Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Chakka Nipāta
V. Dhammika Vagga

Sutta 54

Dhammika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[366]

[1][pts] Evaɱ me sutaɱ:|| ||

Ekaɱ samayaɱ Bhagavā Rājagahe viharati Gijjhakūṭe pabbate.|| ||

Tena kho pana samayen'āyasmā Dhammiko jāti-bhūmiyaɱ āvāsiko hoti sabbaso jāti-bhūmiyaɱ sattasu āvāsesu.|| ||

Tatra sudaɱ āyasmā Dhammiko āgantuke bhikkhū||
akkosati,||
paribhāsati,||
vihiɱsati,||
vitudati,||
roseti vācāya.|| ||

Te ca āgantukā bhikkhu āyasmatā Dhammikena||
akkosiyamānā,||
paribhāsiyamānā,||
vihesiyamānā,||
vitudiyamānā,||
rosiyamānā vācāya,||
pakkamanti,||
na saṇṭhahanti||
riñcanti āvāsaɱ.|| ||

Atha kho jāti-bhūmakānaɱ upāsakānaɱ etad ahosi:|| ||

"Mayaɱ kho bhikkhu-Saŋghaɱ pacc'upaṭṭhitā cīvara-piṇḍa-pāta-sen'āsana-gilāna-paccaya-bhesajja-parikkhārena||
atha kho pana āgantukā bhikkhu pakkamanti,||
na sanṭhahanti,||
riñcanti āvāsaɱ.|| ||

Ko nu kho hetu,||
ko paccayo||
yena āgantukā bhikkhū||
pakkamanti,||
na saṇṭhahanti,||
riñcanti āvāsan" ti?|| ||

Atha kho jāti-bhūmakānaɱ upāsakānaɱ etad ahosi:|| ||

"Ayaɱ kho āyasmā Dhammiko āgantuke bhikkhu||
akkosati,||
paribhāsati,||
vihiɱsati,||
vitudati,||
roseti vācāya.|| ||

Te ca āgantukā bhikkhū āyasmatā Dhammikena||
akkosiyamānā,||
paribhāsiyamānā,||
vihesiyamānā,||
vitudiyamānā,||
rosiyamānā vācāya,||
pakkamanti,||
na saṇṭhahanti,||
riñcanti āvāsaɱ.|| ||

Yan nūna mayaɱ āyasmantaɱ Dhammikaɱ pabbājeyyāmā" ti.|| ||

Atha kho jāti-bhūmakā upāsakā yen'āyasmā Dhammiko ten'upasankamiɱsu.|| ||

Upasaŋkamitvā āyasmantaɱ Dhammikaɱ etad avocuɱ:|| ||

"Pakkamatu bhante āyasmā Dhammiko imamhā āvāsā,||
alaɱ te idha vāsenā" ti.|| ||

2. Atha kho āyasmā Dhammiko tamhā āvāsaɱ aññaɱ avāsaɱ agamāsi.|| ||

Tatra pi sudaɱ āyasmā Dhammiko āgantuke bhikkhu||
akkosati,||
paribhāsati,||
vihiɱsati,||
vitudati,||
roseti vācāya.|| ||

Te ca āgantukā bhikkhu āyasmatā Dhammikena||
akkosiyamānā,||
paribhāsiyamānā,||
vihesiyamānā,||
vitudiyamānā,||
rosiyamānā vācāya,||
pakkamanti,||
na saṇṭhahanti||
riñ- [367] canti āvāsaɱ.|| ||

Atha kho jāti-bhūmakānaɱ upāsakānaɱ etad ahosi:|| ||

"Mayaɱ kho bhikkhu-Saŋghaɱ pacc'upaṭṭhitā cīvara-piṇḍa-pāta-sen'āsana-gilāna-paccaya-bhesajja-parikkhārena||
atha kho pana āgantukā bhikkhu pakkamanti,||
na sanṭhahanti,||
riñcanti āvāsaɱ.|| ||

