Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Chakka Nipāta
IX. Sīti Vagga

Sutta 87

Voropita Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[436]

[1][pts][than] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Chahi bhikkhave dhammehi samannāgato suṇanto pi Sad'Dhammaɱ abhabbo niyāmaɱ okkamituɱ kusalesu dhammesu sammattaɱ.|| ||

Katamehi chahi?|| ||

3. Mātā jīvitā voropitā hoti,||
pitā jivitā voropito hoti||
arahaɱ jivitā voropito hoti,||
Tathāgatassa duṭṭhena cittena lohitaɱ uppāditaɱ hoti,||
saŋgho bhinno hoti,||
duppañño hoti||
jaḷo ela-mūgo.|| ||

Imehi kho bhikkhave chahi dhammehi samannāgato suṇanto pi Sad'Dhammaɱ abhabbo niyāmaɱ okkamituɱ kusalesu dhammesu sammattaɱ.|| ||

 

§

 

4. Chahi bhikkhave dhammehi samannāgato suṇanto pi Sad'Dhammaɱ bhabbo niyāmaɱ okkamituɱ kusalesu dhammesu sammattaɱ.|| ||

Katamehi chahi?|| ||

[437] 5. Na mātā jivitā voropitā hoti,||
na pitā jivitā voropito hoti||
na arahaɱ jivitā voropito hoti,||
na Tathāgatassa duṭṭhena cittena lohitaɱ uppāditaɱ hoti,||
na saŋgho bhinno hoti,||
paññavā hoti||
ajaḷo anela-mūgo.|| ||

Imehi kho bhikkhave chahi dhammehi samannāgato suṇanto pi Sad'Dhammaɱ bhabbo niyāmaɱ okkamituɱ kusalesu dhammesu sammattan ti.|| ||

 


Contact:
E-mail
Copyright Statement