Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Chakka-Nipāta
III: Anuttariya-Vagga

Sutta 28

Dutiya Samaya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[320]

[1][pts] Evaɱ me sutaɱ:|| ||

Ekaɱ samayaɱ sambulā therā bhikkhu Bārāṇasiyaɱ viharanti Isipatane Migadāye.|| ||

Atha kho tesaɱ therānaɱ bhikkhunaɱ pacchā-bhattaɱ piṇḍa-pāta-paṭi-k-kantānaɱ maṇḍala-māle sanni-sinnānaɱ sanni-patitānaɱ ayam antarā-kathā udapādi:|| ||

"Ko nu kho āvuso samayo mano-bhāvanīyassa bhikkhuno dassanāya upasankamitun" ti?|| ||

2. Evaɱ vutte aññataro bhikkhu te bhikkhu etad avoca:|| ||

"Yasmiɱ āvuso samaye mano-bhāvanīyo bhikkhū pacchā-bhattaɱ piṇḍa-pāta-paṭi-k-kanto pāde pakkhāletvā nisinno hoti,||
pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭha-petvā,||
so samayo mano-bhāvanīyassa bhikkhūno dassanāya upasankamitun" ti.|| ||

3. Evaɱ vutte aññataro bhikkhū taɱ bhikkhuɱ etad avoca:|| ||

"Na kho āvuso so samayo mano-bhāvanīyassa bhikkhuno dassanāya upasankamituɱ.|| ||

Yasmiɱ āvuso samaye mano-bhāvanīyo bhikkhu pacchā-bhattaɱ piṇḍa-pāta-paṭi-k-kanto pāde pakkhāletvā nisinno hoti pallaŋkaɱ ābhūjitvā ujuɱ kāyaɱ paṇīdhāya parimukhaɱ satiɱ upaṭṭha-petvā,||
cāritta-kilamatho pi'ssa tasmiɱ samaye appaṭi-p-passaddho hoti,||
bhatta-kilamatho pi'ssa tasmiɱ samaye appaṭi-p-passaddho hoti.|| ||

Tasmā na kho so asamayo mano-bhāvanīyassa bhikkhuno dassanāya upasankamituɱ.|| ||

Yasmiɱ āvuso samaye mano-bhāvanīyo bhikkhū sāyaṇha-samayaɱ patisallānā vuṭṭhito vihāra-pacchāyāyaɱ nisinno hoti pallaŋkaɱ ābhūjitvā ujuɱ kāyaɱ paṇidhāya parimukhaɱ satiɱ upaṭṭha-petvā,||
so samayo mano-bhāvanīyassa bhikkhuno dassanāya upasankamitun" ti.|| ||

4. Evaɱ vutte aññataro bhikkhu taɱ bhikkhuɱ etad avoca:|| ||

"Na kho āvuso so samayo mano-bhāvanīyassa bhikkhuno dassanāya upasankamituɱ.|| ||

Yasmiɱ āvuso samaye [321] mano-bhāvanīyo bhikkhu sāyanaha-samayaɱ patisallānā vuṭṭhito vihāra-pacchāyāyaɱ nisinno hoti pallaŋkaɱ ābhūjitvā ujuɱ kāyaɱ paṇidhāya parimukhaɱ satiɱ upaṭṭha-petvā,||
yad ev'assa divā samādhi nimittaɱ mana-sikataɱ hoti,||
tad ev'assa tasmiɱ samaye samudā-carati.|| ||

Tasmā na kho so samayo mano-bhāvanīyassa bhikkhuno dassanāya upasankamituɱ.|| ||

Yasmiɱ āvuso samaye mano-bhāvanīyo bhikkhu rattiyā paccūsa-samayaɱ paccu-ṭṭhāya nisinno hoti pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭha-petvā,||
so samayo mano-bhāvanīyassa bhikkhuno dassanāya upasankamitun" ti.|| ||

5. Evaɱ vutte aññataro bhikkhu taɱ bhikkhuɱ etad avoca:|| ||

"Na kho āvuso so samayo mano-bhāvanīyassa bhikkhuno dassanāya upasankamituɱ.|| ||