Ko nu kho hetu,||
ko paccayo||
yena āgantukā bhikkhū||
pakkamanti,||
na saṇṭhahanti,||
riñcanti āvāsan" ti?|| ||

Atha kho jāti-bhūmakānaɱ upāsakānaɱ etad ahosi:|| ||

"Ayaɱ kho āyasmā Dhammiko āgantuke bhikkhu||
akkosati,||
paribhāsati,||
vihiɱsati,||
vitudati,||
roseti vācāya.|| ||

Te ca āgantukā bhikkhū āyasmatā Dhammikena||
akkosiyamānā,||
paribhāsiyamānā,||
vihesiyamānā,||
vitudiyamānā,||
rosiyamānā vācāya,||
pakkamanti,||
na saṇṭhahanti,||
riñcanti āvāsaɱ.|| ||

Yan nūna mayaɱ āyasmantaɱ Dhammikaɱ pabbājeyyāmā" ti.|| ||

Atha kho jāti-bhūmakā upāsakā yen'āyasmā Dhammiko ten'upasankamiɱsu.|| ||

Upasaŋkamitvā āyasmantaɱ Dhammikaɱ etad avocuɱ:|| ||

"Pakkamatu bhante āyasmā Dhammiko imamhā āvāsā,||
alaɱ te idha vāsenā" ti.|| ||

3. Atha kho āyasmā Dhammiko tamhā āvāsaɱ aññaɱ avāsaɱ agamāsi.|| ||

Tatra pi sudaɱ āyasmā Dhammiko āgantuke bhikkhū||
akkosati,||
paribhāsati,||
vihiɱsati,||
vitudati,||
roseti vācāya.|| ||

Te ca āgantukā bhikkhu āyasmatā Dhammikena||
akkosiyamānā,||
paribhāsiyamānā,||
vihesiyamānā,||
vitudiyamānā,||
rosiyamānā vācāya,||
pakkamanti,||
na saṇṭhahanti||
riñcanti āvāsaɱ.|| ||

Atha kho jāti-bhūmakānaɱ upāsakānaɱ etad ahosi:|| ||

"Mayaɱ kho bhikkhu-Saŋghaɱ pacc'upaṭṭhitā cīvara-piṇḍa-pāta-sen'āsana-gilāna-paccaya-bhesajja-parikkhārena||
atha kho pana āgantukā bhikkhu pakkamanti,||
na sanṭhahanti,||
riñcanti āvāsaɱ.|| ||

Ko nu kho hetu,||
ko paccayo||
yena āgantukā bhikkhū||
pakkamanti,||
na saṇṭhahanti,||
riñcanti āvāsan" ti?|| ||

Atha kho jāti-bhūmakānaɱ upāsakānaɱ etad ahosi:|| ||

"Ayaɱ kho āyasmā Dhammiko āgantuke bhikkhu||
akkosati,||
paribhāsati,||
vihiɱsati,||
vitudati,||
roseti vācāya.|| ||

Te ca āgantukā bhikkhū āyasmatā Dhammikena||
akkosiyamānā,||
paribhāsiyamānā,||
vihesiyamānā,||
vitudiyamānā,||
rosiyamānā vācāya,||
pakkamanti,||
na saṇṭhahanti,||
[368] riñcanti āvāsaɱ.|| ||

Yan nūna mayaɱ āyasmantaɱ Dhammikaɱ pabbājeyyāmā" ti.|| ||

Atha kho jāti-bhūmakā upāsakā yen'āyasmā Dhammiko ten'upasankamiɱsu.|| ||

Upasaŋkamitvā āyasmantaɱ Dhammikaɱ etad avocuɱ:|| ||

"Pakkamatu bhante āyasmā Dhammiko sabbaso jāti-bhūmiyaɱ sattahi āvāsehī" ti.|| ||

