Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka-Nipāta
XVII. Āghāta Vaggo

Sutta 170

Bhaddaji Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[202]

[1][pts][than] Evaɱ me sutaɱ:|| ||

"Ekaɱ samayaɱ āyasmā Ānando Kosambīyaɱ viharati Ghositārāme.|| ||

Atha kho āyasmā Bhaddaji yen'āyasmā Ānando ten'upasankami.|| ||

Upasaŋkamitvā āyasmatā Ānandena saddhiɱ sammodi.|| ||

Sammodanīyaɱ kathaɱ sārāṇiyaɱ vīti-sāretvā eka-m-antaɱ nisidi.|| ||

Eka-m-antaɱ nisinnaɱ kho āyasmantaɱ Bhaddajiɱ āyasmā Ānando etad avoca:|| ||

Kin nu kho āvuso Bhaddaji, dassanānaɱ aggaɱ?|| ||

Kiɱ savaṇānaɱ aggaɱ?|| ||

Kiɱ sukhānaɱ aggaɱ?|| ||

Kiɱ saññānaɱ aggaɱ?|| ||

Kiɱ bhavānaɱ agganti?|| ||

 

§

 

Atth'āvuso, Brahmā abhibhu anabhibhuto aññadatthu daso vasavattī,||
yo taɱ Brahmānaɱ passati,||
idaɱ dassanānaɱ aggaɱ.|| ||

Atth'āvuso Ābhassarā nāma devā sukhena abhisannā parisannā.|| ||

Te kadāci karahaci udānaɱ udānenti:|| ||

"Aho sukhaɱ, aho sukhan" ti.|| ||

Yo taɱ saddaɱ suṇāti,||
idaɱ savaṇānaɱ aggaɱ.|| ||

Atth'āvuso Subhakiṇhakā nāma devā.|| ||

Te santaññ'eva sukhitā sukhaɱ paṭisaɱvedenti.|| ||

Idaɱ sukhānaɱ aggaɱ.|| ||

Atth'āvuso, Ākiñcaññāyatanūpagā devā.|| ||

Idaɱ saññānaɱ aggaɱ.|| ||

Atth'āvuso N'eva-saññā-nāsaññāyatanūpagā devā.|| ||

Idaɱ bhavānaɱ agganti.|| ||

 

§

 

Sameti kho idaɱ āyasmato Bhaddajissa yad idaɱ bahu-janenāti.|| ||

Āyasmā kho Ānando bahu-s-suto.|| ||

Paṭibhātu āyasmantaññ'eva Ānandan ti.|| ||

Tena hi āvuso, Bhaddaji,||
suṇāhi sādhukaɱ manasi karohi,||
bhāsissāmiti.|| ||

Evam āvuso ti kho āyasmā Bhaddaji āyasmato Ānandassa pacca-s-sosi.|| ||

Yathā passato kho āvuso,||
anantarā āsavānaɱ khayo hoti,||
idaɱ dassanānaɱ aggaɱ.|| ||

Yathā suṇato||
anantarā āsavānaɱ khayo hoti,||
idaɱ savaṇānaɱ aggaɱ.|| ||

Yathā sukhitassa||
anantarā āsavānaɱ khayo hoti,||
idaɱ sukhānaɱ aggaɱ.|| ||

Yathā saññissa||
anantarā āsavānaɱ khayo hoti,||
idaɱ saññānaɱ aggaɱ.|| ||

Yathā bhutassa||
anantarā āsavānaɱ khayo hoti,||
idaɱ bhavānaɱ agganti.|| ||

[203] Āghāta Vagga Dutiya


Copyright Statement