Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka-Nipāta
XIX. Arañña Vaggo

Sutta 181

Āraññaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[219]

[1][pts] Evaɱ me sutaɱ:|| ||

Ekaɱ samayaɱ Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Pañc'ime bhikkhave āraññakā.|| ||

Katame pañca?|| ||

2. Mandattā momūhattā āraññako hoti.|| ||

Pāpiccho icchā-pakato āraññako hoti.|| ||

Ummādā cittakkhepā āraññako hoti.|| ||

'Vaṇaṇitaɱ buddhehi Buddha-sāvakehi' ti araññako hoti.|| ||

Appicchataɱ yeva nissāya,||
santuṭṭhiɱ yeva nissāya,||
sallekhaɱ yeva nissāya,||
pavivekaɱ yeva nissāya,||
idam aṭṭhitaɱ yeva nissāya āraññako hoti.|| ||

Ime kho bhikkhave pañca āraññakā.|| ||

3. Imesaɱ kho bhikkhave pañcannaɱ āraññakānaɱ yvāyaɱ āraññako appicchataɱ yeva nissāya,||
santuṭṭhiɱ yeva nissāya,||
sallekhaɱ yeva nissāya,||
pavivekaɱ yeva nissāya,||
idam aṭṭhitaɱ yeva nissāya āraññako hoti,||
ayaɱ imesaɱ pañcannaɱ āraññakānaɱ aggo ca||
seṭṭho ca||
mokkho ca||
uttamo ca||
pavaro ca.|| ||

Seyyathā pi, bhikkhave, gavā khīraɱ,||
khīramhā dadhi,||
dadhimhā navanītaɱ,||
navanitamhā sappi,||
sappimhā sappi-maṇḍo tattha aggam akkhāyati;|| ||

evam eva kho bhikkhave imesaɱ pañcannaɱ āraññakānaɱ yvāyaɱ āraññako appicchataɱ yeva nissāya,||
santuṭṭhiɱ yeva nissāya,||
sallekhaɱ yeva nissāya,||
pavivekaɱ yeva nissāya,||
idam aṭṭhitaɱ yeva nissāya āraññako hoti,||
ayaɱ imesaɱ pañcannaɱ āraññakānaɱ aggo ca||
seṭṭho ca||
mokkho ca||
uttamo ca||
pavaro cā" ti.|| ||


Copyright Statement