Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Chakka-Nipāta
IV: Devatā-Vagga

Sutta 33

Dutiya Aparihāna Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

2. Atha kho aññatarā devatā abhikkantāya rattiyā abhikkanta-vaṇṇā kevala-kappaɱ Jetavanaɱ obhāsetvā yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhitā kho sā devatā Bhagavantaɱ etad avoca:|| ||

"Cha yime bhante dhammā bhikkhuno aparihānāya saŋvattanti.|| ||

Katame cha?|| ||

Satthu-gāravatā,||
Dhamma-gāravatā,||
Saŋgha-gāravatā,||
sikkhā-gāravatā,||
hiri-gāravatā,||
ottappa-gāravatā.|| ||

Ime kho bhante cha dhammā bhikkhuno aparihānāya saŋvattanti."|| ||

Idam avoca sā devatā.|| ||

Samanuñño Satthā ahosi.|| ||

Atha kho sā devatā,||
samanuñño me Satthā, ti||
Bhagavantaɱ abhivādetvā padakkhiṇaɱ katvā tatth'ev'antara-dhāyī.|| ||

 

§

 

Atha kho Bhagavā tassā rattiyā accayena bhikkhū āmantesi:|| ||

Imaɱ bhikkhave rattiɱ aññatarā devatā abhikkantāya rattiyā abhikkanta vaṇṇā kevala-kappaɱ Jetavanaɱ obhāsetvā yen'āhaɱ ten'upasankami.|| ||

Upasaŋkamitvā maɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhitā kho bhikkhave sā devatā maɱ etad avoca:|| ||

"Chayime bhante dhammā bhikkhuno aparihānāya saŋvattanti.|| ||

Katame cha?|| ||

Satthu-gāravatā,||
Dhamma-gāravatā,||
Saŋgha-gāravatā,||
sikkhā-gāravatā,||
hiri-gāravatā,||
ottappa-gāravatā.|| ||

Ime kho bhante cha dhammā bhikkhuno aparihānāya saŋvattantiti."|| ||

Idam avoca bhikkhave sā devatā,||
idaɱ vatvā maɱ abhivādetvā padakkhiṇaɱ katvā tatth'ev'antara-dhāyī ti.

Satthu garu dhamma-garu saŋghe ca tibba-gāravo,||
Hiri-ottappa-sampanno sappatisso sagāravo,||
Abhabbo parihānāya Nibbānass'eva santike ti.|| ||

 


Copyright Statement