4. Atha kho āyasmato Dhammikassa etad ahosi:|| ||

"Pabbājito kho'mhi||
jāti-bhūmakehi upāsakehi sabbaso jāti-bhūmiyaɱ sattahi āvāsehi,||
kahan nū kho dāni gacchāmī" ti?|| ||

Atha kho āyasmato Dhammikassa etad ahosi:|| ||

"Yan nūnāhaɱ yena Bhagavā ten'upasankameyyan" ti?|| ||

Atha kho āyasmā Dhammiko patta-cīvaram ādāya yena Rājagahaɱ tena pakkāmi.|| ||

Anupubbena yena Rājagahaɱ Gijjhakūṭo pabbato,||
yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho āyasmantaɱ Dhammikaɱ Bhagavā etad avoca:|| ||

"Handa kuto nu tvaɱ brāhmaṇa Dhammika,||
āgachchasī" ti?|| ||

"Pabbājito ahaɱ bhante jāti-bhūmakehi upāsakehi sabbaso jāti-bhūmiyaɱ sattahi āvāsehī" ti.|| ||

"Alaɱ brāhmaṇa Dhammika, kiɱ te iminā?|| ||

Yaɱ tvaɱ tato tato pabbā-jenti,||
so tvaɱ tato tato pabbājito mam eva santike āgacchasi.|| ||

5. Bhūta-pubbaɱ, brāhmaṇa Dhammika,||
sāmuddikā vāṇijā tīra-dassiɱ sakuṇaɱ gahetvā nāvāya samuddaɱ ajjho-gāhanti.|| ||

Te atīradakkhīṇīyā nāvāya tīra-dassiɱ sakuṇaɱ muñcanti.|| ||

So gacchat'eva purattimaɱ disaɱ,||
gacchati pacchimaɱ disaɱ,||
gacchati uttaraɱ disaɱ,||
gacchati dakkhiṇaɱ disaɱ,||
gacchati uddhaɱ,||
gacchati anudisaɱ.|| ||

Sace so samantā tīraɱ passati,||
tathā gatako va hoti.|| ||

Sace pana so samantā tīraɱ na passati,||
tam eva nāvaɱ paccā-gacchati.|| ||

Evam eva kho brāhmaṇa Dhammika,||
yaɱ tvaɱ tato tato pabbā-jenti,||
so tvaɱ tato tato pabbājito mam'eva santikaɱ āgacchasi.|| ||

[369] Bhūta-pubbaɱ, brāhmaṇa Dhammika,||
rañño Koravyassa Suppatiṭṭho nāma Nigrodha-rājā ahosi pañcasākho sītacchāyo manoramo.|| ||

Suppatiṭṭassa kho pana brāhmaṇa Dhammika,||
Nigrodha-rājassa dvādasa yojanāni abhiniveso ahosi,||
pañca yojanāni mulakasantānakānaɱ.|| ||

Suppatiṭṭhassa kho pana brāhmaṇa Dhammika,||
nigodharājassa tāva mahantāni phalāni ahesuɱ.|| ||

Seyyathā pi nāma āḷhakathālikā,||
evam assa sāduni phalāni ahesuɱ,||
seyyathā pi nāma khuddam madhuɱ anīlakaɱ.|| ||

Suppatiṭṭhassa kho pana brāhmaṇa Dhammika,||
Nigrodha-rājassa||
ekaɱ khandhaɱ rājā paribhuñjati saddhiɱ itthāgārena,||
ekaɱ khandhaɱ balakāyo paribhuñjati,||
ekaɱ khandhaɱ negamajāna-padā paribhuñjanti,||
ekaɱ khandhaɱ samaṇa-brāhmaṇā paribhuñjanti,||
ekaɱ khandhaɱ miga-pakkino paribhuñjanti.|| ||

Suppatiṭṭhassa kho pana brāhmaṇa Dhammika Nigrodha-rājassa na koci phalāni rakkhati.|| ||