Yasmiɱ āvuso samaye mano-bhāvanīyo bhikkhu rattiyā paccūsa-samayaɱ paccu-ṭṭhāya nisinno hoti pallaŋkaɱ ābhujitvā ujuɱ kāyaɱ paṇidhāya parimukhaɱ satiɱ upaṭṭha-petvā,||
ojaṭṭhāyi'ssa tasmiɱ samaye kāyo hoti||
phāsu'ssa hoti Buddhānaɱ sāsanaɱ mana-sikātuɱ.|| ||

Tasmā so samayo mano-bhāvanīyassa bhikkhuno dassanāya upasankamitun" ti.|| ||

 

§

 

6. Evaɱ vutte āyasmā Mahā Kaccāno there bhikkhū etad avoca:|| ||

"Sammukhā me taɱ āvuso Bhagavato sutaɱ,||
sammukhā paṭiggahītaɱ:|| ||

'Cha yime bhikkhu samayā mano-bhāvanīyassa bhikkhuno dassanāya upasankamituɱ.|| ||

Katame cha?|| ||

7. Idha bhikkhu yasmiɱ samaye bhikkhu kāma-rāga-pariyuṭṭhitena cetasā viharati,||
kāma-rāga-paretena,||
uppannassa ca kāma-rāgassa nissaraṇaɱ yathā-bhūtaɱ na-p-pajānāti,||
tasmiɱ samaye mano-bhāvanīyo bhikkhū upasankamitvā evam assa vacanīyo:|| ||

"Ahaɱ kho āvuso kāma-rāga-pariyuṭṭhitena cetasā viharāmi kāma-rāga-paretena,||
uppannassa ca kāma-rāgassa nissaraṇaɱ yathā-bhūtaɱ na-p-pajānāmi.|| ||

Sādhu [322] vata me āyasmā kāma-rāgassa pahānāya dhammaɱ desetū" ti.|| ||

Tassa mano-bhāvanīyo bhikkhu kāma-rāgassa pahānāya dhammaɱ deseti.|| ||

Ayaɱ bhikkhu paṭhamo samayo mano-bhāvanīyassa bhikkhuno dassanāya upasankamituɱ.|| ||

8. Puna ca paraɱ bhikkhū, yasmiɱ samaye bhikkhu vyāpāda-pariyuṭṭhitena cetasā viharati,||
vyāpāda-paretena,||
uppannassa ca vyāpādassa nissaraṇaɱ yathā-bhūtaɱ na-p-pajānāti,||
tasmiɱ samaye mano-bhāvanīyo bhikkhu upasankamitvā evam assa vacanīyo:|| ||

"Ahaɱ kho āvuso vyāpāda-pariyuṭṭhitena cetasā viharāmi||
vyāpāda-paretena,||
uppannassa ca vyāpādassa nissaraṇaɱ yathā-bhūtaɱ na-p-pajānāmi.|| ||

Sādhu vata me āyasmā vyāpādassa pahānāya dhammaɱ desetū" ti.|| ||

Tassa mano-bhāvanīyo bhikkhū vyāpādassa pahānāya dhammaɱ deseti.|| ||

Ayaɱ bhikkhu dutiyo samayo mano-bhāvanīyassa bhikkhuno dassanāya upasakamituɱ.|| ||

9. Puna ca paraɱ bhikkhu, yasmiɱ samaye bhikkhu thina-middha-pariyuṭṭhitena cetasā viharati||
thina-middha-paretena,||
uppannassa ca thīna-middhassa nissaraṇaɱ yathā-bhūtaɱ na-p-pajānāti,||
tasmiɱ samaye mano-bhāvanīyo bhikkhu upasankamitvā evam assa vacanīyo:|| ||

"Ahaɱ kho āvuso thīna-middha-pariyuṭṭhitena cetasā viharāmi||
thīna-middha-paretena||
uppanassa ca thīna-middhassa nissaraṇaɱ yathā-bhūtaɱ na-p-pajānāmi.|| ||

