Aŋguttara Nikāya
Pañcaka-Nipāta
XIX. Arañña Vaggo

Sutta 188

Ekā-Sanika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 

---

[220]

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Pañc'ime bhikkhave ekā-sanikā.|| ||

Katame pañca?|| ||

Mandattā momūhattā ekā-saniko hoti.|| ||

Pāpiccho icchā-pakato ekasaniko hoti.|| ||

Ummādā cittakkhepā ekasaniko hoti.|| ||

Vaṇṇitaɱ buddhehi Buddha-sāvakehiti ekā-saniko hoti,||
appicchataɱ yeva nissāya,||
santuṭṭhiɱ yeva nissāya,||
sallekhaɱ yeva nissāya,||
pavivekaɱ yeva nissāya,||
idam aṭṭhitaɱ yeva nissāya ekā-saniko hoti.|| ||

Ime kho bhikkhave pañca ekā-sanikā.|| ||

 

§

 

Imesaɱ kho bhikkhave pañcannaɱ ekā-sanikānaɱ yvāyaɱ ekā-saniko appicchataɱ yeva nissāya,||
santuṭṭhiɱ yeva nissāya,||
sallekhaɱ yeva nissāya,||
pavivekaɱ yeva nissāya,||
idam aṭṭhitaɱ yeva nissāya ekā-saniko hoti,||
ayaɱ imesaɱ pañcannaɱ ekā-sanikānaɱ aggo ca||
seṭṭho ca||
mokkho ca||
uttamo ca||
pavaro ca.|| ||

■

Seyyathā pi, bhikkhave, gavā khīraɱ,||
khīramhā dadhi,||
dadhimhā navanītaɱ,||
navanitamhā sappi,||
sappimhā sappi-maṇḍo tattha aggam akkhāyati,||
evam eva kho, bhikkhave,||
imesaɱ pañcannaɱ ekā-sanikānaɱ yvāyaɱ ekā-saniko appicchataɱ yeva nissāya,||
santuṭṭhiɱ yeva nissāya||
sallekhaɱ yeva nissāya,||
pavivekaɱ yeva nissāya,||
idam aṭṭhitaɱ yeva nissāya ekā-saniko hoti,||
ayaɱ imesaɱ pañcannaɱ ekā-sanikānaɱ aggo ca||
seṭṭho ca||
mokkho ca||
uttamo ca||
pavaro cā" ti.|| ||