Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
VIII. Aṭṭhaka Nipāta
I: Mettā Vagga

Sutta 8

Uttara Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[162]

[1][pts][than][bodh] EVAṂ ME SUTAṂ.|| ||

Ekaɱ samayaɱ āyasmā Uttaro Mahisavatthusmiɱ viharati Saŋkheyyake pabbate Dhavajālikāyaɱ.|| ||

Tatra kho āyasmā Uttaro bhikkhū āmantesi bhikkhavoti.

Bhadante ti te bhikkhū āyasmato Uttarassa paccassosuɱ.

Āyasmā Uttaro etad avoca:|| ||

2. Sādhāvuso bhikkhu kālena kālaɱ attavipattiɱ pacc-a-vekkhitā hoti,||
sādhāvuso bhikkhu kālena kālaɱ paravipattiɱ pacc-a-vekkhitā hoti,||
sādhāvuso bhikkhu kālena kālaɱ attasampattiɱ pacc-a-vekkhitā hoti,||
sādhāvuso bhikkhu kālena kālaɱ parasampattiɱ pacc-a-vekkhitā hotī ti.|| ||

3. Tena kho pana samayena Vessavaṇo Mahārājā uttarāya disāya dakkhiṇaɱ disaɱ gacchati kenaci-d-eva karaṇīyena.|| ||

Assosi kho Vessavaṇo Mahārājā āyasmato Uttarassa Mahisavatthusmiɱ Saŋkheyyake pabbate Dhavajālikāyaɱ bhikkhūnaɱ evaɱ dhammaɱ desentassa:|| ||

Sādhāvuso bhikkhu kālena kālaɱ attavipattiɱ pacc-a-vekkhitā hoti,||
sādhāvuso bhikkhu kālena kālaɱ paravipattiɱ pacc-a-vekkhitā hoti,||
sādhāvuso bhikkhu kālena kālaɱ attasampattiɱ pacc-a-vekkhitā hoti,||
sādhāvuso bhikkhu kālena kālaɱ parasampattiɱ pacc-a-vekkhitā hotī ti.|| ||

4. Atha kho Vessavaṇo Mahārājā seyyathā pi nāma balavā puriso sammiñjitaɱ vā bāhaɱ pasāreyya pasāritaɱ vā bāhaɱ sammiñjeyya,||
evam eva Mahisavatthusmiɱ Saŋkheyyake pabbate Dhavajālikāyaɱ antara-hito devesu Tāvatiɱsesu pātur ahosi.|| ||

Atha kho Vessavaṇo Mahārājā yena Sakko devānaɱ indo ten'upasankami,||
upasankamitvā Sakkaɱ devānam Indaɱ etad avoca,|| ||

'Yagghe mārisa, jāneyyāsi, eso āyasmā Uttaro Mahisavatthusmiɱ Saŋ- [163] kheyyake Pabbate Dhavajālikāyaɱ bhikkhūnaɱ evaɱ dhammaɱ deseti:|| ||

Sādhāvuso bhikkhu kālena kālaɱ attavipattiɱ pacc-a-vekkhitā hoti,||
sādhāvuso bhikkhu kālena kālaɱ paravipattiɱ pacc-a-vekkhitā hoti,||
sādhāvuso bhikkhu kālena kālaɱ attasampattiɱ pacc-a-vekkhitā hoti,||
sādhāvuso bhikkhu kālena kālaɱ parasampattiɱ pacc-a-vekkhitā hotī ti.|| ||

5. Atha kho Sakko devānaɱ indo seyyathā pi nāma balavā puriso sammiñjitaɱ vā bāhaɱ pasāreyya,||
pasāritaɱ vā bāhaɱ sammiñjeyya,||
evam eva devesu Tāvatiɱsesu antara-hito Mahisavatthusmiɱ Saŋkheyyake pabbate Dhavajālikāyaɱ āyasmato Uttarassa samukhe pātur ahosi.|| ||

Atha kho Sakko devānaɱ indo yen'āyasmā Uttaro ten'upasankami,||
upasankamitvā āyasmantaɱ Uttaraɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho Sakko devānaɱ indo āyasmantaɱ Uttaraɱ etad avoca:|| ||

