Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka-Nipāta
XVIII. Upāsaka Vaggo

Sutta 180

Gavesī Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[214]

[1][pts][than] Sāvatthi nidānaɱ|| ||

Ekaɱ samayaɱ Bhagavā Kosalesu cārikaɱ carati mahatā bhikkhu-saŋghena saddhiɱ.|| ||

Addasā kho Bhagavā addhāna-magga-paṭipanno aññatarasmiɱ padese mahantaɱ sāla-vanaɱ||
disvā maggā okkamma yena taɱ sāla-vanaɱ ten'upasankami.|| ||

Upasaŋkamitvā taɱ sāla-vanaɱ ajjhoga-hetvā aññatarasmiɱ padese sitaɱ pātvākāsi.|| ||

Atha kho āyasmato Ānandassa etad ahosi:|| ||

"Ko nu kho hetu||
ko paccayo||
Bhagavato sitassa pātu-kammāya?|| ||

Na akāraṇena Tathāgatā sitaɱ pātu-karontī" ti.|| ||

Atha kho āyasmā Ānando [215] Bhagavantaɱ etad avoca:|| ||

"Ko nu kho bhante hetu||
ko paccayo||
Bhagavato sitassa pātu-kammāya?|| ||

Na akāraṇena Tathāgatā sitaɱ pātu-karontī" ti.|| ||

2. Bhuta-pubbaɱ Ānanda imasmiɱ padese nagaraɱ ahosi iddhañ c'eva phītañ ca bahu-janaɱ ākiṇṇa-manussaɱ.|| ||

Taɱ kho pan'Ānanda, nagaraɱ Kassapo,||
Bhagavā,||
arahaɱ,||
Sammā-Sam-Buddhho,||
upanissāya vihāsi.|| ||

Kassapassa kho pan'Ānanda,||
Bhagavato,||
arahato,||
Sammā-Sam-Buddhhassa,||
Gavesī nāma upāsako ahosi sīlesu aparipūra-kārī.|| ||

Gavesinā kho Ānanda, upāsakena pañca-mattāni upāsaka-satāni paṭidesitāni samāda-pitāni ahesuɱ sīlesu aparipūra-kārino.|| ||

Atha kho Ānanda Gavesissa upāsakassa etad ahosi:|| ||

"Ahaɱ kho imesaɱ pañcannaɱ upāsaka-satānaɱ bah'ūpakāro pubbaŋ-gamo sam-ā-dapetā||
ahañ c'amhi sīlesu aparipūra-kārī||
imāni ca pañca upāsaka-satāni sīlesu aparipūra-kārino.|| ||

Icc'etaɱ samasamaɱ,||
n'atthi kiñci atirekaɱ.|| ||

Handāhaɱ atirekāyā" ti.|| ||

Atha kho Ānanda, Gavesī upāsako yena tāni pañca upāsaka-satāni ten'upasankami.|| ||

Upasaŋkamitvā tāni pañca upasakasatāni etad avoca:|| ||

"Ajja-t-agge maɱ āyasmanto sīlesu paripūra-kāriɱ dhārethā" ti.|| ||

Atha kho Ānanda,||
tesaɱ pañcannaɱ upāsaka-satānaɱ etad ahosi:|| ||

"Ayyo kho Gavesī amhākaɱ bah'ūpakāro pubbaŋ-gamo sam-ā-dapetā,||
ayyo hi nāma Gavesī sīlesu paripūra-kārī bhavissati||
kimaŋga pana mayan" ti.|| ||

Atha kho Ānanda,||
tāni pañca upāsaka-satāni yena Gavesī upāsako ten'upasankamiɱsu.|| ||

Upasaŋkamitvā Gavesiɱ upāsakaɱ etad avocuɱ:|| ||

"Ajja-t-agge ayyo Gavesī,||
imāni pañca upāsaka-satāni sīlesu paripūra-kārino dhāretu" ti.|| ||

Atha kho Ānanda,||
Gavesissa upāsakassa etad ahosi:|| ||

"Ahaɱ kho imesaɱ pañcannaɱ upāsaka-satānaɱ bah'ūpakāro pubbaŋ-gamo sam-ā-dapetā||
ahañ c'amhi sīlesu paripūra-kāri||
imāni ca pañca upāsaka-satāni sīlesu [216] paripūra-kārino.|| ||