Na ca sudaɱ añña-maññassa phalāni hiɱsanti.|| ||

Atha kho brāhmaṇa Dhammika,||
aññataro pūriso Suppatiṭṭhassa Nigrodha-rājassa yāva-datthaɱ phalāni bhakkhitvā sākhaɱ bhañjitvā pakkāmi.|| ||

Atha kho brāhmaṇa Dhammika,||
Suppatiṭṭhe Nigrodha-rāje adhivatthāya devatāya etad ahosi:|| ||

'Acchariyaɱ vata bho,||
abbhūtaɱ vata bho,||
yāva pāpo manusso yatra hi nāma Suppatiṭṭhassa Nigrodha-rājassa yāva-datthaɱ phalāni bhakkhitvā sākhaɱ bhañjitvā pakkamissati,||
yan nūna Suppatiṭṭho Nigrodha-rājā āyatiɱ phalaɱ na dadeyyā' ti.|| ||

Atha kho brāhmaṇa Dhammika,||
Suppatiṭṭho Nigrodha-rājā āyatiɱ phalaɱ nādāsi.|| ||

Atha kho brāhmana Dhammika,||
[370] rājā Koravyo yena Sakko devanam indo ten'upasankami.|| ||

Upasakamitvā Sakkaɱ devānam indaɱ etad avoca:|| ||

'Yagghe mārisa, jāneyyāsi,||
Suppatiṭṭho Nigrodha-rājā phalaɱ na detī' ti?|| ||

Atha kho brāhmaṇa Dhammika,||
Sakko devānam indo tathā-rūpaɱ iddhābhi-sankhāraɱ abhisaŋkhāsi,||
yathā bhusā vāta-vuṭṭhi āgantvā Suppatiṭṭhaɱ Nigrodha-rājaɱ pātesi ummūlam akāsi.|| ||

Atha kho brāhmaṇa Dhammika,||
Suppatiṭṭhe Nigrodha-rāje adhivatthā devatā dukkhī dummanā assumukhī rudamānā eka-m-antaɱ aṭṭhāsi.|| ||

Atha kho brāhmaṇa Dhammika,||
Sakko devānam indo yena Suppatiṭṭhe Nigrodha-rāje adhivatthā devatā ten'upasankami.|| ||

Upasaŋkamitvā Suppatiṭṭhe Nigrodha-rāje adhivatthaɱ devataɱ etad avoca:|| ||

'Kin nu tvaɱ devate dukkhī dummanā assumukhī rudamānā eka-m-antaɱ ṭhitā' ti?|| ||

'Tathā hi pana me mārisa,||
bhūsā vāta-vuṭṭhi āgantvā bhavanaɱ pātesi ummūlam akāsī' ti.|| ||

'Api nu tvaɱ devate,||
rukkha-dhamme ṭhitāya bhūsā vāta-vuṭṭhi āgantvā bhavanaɱ pavattesi ummūlam akāsī' ti?|| ||

'Kathaɱ pana mārisa rukkho rukkha-dhamme ṭhito hotī' ti?|| ||

'Idh'eva devate,||
rukkhassa mūlaɱ mūlatthikā haranti,||
tacaɱ tacatthikā haranti,||
pattaɱ pattatthikā haranti,||
pupphaɱ pupphatthikā haranti,||
phalaɱ phalatthikā haranti||
na ca tena devatāya anatta-manatā vā||
anabhiraddhi vā||
karaṇīyā.|| ||

Evaɱ kho devate rukkho rukkha-dhamme ṭhito hotī' ti.|| ||

'Aṭṭhitāy'eva kho me mārisa rukkha-dhamme bhūsā vāta-vuṭṭhi āgantvā bhavanaɱ pātesi ummūlam akāsi' ti.|| ||

'Sace kho tvaɱ devate rukkha-dhamme tiṭṭheyyāsi,||
siyā pe te bhavanaɱ yathāpure' ti.|| ||

