Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Chakka-Nipāta
III: Anuttariya-Vagga

Sutta 26

Mahā Kaccāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[314]

[1][pts] Evaɱ me sutaɱ:|| ||

Ekaɱ samayaɱ āyasmā Mahā Kaccāno Sāvatthiyaɱ viharati.|| ||

Tatra kho āyasmā Mahā Kaccāno bhikkhu āmantesi:|| ||

"Āvuso bhikkhavo" ti.|| ||

"Āvuso" ti te bhikkhū Bhagavato paccassosuɱ.|| ||

Āyasmā Mahā Kaccāno etad avoca:|| ||

2. "Acchariyaɱ āvuso||
abbhūtaɱ āvuso||
yāvañ c'idaɱ tena Bhagavatā jānatā passatā arahatā Sammā-SamBuddhena sambādhe okās'ādhigamo anu-Buddho sattānaɱ visuddhiyā soka-pari-d-davānaɱ samati-k-kamāya dukkha-domanassānaɱ atthaŋ-gamāya ñāyassa adhigamāya,||
Nibbānassa sacchi-kiriyāya,||
yad idaɱ cha anussati-ṭ-ṭhānāni.|| ||

Katamāni cha?|| ||

3. Idh'āvuso ariya-sāvako Tathāgataɱ anussarati:|| ||

'Iti pi so Bhagavā arahaɱ Sammā-Sam-Buddho vijjā-caraṇa-sampanno Sugato loka-vidū anuttaro purisa-damma-sārathi Satthā deva-manussānaɱ Buddho Bhagavā' ti.|| ||

Yasmiɱ āvuso samaye ariya-sāvako Tathāgataɱ anussarati,||
nev'assa tasmiɱ samaye rāga-pariyuṭṭhitaɱ cittaɱ hoti,||
na dosa-pariyuṭṭhitaɱ cittaɱ hoti,||
na [315] moha-pariyuṭṭhitaɱ cittaɱ hoti,||
ujugatam ev'assa tasmiɱ samaye cittaɱ hoti,||
nikkhantaɱ muttaɱ vuṭṭhitaɱ gedhamhā,||
gedho ti kho āvuso pañcann'etaɱ kāma-guṇānaɱ adhivacanaɱ.|| ||

Sa kho so āvuso ariya-sāvako sabbaso ākāsasamena cetasā viharati,
vipulena mahaggatena appamāṇena averena avyāpajjhena.|| ||

Idam pi kho āvuso ārammaṇaɱ karitvā evam idh'ekacce sattā visuddhi-dhammā bhavanti.|| ||

4. Puna ca paraɱ bhikkhave ariya-sāvako dhammaɱ anussarati:|| ||

'Svākkhāto Bhagavatā dhammo sandiṭṭhiko akāliko ehi passiko opanayiko paccattaɱ veditabbo viññūhī' ti.|| ||

Yasmiɱ bhikkhave samaye ariya-sāvako Dhammo anussarati,||
nev'assa tasmiɱ samaye rāga-pariyuṭṭhitaɱ cittaɱ hoti,||
na dosa-pariyuṭṭhitaɱ cittaɱ hoti,||
na moha-pariyuṭṭhitaɱ cittaɱ hoti,||
ujugatam ev'assa tasmiɱ samaye cittaɱ hoti,||
nikkhantaɱ muttaɱ vuṭṭhitaɱ gedhamhā,||
gedho ti kho bhikkhave pañcann'etaɱ kāma-guṇānaɱ adhivacanaɱ.|| ||

Sa kho so āvuso ariya-sāvako sabbaso ākāsasamena cetasā viharati,
vipulena mahaggatena appamāṇena averena avyāpajjhena.|| ||

Idam pi kho āvuso ārammaṇaɱ karitvā evam idh'ekacce sattā visuddhi-dhammā bhavanti.|| ||

Puna ca paraɱ bhikkhave ariya-sāvako Saŋghaɱ anussarati:|| ||

'Su-paṭipanno Bhagavato sāvaka-saŋgho uju-paṭipanno Bhagavato sāvaka-saŋgho, ñāya-paṭipanno Bhagavato sāvaka-saŋgho,||
sāmīci-paṭipanno Bhagavato sāvaka-saŋgho,||
yad idaɱ cattāri purisa-yugāni aṭṭha purisa-puggalā,||
esa Bhagavato sāvaka-saŋgho āhuneyyo,||
pāhuneyyo,||
dakkhiṇeyyo||
añjali-karaṇīyo,||
anuttaraɱ puñña-k-khettaɱ lokassā' ti.|| ||

Yasmiɱ bhikkhave samaye ariya-sāvako Saŋghaɱ anussarati,||
nev'assa tasmiɱ samaye rāga-pariyuṭṭhitaɱ cittaɱ hoti,||
na dosa-pariyuṭṭhitaɱ cittaɱ hoti,||
na moha-pariyuṭṭhitaɱ cittaɱ hoti,||
ujugatam ev'assa tasmiɱ samaye cittaɱ hoti,||
nikkhantaɱ muttaɱ vuṭṭhitaɱ gedhamhā,||
gedho ti kho bhikkhave pañcann'etaɱ kāma-guṇānaɱ adhivacanaɱ.|| ||

Sa kho so āvuso ariya-sāvako sabbaso ākāsasamena cetasā viharati,
vipulena mahaggatena appamāṇena averena avyāpajjhena.|| ||

Idam pi kho āvuso [316] ārammaṇaɱ karitvā evam idh'ekacce sattā visuddhi-dhammā bhavanti.|| ||

