Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
VIII. Aṭṭhaka Nipāta
II: Mahā Vagga

Sutta 20

Uposatha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[204]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati||
Pubbārāme Migāra-mātu pāsāde.|| ||

Tena kho pana samayena Bhagavā tadah'uposathe bhikkhu-Saŋgha-parivuto nisinno hoti.|| ||

Atha kho āyasmā Ānando abhikkantāya rattiyā nikkhante paṭhame yāme uṭṭhāy āsanā ekaɱsaɱ uttarā-saŋgaɱ karitvā yena Bhagavā ten'añjaliɱ paṇāmetvā Bhagavantaɱ etad avoca:|| ||

Abhikkantā bhante ratti nikkhanto paṭhamo yāmo, cira-nisinno bhikkhu-saŋgho, uddisatu bhante Bhagavā bhikkhūnaɱ Pātimokkhanti.|| ||

Evaɱ vutte Bhagavā tuṇhī ahosi.|| ||

[205] 2. Dutiyam pi kho āyasmā Ānando abhikkantāya rattiyā,||
nikkhante majjhime yāme,||
uṭṭhāy āsanā ekaɱsaɱ uttarā-saŋgaɱ karitvā yena Bhagavā ten'añjaliɱ paṇāmetvā Bhagavantaɱ etad avoca:|| ||

'Abhikkantā bhante, ratti,||
nikkhanto majjhimo yāmo,||
cira-nisinno bhikkhu-saŋgho,||
uddisatu bhante, Bhagavā bhikkhūnaɱ Pātimokkhan' ti|| ||

Dutiyam pi kho Bhagavā tuṇhī ahosi.|| ||

3. Tatiyam pi kho āyasmā Ānando abhikkantāya rattiyā,||
nikkhante pacchime yāme,||
uddhaste aruṇe nandi-mukhiyā rattiyā,||
uṭṭhāy āsanā ekaɱsaɱ uttarā-saŋgaɱ karitvā yena Bhagavā ten'añjaliɱ paṇāmetvā Bhagavantaɱ etad avoca:|| ||

'Abhikkantā bhante, ratti,||
nikkhanto pacchimo yāmo,||
uddhastaɱ aruṇaɱ nandi-mukhī ratti,||
cira-nisinno bhikkhu-saŋgho,||
uddisatu bhante, Bhagavā bhikkhūnaɱ Pātimokkhan' ti.|| ||

'Aparisuddhā Ānanda parisā' ti.|| ||

4. Atha kho āyasmato Mahā Moggallānassa etad ahosi:|| ||

'Kiɱ nu kho Bhagavā puggalaɱ sandhāya evam āha:|| ||

"Aparisuddhā Ānanda parisā" ti?|| ||

Atha kho āyasmā Mahā Moggallāno sabbā-vantaɱ bhikkhu-Saŋghaɱ cetasā ceto paricca manas'ākāsi.|| ||

Addasā kho āyasmā Mahā Moggallāno taɱ puggalaɱ dussīlaɱ pāpa-dhammaɱ asuciɱ-saŋkassa-rasamā-cāraɱ paṭi-c-channa-kammantaɱ assamaṇaɱ samaṇa-paṭiññaɱ abrahma-cāriɱ brahma-cārī-paṭiññaɱ antopūtiɱ ava-s-sutaɱ kasambu-jātaɱ majjhe bhikkhu-Saŋghassa nisinnaɱ,||
disvā uṭṭhāy āsanā yena so puggalo ten'upasankami.|| ||

Upasaŋkamitvā taɱ puggalaɱ etad avoca:|| ||

'Uṭṭheh'āvuso,||
diṭṭho'si Bhagavatā,||
n'atthi te bhikkhūhi saddhiɱ saɱvāso' ti.|| ||

Evaɱ vutte so puggalo tuṇhī ahosi.|| ||

Dutiyam pi kho āyasmā Mahā Moggallāno taɱ puggalaɱ etad avoca:|| ||

'Uṭṭheh'āvuso,||
diṭṭho'si Bhagavatā,||
n'atthi te bhikkhūhi saddhiɱ saɱvāso' ti.|| ||

Dutiyam pi kho so puggalo tuṇhī ahosi.|| ||

Tatiyam pi kho āyasmā Mahā Moggallāno taɱ puggalaɱ [206] etad avoca:|| ||

'Uṭṭheh'āvuso,||
diṭṭho'si Bhagavatā,||
n'atthi te bhikkhūhi saddhiɱ saɱvāso' ti.|| ||

