Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Pañcaka-Nipāta
XX. Brāhmaṇa Vagga

Sutta 196

Mahā-Supina Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[240]

[1][pts][than] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Tathāgatassa bhikkhave, arahato Sammā-Sam-Buddhassa||
pubb'eva sambodhā anabhi-sambuddhassa bodhisattass'eva sato||
pañca mahā-supinā pātu-r-ahesuɱ.|| ||

Katame pañca?|| ||

2. Tathāgatassa bhikkhave, arahato Sammā-Sam-Buddhassa||
pubb'eva sambodhā anabhi-sambuddhassa bodhisattass'eva sato||
ayaɱ mahā-paṭhavi mahā-sayanaɱ ahosi,||
Himavā pabba-tarājā bimbohanaɱ ahosi,||
puratthime samudde vāmo hattho ohito ahosi,||
pacchime samudde dakkhiṇo hattho ohito ahosi,||
dakkhiṇe samudde ubho pādā ohitā ahesuɱ.|| ||

Tathāgatassa bhikkhave arahato Sammā-Sam-Buddhassa||
pubb'eva sambodhā anabhi-sambuddhassa bodhīsattass'eva sato||
ayaɱ paṭhamo mahā-supino pātu-r-ahosi.|| ||

3. Puna ca paraɱ bhikkhave Tathāgatassa arahato Sammā-Sam-Buddhassa||
pubb'eva sambodhā anabhi-sambuddhassa bodhisattass'eva sato||
tiriyā nāma tiṇajāti nābhiyā uggantvā nabhaɱ āhacca ṭhitā ahosi.|| ||

Tathāgatassa [241] bhikkhave, arahato Sammā-Sam-Buddhassa||
pubb'eva sambodhā anabhi-sambuddhassa bodhisattass'eva sato||
ayaɱ dutiyo mahā-supino pātu-r-ahosi.|| ||

4. Puna ca paraɱ bhikkhave Tathāgatassa arahato Sammā-Sam-Buddhassa||
pubb'eva sambodhā anabhi-sambuddhassa bodhisattass'eva sato||
setā kimī kaṇhasīsā pādehi ussakkitvā yāva jāṇumaṇḍalaɱ paṭicchādesuɱ.|| ||

Tathāgatassa bhikkhave, arahato Sammā-Sam-Buddhassa||
pubb'eva sambodhā anabhi-sambuddhassa bodhisattass'eva sato||
ayaɱ tatiyo mahā-supino pātu-r-ahosi.|| ||

5. Puna ca paraɱ bhikkhave Tathāgatassa arahato Sammā-Sam-Buddhassa||
pubb'eva sambodhā anabhi-sambuddhassa bodhisattass'eva sato||
cattāro sakuṇā nānā-vaṇṇā catūhi disāhi āgantvā pāda-mūle nipatitvā sabba-setā sampajjiɱsu.|| ||

Tathāgatassa bhikkhave, arahato Sammā-Sam-Buddhassa||
pubb'eva sambodhā anabhi-sambuddhassa bodhisattass'eva sato||
ayaɱ catuttho mahā-supino pātu-r-ahosi.|| ||

6. Puna ca paraɱ bhikkhave Tathāgatassa arahaɱ Sammā-Sam-Buddhassa||
pubb'eva sambodhā anabhi-sambuddho bodhisatto'va||
samāno mahato mīḷha-pabbatassa uparūpari caŋkamati alippamāno mīḷhena.|| ||

Tathāgatassa bhikkhave, arahato Sammā-Sam-Buddhassa||
pubb'eva sambodhā anabhi-sambuddhassa bodhisattass'eva sato||
ayaɱ pañcamo mahā-supino pātu-r-ahosi.|| ||


7. Yam pi bhikkhave, Tathāgatassa arahato Sammā-Sam-Buddhassa||
pubb'eva sambodhā anabhi-sambuddhassa bodhisattass'eva sato||
ayaɱ mahā-paṭhavī mahā-sayanaɱ ahosi,||
Himavā pabba-tarājā bimbohanaɱ ahosi,||
puratthime samudde vāmo hattho ohito ahosi,||
pacchime samudde dakkhiṇo hattho ohito ahosi,||
dakkhiṇe samudde ubho pādā ohitā ahesuɱ,||
Tathāgatena bhikkhave, arahatā Sammā-Sam-Buddhena||
anuttarā sammā-sambodhi abhisambuddhā.|| ||

Tassā abhisambodhāya ayaɱ paṭhamo mahā-supino pātu-r-ahosi.|| ||

[242] 8. Yam pi bhikkhave, Tathāgatassa arahato Sammā-Sam-Buddhassa||
pubb'eva sambodhā anabhi-sambuddhassa bodhisattass'eva sato||
tiriyā nāma tiṇa jāti nābhiyā uggantvā nabhaɱ āhacca ṭhitā ahosi,||
Tathāgatena bhikkhave, arahatā Sammā-SamBuddhena||
Ariyo Aṭṭhaŋgiko Maggo abhisambujjhitvā yāva-d-eva-manussehi suppakāsito.|| ||

Tassā abhisambodhāya ayaɱ dutiyo mahā-supino pātu-r-ahosi.|| ||

9. Yam pi bhikkhave, Tathāgatassa arahato Sammā-Sam-Buddhassa||
pubb'eva sambodhā anabhi-sambuddhassa bodhisattass'eva sato||
setā kimī kaṇhasīsā pādehi ussakkitvā yāva jāṇu-maṇḍalā paṭicchādesuɱ,||
bahū bhikkhave,||
gihī odāta-vasanā Tathāgataɱ pāṇupetaɱ saraṇaɱ gatā.|| ||

Tassā abhisambodhāya ayaɱ tatiyo mahā-supino pātu-r-ahosi.|| ||

10. Yam pi bhikkhave, Tathāgatassa arahato Sammā-Sam-Buddhassa||
pubb'eva sambodhā anabhi-sambuddhassa bodhisattass'eva sato||
cattaro sakuṇā nānā-vaṇṇā catūhi disāhi āgantvā pāda-mūle nipatitvā sabba-setā sampajjiɱsu,||
cattaro'me bhikkhave, vaṇṇā:||
khattiyā,||
brāhmaṇā,||
vessā,||
suddā,||
te Tathāgata-p-pavedite Dhamma-Vinaye agārasmā anagāriyaɱ pabba-jitvā anuttaraɱ vimuttiɱ sacchi-karonti.|| ||

Tassā abhisambodhāya ayaɱ catuttho mahā-supino pātu-r-ahosi.|| ||

11. Yam pi bhikkhave, Tathāgato arahaɱ Sammā-Sam-Buddho||
pubb'eva sambodhā anabhi-sambuddho bodhisatto'va||
samāno mahato mīḷha-pabbatassa uparūpari caŋka-mati alippamāno mīḷhena,||
lābhi bhikkhave, Tathāgato||
civara-piṇḍa-pāta-sen'āsana-gilāna-paccaya-bhesajja-parikkhārānaɱ,||
tattha ca Tathāgato agadhito amucchito anajjhopanno ādīnava-dassāvī nissaraṇa-pañño paribhuñjati.|| ||

Tassā abhisambodhāya ayaɱ pañcamo mahā supino pātu-r-ahosi.|| ||

Tathāgatassa bhikkhave arahato Sammā-Sam-Buddhassa||
pubb'eva sambodhā anabhi-sambuddhassa bodhisattass'eva sato||
ime pañca mahā supinā pāturahesun" ti.|| ||


Contact:
E-mail
Copyright Statement