'Ṭhassām'ahaɱ [371] mārisa rukkha-dhamme,||
hotu me bhavanaɱ yathāpūre' ti.|| ||

Atha kho brāhmaṇa Dhammika,||
Sakko devānam indo tathā-rūpaɱ iddhābhi-sankhāraɱ abhisaŋkhāsi,||
yathā bhūsā vāta-vuṭṭhi āgantvā Suppatiṭṭhaɱ Nigrodha-rājaɱ ussāpesi,||
sacchavīni mūlāni ahesuɱ.|| ||

Evam eva kho brāhmaṇa Dhammika,||
api nū taɱ samaṇa-dhamme ṭhitaɱ jāti-bhūmikā upāsakā pabbājeyyuɱ sabbaso jāti-bhūmiyaɱ sattahi āvāsehī" ti?|| ||

"Kathaɱ pana bhante samaṇo samaṇa-dhamme ṭhito hoti" ti?|| ||

"Idha brāhmaṇa Dhammika,||
samaṇo akkosantaɱ na paccakkosati,||
rosentaɱ na paṭirosati,||
bhaṇḍantaɱ na paṭibhaṇḍati.|| ||

Evaɱ kho brāhmaṇa Dhammika,||
samaṇo samaṇa-dhamme ṭhito hotī" ti.|| ||

"Aṭṭhitaɱ yeva kho maɱ bhante samaṇa-dhamme jāti-bhūmikā upāsakā pabbājesuɱ sabbaso jāti-bhūmiyaɱ sattahī āvāsehī" ti.|| ||

7. "Bhūta-pubbaɱ brāhmaṇa Dhammika,||
Sunetto nāma Satthā ahosi titthakaro kāmesu vīta-rāgo.|| ||

Sunettassa kho pana brāhmaṇa Dhammika,||
Satthuno anekāni sāvakasatāni ahesuɱ.|| ||

Sunetto Satthā sāvakānaɱ Brahma-lokasahavyatāya dhammaɱ deseti.|| ||

Ye kho pana brāhmaṇa Dhammika,||
Sunettassa Satthuno Brahma-lokasahavyatāya dhammaɱ desentassa cittāni na pasādesuɱ,||
te kāyassa bhedā param maraṇā apāyaɱ duggatiɱ vinipātaɱ Nirayaɱ upapajjiɱsu.|| ||

Ye kho pana brāhmaṇa Dhammika,||
Sunettassa Satthuno Brahma-lokasahavyatāya dhammaɱ desentassa cittāni pasādesuɱ,||
te kāyassa bhedā param maraṇā sugatiɱ saggaɱ lokaɱ upapajjiɱsu.|| ||

Bhūta-pubbaɱ brāhmaṇa Dhammika, Mūgapakkho nāma Satthā ahosi titthakaro kāmesu vīta-rāgo.|| ||

Mūgapakkhassa kho pana brāhmaṇa Dhammika,||
Satthuno anekāni sāvakasatāni ahesuɱ.|| ||

Mūgapakkho Satthā sāvakānaɱ Brahma-lokasahavyatāya dhammaɱ deseti.|| ||

Ye kho pana brāhmaṇa Dhammika,||
Mūgapakkhassa Satthuno Brahma-lokasahavyatāya dhammaɱ desentassa cittāni na pasādesuɱ,||
te kāyassa bhedā param maraṇā apāyaɱ duggatiɱ vinipātaɱ Nirayaɱ upapajjiɱsu.|| ||

Ye kho pana brāhmaṇa Dhammika,||
Mūgapakkhassa Satthuno Brahma-lokasahavyatāya dhammaɱ desentassa cittāni pasādesuɱ,||
te kāyassa bhedā param maraṇā sugatiɱ saggaɱ lokaɱ upapajjiɱsu.|| ||

