Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Chakka-Nipāta
II: Sārāṇīya-Vagga

Sutta 16

Nakula-Pitu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[295]

[1][pts][than] Evaɱ me sutaɱ:|| ||

Ekaɱ samayaɱ Bhagavā Bhaggesu viharati Suɱsumāragire Bhesakalāvane Migadāye.|| ||

Tena kho pana samayena Nakula-pitā gahapati ābādhiko hoti dukkhito bāḷha-gilāno.|| ||

Atha kho Nakula-mātā gahapatānī Nakula-pitaraɱ gahapatiɱ etad avoca:|| ||

2. Mā kho tvaɱ gahapati sāpekkho kālam akāsi.|| ||

Dukkhā gahapati sāpekkhassa kāla-kiriyā.|| ||

Garahitā ca Bhagavatā sāpekkhassa kāla-kiriyā.|| ||

3. Siyā kho pana te gahapati evam assa:|| ||

"Nakula-mātā gahapatāni mam'accayena na sakkhoti dārake posetuɱ gharāvāsaɱ sattharitun" ti.|| ||

Na kho pan'etaɱ gahapati evaɱ daṭṭhabbaɱ.|| ||

Kusalā'haɱ gahapati kappāsaɱ kantituɱ,||
veṇiɱ olikhituɱ,||
Sakkom'ahaɱ gahapati tav'accayena dārake posetuɱ gha- [296] rāvāsaɱ santharituɱ.|| ||

Tasmā ti ha tvaɱ gahapati mā sāpekkho kālam akāsi.|| ||

Dukkhā gahapati sāpekkhassa kāla-kiriyā.|| ||

Garahitā ca Bhagavatā sāpekkhassa kāla-kiriyā.|| ||

4. Siyā kho pana te gahapati evam assa:|| ||

"Nakula-mātā gahapatānī mam'accayena aññaɱ varaɱ gamissatī" ti.|| ||

Na kho pan'etaɱ gahapati evaɱ daṭṭhabbaɱ.|| ||

Tvaɱ c'eva kho gahapati jānāsi, ahaɱ ca,||
yathā no soḷasa-vassāni gahaṭṭhakaɱ Brahma-cariyaɱ samāciṇṇaɱ.|| ||

Tasmā ti ha tvaɱ gahapati mā sāpekkho kālam akāsi.|| ||

Dukkhā gahapati sāpekkhassa kāla-kiriyā.|| ||

Garahitā ca Bhagavatā sāpekkhassa kāla-kiriyā.|| ||

5. Siyā kho pana te gahapati evam assa:|| ||

"Nakula-mātā gahapatānī mam'accayena na dassana-kāmā bhavissati Bhagavato,||
na dassana-kāmā bhikkhu-Saŋghassā" ti.|| ||

Na kho pan'etaɱ gahapati evaɱ daṭṭhabbaɱ.|| ||

Ahaɱ hi gahapati tav'accayena dassana-kāmatarā c'eva bhavissāmi Bhagavato,||
dassana-kāmatarā ca bhikkhu-Saŋghassa.|| ||

Tasmā ti ha tavaɱ gahapati mā sāpekkho kālam akāsi.|| ||

Dukkhā gahapati sāpekkhassa kāla-kiriyā.|| ||

Garahitā ca Bhagavatā sāpekkhassa kāla-kiriyā.|| ||

6. Siyā kho pana te gahapati evam assa:|| ||

"Nakula-mātā gahapatānī mam'accayena na sīlesu paripūra-kāriṇī" ti.|| ||

Na kho pan'etaɱ gahapati evaɱ daṭṭhabbaɱ.|| ||

Yāvatā kho gahapati tassa Bhagavato sāvikā gihī odāta-vasanā sīlesu paripūra-kāriṇiyo,||
ahaɱ tāsaɱ aññatarā.|| ||

Yassa kho pan'assa kaŋkhā vā vimati vā,||
ayaɱ so Bhagavā arahaɱ Sammā-SamBuddho Bhaggesu viharati Suɱsumāragire Bhesakalāvane Migadāye,||
taɱ Bhagavantaɱ upasankamitvā pucchatu.|| ||