Tatiyam pi kho so puggalo tuṇhī ahosi.|| ||

5. Atha kho āyasmā Mahā Moggallāno taɱ puggalaɱ bāhāyaɱ gahetvā bahi-dvāra-koṭṭhakā nikkhāmetvā sūcighaṭikaɱ datvā yena Bhagavā ten'upasankami.|| ||

Upasaŋkamitvā Bhagavantaɱ etad avoca:|| ||

'Nikkhāmito so bhante puggalo mayā,||
parisuddhā parisā,||
uddisatu bhante Bhagavā bhikkhūnaɱ Pātimokkhan' ti.|| ||

'Acchariyaɱ Moggallāna,||
abbhutaɱ Moggallāna,||
yāva bāhāgahaṇā ' pi nāma so mogha-puriso āgamessatī ti.|| ||

Atha kho Bhagavā bhikkhū āmantesi:|| ||

6. Tumhe'va dāni bhikkhave, uposathaɱ kareyyātha,||
Pātimokkhaɱ uddiseyyātha.|| ||

Na dān'āhaɱ bhikkhave, ajja-t-agge uposathaɱ karissāmi,||
Pātimokkhaɱ uddisissāmi.|| ||

Aṭṭhānam etaɱ bhikkhave, anavakāso,||
yaɱ Tathāgato aparisuddhāya parisāya uposathaɱ kareyya Pātimokkhaɱ uddiseyya.|| ||

 


 

'Aṭṭh'ime bhikkhave, mahā-samudde acchariyā abbhutā dhammā ye disvā disvā Asurā mahā-samudde abhiramanti.|| ||

Katame aṭṭha?|| ||

7. Mahā-samuddo bhikkhave, anupubba-ninno anupubba-poṇo anupubba-pabbhāro na āyataken'eva papāto.|| ||

Yam pi bhikkhave, mahā-samuddo anupubba-ninno anupubba-poṇo anupubba-pabbhāro na āyataken'eva papāto,||
ayaɱ bhikkhave, mahā-samudde paṭhamo acchariyo abbhuto dhammo,||
yaɱ disvā disvā Asurā mahā-samudde abhiramanti.|| ||

8. Puna ca paraɱ bhikkhave, mahā-samuddo ṭhita-dhammo velaɱ nāti-vattati.|| ||

Yam pi bhikkhave, mahā-samuddo ṭhita-dhammo velaɱ nāti-vattati,||
ayaɱ bhikkhave, mahā-samudde dutiyo acchariyo abbhuto dhammo,||
yaɱ disvā disvā Asurā mahā-samudde abhiramanti.|| ||

9. Puna ca paraɱ bhikkhave, mahā-samuddo na matena kuṇapena saɱvasati,||
yaɱ hoti mahā-samudde mataɱ kuṇapaɱ taɱ khippaɱ eva tīraɱ vāheti, thalaɱ ussādeti.|| ||

Yam pi bhikkhave, mahā-samuddo na matena kuṇapena saɱvasati.|| ||

Yaɱ hoti mahā-samudde mataɱ kuṇapaɱ taɱ khippaɱ eva tīraɱ vāheti, thalaɱ ussādeti,||
ayaɱ bhikkhave, mahā-samudde tatiyo acchariyo abbhuto dhammo,||
yaɱ disvā disvā Asurā mahā-samudde abhiramanti.|| ||

10. Puna ca paraɱ bhikkhave, yā kāci mahā-nadiyo,||
seyyath'īdaɱ:||
Gaŋgā,||
Yamunā,||
Aciravatī,||
Sarabhū,||
Mahī,||
tā mahā-samuddaɱ patvā jahanti purimāni nāma-gottāni,||
mahā-samuddo tv'eva saŋkhaɱ gacchanti.|| ||

Yam pi bhikkhave, yā kāci mahā-nadiyo,||
seyyath'īdaɱ:||
Gaŋgā,||
Yamunā,||
Aciravatī,||
Sarabhū,||
Mahī,||
tā mahā-samuddaɱ patvā jahanti purimāni nāma-gottāni,||
mahā-samuddo tv'eva saŋkhaɱ gacchanti,||
ayaɱ bhikkhave, mahā-samudde catuttho acchariyo abbhuto dhammo,||
yaɱ disvā disvā Asurā mahā-samudde abhiramanti.|| ||

11. Puna ca paraɱ bhikkhave, yā kā ci loke savantiyo mahā-samuddaɱ appenti,||
yā kā ci antalikkhā dhārā papatanti,||
na tena mahā-samuddassa ūnattaɱ vā pūrattaɱ vā paññāyati.|| ||

