Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka-Nipāta
XX. Brāhmaṇa Vagga

Sutta 192

Doṇa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[223]

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Atha kho Doṇo brahmaṇo yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

Eka-m-antaɱ nisinno kho Doṇo brāhmaṇo Bhagavantaɱ etad avoca:|| ||

2. "Sutaɱ me taɱ bho Gotama:|| ||

'Na Samaṇo Gotamo brāhmaṇe jiṇṇe vuddhe mahallake addhagate vayo-anuppatte abhivādeti vā paccuṭṭheti vā āsanena vā nimanteti' ti.|| ||

Tayidaɱ bho Gotama tath'eva,||
na hi bhavaɱ Gotamo brāhmaṇe jiṇṇe vuddhe mahallake addhagate vayo-anuppatte abhivādeti vā||
paccuṭṭheti vā||
āsanena vā nimantetī.|| ||

Tayidaɱ bho Gotama na sampannam evā" ti.|| ||

"Tvam pi no Doṇa, brāhmaṇo paṭijānāsī" ti?|| ||

"Yaɱ hi taɱ bho Gotama sammā vadamāno vadeyya:|| ||

'Brahmaṇo ubhato sujāto mātito ca pitito ca,||
saɱsuddha-gahaṇiko yāva sattamā pitā-mah'ayugā,||
akkhitto anupakkuṭṭho jāti-vādena,||
ajjhāyako manta-dharo,||
tiṇṇaɱ vedānaɱ pāragu sanighaṇḍukeṭubhānaɱ sākkhara-p-pabhe-dānaɱ itihā-sapañca-mānaɱ,||
padako veyyā-karaṇo,||
lokāyata mahā-purisa-lakkhaṇesu anavayo" ti|| ||

mam'eva taɱ bho Gotama sammā vadamāno vadeyya.|| ||

Ahaɱ hi bho Gotama brahmaṇo ubhato sujāto mātito ca pitito ca,||
saɱsuddha-gahaṇiko yāva sattamā pitā-mah'ayugā,||
akkhitto anupakkuṭṭho jāti-vādena,||
ajjhāyako manta-dharo,||
tiṇṇaɱ vedānaɱ pāragu sanighaṇḍukeṭubhānaɱ sākkhara-p-pabhe-dānaɱ itihā-sapañca-mānaɱ,||
padako veyyā-karaṇo,||
lokāyata mahā-purisa-lakkhaṇesu anavayo" ti.|| ||

"Ye kho te Doṇa, brahmaṇānaɱ pub- [224] bakā isayo||
mantānaɱ kattāro mantānaɱ pavattāro,||
yesañ c'idaɱ etarahi brahmaṇā porāṇaɱ manta-padaɱ gītaɱ pavuttaɱ samīhitaɱ tad anugāyanti,||
tad anubhāsanti,||
bhāsitam anubhāsanti,||
sajjhāyitam anusajjhāyanti,||
vācitam anuvācenti,||
seyyath'īdaɱ:||
Aṭṭako,||
Vāmako,||
Vāmadevo,||
Vessāmitto,||
Yamadaggi,||
Aŋgīraso,||
Bhāradvājo,||
Vāseṭṭho,||
Kassapo,||
Bhagu||
tyāssu me pañca brahmaṇe paññā-penti:||
brahmasamaɱ,||
devasamaɱ,||
mariyādaɱ,||
sambhinna-mariyādaɱ,||
brāhmaṇa caṇḍālaɱ yeva pañcamaɱ.|| ||

Tesaɱ tvaɱ Doṇa katamo" ti?|| ||

"Na kho mayaɱ bho Gotama,||
ime pañca brāhmaṇe jānāma||
atha kho mayaɱ brāhmaṇā tv'eva jānāma.|| ||

Sādhu me bhavaɱ Gotamo tathā dhammaɱ desetu,||
yathā ahaɱ ime pañca brāhmaṇe jāneyyan" ti.|| ||

"Tena hi brahmaṇa suṇāhi,||
sādhukaɱ mana-sikarohi,||
bhāsissāmī" ti.|| ||

"Evaɱ bho" ti kho Doṇo brahmaṇo Bhagavato pacca-s-sosi.|| ||

Bhagavā etad avoca:|| ||

 

§

 

3. "Kathañ ca Doṇa, brāhmaṇo brahmasamo hoti?|| ||

Idha Doṇa brahmaṇo ubhato sujāto mātito ca pitito ca,||
saɱsuddha-gahaṇiko yāva sattamā pitā-mah'ayugā,||
akkhitto anupakkuṭṭho jāti-vādena.|| ||