Saccaɱ kira bhante, āyasmā Uttaro bhikkhūnaɱ evaɱ dhammaɱ desesi:|| ||

Sādhāvuso bhikkhu kālena kālaɱ attavipattiɱ pacc-a-vekkhitā hoti,||
sādhāvuso bhikkhu kālena kālaɱ paravipattiɱ pacc-a-vekkhitā hoti,||
sādhāvuso bhikkhu kālena kālaɱ attasampattiɱ pacc-a-vekkhitā hoti,||
sādhāvuso bhikkhu kālena kālaɱ parasampattiɱ pacc-a-vekkhitā hotī ti.|| ||

'Evaɱ devānam indā' ti.|| ||

'Kiɱ pana'idaɱ Bhante, āyasmato Uttarassa sakaɱ paṭibhānaɱ,||
udāhu tassa Bhagavato vacanaɱ arahato Sammā-sambuddhassā' ti?|| ||

6. 'Tena hi devānam Inda, upamaɱ te karissāmi,||
upamāya pi idh'ekacce viññū purisā bhāsitassa atthaɱ ājānanti.|| ||

Seyyathā pi devānam Inda, gāmassa vā nigamassa vā avidūre mahādhaññarāsi,||
tato mahā-jana-kāyo dhaññaɱ āhareyya kājehi pi piṭakehi pi ucchaŋgehi [164] pi añjalīhi pi.|| ||

Yo nu kho devānam Inda taɱ mahā-jana-kāyaɱ upasankamitvā evaɱ puccheyya:|| ||

Kuto imaɱ dhaññaɱ āharathā ti?|| ||

Kathaɱ taɱ vyākaramāno nu kho devānam Inda,||
so mahā-jana-kāyo sammā vyākaramāno vyākareyyā' ti?|| ||

'Amumhā mahādhaññarāsimhā āharāmā ti kho bhante,||
so mahā-jana-kāyo sammā vyākaramāno vyākareyyā' ti.|| ||

Evam eva kho devānam Inda,||
yaɱ kiñci su-bhāsitaɱ sabbaɱ taɱ tassa Bhagavato vacanaɱ arahato Sammā-sambuddhassa,||
tato upādāy'upādāya mayañ c'aññe ca bhaṇāmā' ti.|| ||

7. Acchariyaɱ bhante, abbhutaɱ bhante,||
yāva su-bhāsitam idaɱ Bhante,||
āyasmatā Uttarena:|| ||

"Yaɱ kiñci su-bhāsitaɱ sabbaɱ taɱ tassa Bhagavato vacanaɱ arahato Sammā-sambuddhassa,||
tato upādāyupādāya mayañ c'aññe ca bhaṇāmā' ti.|| ||

Ekam idaɱ bhante, Uttara,||
samayaɱ Bhagavā Rājagahe viharati||
Gijjhakuṭe pabbate acira-pakkante Devadatte.|| ||

Tatra kho Bhagavā Devadattaɱ ārabbha bhikkhū āmantesi:|| ||

Sādhāvuso bhikkhu kālena kālaɱ attavipattiɱ pacc-a-vekkhitā hoti,||
sādhāvuso bhikkhu kālena kālaɱ paravipattiɱ pacc-a-vekkhitā hoti,||
sādhāvuso bhikkhu kālena kālaɱ attasampattiɱ pacc-a-vekkhitā hoti,||
sādhāvuso bhikkhu kālena kālaɱ parasampattiɱ pacc-a-vekkhitā hotī ti.|| ||

Aṭṭhahi bhikkhave, aSad'Dhammehi abhibhuto pariyādinna-citto Devadatto āpāyiko nerayiko kappaṭṭho atekiccho.|| ||

Katamehi aṭṭhahi?|| ||

Lābhena bhikkhave, abhibhūto pariyādinna-citto Devadatto āpāyiko nerayiko kappaṭṭho atekiccho.|| ||

