Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
Chakka Nipāta
IX. Sīti Vagga

Sutta 88

Sussūsati Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[437]

[1][pts][than] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Chahi bhikkhave dhammehi samannāgato suṇanto pi Sad'Dhammaɱ abhabbo niyāmaɱ okkamituɱ kusalesu dhammesu sammattaɱ.|| ||

Katamehi chahi?|| ||

Tathāgata-p-pavedite Dhamma-Vinaye desiyamāne na sussūsati,||
na sotaɱ odahati,||
na aññā-cittaɱ upaṭṭhapeti,||
anatthaɱ gaṇhāti,||
atthaɱ riñcati,||
ananulomikāya khantiyā samannāgato hoti.|| ||

Imehi kho bhikkhave chahi dhammehi samannāgato suṇanto pi Sad'Dhammaɱ abhabbo niyāmaɱ okkamituɱ kusalesu dhammesu sammattaɱ.|| ||

 

§

 

Chahi bhikkhave dhammehi samannāgato suṇanto pi Sad'Dhammaɱ bhabbo niyāmaɱ okkamituɱ kusalesu dhammesu sammattaɱ.|| ||

Katamehi chahi?|| ||

Tathāgata-p-pavedite Dhamma-Vinaye desiyamāne sussūsati,||
sotaɱ odahati,||
aññā-cittaɱ upaṭṭhapeti,||
atthaɱ gaṇhāti,||
anatthaɱ riñcati,||
anulomikāya khantiyā samannāgato hoti.|| ||

Imehi kho bhikkhave chahi dhammehi samannāgato suṇanto pi Sad'Dhammaɱ bhabbo niyāmaɱ okkamituɱ kusalesu dhammesu sammattan ti.|| ||

 


Contact:
E-mail
Copyright Statement