Bhūta-pubbaɱ brāhmaṇa Dhammika, Araṇemi nāma Satthā ahosi titthakaro kāmesu vīta-rāgo.|| ||

Araṇemissa kho pana brāhmaṇa Dhammika,||
Satthuno anekāni sāvakasatāni ahesuɱ.|| ||

Araṇemino Satthā sāvakānaɱ Brahma-lokasahavyatāya dhammaɱ deseti.|| ||

Ye kho pana brāhmaṇa Dhammika,||
Araṇemissa Satthuno Brahma-lokasahavyatāya dhammaɱ desentassa cittāni na pasādesuɱ,||
te kāyassa bhedā param maraṇā apāyaɱ duggatiɱ vinipātaɱ Nirayaɱ upapajjiɱsu.|| ||

Ye kho pana brāhmaṇa Dhammika,||
Araṇemissa Satthuno Brahma-lokasahavyatāya dhammaɱ desentassa cittāni pasādesuɱ,||
te kāyassa bhedā param maraṇā sugatiɱ saggaɱ lokaɱ upapajjiɱsu.|| ||

Bhūta-pubbaɱ brāhmaṇa Dhammika, Kuddālako nāma Satthā ahosi titthakaro kāmesu vīta-rāgo.|| ||

Kuddālakassa kho pana brāhmaṇa Dhammika,||
Satthuno anekāni sāvakasatāni ahesuɱ.|| ||

Kuddālako Satthā sāvakānaɱ Brahma-lokasahavyatāya dhammaɱ deseti.|| ||

Ye kho pana brāhmaṇa Dhammika,||
Kuddālakassa Satthuno Brahma-lokasahavyatāya dhammaɱ desentassa cittāni na pasādesuɱ,||
te kāyassa bhedā param maraṇā apāyaɱ duggatiɱ vinipātaɱ Nirayaɱ upapajjiɱsu.|| ||

Ye kho pana brāhmaṇa Dhammika,||
Kuddālakassa Satthuno Brahma-lokasahavyatāya dhammaɱ desentassa cittāni pasādesuɱ,||
te kāyassa bhedā param maraṇā sugatiɱ saggaɱ lokaɱ upapajjiɱsu.|| ||

Bhūta-pubbaɱ brāhmaṇa Dhammika, Hatthipālo nāma Satthā ahosi titthakaro kāmesu vīta-rāgo.|| ||

Hatthipālassa kho pana brāhmaṇa Dhammika,||
Satthuno anekāni sāvakasatāni ahesuɱ.|| ||

Hatthipālo Satthā sāvakānaɱ Brahma-lokasahavyatāya dhammaɱ deseti.|| ||

Ye kho pana brāhmaṇa Dhammika,||
Hatthipālassa Satthuno Brahma-lokasahavyatāya dhammaɱ desentassa cittāni na pasādesuɱ,||
te kāyassa bhedā param maraṇā apāyaɱ duggatiɱ vinipātaɱ Nirayaɱ upapajjiɱsu.|| ||

Ye kho pana brāhmaṇa Dhammika,||
Hatthipālassa Satthuno Brahma-lokasahavyatāya dhammaɱ desentassa cittāni pasādesuɱ,||
te kāyassa bhedā param maraṇā sugatiɱ saggaɱ lokaɱ upapajjiɱsu.|| ||

Bhūta-pubbaɱ brāhmaṇa Dhammika, [372] Jotipālo nāma Satthā ahosi titthakaro kāmesu vīta-rāgo.|| ||

Jotipālassa kho pana brāhmaṇa Dhammika,||
Satthuno anekāni sāvakasatāni ahesuɱ.|| ||

Jotipālo Satthā sāvakānaɱ Brahma-lokasahavyatāya dhammaɱ deseti.|| ||

Ye kho pana brāhmaṇa Dhammika,||
Jotipālassa Satthuno Brahma-lokasahavyatāya dhammaɱ desentassa cittāni na pasādesuɱ,||
te kāyassa bhedā param maraṇā apāyaɱ duggatiɱ vinipātaɱ Nirayaɱ upapajjiɱsu.|| ||