So aṭṭha-cattāḷīsa vassāni komāra-brahma-cariyaɱ carati mante adhīya-māno,||
aṭṭha-cattāḷīsa vassāni komāra-brahma-cariyaɱ caritvā mante adhīyitvā ācariyassa ācariya-dhanaɱ pariyesati dhammen'eva,||
no adhammena.|| ||

Tattha ca Doṇa ko dhammo?|| ||

[225] N'eva kasiyā,||
na vaṇijjāya,||
na gorakkhena,||
na issatthena||
na rājaporisena||
na sippañññatarena,||
kevalaɱ bhikkhācariyāya kapālaɱ anatimañña-māno.|| ||

So ācariyassa ācariya dhanaɱ niyyādetvā kesa-massuɱ ohāretvā kāsāyāni vatthāni acchādetvā agārasmā anagāriyaɱ pabbajati.|| ||

So evaɱ pabba-jito samāno mettā-saha-gatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthiɱ.|| ||

Iti uddham-adho tiriyaɱ sabbadhī sabbattatāya sabbā-vantaɱ lokaɱ mettā-saha-gatena cetasā vipulena mahaggatena appamāṇena averena avyāpajjhena pharitvā viharati.|| ||

Karuṇā-saha-gatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthiɱ.|| ||

Iti uddham-adho tiriyaɱ sabbadhī sabbattatāya sabbā-vantaɱ lokaɱ karuṇā-saha-gatena cetasā vipulena mahaggatena appamāṇena averena avyāpajjhena pharitvā viharati.|| ||

Muditā-saha-gatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthiɱ.|| ||

Iti uddham-adho tiriyaɱ sabbadhī sabbattatāya sabbā-vantaɱ lokaɱ muditā-saha-gatena cetasā vipulena mahaggatena appamāṇena averena avyāpajjhena pharitvā viharati.|| ||

Upekkhā-saha-gatena cetasā ekaɱ disaɱ pharitvā viharati,||
tathā dutiyaɱ,||
tathā tatiyaɱ,||
tathā catutthiɱ.|| ||

Iti uddham-adho tiriyaɱ sabbadhī sabbattatāya sabbā-vantaɱ lokaɱ upekkhā-saha-gatena cetasā vipulena mahaggatena appamāṇena averena avyāpajjhena pharitvā viharati.|| ||

So ime cattāro brahma-vihāre bhāvetvā kāyassa bhedā param maraṇā sugatiɱ Brahma-lokaɱ uppajjati.|| ||

Evaɱ kho Doṇa brāhmaṇo brahmasamo hoti.|| ||

4. Katañ ca Doṇa brāhmaṇo devasamo hoti?|| ||

Idha Doṇa brāhmaṇo ubhato sujāto mātito ca pitito ca,||
saɱsuddha-gahaṇiko yāva sattamā pitā-mah'ayugā,||
akkhitto anupakkuṭṭho jāti-vādena.|| ||

So aṭṭha-cattāḷīsa vassāni komāra-brahma-cariyaɱ carati mante adhīya-māno,||
aṭṭha-cattāḷīsa vassāni komāra-brahma-cariyaɱ caritvā mante adhīyitvā ācariyassa ācariya-dhanaɱ pariyesati dhammen'eva,||
no adhammena.|| ||

Tattha ca Doṇa ko dhammo?|| ||

N'eva kasiyā,||
na vaṇijjāya,||
na gorakkhena,||
na issatthena||
na rājaporisena||
na sippañññatarena,||
kevalaɱ bhikkhācariyāya [226] kapālaɱ anatimañña-māno.|| ||

So ācariyassa ācariya-dhanaɱ nīyādetvā dāraɱ pariyesati dhammen'eva no adhammena.|| ||

Tattha ca Doṇa ko dhammo?|| ||

N'eva kayena,||
na vikkayena,||
brāhmaṇiɱ yeva udakūpassaṭṭhaɱ.|| ||

So brāhmaṇiɱ yeva gacchati||
na khattiyiɱ,||
na vessiɱ,||
na suddiɱ,||
na caṇḍāliɱ,||
na nesādiɱ,||
na veṇiɱ,||
na rathakāriɱ,||
na pukkusiɱ gacchati,||
na gabbhiniɱ gacchati,||
na pāyamānaɱ gacchati,||
na anutuniɱ gacchati.|| ||