Alābhena bhikkhave abhibhūto pariyādinna-citto Devadatto āpāyiko nerayiko kappaṭṭho atekiccho.|| ||

Yasena bhikkhave, abhibhūto pariyādinna-citto Devadatto āpāyiko nerayiko kappaṭṭho atekiccho.|| ||

Ayasena bhikkhave, abhibhūto pariyādinna-citto Devadatto āpāyiko nerayiko kappaṭṭho atekiccho.|| ||

Sakkārena bhikkhave, abhibhūto pariyādinna-citto Devadatto āpāyiko nerayiko kappaṭṭho atekiccho.|| ||

Asakkārena bhikkhave, abhibhūto pariyādinna-citto Devadatto āpāyiko nerayiko kappaṭṭho atekiccho.|| ||

Pāpicchatāya bhikkhave, abhibhūto pariyādinna-citto Devadatto āpāyiko nerayiko kappaṭṭho atekiccho.|| ||

[165] Pāpa-mittatāya bhikkhave, abhibhūto pariyādinna-citto Devadatto āpāyiko nerayiko kappaṭṭho atekiccho.|| ||

Imehi kho bhikkhave, aṭṭhahi aSad'Dhammehi aebhibhūto pariyādinna-citto Devadatto āpāyiko nerayiko kappaṭṭho, atekicchā.|| ||

Sādhu bhikkhave bhikkhu uppannaɱ lābhaɱ abhibhuyya abhibhuyya vihareyya.|| ||

Uppannaɱ alābhaɱ abhibhuyya abhibhuyya vihareyya.|| ||

Uppannaɱ yasaɱ abhibhuyya abhibhuyya vihareyya.|| ||

Uppannaɱ ayasaɱ abhibhuyya abhibhuyya vihareyya.|| ||

Uppannaɱ sakkāraɱ abhibhuyya abhibhuyya vihareyya.|| ||

Uppannaɱ asakkāraɱ abhibhuyya abhibhuyya vihareyya.|| ||

Uppannaɱ pāpicchataɱ abhibhuyya abhibhuyya vihareyya.|| ||

Uppannaɱ pāpa-mittataɱ abhibhuyya abhibhuyya vihareyya.|| ||

8. Kathañ ca bhikkhave, bhikkhu attha-vasaɱ paṭicca uppannaɱ lābhaɱ abhibhuyya abhibhuyya vihareyya,||
uppannaɱ alābhaɱ abhibhuyya abhibhuyya vihareyya,||
uppannaɱ yasaɱ abhibhuyya abhibhuyya vihareyya,||
uppannaɱ ayasaɱ abhibhuyya abhibhuyya vihareyya,||
uppannaɱ sakkāraɱ abhibhuyya abhibhuyya vihareyya,||
uppannaɱ asakkāraɱ abhibhuyya abhibhuyya vihareyya,||
uppannaɱ pāpicchataɱ abhibhuyya abhibhuyya vihareyya,||
uppannaɱ pāpa-mittataɱ abhibhuyya abhibhuyya vihareyya.|| ||

Yaɱ hi'ssa bhikkhave uppannaɱ lābhaɱ anabhibhuyya viharato uppajjeyyuɱ āsavā vighāta-pariḷāhā,||
uppannaɱ lābhaɱ abhibhuyya viharato evaɱsa te āsavā vighāta-pariḷāhā na honti.|| ||

Yaɱ hi'ssa bhikkhave uppannaɱ alābhaɱ anabhibhuyya viharato uppajjeyyuɱ āsavā vighāta-pariḷāhā,||
uppannaɱ alābhaɱ abhibhuyya viharato evaɱsa te āsavā vighāta-pariḷāhā na honti.|| ||

Yaɱ hi'ssa bhikkhave uppannaɱ yasaɱ anabhibhuyya viharato uppajjeyyuɱ āsavā vighāta-pariḷāhā,||
uppannaɱ yasaɱ abhibhuyya viharato evaɱsa te āsavā vighāta-pariḷāhā na honti.|| ||