Sādhu vata me āyasmā thīna-middhassa pahānāya dhammaɱ desetū" ti.|| ||

Tassa mano-bhāvanīyo bhikkhu thīna-middhassa pahānāya dhammaɱ deseti.|| ||

Ayaɱ bhikakhū tatiyo samayo mano-bhāvanīyassa bhikkhuno dassanāya upasankamituɱ.|| ||

10. Puna ca paraɱ bhikkhu, yasmiɱ samaye bhikkhu uddhacca-kukkucca-pariyuṭṭhitena cetasā viharati||
uddhacca-kukkucca-paretena,||
uppannassa ca uddhaccakukkucassa nissaraṇaɱ yathā-bhūtaɱ na-p-pajānāti,||
tasmiɱ samaye mano-bhāvanīyo bhikkhu upasankamitvā evam assa vacanīyo:|| ||

"Ahaɱ kho āvuso uddhacca-kukkucca-pariyuṭṭhitena cetasā viharāmi||
uddhacca-kukkucca-paretena||
uppanassa ca uddhacca-kukkuccassa nissaraṇaɱ yathā-bhūtaɱ na-p-pajānāmi.|| ||

Sādhu vata me āyasmā uddhacca-kukkuccassa pahānāya dhammaɱ desetū" ti.|| ||

Tassa mano-bhāvanīyo bhikkhu uddhacca-kukkuccassa pahānāya dhammaɱ deseti.|| ||

Ayaɱ bhikakhū catuttho samayo mano-bhāvanīyassa bhikkhuno dassanāya upasankamituɱ.|| ||

11. Puna ca paraɱ bhikkhu, yasmiɱ samaye bhikkhu vicikicchā-pariyuṭṭhitena cetasā viharati,||
vicikicchā-paretena,||
uuppannāya ca vicikicchāya nissaraṇaɱ yathā-bhūtaɱ na-p-pajānāti,||
tasmiɱ samaye mano-bhāvanīyo bhikkhu upasankamitvā evam assa vacanīyo:|| ||

"Ahaɱ kho āvuso vicikicchā-pariyuṭṭhitena cetasā viharāmi, vicikicchā-paretena||
uppannāya ca vicikicchāya nissaraṇaɱ yathā-bhūtaɱ na-p-pajānāmi.|| ||

Sādhu vata me āyasmā vicikicchāya pahānāya dhammaɱ desetū" ti.|| ||

Tassa mano-bhāvanīyo bhikkhū vicikicchāya pahānāya dhammaɱ deseti.|| ||

Ayaɱ bhikkhu pañcamo samayo mano-bhāvanīyassa bhikkhuno dassanāya upasankamituɱ.|| ||

12. Puna ca paraɱ bhikkhu, yasmiɱ samaye bhikkhu yan nimittaɱ āgamma yaɱ nimittaɱ mana-sikaroto anantarā āsavānaɱ khayo hoti,||
taɱ nimittaɱ na jānāti,||
na passati,||
tasmiɱ samaye mano-bhāvanīyo bhikkhu upasankamitvā evam assa vacanīyo:|| ||

"Ahaɱ kho āvuso yaɱ nimittaɱ āgamma yaɱ nimittaɱ mana-sikaroto anantarā āsavānaɱ khayo hoti,||
taɱ nimittaɱ na jānāmi,||
na passāmi.|| ||

Sādhu vata me āyasmā āsavānaɱ khayāya dhammaɱ desetū" ti.|| ||

Tassa mano-bhāvanīyo bhikkhu āsavānaɱ khayāya dhammaɱ deseti.|| ||

Ayaɱ bhikakhu chaṭṭho samayo mano-bhāvanīyassa bhikkhuno dassanāya upasankamituɱ.|| ||

Ime kho bhikkhu cha samayā mano-bhāvanīyassa bhikkhuno dassanāya upasankamitun' ti.|| ||

Sammukhā me taɱ āvuso Bhagavato sutaɱ,||
sammukhā paṭiggahītaɱ:||
ime kho bhikkhu, cha samayā mano-bhāvanīyassa bhikkhuno dassanāya upasankamitun" ti.|| ||

 


Contact:
E-mail
Copyright Statement