Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka-Nipāta
XX. Brāhmaṇa Vagga

Sutta 194

Kāraṇapāli Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[236]

[1][pts] Evaɱ me sutaɱ:|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgāra-sālāyaɱ.|| ||

Tena kho pana samayena Kāraṇapālī brāhmaṇo Licchavīnaɱ kammantaɱ kāreti.|| ||

Addasā kho Kāraṇāpālī brāhmaṇo Piŋgiyāniɱ brāhmaṇaɱ dūrato [237] va āga-c-chantaɱ,||
disvā Piŋgiyāniɱ brāhmaṇaɱ etad avoca:|| ||

"Handa kuto nu bhavaɱ Piŋgiyānī āga-c-chati divādivassā" ti.|| ||

"Ito'haɱ bho āgacchāmi,||
samaṇassa Gotamassa santikā" ti.|| ||

"Taɱ kiɱ maññati bhavaɱ Piŋgiyānī samaṇassa Gotamassa paññāveyyattiyaɱ,||
paṇḍito maññe" ti?|| ||

"Ko c'āhaɱ bho,||
ko ca samaṇassa Gotamassa paññāveyyattiyaɱ jānissāmi?|| ||

So pi nūn'assa tādiso'va,||
yo samaṇassa Gotamassa paññāveyyattiyaɱ jāneyyā" ti.|| ||

"Uḷārāya khalu bhavaɱ Piŋgiyānī samaṇaɱ Gotamaɱ pasaɱsāya pasaɱsatī" ti.|| ||

"Ko c'āhaɱ bho,||
ko ca samaṇaɱ Gotamaɱ pasaɱsissāmi?|| ||

Pasattha-pasattho'va so bhavaɱ Gotamo seṭṭho deva-manussānan" ti.|| ||

"Kiɱ pana bhavaɱ Piŋgiyānī attha-vasaɱ sampassamāno samaṇe Gotame evaɱ abhi-p-pasanno" ti?|| ||

"Seyyathā pi bho puriso aggarasaparititto na aññesaɱ hīnānaɱ rasānaɱ piheti,||
evam eva kho bho,||
yato yato tassa bhoto Gotamassa dhammaɱ suṇāti,||
yadi suttaso,||
yadi geyyaso,||
yadi veyyā-karaṇaso,||
yadi abbhuta-dhammaso,||
tato tato na aññesaɱ puthusamaṇa-brāhmaṇa-ppavādānaɱ piheti.|| ||

Seyyathā pi bho puriso jighacchādubbalyapareto madhupiṇḍikaɱ adhigaccheyya,||
so yato yato sāyetha,||
labhat'eva sādhu rasaɱ asecanakaɱ,||
evam eva kho bho,||
yato yato tassa bhoto Gotamassa dhammaɱ suṇāti,||
yadi suttaso,||
yadi geyyaso,||
yadi veyyā-karaṇaso,||
yadi abbhuta-dhammaso,||
tato tato labhat'eva atta-manataɱ,||
labhati cetaso pasādaɱ.|| ||

Seyyathā pi bho puriso candanaghaṭikaɱ adhigaccheyya haricandanassa vā lohita-candanassa vā,||
so yato yato ghāyetha,||
yadi mūlato.||
yadi majjhato,||
yadi aggato,||
adhigac [238] chateva surabhigandhaɱ asecanakaɱ,||
evam eva kho bho,||
yato yato tassa bhoto Gotamassa dhammaɱ suṇāti,||
yadi suttaso,||
yadi geyyaso,||
yadi veyyā-karaṇaso,||
yadi abbhuta-dhammaso,||
tato tato adhigacchati pāmojjaɱ,||
adhigacchati somanassaɱ.|| ||

Seyyathā pi bho puriso ābādhiko dukkhito bāḷha-gilāno,||
tassa kusalo bhisakko ṭhānaso ābādhaɱ nīhareyya,||
evam eva kho bho,||
yato yato tassa bhoto Gotamassa dhammaɱ suṇāti,||
yadi suttaso,||
yadi geyyaso,||
yadi veyyā-karaṇaso,||
yadi abbhuta-dhammaso,||
tato tato soka-parideva-dukkha-domanass'upāyāsā abbhatthaɱ gacchanti.|| ||

Seyyathā pi bho pokkharaṇi acchodakā||
sātodakā||
sītodakā||
setodakā||
supatitthā ramaṇīyā,||
atha puriso āgaccheyya ghamm-ā-bhitatto ghamma-pareto kilanto tasito pipāsito,||
so taɱ pokkharaṇaɱ ogāhetvā nahātvā ca pītvā ca sabba-daratha-kilamatha-pariḷāhaɱ paṭippassambheyya,||
evam eva kho bho,||
yato yato tassa bhoto Gotamassa dhammaɱ suṇāti,||
yadi suttaso,||
yadi geyyaso,||
yadi veyyā-karaṇaso,||
yadi abbhuta-dhammaso,||
tato tato sabba-daratha-kilamatha-pariḷāhā paṭippassambhantī" ti.|| ||

2. Evaɱ vutte Kāraṇapālī brāhmaṇo uṭṭhāy āsanā ekaɱsaɱ uttarā-saŋgaɱ karitvā dakkhiṇajāṇumaṇḍalaɱ paṭhaviyaɱ nihantvā yena Bhagavā ten'añjaliɱ paṇāmetvā ti-k-khattuɱ udānaɱ udānesi:|| ||

"Namo tassa Bhagavato arahato Sammā-Sam-Buddhassa.|| ||

Namo tassa Bhagavato arahato Sammā-Sam-Buddhassa.|| ||

Namo tassa Bhagavato arahato Sammā-Sam-Buddhassā.|| ||

Abhikkantaɱ bho Piŋgiyānī, abhikkantaɱ bho Piŋgiyānī.|| ||

Seyyathā pi bho Piŋgiyānī,||
nikkujjitaɱ vā ukkujjeyya,||
paṭi-c-channaɱ vā vivareyya,||
mūlhassa vā Maggaɱ ācikkheyya,||
[239] andha-kāre vā tela-pajjotaɱ dhāreyya||
'cakkhu-manto rūpāni dakkhintī' ti,||
evam evaɱ bhotā Piŋgiyāninā aneka-pariyāyena dhammo pakāsito.|| ||

Es'āhaɱ bho Piŋgiyānī taɱ bhavantaɱ Gotamaɱ saraṇaɱ gacchāmi,||
dhammaɱ ca||
bhikkhusaɱghañ ca.|| ||

Upāsakaɱ maɱ bhavaɱ Piŋgiyānī dhāretu ajja-t-agge pāṇupetaɱ saraṇaɱ gatan" ti.|| ||


Contact:
E-mail
Copyright Statement