Kasmā ca Doṇa brāhmaṇo na gabbhiniɱ gacchati?|| ||

Sace Doṇa brāhmaṇo gabhiniɱ gacchati,||
atimīḷhajo nāma so hoti māṇavako vā māṇavikā vā,||
tasmā Doṇa brāhmaṇo na gabbhiniɱ gacchati.|| ||

Kasmā ca Doṇa brahmaṇo na pāyamānaɱ gacchati?|| ||

Sace Doṇa brāhmaṇo pāyamānaɱ gacchati,||
asuci-paṭipīto nāma so hoti māṇavako vā māṇavikā vā,||
tasmā Doṇa brāhmaṇo na pāyamānaɱ gacchati.|| ||

Kasmā ca Doṇa brāhmaṇo na anutuniɱ gacchati?|| ||

Sace Doṇa brāhmaṇo anutuniɱ gacchati,||
tassa sā hoti brāhmaṇī n'eva kāmatthā na davatthā na ratatthā,||
pajatthā'va brāhmaṇassa brāhmaṇī hoti.|| ||

So mithunaɱ uppādetvā kesa-massuɱ ohāretvā kāsāyāni vatthāni acchādetvā agārasmā anagāriyaɱ pabbajati.|| ||

So evaɱ pabba-jito samāno||
vivicc'eva kāmehi||
vivicca akusalehi dhammehi||
sa-vitakkaɱ sa-vicāraɱ||
viveka-jaɱ pīti-sukhaɱ||
paṭhamaɱ jhānaɱ upasampajja viharati,|| ||

Vitakka-vicārānam vūpasamā||
ajjhattaɱ sampasādanaɱ||
cetaso ekodi-bhāvaɱ||
avitakkaɱ avicāraɱ||
samādhi-jaɱ pīti-sukhaɱ||
dutiyaɱ jhānaɱ upasampajja viharati,|| ||

Pītiyā ca virāgā||
upekkhako ca viharati||
sato ca sampajāno||
sukhaɱ ca kāyena paṭisaɱvedeti||
yaɱ taɱ ariyā ācikkhanti||
'upekkhako satimā sukha-vihāri' ti||
tatiyaɱ jhānaɱ upasampajja viharati,|| ||

Sukhassa ca pahānā||
dukkhassa ca pahānā||
pubbe'va somanassa-domanassānaɱ atthaŋ-gamā||
adukkha-m-asukhaɱ upekkhā-sati-pārisuddhiɱ||
catutthaɱ jhānaɱ upasampajja viharati.|| ||

So ime cattāro jhāne bhāvetvā kāyassa [227] bhedā param maraṇā sugatiɱ saggaɱ lokaɱ uppajjati.|| ||

Evaɱ kho Doṇa brāhmaṇo devasamo hoti.|| ||

5. Kathañ ca Doṇa, brahmaṇo mariyādo hoti?|| ||

Idha Doṇa brāhmaṇo ubhato sujāto mātito ca pitito ca,||
saɱsuddha-gahaṇiko yāva sattamā pitā-mah'ayugā,||
akkhitto anupakkuṭṭho jāti-vādena.|| ||

So aṭṭha-cattāḷīsa-vassāni komāra-brahma-cariyaɱ carati mante adhīya-māno,||
aṭṭha-cattāḷīsa-vassāni komāra-brahma-cariyaɱ caritvā mante adhīyitvā ācariyassa ācariya-dhanaɱ pariyesati dhammen'eva,||
no adhammena.|| ||

Tattha ca Doṇa ko dhammo?|| ||

N'eva kasiyā,||
na vaṇijjāya,||
na gorakkhena,||
na issatthena||
na rājaporisena||
na sippañññatarena,||
kevalaɱ bhikkhācariyāya kapālaɱ anatimañña-māno.|| ||

So ācariyassa ācariya-dhanaɱ nīyādetvā dāraɱ pariyesati dhammen'eva no adhammena.|| ||

Tattha ca Doṇa ko dhammo?|| ||

N'eva kayena,||
na vikkayena,||
brāhmaṇiɱ yeva udakūpassaṭṭhaɱ.|| ||

So brāhmaṇiɱ yeva gacchati||
na khattiyiɱ,||
na vessiɱ,||
na suddiɱ,||
na caṇḍāliɱ,||
na nesādiɱ,||
na veṇiɱ,||
na rathakāriɱ,||
na pukkusiɱ gacchati,||
na gabbhiniɱ gacchati,||
na pāyamānaɱ gacchati,||
na anutuniɱ gacchati.|| ||

