Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
VIII. Aṭṭhaka Nipāta
I: Mettā Vagga

Sutta 9

Nanda Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[166]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"'Kulaputto' ti bhikkhave,||
Nandaɱ sammā vadamāno vadeyya:||
balavāti bhikkhave,||
Nandaɱ sammā vadamāno vadeyya;||
'pāsādiko' ti bhikkhave,||
Nandaɱ sammā vadamāno vadeyya;||
'tibbarāgo' ti bhikkhave,||
Nandaɱ sammā vadamāno vadeyya.|| ||

 

§

 

Kim aññatra bhikkhave,||
Nando indriyesu gutta-dvāro||
bhojanesu matt'aññū||
jāgariyaɱ anuyutto||
sati-sampajaññena samannāgato||
yena Nando Sakkoti paripuṇṇaɱ parisuddhaɱ Brahma-cariyaɱ carituɱ?|| ||

 

§

 

2. Tatr'idaɱ bhikkhave,||
Nandassa indriyesu gutta-dvāratāya hoti:||
sace [167] bhikkhave,||
Nandassa puratthimā disā āloketabbā hoti,||
sabbaɱ cetasā samannā-haritvā Nando puratthimaɱ disaɱ āloketi,||
'Evaɱ me puratthimaɱ disaɱ ālokayato na abhijjhā domanassā pāpakā akusalā dhammā anvāssavissantī' ti,||
itiha tattha sampajāno hoti.|| ||

Sace bhikkhave,||
Nandassa pacchimā disā āloketabbā hoti.|| ||

Sabbaɱ cetasā samannā-haritvā Nando pacchimaɱ disaɱ āloketi,||
'Evaɱ me pacchimaɱ disaɱ ālokayato na abhijjhā domanassā pāpakā akusalā dhammā anvāssavissantī'ti,||
itiha tattha sampajāno hoti.|| ||

Sace bhikkhave,||
Nandassa uttarā disā āloketabbā hoti.|| ||

Sabbaɱ cetasā samannā-haritvā Nando uttaraɱ disaɱ āloketi,||
'Evaɱ me uttaraɱ disaɱ ālokayato na abhijjhā domanassā pāpakā akusalā dhammā anvāssavissantī' ti,||
itiha tattha sampajāno hoti.|| ||

Sace bhikkhave,||
Nandassa dakkhiṇā disā āloketabbā hoti,||
sabbaɱ cetasā samannā-haritvā Nando dakkhiṇaɱ disaɱ āloketi,||
'Evaɱ me dakkhiṇaɱ disaɱ ālokayato na abhijjhā domanassā pāpakā akusalā dhammā anvāssavissantī' ti,||
itiha tattha sampajāno hoti.|| ||

Sace bhikkhave,||
Nandassa uddhaɱ ulloketabbā hoti.|| ||

Sabbaɱ cetasā samannā-haritvā Nando uddhaɱ ulloketi,||
'Evaɱ me uddhaɱ ullokayato na abhijjhā domanassā pāpakā akusalā dhammā anvāssavissantī' ti,||
itiha tattha sampajāno hoti.|| ||

Sace bhikkhave,||
Nandassa adho oloketabbā hoti.|| ||

Sabbaɱ cetasā samannā-haritvā Nando adho oloketi,||
'Evaɱ me adho olokayato na abhijjhā domanassā pāpakā akusalā dhammā anvāssavissantī' ti,||
itiha tattha sampajāno hoti.|| ||

Sace bhikkhave,||
Nandassa anudisā anuviloketabbā hoti.|| ||

Sabbaɱ cetasā samannā-haritvā Nando anudisaɱ anuviloketi,||
'Evaɱ me anudisaɱ anuvilokayato na abhijjhā domanassā pāpakā akusalā dhammā anvāssavissantī' ti.|| ||

Iti ha tattha sampajāno hoti.|| ||

Idaɱ kho bhikkhave,||
Nandassa indriyesu gutta-dvāratāya hoti.|| ||

3. Tatr'idaɱ bhikkhave,||
Nandassa bhojane matt'aññutāya hoti?|| ||

Idha bhikkhave Nando paṭisaŋkhā yoniso āhāraɱ āhāreti:||
n'eva davāya||
na madāya||
na maṇḍanāya||
na vibhusanāya,||
yāva-d-eva imassa kāyassa ṭhitiyā yāpanāya vihiɱs'ūparatiyā brahma-cariy-ā-nuggahāya,||
'Iti purāṇañ ca vedanaɱ paṭihaŋkhāmi,||
navañ ca vedanaɱ na uppādessāmi,||
yātrā ca me bhavissati,||
anavajjatā ca phāsu-vihāro cā' ti.|| ||

Idaɱ kho bhikkhave,||
Nandassa bhojane matt'aññutāya hoti.|| ||

4. Tatr'idaɱ bhikkhave,||
Nandassa jāgariyānuyogasmiɱ hoti.|| ||

[168] Idha bhikkhave,||
Nando divasaɱ caŋkamena nisajjāya āvaraṇīyehi dhammehi cittaɱ parisodheti.|| ||

Rattiyā paṭhamaɱ yāmaɱ caŋkamena nisajjāya āvaraṇīyehi dhammehi cittaɱ parisodheti.|| ||

Rattiyā majjhimaɱ yāmaɱ dakkhiṇena passena sīhaseyyaɱ kappeti.|| ||

Pāde pādaɱ accādhāya sato sampajāno uṭṭhāna-saññaɱ mana-sikaritvā.|| ||

Rattiyā pacchimaɱ yāmaɱ paccu-ṭṭhāya caŋkamena nisajjāya āvaraṇīyehi dhammehi cittaɱ parisodheti.|| ||

Idaɱ kho bhikkhave,||
Nandassa jāgariyānuyogasmiɱ hoti.|| ||

5. Tatr'idaɱ bhikkhave,||
Nandassa sati-sampajaññasmiɱ hoti?|| ||

Idha bhikkhave, Nandassa viditā vedanā uppajjanti,||
viditā upaṭṭhahanti,||
viditā abbhatthaɱ gacchanti,||
viditā saññā uppajjanti,||
viditā upaṭṭhāhanti,||
viditā abbhatthaɱ gacchanti.|| ||

Viditā vitakkā uppajjanti,||
viditā upaṭṭhahanti,||
viditā abbhatthaɱ gacchanti,||
idaɱ kho bhikkhave,||
Nandassa sati-sampajaññasmiɱ hoti.|| ||

Kim aññatra bhikkhave,||
Nando indriyesu gutta-dvāro||
bhojanesu matt'aññū||
jāgariyaɱ anuyutto||
sati-sampajaññena samannāgato,||
yena Nando Sakkoti paripuṇṇaɱ parisuddhaɱ Brahma-cariyaɱ carituɱ?|| ||

 


Contact:
E-mail
Copyright Statement