Yaɱ hi'ssa bhikkhave uppannaɱ ayasaɱ anabhibhuyya viharato uppajjeyyuɱ āsavā vighāta-pariḷāhā,||
uppannaɱ ayasaɱ abhibhuyya viharato evaɱsa te āsavā vighāta-pariḷāhā na honti.|| ||

Yaɱ hi'ssa bhikkhave uppannaɱ sakkāraɱ anabhibhuyya viharato uppajjeyyuɱ āsāvā vighāta-pariḷāhā,||
uppannaɱ sakkāraɱ abhibhuyya viharato evaɱsa te āsavā vighāta-pariḷāhā na honti.|| ||

Yaɱ hi'ssa bhikkhave uppannaɱ asakkāraɱ anabhibhuyya viharato uppajjeyyuɱ āsavā vighāta-pariḷāhā,||
uppannaɱ asakkāraɱ abhibhuyya viharato evaɱsa te āsavā vighāta-pariḷāhā na honti.|| ||

Yaɱ hi'ssa bhikkhave uppannaɱ pāpicchataɱ anabhibhuyya viharato uppajjeyyu āsavā vighāta-pariḷāhā,||
uppannaɱ pāpicchataɱ abhibhuyya viharato evaɱsa te āsavā vighāta-pariḷāhā na honti.|| ||

Yaɱ hi'ssa bhikkhave uppannaɱ pāpa-mittataɱ anabhibhuyya viharato uppajjeyyuɱ āsāvā vighāta-pariḷāhā,||
uppannaɱ pāpa-mittataɱ abhibhuyya viharato evaɱsa te āsavā vighāta-pariḷāhā na honti.|| ||

Idaɱ kho bhikkhave, bhikkhu attha-vasaɱ paṭicca uppannaɱ lābhaɱ abhibhuyya abhibhuyya vihareyya,||
uppannaɱ alābhaɱ abhibhuyya abhibhuyya vihareyya,||
uppannaɱ yasaɱ abhibhuyya abhibhuyya vihareyya,||
uppannaɱ ayasaɱ abhibhuyya abhibhuyya vihareyya,||
uppannaɱ sakkāraɱ abhibhuyya abhibhuyya vihareyya,||
uppannaɱ asakkāraɱ abhibhuyya abhibhuyya vihareyya,||
uppannaɱ pāpicchataɱ abhibhuyya abhibhuyya vihareyya,||
uppannaɱ pāpa-mittataɱ abhibhuyya abhibhuyya vihareyya.|| ||

Tasmā ti ha bhikkhave evaɱ sikkhitabbam:|| ||

[166] 9. Uppannaɱ lābhaɱ abhibhuyya abhibhuyya viharissāma,||
uppannaɱ alābhaɱ abhibhuyya abhibhuyya viharissāma,||
uppannaɱ yasaɱ abhibhuyya abhibhuyya viharissāma,||
uppannaɱ ayasaɱ abhibhuyya abhibhuyya viharissāma,||
uppannaɱ sakkāraɱ abhibhuyya abhibhuyya viharissāma,||
uppannaɱ asakkāraɱ abhibhuyya abhibhuyya viharissāma,||
uppannaɱ pāpicchataɱ abhibhuyya abhibhuyya viharissāma,||
uppannaɱ pāpa-mittataɱ abhibhuyya abhibhuyya viharissāma ti.|| ||

Evaɱ hi vo bhikkhave sikkhitabban ti.|| ||

10. Yāvatā bhante Uttara, manussesu catasso parisā:||
bhikkhū bhikkhuniyo upāsakā upāsikāyo||
nāyaɱ dhamma-pariyāyo kismiñci patiṭṭhito.|| ||

Uggaṇhātu bhante,||
āyasmā Uttaro imaɱ dhamma-pariyāyaɱ,||
pariyāpuṇātu bhante,||
āyasmā Uttaro imaɱ dhamma-pariyāyaɱ,||
dhāretu bhante,||
āyasmā Uttaro imaɱ dhamma-pariyāyaɱ,||
attha-saɱhito ayaɱ bhante,||
dhamma-pariyāyo ādibrahma-cariyako' ti.|| ||

 


Copyright Statement