Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara-Nikāya
Pañcaka-Nipāta
23. Dīgha-Cārika Vagga

Sutta 221

Paṭhama Dīgha-Cārika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[257]

[1][pts] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.

Bhagavā etad avoca:|| ||

"Pañc'ime bhīkkhave ādīnavā dīgha-cārikaɱ anavattha cārikaɱ anuyuttassa viharato.|| ||

Katame pañca?|| ||

Assutaɱ na suṇāti,||
sutaɱ na pariyodapeti,||
suten'eka-c-cena avisārado hoti,||
gāḷhaɱ rog'ātaŋkaɱ phusati,||
na ca mittavā hoti.|| ||

Ime kho bhikkhave pañca ādīnavā dīgha-cārikaɱ anavattha cārikaɱ anuyuttassa viharato.|| ||

 

§

 

Pañc'ime bhikkhave ānisaŋsā samavattha-cāre.|| ||

Katame pañca?|| ||

Assutaɱ suṇāti,||
sutaɱ pariyodapeti,||
suten'eka-c-cena visārado hoti,||
na gāḷhaɱ rog'ātaŋkaɱ phusati,||
mittavā ca hoti.|| ||

Ime kho bhikkhave pañca ānisaŋsā samavattha-cāre" ti.|| ||


Copyright Statement