Yam pi bhikkhave, yā kā ci loke savantiyo mahā-samuddaɱ appenti,||
yā kā ci antalikkhā dhārā papatanti,||
na tena mahā-samuddassa ūnattaɱ vā pūrattaɱ vā paññāyati,||
ayaɱ bhikkhave, mahā-samudde pañcamo acchariyo abbhuto dhammo,||
yaɱ disvā disvā Asurā mahā-samudde abhiramanti.|| ||

12. Puna ca paraɱ bhikkhave, mahā-samuddo eka-raso loṇa-raso.|| ||

Yam pi bhikkhave, mahā-samuddo eka-raso loṇa-raso,||
ayaɱ bhikkhave, mahā-samudde chaṭṭho acchariyo abbhuto dhammo,||
yaɱ disvā disvā Asurā mahā-samudde abhiramanti.|| ||

13. Puna ca paraɱ bhikkhave, mahā-samuddo bahu-ratano aneka-ratano,||
tatr'imāni ratanāni,||
seyyath'īdaɱ:||
muttā||
maṇi,||
veḷuriyo,||
saŋkho,||
silā,||
pavāḷaɱ||
rajataɱ,||
jāta-rūpaɱ,||
lohitaŋko,||
masāragallaɱ.|| ||

Yam pi bhikkhave, mahā-samuddo bahu-ratano aneka-ratano,||
tatr'imāni ratanāni,||
seyyath'īdaɱ:||
muttā,||
maṇi,||
veḷuriyo,||
saŋkho,||
silā,||
pavāḷaɱ,||
rajataɱ,||
jāta-rūpaɱ,||
lohitaŋko,||
masāragallaɱ,||
ayaɱ bhikkhave, mahā-samudde sattamo acchariyo abbhuto dhammo,||
yaɱ disvā disvā Asurā mahā-samudde abhiramanti.|| ||

14. Puna ca paraɱ bhikkhave, mahā-samuddo mahataɱ bhūtānaɱ āvāso.|| ||

Tatr'ime bhūtā:||
timī||
timiŋgalā||
[207] timiramiŋgalā||
Asurā,||
nāgā,||
gandhabbā.|| ||

Santi mahā-samudde yojana-satikā pi atta-bhāvā,||
dvi-yojana-satikā pi atta-bhāvā,||
ti-yojana-satikā pi atta-bhāvā,||
catu-yojana-satikā pi atta-bhāvā,||
pañca-yojana-satikā pi atta-bhāvā.|| ||

Yam pi bhikkhave, mahā-samuddo mahataɱ bhūtānaɱ āvāso,||
tatirame bhutā:||
timi,||
timiŋgalā||
timiramiŋgalā,||
Asurā,||
nāgā,||
gandhabbā;||
santi mahā-samudde yojana-satikā pi atta-bhāvā,||
dvi-yojana-satikā pi atta-bhāvā,||
ti-yojana-satikā pi atta-bhāvā,||
catu-yojana-satikā pi atta-bhāvā,||
pañca-yojana-satikā pi atta-bhāvā,||
ayaɱ bhikkhave, mahā-samudde aṭṭhamo acchariyo abbhuto dhammo,||
yaɱ disvā disvā Asurā mahā-samudde abhiramanti.|| ||

Ime kho bhikkhave, mahā-samudde aṭṭha acchariyā abbhutā dhammā,||
ye disvā disvā Asurā mahā-samudde abhiramantī' ti.|| ||

15. 'Evaɱ eva kho, bhikkhave imasmiɱ Dhamma-Vinaye acchariyā abbhutā dhammā,||
ye disvā disvā bhikkhū imasmiɱ Dhamma-Vinaye abhiramanti.|| ||

Katame aṭṭha?|| ||

16. Seyyathā pi bhikkhave mahā-samuddo anupubba-ninno anupbbapoṇo anupubba-pabbhāro na āyataken'eva papāto,||
evam eva kho bhikkhave imasmiɱ Dhamma-Vinaye anupubbasikkhā anupubbakiriyā anupubbapaṭipadā,||
na āyataken'eva aññāpaṭivedho.|| ||

Yam pi bhikkhave, imasmiɱ Dhamma-Vinaye anupubbasikkhā anupbbakiriyā anupubbapaṭipadā,||
na āyataken'eva aññāpaṭivedho,||
ayaɱ bhikkhave, imasmiɱ Dhamma-Vinaye paṭhamo acchariyo abbhuto dhammo,||
yaɱ disvā disvā bhikkhū imasmiɱ Dhamma-Vinaye abhiramanti.|| ||