Icc'etaɱ samasamaɱ,||
n'atthi kiñci atirekaɱ.|| ||

Handāhaɱ atirekāyā" ti.|| ||

Atha kho Ānanda Gavesī upāsako yena tāni pañca upāsaka-satāni ten'upasankami.|| ||

Upasaŋkamitvā tāni pañca upāsaka-satāni etad avoca:|| ||

"Ajja-t-agge maɱ ayasmanto brahma-cāriɱ dhāretha ārā-cārīɱ virataɱ methunā gāma-dhammā" ti.|| ||

Atha kho Ānanda,||
tesaɱ pañcannaɱ upāsaka-satānaɱ etad ahosi:|| ||

"Ayyo kho Gavesī amhākaɱ bah'ūpakāro pubbaŋ-gamo sam-ā-dapetā||
ayyo hi nāma Gavesī brahma-cāri bhavissati||
ārā-cārī virato methunā gāma-dhammā,||
kimaŋga pana na mayan" ti.|| ||

Atha kho Ānanda,||
tāni pañca upāsaka-satāni yena Gavesī upāsako ten'upasankamisuɱ.|| ||

Upasaŋkamitvā Gavesiɱ upāsakaɱ etad avocuɱ:|| ||

"Ajja-t-agge ayyo Gavesī||
imāni pi pañca upāsaka-satāni brahma-cārino dhāretu ārā-cārīno viratā methunā gāma-dhammā" ti.|| ||

Atha kho Ānanda,||
Gavesissa upāsakassa etad ahosi:|| ||

"Ahaɱ kho imesaɱ pañcannaɱ upāsaka-satānaɱ bah'ūpakāro pubbaŋgamo sam-ā-dapetā||
ahañ c'amhi sīlesu paripūra-kāri||
imāni ca pañca upāsaka-satāni sīlesu paripūra-kārino||
ahañ c'amhi brahma-cārī ārā-cārī virato methunā gāma dhammā||
imāni ca pañca upāsaka-satāni brahma-cārino ārā-cārīno viratā methunā gāma-dhmamā.|| ||

Icc'etaɱ samasamaɱ,||
n'atthi kiñci atirekaɱ.|| ||

Handāhaɱ atirekāyā' ti.|| ||

Atha kho Ānanda,||
Gavesī upāsako yena tāni pañca upāsaka-satāni ten'upasankami.|| ||

Upasaŋkamitvā tāni pañca upāsaka-satāni etad avoca:|| ||

"Ajja-t-agge maɱ āyasmanto eka-bhattikaɱ dhāretha ratt'ūparataɱ virataɱ vikāla-bhojanā' ti.|| ||

Atha kho Ānanda,||
tesaɱ pañcannaɱ upāsaka-satānaɱ etad ahosi:|| ||

"Ayyo kho Gavesī amhākaɱ bah'ūpakāro pubbaŋ-gamo sam-ā-dapetā||
ayyo hi nāma Gavesī eka-bhattiko bhavissati ratt'ūparato virato vikāla-bhojanā||
kimaŋga pana na mayaɱ" ti.|| ||

Atha kho Ānanda,||
tāni pañca upāsaka-satāni yena Gavesī upāsako ten'upasankamisuɱ.|| ||

Upasaŋkamitvā Gavesiɱ upāsakaɱ [217] etad avocuɱ:|| ||

"Ajja-t-agge ayyo Gavesī imāni pañca upāsaka-satāni eka-bhattike dhāretu ratt'ūparate virate vikāla-bhojanā" ti.|| ||

Atha kho Ānanda,||
Gavesissa upāsakassa etad ahosi:|| ||

"Ahaɱ kho imesaɱ pañcannaɱ upāsaka-satānaɱ bah'ūpakāro pubbaŋ-gamo sam-ā-dapetā||
ahañ c'amhi sīlesu paripūra-kārī,||
imāni pi pañca upāsaka-satāni sīlesu paripūra-kārino||
ahañ c'amhi brahma-cāri ārā-cārī virato methunā gāma-dhammā||
imāni pi pañca upāsaka-satāni brahma-cārino ārā-cārīno viratā methunā gāma-dhmamā,||
ahañ c'amhi eka-bhattiko ratt'ūparato virato vikāla-bhojanā,||
imāni pi pañca upāsaka-satāni eka-bhattikā ratt'ūparatā viratā vikāla-bhojanā.|| ||

