Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka-Nipāta
XVIII. Upāsaka Vaggo

Sutta 173

Niraya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[ ]

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi||
"Bhikkhavo" ti.|| ||

"Bhadante" ti te bhikkhu Bhagavato paccassosuɱ.|| ||

Bhagavā etad avoca:|| ||

"Pañcahi bhikkhave, dhammehi samannāgato upāsako yath'ābhataɱ nikkhitto evaɱ Niraye.|| ||

Katamehi pañcahi?|| ||

Pāṇāti-pātī hoti,||
adinn'ādāyī hoti,||
kāmesu micchā-cārī hoti,||
musā-vādī hoti,||
surā-mera-yamajja-pamā-daṭṭhāyī hoti.|| ||

Imehi kho bhikkhave, pañcahi dhammehi samannāgato upāsako yath'ābhataɱ nikkhitto evaɱ Niraye.|| ||

 

§

 

Pañcahi bhikkhave, dhammehi samannāgato upāsako yath'ābhataɱ nikkhitto evaɱ sagge.|| ||

Katamehi pañcahi?|| ||

Pāṇāti-pātā paṭivirato hoti,||
adinn'ādānā paṭivirato hoti,||
kāmesu micchā-cārā paṭivirato hoti,||
musā-vādā paṭivirato hoti,||
surā-mera-yamajja-pamā-daṭṭhānā paṭivirato hoti.|| ||

Imehi kho bhikkhave, pañcahi dhammehi samannāgato upāsako yath'ābhataɱ nikkitto evaɱ saggeti.|| ||


Copyright Statement