Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Chakka Nipāta
V. Dhammika Vagga

Sutta 43

Nāga Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[344]

[1][pts][than] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane anātha piṇḍikassa ārāme.|| ||

Atha kho Bhagavā pubbaṇha-samayaɱ nivāsetvā patta cīvaram ādāya Sāvatthiyaɱ piṇḍāya pāvisi.|| ||

Sāvatthiyaɱ piṇḍāya caritvā pacchā-bhattaɱ piṇḍa-pāta paṭikkanto āyasmantaɱ Ānandaɱ amantesi:|| ||

"Āyām Ānanda, yena pubb'ārāmo Mīgāramātu pā- [345] sādo ten'upasankamissāma divā-vihārāyā" ti.|| ||

"Evaɱ bhante" ti kho āyasmā Ānando Bhagavato paccassosi.|| ||

Atha kho Bhagavā āyasmatā Ānandena saddhiɱ yena pubb'ārāmo Migāra-mātu pāsādo ten'upasankami.|| ||

Atha kho Bhagavā sāyaṇha-samayaɱ patisallānā vuṭṭhito āyasmantaɱ Ānandaɱ āmantesi:|| ||

"Āyām Ānanda, yena pubba-koṭṭhako ten'upasankamissāma gattāni parisiñcituɱ" ti.|| ||

"Evaɱ bhante", ti kho āyasmā Ānando Bhagavato paccassosi.|| ||

Atha kho Bhagavā āyasmatā Ānandena saddhiɱ yena pubba-koṭṭhako ten'upasankami gattāni parisiñcituɱ.|| ||

Pubba-koṭṭhake gattāni parisiñcitvā pacc'uttaritvā eka-cīvaro aṭṭhāsi gattatāni pubb-ā-paya-māno.|| ||

2. Tena kho pana samayena rañño Pasenadi-Kosalassa "Seto" nāma nāgo mahā-turiya-tālita-vāditena pubba-koṭṭhakā pacc'uttarati.|| ||

Api'ssu taɱ jano disvā evam āha:|| ||

"Abhirūpo vata bho rañño nāgo,||
dassanīyo vata bho rañño nāgo,||
pāsādiko vata bho rañño nāgo,||
kāy'ūpapanno vata bho rañño nāgo" ti.|| ||

Evaɱ vutte āyasmā Udāyi Bhagavantaɱ etad avoca:|| ||

"Hatthim eva nu kho bhante mahantaɱ brahantaɱ kāy'ūpapannaɱ jano disvā evam āha:|| ||

'Nāgo vata bho nāgo' ti?|| ||

udāhu aññam pi kañci mahantaɱ brahantaɱ kāy'ūpapannaɱ jano disvā evam āha:|| ||

'Nāgo vata bho nāgo' ti?"|| ||

Hatthim pi kho Udāyi,||
mahantaɱ brahantaɱ kāy'ūpapannaɱ jano disvā evam āha:|| ||

"Nāgo vata bho nāgo" ti.|| ||

Assam pi kho Udāyi,||
mahantaɱ brahantaɱ kāy'upapannaɱ jano disvā evam āha:|| ||

"Nāgo vata bho nāgo" ti.|| ||

Goṇam pi kho Udāyi,||
mahantaɱ brahantaɱ kāy'upapannaɱ jano disvā evam āha:|| ||

"Nāgo vata bho nāgo" ti.|| ||

Uragam pi kho Udāyi,||
mahantaɱ brahantaɱ kāy'upapannaɱ jano disvā evam āha:|| ||

"Nāgo vata ho nāgo" ti.|| ||

Rukkham pi kho [346] Udāyi,||
mahantaɱ brahantaɱ kāy'upapannaɱ jano disvā evam āha:|| ||

"Nāgo vata bho nāgo" ti.|| ||

Manussam pi kho Udāyi,||
mahantaɱ brahantaɱ kāy'upapannaɱ jano disvā evam āha:|| ||

"Nāgo vata bho nāgo" ti.|| ||

Api c'Udāyi,||
yo sa-devake loke sa-mārake sabrahmake,||
sa-s-samaṇa-brāhmaṇiyā pajāya sadeva-manussāya,||
āguɱ na karoti kāyena vācāya manasā,||
'tam ahaɱ nāgo' ti brūmi" ti.|| ||

"Acchariyaɱ bhante,||
ababhūtaɱ bhante,||
yāva su-bhāsitañ c'idaɱ bhante, Bhagavatā:|| ||

'Api ca Udāyi,||
yo sa-devake loke sa-mārake sabrahmake,||
sa-s-samaṇa-brāhmaṇiyā pajāya sadeva-manussāya,||
āguɱ na karoti kāyena vācāya manasā,||
"tam ahaɱ nāgo" ti brūmi' ti.|| ||

Idañ ca pan'āhaɱ bhante,||
Bhagavato su-bhāsitaɱ imāhi gāthāhi anumodāmi:|| ||

Manussabhūtaɱ sambuddhaɱ attadantaɱ samāhitaɱ||
Irīyamānaɱ brahmapathe cittassupasame rataɱ.|| ||

Yaɱ manussā namassanti sabba-dhammāna pāraguɱ,||
Devā pi naɱ namassanti: iti me arahato sutaɱ.|| ||

Sabbasaŋyojanātītaɱ vanā Nibbānam āgataɱ||
Kāmehi nekkhammarataɱ muttaɱ selā va kañcanaɱ.|| ||

Sabbe accarucī nāgo Himavā'ññe siluccaye||
Sabbesaɱ nāganāmānaɱ saccanāmo anuttaro.|| ||

Nāgaɱ vo kittayissāmi, na hī āguɱ karoti so||
Soraccaɱ avihiɱsā ca pādā nāgassa te duve.|| ||

Tapo ca Brahma-cariyaɱ caraṇā nāgassa tyāpare||
Saddhāhattho mahānāgo upekkhāsetadantavā.|| ||

Sati gīvā, siro paññā, vīmaɱsā dhammacittanā,||
Dhammakūcchi samāvāpo, viveko tassa vāladhi.|| ||

So jhāyī assāsarato ajjhattaɱ susamāhito,||
Gacchaɱ samāhito nāgo, ṭhito nāgo samāhito.|| ||

Seyyaɱ samāhito nāgo, nisinno pi samāhito||
[347] Sabbattha saɱvuto nāgo, esā nāgassa sampadā|| ||

Bhūñjati anavajjāni, sāvajjāni na bhūñjati||
Ghāsaɱ acchādanaɱ laddhā, sannidhiɱ parivajjayaɱ.|| ||

Saŋyojanaɱ aṇuɱ thūlaɱ sabbaɱ chetvāna bandhanaɱ||
Yena yen'eva gacchati, anapekkho'va gacchati.|| ||

Yathā pi udake jātaɱ puṇḍarīkaɱ pavaḍḍhati,||
Na upalippati toyena sucigandhaɱ manoramaɱ.|| ||

Tath'eva loke sujāto Buddho loke virajjati||
Na upalippati lokena toyena padumaɱ yathā.|| ||

Mahagginī pajjalito an-āhārūpasammati||
Sankhāresūpasantesu nibbuto ti pavuccati.|| ||

Atth'assāyaɱ viññāpanī upamā viññuhi desitā,||
Viññassanti mahānāgā nāgaɱ nāgena desitaɱ.|| ||

Vītarāgo vītadoso vitamoho anāsavo,||
Sarīraɱ vijahaɱ nāgo parinibbāti'nāsavo" ti.

 


Contact:
E-mail
Copyright Statement