Aŋguttara Nikāya


[Site Map]  [Home]  [Sutta Indexes]  [Glossology]  [Site Sub-Sections]


 

Aŋguttara Nikāya
VIII. Aṭṭhaka Nipāta
II: Mahā Vagga

Sutta 15

Mala Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[195]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Aṭṭh'imāni bhikkhave malāni.|| ||

Katamāni aṭṭha?|| ||

3. Asajjhāya malā bhikkhave mantā,||
anuṭṭhāna-malā bhikkhave gharā,||
malaɱ bhikkhave vaṇṇassa kosajjaɱ,||
pamādo bhikkhave rakkhato malaɱ,||
malaɱ bhikkhave itthiyā du-c-caritaɱ||
maccheraɱ bhikkhave dadato malaɱ,||
malā bhikkhave pāpakā akusalā dhammā asmiɱ loke parambhi ca,||
tato ca bhikkhave malā malataraɱ,||
avijjā paramaɱ malaɱ.|| ||

Imāni kho bhikkhave aṭṭha malānī ti.|| ||

 


 

Asajjhāya malā mantā anuṭṭhāna-malā gharā,||
Malaɱ vaṇṇassa kosajjaɱ pamādo rakkhato malaɱ|| ||

Malitthiyā du-c-caritaɱ maccheraɱ dadato malaɱ,||
Malā ve pāpakā dhammā asmiɱ loke parambhi ca||
Tato malā malataraɱ avijjā paramaɱ malan ti.|| ||

 


Copyright Statement