Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka-Nipāta
XVIII. Upāsaka Vaggo

Sutta 176

Pīti Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[206]

[1][than][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho Anāthapiṇḍiko gahapati pañca-mattehi upāsaka-satehi parivuto yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisidi.||
Eka-m-antaɱ nisinnaɱ kho Anāthapiṇḍikaɱ gahapatiɱ Bhagavā etad avoca:|| ||

2. Tumhe pi kho gahapati,
bhikkhu-Saŋghaɱ pacc'upaṭṭhitā cīvara-piṇḍa-pāta-senā-sanagilāna-paccay-abhesajja-parikkhārena.|| ||

Na kho gahapati,
tāvataken'eva tuṭṭhi karaṇiyā:|| ||

'Mayaɱ bhikkhu-Saŋghaɱ pacc'upaṭṭhitā
cīvara-piṇḍa-pāta-senā-sanagilāna-paccay-abhesajja-parikkhārenā' ti.|| ||

Tasmā ti ha gahapati,
evaɱ sikkhitabbaɱ:|| ||

[207]3."Kinti mayaɱ kālena kālaɱ pavivekaɱ pītiɱ upasampajja vihareyyāmā" ti.|| ||

Evaɱ hi vo gahapati sikkhitabban ti.|| ||

 

§

 

4. Evaɱ vutte āyasmā Sāriputto Bhagavantaɱ etad avoca:|| ||

Acchariyaɱ bhante!|| ||

Abbhutaɱ bhante!|| ||

Yāva su-bhāsitatañ c'idaɱ bhante, Bhagavatā:-|| ||

"Tumhe kho gahapati,
bhikkhu-Saŋghaɱ pacc'upaṭṭhitā
cīvara-piṇḍa-pāta-senā-sanagilāna-paccay-abhesajja-parikkhārena.|| ||

Na kho gahapati tāvataken'eva tuṭṭhi karaṇiyā:|| ||

'Mayaɱ bhikkhu-Saŋghaɱ pacc'upaṭṭhitā
cīvara-piṇḍa-pāta-senā-sanagilāna-paccay-abhesajja-parikkhārenā' ti.|| ||

Tasmā ti ha gahapati,
evaɱ sikkhitabbaɱ:|| ||

"Kinti mayaɱ kālena kālaɱ pavivekaɱ pītiɱ upasampajja vihareyyāmā' ti.|| ||

Evaɱ hi vo gahapati,
sikkhitabban' ti.|| ||

Yasmiɱ bhante,
samaye ariya-sāvako pavivekaɱ pītiɱ upasampajja viharati.|| ||

Pañc'assa ṭhānāni tasmiɱ samaye na honti:|| ||

Yam pi'ssa kām'ūpasaɱhitaɱ dukkhaɱ domanassaɱ,
tam pi'ssa tasmiɱ samaye na hoti.|| ||

Yam pi'ssa kām'ūpasaɱhitaɱ sukhaɱ somanassaɱ,
tam pi'ssa tasmiɱ samaye na hoti.|| ||

Yam pi'ssa akusalupasaɱhitaɱ dukkhaɱ domanassaɱ,
tam pi'ssa tasmiɱ samaye na hoti.|| ||

Yam pi'ssa akusalūpasaɱhitaɱ sukhaɱ somanassaɱ,
tam pi'ssa tasmiɱ samaye na hoti.|| ||

Yam pi'ssa kusalūpasaɱhitaɱ dukkhaɱ domanassaɱ,
tam pi'ssa tasmiɱ samaye na hoti.|| ||

Yasmiɱ bhante,
samaye ariya-sāvako pavivekaɱ pītiɱ upasampajja viharati.
Imāni'ssa pañca ṭhānāni tasmiɱ samaye na hontī ti.|| ||

 

§

 

Sādhu! Sādhu! Sāriputta.|| ||

Yasmiɱ Sāriputta, samaye [208] ariya-sāvako pavivekaɱ pītiɱ upasampajja viharati,
pañc'assa ṭhānāni tasmiɱ samaye na honti:|| ||

Yam pi'ssa kām'ūpasaɱhitaɱ dukkhaɱ domansasaɱ,
tam pi'ssa tasmim samaye na hoti.|| ||

Yam pi'ssa kām'ūpasaɱhitaɱ sukhaɱ somanassaɱ,
tam pi'ssa tasmiɱ samaye na hoti.|| ||

Yam pi'ssa akusalūpasaɱhitaɱ dukkhaɱ domanassaɱ,
tam pi'ssa tasmiɱ samaye na hoti.|| ||

Yam pi'ssa akusalūpasaɱhitaɱ sukhaɱ somanassaɱ,
tam pi'ssa tasmiɱ samaye na hoti.|| ||

Yam pi'ssa kusalūpasaɱhitaɱ dukkhaɱ domanassaɱ,
tam pi'ssa tasmiɱ samaye na hoti.|| ||

Yasmiɱ Sāriputta samaye ariya-sāvako pavivekaɱ pītiɱ upasampajja viharati,
imāni'ssa pañca ṭhānāni tasmiɱ samaye na hontī ti.|| ||


Contact:
E-mail
Copyright Statement