Icc'etaɱ samasamaɱ,||
n'atthi kiñci atirekaɱ.|| ||

Handāhaɱ atirekāyā' ti.|| ||

Atha kho Ānanda,||
Gavesī upāsako yena Kassapo Bhagavā arahaɱ Sammā-Sam-Buddho ten'upasankami.|| ||

Upasaŋkamitvā Kassapaɱ Bhagavantaɱ arahantaɱ Sammā-Sam-Buddhaɱ etad avoca:|| ||

"Labheyyāhaɱ bhante, Bhagavato,||
santike pabbajjaɱ,||
labheyyaɱ upasampadaɱ" ti.|| ||

Alattha kho Ānanda,||
Gavesī upāsako Kassapassa||
Bhagavato||
arahato||
Sammā-Sam-Buddhassa||
santike pabbajjaɱ alattha upasampadaɱ.|| ||

Acir'ūpasampanno kho pan'Ānanda,||
Gavesī bhikkhū eko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaɱ pabbajanti,||
tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

"Khīṇā jāti,||
vusitaɱ Brahma-cariyaɱ,||
kataɱ karaṇiyaɱ,||
nāparaɱ itthattāyā" ti abbhaññāsi.|| ||

Aññataro ca pan'Ānanda,||
Gavesī bhikkhu arahataɱ ahosi.|| ||

Atha kho Ānanda,||
tesaɱ pañcannaɱ upāsaka-satānaɱ etad ahosi:|| ||

"Ayyo kho Gavesī amhākaɱ bah'ūpakāro pubbaŋ-gamo sam-ā-dapetā.|| ||

Ayyo hi nāma Gavesī kesa-massuɱ ohāretvā kāsāyāni vatthāni acchādetvā agārasmā anagāriyaɱ pabbajissati||
kimaŋga pana na mayaɱ" ti.|| ||

Atha kho Ānanda,||
tāni pañca upāsaka-satāni yena Kassapo||
Bhagavā||
arahaɱ||
Sammā-Sam-Buddho ten' [218] upasankamisuɱ.|| ||

Upasaŋkamitvā Kassapaɱ Bhagavantaɱ arahantaɱ||
Sammā-Sam-Buddhaɱ etad avocuɱ:|| ||

Labheyyāma mayaɱ bhante,||
Bhagavato santike pabbajjaɱ,||
labheyyāma upasampadaɱ" ti.|| ||

Alabhiɱsu kho Ānanda,||
tāni pañca upāsaka-satāni Kassapassa||
Bhagavato||
arahato||
Sammā-Sam-Buddhassa santike pabbajjaɱ,||
alabhiɱsu upasampadaɱ.|| ||

Atha kho Ānanda Gavesissa bhikkhuno etad ahosi:|| ||

"Ahaɱ kho imassa anuttarassa vimutti-sukhassa nikāma-lābhī akiccha-lābhī akasira-lābhī.|| ||

Aho vat'imāni pi pañca bhikkhu-satāni imassa anuttrassa vimutti-sukhassa nikāma-lābhino assu akiccha-lābhino akasira-lābhino' ti.|| ||

Atha kho Ānanda,||
tāni pañca bhikkhu-satāni vūpakaṭṭhā appamattā ātāpino pahit'attā viharantā na cirass'eva,||
yass'atthāya kula-puttā samma-d-eva agārasmā anagāriyaɱ pabbajanti,||
tad anuttaraɱ Brahma-cariya-pariyosānaɱ diṭṭhe'va dhamme sayaɱ abhiññā sacchi-katvā upasampajja vihariɱsu.|| ||

"Khiṇā jāti,||
vusitaɱ Brahma-cariyaɱ,||
kataɱ karaṇiyaɱ,||
nāparaɱ itthattāyā" ti abhaññiɱsu.|| ||

3. Iti kho Ānanda,||
tāni pañca bhikkhu-satāni Gavesī-pamukhāni uttar-uttariɱ paṇita-paṇitaɱ vāyamamānā anuttaraɱ vimuttiɱ sacchākaɱsu.|| ||

Tasmā ti ha Ānanda, evaɱ sikkhitabbaɱ:|| ||

'Uttar-uttariɱ paṇita-paṇitaɱ vāyamamānā anuttaraɱ vimuttiɱ sacchi-karissāmā' ti.|| ||

Evaɱ hi vo Ānanda, sikkhitabban ti.|| ||

Upāsaka Vagga Tatiyo


Contact:
E-mail
Copyright Statement