatth'assa te uppannā pāpakā akusalā dhammā aparisesā nirujjhanti,||
so evam assa vacaniyo:|| ||

'Āyasmato kho ārambhajā āsavā saŋvijjanti;||
vippaṭi-sārajā āsavā pavaḍḍhanti;||
sādhu vatāyasmā ārambhajā āsave pahāya vippaṭisāraje āsave paṭivinodetvā cittaɱ paññaɱ ca bhāvetu;||
evam āyasmā amunā pañcamena puggalena samasamo bhavissatī' ti.|| ||

Tatra, bhikkhave, yvāyaɱ puggalo ārabhati,||
na vippaṭisāri hoti,||
taɱ ca ceto-vimuttiɱ paññā-vimuttiɱ yathā-bhūtaɱ na-p-pajānāti,||
yatth'assa te uppannā pāpakā akusalā dhammā aparisesā nirujjhanti,||
so evam assa vacaniyo:|| ||

'Āyasmato kho ārambhajā āsavā saŋvijjanti;||
vippaṭi-sārajā āsavā nappavaḍḍhanti;||
sādhu vatāyasmā ārambhajā āsave pahāya cittaɱ ca bhāvetu;||
evam āyasmā amunā pañcamena puggalena samasamo bhavissatī' ti.|| ||

Tatra, bhikkhave, yvāyaɱ puggalo nārabhati,||
na vippaṭisāri hoti,||
taɱ ca ceto-vimuttiɱ paññā-vimuttiɱ yathā-bhūtaɱ na-p-pajānāti,||
yatth'assa te uppannā pāpakā akusalā dhammā aparisesā nirujjhanti, so evam assa vacaniyo:|| ||

[167] 'Āyasmato kho ārambhajā āsavā na saŋvijjanti.|| ||

Vippaṭisārajā āsavā pavaḍḍhanti.|| ||

Sādhu vatāyasmā vippaṭisāraje āsave paṭivinodetvā cittaɱ paññaɱ ca bhāvetu;||
evam āyasmā amunā pañcamena puggalena samasamo bhavissatī' ti.|| ||

Tatra, bhikkhave, yvāyaɱ puggalo nārabhati,||
na vipipaṭisāri hoti,||
taɱ ca ceto-vimuttiɱ paññā-vimuttiɱ yathā-bhūtaɱ na-p-pajānāti,||
yatth'assa te uppannā pāpakā akusalā dhammā aparisesā nirujjhanti, so evam assa vacaniyo:|| ||

'Āyasmato kho ārambhajā āsavā na saŋvijjanti.|| ||

Vippaṭisārajā āsavā nappaḍḍhanti.|| ||

Sādhu vatāyasmā cittaɱ paññaɱ ca bhāvetu;||
evam āyasmā amunā pañcamena puggalena samasamo bhavissatī' ti.|| ||

Iti kho bhikkhave ime cattāro puggalā amunā pañcamena puggalena evaɱ ovadiyamānā||
evaɱ anusāsiyamānā anupubbena āsavānaɱ khayaɱ pāpuṇantī" ti.|| ||


Copyright Statement