5. Puna ca paraɱ bhikkhave ariya-sāvako attano sīlāni anussarati:|| ||

Akhaṇḍāni acchiddāni asa-balāni akammā-sāni bhūji-s-sāni viññuppa-satthāni aparām-aṭṭhāni samādhi-saŋvatta-nikāni.|| ||

Yasmiɱ bhikkhave samaye ariya-sāvako sīlaɱ anussarati,||
nev'assa tasmiɱ samaye rāga-pariyuṭṭhitaɱ cittaɱ hoti,||
na dosa-pariyuṭṭhitaɱ cittaɱ hoti,||
na moha-pariyuṭṭhitaɱ cittaɱ hoti,||
ujugatam ev'assa tasmiɱ samaye cittaɱ hoti,||
nikkhantaɱ muttaɱ vuṭṭhitaɱ gedhamhā,||
gedho ti kho bhikkhave pañcann'etaɱ kāma-guṇānaɱ adhivacanaɱ.|| ||

Sa kho so āvuso ariya-sāvako sabbaso ākāsasamena cetasā viharati,
vipulena mahaggatena appamāṇena averena avyāpajjhena.|| ||

Idam pi kho āvuso ārammaṇaɱ karitvā evam idh'ekacce sattā visuddhi-dhammā bhavanti.|| ||

6. Puna ca paraɱ bhikkhave ariya-sāvako attano cāgaɱ anussarati:|| ||

'Lābhā vata me,||
su-laddhaɱ vata me,||
yo'haɱ macchera-mala-pariyuṭṭhitāya pajāya vigata-mala-maccherena cetasā agāraɱ ajjhā-vasāmi mutta-cāgo payata-pāṇī vossagga-rato yā cayogo dāna-saɱvibhāga-rato' ti.|| ||

Yasmiɱ bhikkhave samaye ariya-sāvako cāgaɱ anussarati,||
nev'assa tasmiɱ samaye rāga-pariyuṭṭhitaɱ cittaɱ hoti,||
na dosa-pariyuṭṭhitaɱ cittaɱ hoti,||
na moha-pariyuṭṭhitaɱ cittaɱ hoti,||
ujugatam ev'assa tasmiɱ samaye cittaɱ hoti,||
nikkhantaɱ muttaɱ vuṭṭhitaɱ gedhamhā,||
gedho ti kho bhikkhave pañcann'etaɱ kāma-guṇānaɱ adhivacanaɱ.|| ||

Sa kho so āvuso ariya-sāvako sabbaso ākāsasamena cetasā viharati,
vipulena mahaggatena appamāṇena averena avyāpajjhena.|| ||

Idam pi kho āvuso ārammaṇaɱ karitvā evam idh'ekacce sattā visuddhi-dhammā bhavanti.|| ||

7. Puna ca paraɱ bhikkhave ariya-sāvako devatā anussarati:|| ||

'Santi devā Cātu-m-mahā-rājikā,||
santi devā Tāvatiɱsā,||
santi devā Yāmā,||
santi devā Tusitā,||
santi devā Nimmāna-ratino,||
santi devā Paranimmita Vasa-vattino,||
santi devā Brahma-kāyikā,||
santi devā Taduttariɱ.|| ||

Yathā-rūpāya saddhāya samannāgatā tā devatā||
ito cutā tattha uppannā,||
mayham pi tathā-rūpā saddhā saɱ- [317] vijjati.|| ||

Yathā-rūpena sīlena samannāgatā tā devatā||
ito cutā tattha uppannā,||
mayham pi tathā-rūpaɱ sīlaɱ saŋvijjati.|| ||

Yathā-rūpena sutena samannāgatā tā devatā||
ito cutā tattha uppannā,||
mayham pi tathā-rūpaɱ sutaɱ saŋvijjati.|| ||

Yathā-rūpena cāgena samannāgatā tā devatā||
ito cutā tattha uppannā,||
mayham pi tathā-rūpo cāgo saŋvijjati.|| ||

Yathā-rūpāya paññāya samannāgatā tā devatā||
ito cutā tattha uppannā,||
mayham pi tathā-rūpā paññā saŋvijjatī' ti.|| ||

Yasmiɱ bhikkhave samaye ariya-sāvako attano ca tāsaɱ ca devatānaɱ saddhañ ca||
sīlañ ca||
sutañ ca||
cāgañ ca||
paññañ canev'assa||
tasmiɱ samaye rāga-pariyuṭṭhitaɱ cittaɱ hoti,||
na dosa-pariyuṭṭhitaɱ cittaɱ hoti,||
na moha-pariyuṭṭhitaɱ cittaɱ hoti,||
ujugatam ev'assa tasmiɱ samaye cittaɱ hoti,||
nikkhantaɱ muttaɱ vuṭṭhitaɱ gedhamhā,||
gedho ti kho bhikkhave pañcann'etaɱ kāma-guṇānaɱ adhivacanaɱ.|| ||

Sa kho so āvuso ariya-sāvako sabbaso ākāsasamena cetasā viharati,
vipulena mahaggatena appamāṇena averena avyāpajjhena.|| ||

Idam pi kho āvuso ārammaṇaɱ karitvā evam idh'ekacce sattā visuddhi-dhammā bhavanti.|| ||

Acchariyaɱ āvuso||
abbhūtaɱ āvuso||
yāvañ c'idaɱ tena Bhagavatā jānatā passatā arahatā Sammā-Sam-Buddhena sambādhe okās'ādhigamo anu-Buddho sattānaɱ visuddhiyā soka-pari-d-davānaɱ samati-k-kamāya dukkha-domanassānaɱ atthaŋ-gamāya ñāyassa adhigamāya,||
Nibbānassa sacchi-kiriyāya,||
yad idaɱ cha anussati-ṭ-ṭhānāni" ti.|| ||

 


Contact:
E-mail
Copyright Statement