Kasmā ca Doṇa brāhmaṇo na gabbhiniɱ gacchati?|| ||

Sace Doṇa brāhmaṇo gabhiniɱ gacchati,||
atimīḷhajo nāma so hoti māṇavako vā māṇavikā vā,||
tasmā Doṇa brāhmaṇo na gabbhiniɱ gacchati.|| ||

Kasmā ca Doṇa brahmaṇo na pāyamānaɱ gacchati?|| ||

Sace Doṇa brāhmaṇo pāyamānaɱ gacchati,||
asuci-paṭipīto nāma so hoti māṇavako vā māṇavikā vā,||
tasmā Doṇa brāhmaṇo na pāyamānaɱ gacchati.|| ||

Kasmā ca Doṇa brāhmaṇo na anutuniɱ gacchati?|| ||

Sace Doṇa brāhmaṇo anutuniɱ gacchati,||
tassa sā hoti brāhmaṇī n'eva kāmatthā na davatthā na ratatthā,||
pajatthā'va brāhmaṇassa brāhmaṇī hoti.|| ||

So mithunaɱ uppādetvā tam eva puttassādaɱ nikāmaya-māno kuṭumbaɱ ajjhāvasati,||
na agārasmā anagāriyaɱ pabbajati.|| ||

Yāva porāṇānaɱ brahmaṇānaɱ mariyādā,||
tattha tiṭṭhati,||
taɱ na vītikkamati.|| ||

'Yāva porāṇānaɱ brāhmaṇānaɱ mariyādo tattha brāhmaṇo ṭhito taɱ na vītikkamatī' ti kho Doṇa,||
tasmā 'brāhmaṇo mariyādo' ti vuccati.|| ||

Evaɱ kho Doṇa brāhmaṇo mariyādo hoti.|| ||

6. Kathañ ca Doṇa, brāhmaṇo sambhinna-mariyādo hoti?|| ||

[228] Idha Doṇa brāhmaṇo ubhato sujāto mātito ca pitito ca,||
saɱsuddha-gahaṇiko yāva sattamā pitā-mah'ayugā,||
akkhitto anupakkuṭṭho jāti-vādena.|| ||

So aṭṭha-cattāḷīsa-vassāni komāra-brahma-cariyaɱ carati mante adhīya-māno,||
aṭṭha-cattāḷīsa-vassāni komāra-brahma-cariyaɱ caritvā mante adhīyitvā ācariyassa ācariya-dhanaɱ pariyesati,||
dhammen'eva no adhammena.|| ||

Tattha ca Doṇa ko dhammo?|| ||

N'eva kasiyā,||
na vaṇijjāya,||
na gorakkhena,||
na issatthena||
na rājaporisena||
na sippañññatarena,||
kevalaɱ bhikkhācariyāya kapālaɱ anatimañña-māno.|| ||

So ācariyassa ācariya-dhanaɱ nīyādetvā dāraɱ pariyesati||
dhammena pi||
adhammena pi||
kayena pi||
vikkayena pi||
brāhmaṇim pi udakūpassaṭṭhaɱ.|| ||

So brāhmaṇim pi gacchati,||
khattiyim pi gacchati,||
vessim pi gacchati,||
suddim pi gacchati,||
caṇḍālim pi gacchati,||
nesādim pi gacchati,||
veṇim pi gacchati,||
rathakārim pi gacchati,||
pukkusim pi gacchati,||
gabhinim pi gacchati,||
pāyamānam pi gacchati,||
utunim pi gacchati,||
anutunim pi gacchati.|| ||

Tassa sā hoti brāhmaṇi kāmatthā pi davatthā pi ratatthā pi,||
pajatthā pi brāhmaṇassa brāhmaṇī hoti.|| ||

Yāva porāṇānaɱ brahmaṇānaɱ mariyādā,||
tattha na tiṭṭhati,||
taɱ vītikkamati.|| ||

'Yāva porāṇānaɱ brāhmaṇānaɱ mariyādā,||
tattha brāhmaṇo na ṭhito taɱ vītikkamatī' ti kho Doṇa,||
tasmā "brāhmaṇo sambhinna-mariyādo" ti vuccati.|| ||

Evaɱ kho Doṇa brahmaṇo sambhinna-mariyādo hoti.|| ||

7. Kathañ ca Doṇa, brāhmaṇo brāhmaṇa-caṇḍālo hoti?|| ||

Idha Doṇa brāhmaṇo ubhato sujāto mātito ca pitito ca,||
saɱsuddha-gahaṇiko yāva sattamā pitā-mah'ayugā,||
akkhitto anupakkuṭṭho jāti-vādena.|| ||