17. Seyyathā pi bhikkhave, mahā-samuddo ṭhita-dhammo velaɱ nāti-vattati,||
evam eva kho bhikkhave, yaɱ mayā sāvakānaɱ sikkhāpadaɱ paññattaɱ,||
taɱ mama sāvakā jīvitahetū pi nātikkamanti.|| ||

Yam pi bhikkhave, mayā sāvakānaɱ sikkhāpadaɱ paññattaɱ,||
taɱ mama sāvakā jīvitahetu pi nātikkamanti,||
ayaɱ bhikkhave, imasmiɱ Dhamma-Vinaye dutiyo acchariyo abbhuto dhammo,||
yaɱ disvā disvā bhikkhū imasmiɱ Dhamma-Vinaye abhiramanti.|| ||

18. Seyyathā pi bhikkhave mahā-samuddo na matena kuṇapena saɱvasati,||
yaɱ hoti mahā-samudde mataɱ kuṇapaɱ,||
taɱ khippam eva tiraɱ vāheti thalaɱ ussādeti,||
evam eva kho bhikkhave, yo so puggalo dussīlo pāpa-dhammo asucisaŋkassarasamā-cāro paṭi-c-channa-kammanto assamaṇo samaṇa-paṭiñño abrahma-cārī brahma-cārīpaṭiñño,||
antopūti avassuto kasambu-jāto,
na tena saŋgho saɱvasati||
khippam eva sanni-patitvā ukkhipati,
kiñ cāpi so hoti majjhe bhikkhu-Saŋghassa nisinno,||
atha kho so ārakā'va Saŋghamhā saŋgho ca tena.|| ||

Yam pi bhikkhave yo so puggalo dussīlo pāpa-dhammo asucisaŋkassarasamā-cāro paṭi-c-channa-kammanto assamaṇo samaṇa-paṭiñño abrahma-cārī brahma-cārīpaṭiñño,||
antopūti avassuto kasambu-jāto,||
na tena saŋgho saɱvasati,||
khippam eva sanni-patitvā ukkhipati,||
kiñ cāpi so hoti majjhe bhikkhu-Saŋghassa nisinno,||
atha kho so ārakā'va Saŋghamhā saŋgho ca tena,||
ayaɱ bhikkhave, imasmiɱ Dhamma-Vinaye tatiyo acchariyo abbhuto dhammo,||
yaɱ disvā disvā bhikkhū imasmiɱ Dhamma-Vinaye abhiramanti.|| ||

19. Seyyathā pi bhikkhave, yā kāci mahā-nadiyo,||
seyyath'īdaɱ:||
Gaŋgā||
Yamunā||
Aciravatī||
Sarabhu||
Mahī,||
tā mahā-samuddaɱ patvā jahanti purimāni nāma-gottāni,||
mahā-samuddo tv'eva saŋkhaɱ gacchanti,||
evam eva kho bhikkhave, cattāro'me vaṇṇā,||
khattiyā||
brāhmaṇā||
vessā||
suddā,||
te Tathāgata-p-pavedite Dhamma-Vinaye agārasmā anagāriyaɱ pabba-jitvā jahanti purimāni nāma-gottāni,||
'Samaṇā Sakya-puttiyā'||
tv'eva saŋkhaɱ gacchanti.|| ||

Yam pi bhikkhave, cattāro'me vaṇṇā||
khattiyā||
brāhmaṇā||
vessā||
suddā,||
te Tathāgata-p-pavedite Dhamma-Vinaye agārasmā anagāriyaɱ pabba-jitvā jahanti purimāni nāma-gottāni,||
'Samaṇā Sakya-puttiyā'||
tv'eva saŋkhaɱ gacchanti,||
ayaɱ bhikkhave, imasmiɱ Dhamma-Vinaye catuttho acchariyo abbhuto dhammo,||
yaɱ disvā disvā bhikkhū imasmiɱ Dhamma-Vinaye abhiramanti.|| ||

20. Seyyathā pi bhikkhave, yā ca loke savantiyo mahā-samuddaɱ appenti,||
yā kāci antalikkhā dhārā papatanti,||
na tena mahā-samuddassa ūnattaɱ vā pūrattaɱ vā paññāyati,||
evam eva kho bhikkhave, bahu ce pi bhikkhū anupādisesāya Nibbānadhātuyā parinibbāyanti,||
na tena Nibbānadhātuyā ūnattaɱ vā pūrattaɱ vā paññāyati.|| ||

