Dhātu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Tayo me bhikkhave dhammā.|| ||

Katame tayo?|| ||

Kāma-dhātu,||
vyāpāda-dhātu,||
vihiɱsā-dhātu.|| ||

Ime kho bhikkhave tayo dhammā.|| ||

Imesaɱ kho bhikkhave tiṇṇaɱ dhammānaɱ pahānāya tayo dhammā bhāvetabbā.|| ||

Katame tayo?|| ||

Kāma-dhātuyā pahānāya nekkhamma-dhātu bhāvetabbā.|| ||

■

Vyāpāda-dhātuyā pahānāya avyāpāda-dhātu bhāvetabbā.|| ||

■

Vihiɱsā-dhātuyā pahānāya avihiɱsā-dhātu bhāvetabbā.|| ||

Imesaɱ kho bhikkhave tiṇṇaɱ dhammānaɱ pahānāya||
ime tayo dhammā bhāvetabbā" ti.|| ||