Ye kho pana brāhmaṇa Dhammika,||
Jotipālassa Satthuno Brahma-lokasahavyatāya dhammaɱ desentassa cittāni pasādesuɱ,||
te kāyassa bhedā param maraṇā sugatiɱ saggaɱ lokaɱ upapajjiɱsu.|| ||

Taɱ kiɱ maññasi brāhmaṇa Dhammika,||
yo ime cha Satthāre titthakare kāmesū vīta-rāge aneka-sataparivāre sasāvaka-saŋghe paduṭṭhacitto akkoseyya,||
paribhāseyya,||
bahuɱ so apuññaɱ pasaveyyā" ti?|| ||

"Evaɱ bhante."|| ||

8. "Yo kho brāhmaṇa Dhammika,||
ime cha Satthāre titthakare kāmesu vīta-rāge aneka-sataparivāre sasāvaka-saŋghe paduṭṭhacitto akkoseyya,||
paribhāseyya,||
bahuɱ so apuññaɱ pasaveyya.|| ||

Yo ekaɱ diṭṭhi-sampannaɱ puggalaɱ paduṭṭhacitto akkosati,||
paribhāsati,||
ayaɱ tato bahutaraɱ apuññaɱ pasavati.|| ||

Taɱ kissa hetu?|| ||

Nāhaɱ brāhmaṇa Dhammika,||
ito bahiddhā eva-rūpiɱ khantiɱ vadāmi yathā'maɱ sabrahma-cārīsu.|| ||

9. Tasmā ti ha brāhmaṇa Dhammika,||
evaɱ sikkhitabbaɱ:|| ||

"Na no sabrahma-cārisu cittāni paduṭṭhāni bhavissantī ti.|| ||

Evaɱ hi te brāhmaṇa Dhammika, sikkhitabban" ti.|| ||

[373] Sunetto Mūgapakkho ca Araṇemi ca brāhmaṇo||
Kuddālako ahu Satthā Hatthipālo ca māṇavo.

Jotipālo ca Govindo ahu satta purohito||
Ahiɱsaka atītaɱse cha Satthāro yasassino,

Nirāmagandhā karuṇe vimuttā kāmasaŋyojanātigā||
Kāmarāgaɱ virāchetvā brahma-lok'ūpagā ahu.

Ahesuɱ sāvakā tesaɱ anekāni satāni pi||
Nirāmagandhā karuṇe vimuttā kāmasaŋyojanātigā||
Kāmarāgaɱ virāchetvā Brahma-lokupagā ahu.

Ye te isī bāhirake vīta-rāge samāhite||
Paduṭṭhamanasaŋkappo yo naro paribhāsati,

Bahuñ ca so pasavati apuññaɱ tādiso naro||
Yo cekaɱ diṭṭhi-sampannaɱ bhikkhuɱ Buddhassa sāvakaɱ,

Paduṭṭhamanasaŋkappo yo naro paribhāsati.||
Ayaɱ tato bahutaraɱ apuññaɱ pasave naro.

Na sādhurūpaɱ āsīde diṭṭhi-ṭ-ṭhānappahāyinaɱ||
Sattamo puggalo eso ariyaSaŋghassa vuccati.

Avīta-rāgo kāmesu yassa pañc'indriyā mudu||
Saddhā satī ca viriyaɱ samatho ca vipassanā.

Tādisaɱ bhikkhum āsajja pubb'eva upahaññati.||
Attānaɱ upahantvāna pacchā aññaɱ vihiɱsati.

Yo ca rakkhati attānaɱ rakkhito tassa bāhiro||
Tasmā rakkheyya attānaɱ, akkhato paṇḍito sadā ti.|| ||

Dhammika Vagga Pañcamo

 


Contact:
E-mail
Copyright Statement