So aṭṭha-cattāḷīsa vas- [229] sāni koMāraɱ brahma-cariyaɱ carati mante adhīya-māno,||
aṭṭha-cattāḷīsa-vassāni koMāraɱ brahma-cariyaɱ caritvā mante adhīyitvā ācariyassa ācariya-dhanaɱ pariyesati||
dhammena pi||
adhammena pi||
kasiyā pi||
vaṇijjāya pi||
gorakkhena pi||
issatthena pi||
rājaporisena pi||
sippaññatarena pi||
kevalam pi||
bhikkhācariyāya kapālaɱ anatimañña-māno.|| ||

So ācariyassa ācariya-dhanaɱ nīyādetvā dāraɱ pariyesati||
dhammena pi||
adhammena pi||
kayena pi||
vikkayena pi||
udakupassaṭṭhaɱ.|| ||

So brāhmaṇim pi gacchati,||
khattiyim pi gacchati,||
vessim pi gacchati,||
suddim pi gacchati,||
caṇḍālim pi gacchati,||
nesādim pi gacchati,||
veṇim pi gacchati||
rathakārim pi gacchati,||
pukkusim pi gacchati,||
gabhinim pi gacchati,||
pāyamānam pi gacchati,||
utunim pi gacchati,||
anutunim pi gacchati.|| ||

Tassa sā hoti brāhmaṇī||
kāmatthā pi,||
davatthā pi,||
ratatthā pi,||
pajatthā pi,||
brāhmaṇassa brāhmaṇī hoti.|| ||

So sabba-kammehi jīvikaɱ kappeti.|| ||

Tam enaɱ brāhmaṇā evam āhaɱsu:|| ||

'Kasmā bhavaɱ brāhmaṇo paṭijānamāno sabba-kammehi jīvikaɱ kappeti' ti?|| ||

So evam āha:|| ||

'Seyyathā pi bho aggi sucim pi dahati,||
asucim pi dahati||
na ca tena aggi upalippati,||
evam eva kho bho sabba-kammehi ce pi brāhmaṇo jīvikaɱ kappeti,||
na ca tena brāhmaṇo upalippa' ti.|| ||

'Sabbakammehi jīvikaɱ kappetī' ti kho Doṇa,||
tasmā brāhmaṇo 'brāhmaṇa-caṇḍālo' ti vuccati.|| ||

Evaɱ kho Doṇa brāhmaṇo brāhmaṇa-caṇḍālo hoti.|| ||

8. Ye kho Doṇa brāhmaṇānaɱ pubbakā isayo||
mantānaɱ kattāro mantānaɱ pavattāro,||
yesañ c'idaɱ etarahi brahmaṇā porāṇaɱ manta-padaɱ gītaɱ pavuttaɱ samīhitaɱ tad anugāyanti,||
tad anubhāsanti,||
bhāsitam anubhāsanti,||
sajjhāyitam anusajjhāyanti,||
vācitam anuvācenti,||
seyyath'īdaɱ:||
Aṭṭako,||
Vāmako,||
Vāmadevo,||
Vessāmitto,||
Yamadaggi,||
Aŋgīraso,||
Bhāradvājo,||
Vā- [230] seṭṭho,||
Kassapo,||
Bhagu||
tyāssu me pañca brahmaṇe paññā-penti:||
brahmasamaɱ,||
devasamaɱ,||
mariyādaɱ,||
sambhinna-mariyādaɱ,||
brāhmaṇa caṇḍālaɱ yeva pañcamaɱ.|| ||

Tesaɱ tvaɱ Doṇa katamo" ti?|| ||

"Evaɱ sante mayaɱ bho Gotama brāhmaṇa-caṇḍālam pi na purema.|| ||

Abhikkantaɱ bho Gotama||
abhikkantaɱ bho Gotama,||
seyyathā pi bho Gotama nikkujjitaɱ vā ukkujjeyya,||
paṭi-c-channaɱ vā vivareyya,||
mūḷhassa vā Maggaɱ ācikkheyya,||
tela pajjotaɱ vā dhāreyya,||
'cakkhu-manto rūpāni dakkhintī' ti.|| ||

Evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi Dhammañ ca bhikkhu-Saŋghañ ca:||
upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatanti.|| ||


Copyright Statement