Tasmā ti ha tvaɱ gahapati mā sāpekkho [297] kālam akāsi.|| ||

Dukkhā gahapati sāpekkhassa kāla-kiriyā.|| ||

Garahitā ca Bhagavatā sāpekkhassa kāla-kiriyā.|| ||

7. Siyā kho pana te gahapati evam assa:|| ||

"Nakula-mātā gahapatānī na lābhinī ajjhattaɱ ceto-samathassā" ti.|| ||

Na kho pan'etaɱ gahapati evaɱ daṭaṭhababaɱ.|| ||

Yāvatā kho gahapati tassa Bhagavato sāvikā gihī odāta-vasanā lābhiniyo ajjhattaɱ ceto-samathassa,||
ahaɱ tāsaɱ aññatarā.|| ||

Yassa kho pan'assa kaŋkhā vā vimati vā,||
ayaɱ so Bhagavā arahaɱ Sammā-SamBuddho Bhaggesu viharati Suɱsumāragire Bhesakalāvane Migadāye,
taɱ Bhagavantaɱ upasankamitvā pucchatu.|| ||

Tasmā ti ha tvaɱ gahapati mā sāpekkho kālam akāsi.|| ||

Dukkhā gahapati sāpekkhassa kāla-kiriyā.|| ||

Garahitā ca Bhagavatā sāpekkhassa kāla-kiriyā.|| ||

8. Siyā kho pana te gahapati evam assa:|| ||

"Nakula-mātā gahapatānī na imasmiɱ Dhamma-Vinaye ogādhappattā patigādha-p-pattā assāsappattā tiṇṇa-vicikicchā vigata-kathaɱ-kathā vesārajja-p-pattā apara-p-paccayā Satthu sāsane viharatī" ti.|| ||

Na kho pan'etaɱ gahapati evaɱ daṭṭhabbaɱ.|| ||

Yāvatā kho gahapati tassa Bhagavato sāvikā gihī odāta-vasanā imasmiɱ Dhamma-Vinaye ogādhappattā patigādha-p-pattā assāsappattā tiṇṇa-vicikicchā vigata-kathaɱkatā vesārajja-p-pattā apara-p-paccayā Satthu sāsane viharanti,||
ahaɱ tāsaɱ aññatarā.|| ||

Yassa kho pan'assa kaŋkhā vā, vimati vā,||
ayaɱ so Bhagavā arahaɱ Sammā-SamBuddho Bhaggesu viharati Suɱsumāragire Bhesakalāvane Migadāye.|| ||

Taɱ Bhagavantaɱ upasankamitvā pucchatu.|| ||

Tasmā ti ha tvaɱ gahapati mā sāpekkho kālam akāsi.|| ||

Dukkhā gahapati sāpekkhassa kāla-kiriyā.|| ||

Garahitā ca Bhagavatā sāpekkhassa kāla-kiriyāti.|| ||

 

§

 

9. Atha kho Nakula-pituno gahapatissa Nakula-mā- [298] tāra gahapatāniyā iminā ovādena ovadiya-mānassa so ābādho ṭhānaso paṭippassamhī,||
vuṭṭhāhi ca Nakula-pitā gahapati tamhā ābādhā.

Tathā pahīno ca pana Nakula-pituno gahapatissa so ābādho ahosi.|| ||

Atha kho Nakula-pitā gahapati gilānā vuṭṭhito acira-vuṭṭhito gelaññā,||
daṇḍam olubbha yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho Nakula-pitaraɱ gahapatiɱ Bhagavā etad avoca:|| ||

10. Lābhā te gahapati,||
su-laddhaɱ te gahapati,||
yassa te Nakula-mātā gahapatānī anukampikā attha-kāmā ovādikā anusāsikā;|| ||

yāvatā kho gahapati mama sāvikā gihī odāta-vasanā sīlesu paripūra-kāriṇiyo,||
Nakula-mātā gahapatānī tāsaɱ aññatarā;|| ||

yāvatā kho gahapati mama sāvikā gihī odāta-vasanā lābhiniyo ajjhattaɱ ceto-samathassa,||
Nakula-mātā gahapatāni tāsaɱ aññatarā;|| ||

yāvatā kho gahapati mama sāvikā gihī odāta-vasanā imasmiɱ Dhamma-Vinaye ogādhappattā patigādha-p-pattā assāsappattā||
tiṇṇa-vicikicchā vigata-kathaɱ-kathā vesārajja-p-pattā apara-p-paccayā Satthu sāsane viharantiyo,||
Nakula-mātā gahapatānī tāsaɱ aññatarā.|| ||

Lābhā te gahapati,||
su-laddhaɱ te gahapati,||
yassa te Nakula-mātā gahapatāni anukampikā attha-kāmā ovādikā anusāsikā" ti.|| ||

 


Contact:
E-mail
Copyright Statement