Yam pi bhikkhave, bahū ce pi bhikkhū anūpādisesāya Nibbānadhātuyā parinibbāyanti,||
na tena Nibbānadhātuyā ūnattaɱ vā pūrattaɱ vā paññāyati,||
ayaɱ bhikkhave, imasmiɱ Dhamma-Vinaye pañcamo acchariyo abbhuto dhammo,||
yaɱ disvā disvā bhikkhū imasmiɱ Dhamma-Vinaye abhiramanti.|| ||

21. Seyyathā pi bhikkhave, mahā-samuddo eka-raso loṇa-raso,||
evam eva kho bhikkhave, ayaɱ Dhamma-Vinayo eka-raso vimutti-raso.|| ||

Yam pi bhikkhave, ayaɱ Dhamma-Vinayo eka-raso vimutti-raso,||
ayaɱ bhikkhave imasmiɱ Dhamma-Vinaye chaṭṭho acchariyo abbhuto dhammo,||
yaɱ disvā disvā bhikkhū imasmiɱ Dhamma-Vinaye abhiramanti.|| ||

22. Seyyathā pi bhikkhave, mahā-samuddo bahu-ratano aneka-ratano,||
tatr'imāni ratanāni,||
seyyath'īdaɱ:||
muttā,||
maṇi,||
veḷuriyo,||
saŋkho,||
silā,||
pavāḷaɱ,||
rajataɱ,||
jāta-rūpaɱ,||
lohitaŋko,||
masāragallaɱ,||
Evam eva kho bhikkhave, ayaɱ Dhamma-Vinayo bahu-ratano aneka-ratano,||
tatr'imāni ratanāni,||
seyyath'īdaɱ:
cattāro sati-paṭṭhānā,||
cattāro samma-p-padhānā||
cattāro iddhi-pādā||
pañc'indriyāni||
pañca balāni||
satta bojjhaŋgā||
Ariyo Aṭṭhaŋgiko Maggo.|| ||

Yam pi bhikkhave, ayaɱ Dhamma-Vinayo bahu-ratano aneka-ratano,||
tatr'imāni ratanāni,||
seyyath'īdaɱ:||
cattāro sati-paṭṭhānā||
cattāro samma-p-padhānā||
cattāro iddhi-pādā||
pañc'indriyāni||
pañca balāni||
satta bojjhaŋgā||
Ariyo Aṭṭhaŋgiko Maggo,||
ayaɱ bhikkhave, imasmiɱ Dhamma-Vinaye sattamo acchariyo abbhuto dhammo,||
yaɱ disvā disvā bhikkhū imasmiɱ Dhamma-Vinaye abhiramanti.|| ||

23. Seyyathā pi bhikkhave mahā-samuddo mahataɱ bhūtānaɱ āvāso,||
tatr'ime bhūtā:||
timi||
timiŋgalā||
timirapiŋgalā||
Asurā||
nāgā||
gandhabbā,||
santi mahā-samudde yojana-satikā pi atta-bhāvā||
dvi-yojana-satikā pi atta-bhāvā,||
ti-yojana-satikā pi atta-bhāvā,||
catu-yojana-satikā pi atta-bhāvā,||
pañca- [208] yojana-satikā pi atta-bhāvā||
evam eva kho bhikkhave, ayaɱ Dhamma-Vinayo mahataɱ bhūtānaɱ āvāso,||
tatr'ime bhūtā:||
sotāpanto,||
sot'āpatti phala-sacchi-kiriyāya paṭipanno,||
Sakad'āgāmī,||
Sakad-āgāmi phala-sacchi-kiriyāya paṭipanno,||
Anāgāmī,||
Anāgāmi phala-sacchi-kiriyāya paṭipanno,||
arahā,||
arahattāya paṭipanno.|| ||

Yam pi bhikkhave, ayaɱ Dhamma-Vinaye mahataɱ bhūtānaɱ āvāso,||
tatr'ime bhūtā,||
Sot'āpanno,||
sot'āpatti phala-sacchi-kiriyāya paṭipanno,||
Sakad'āgāmī,||
Sakad-āgāmi-phala-sacchi-kiriyāya paṭipanno,||
Anāgāmī,||
Anāgāmi phala-sacchi-kiriyāya paṭipanno,||
arahā,||
arahattāya paṭipanno,||
ayaɱ bhikkhave, imasmiɱ Dhamma-Vinaye aṭṭhamo acchariyo abbhuto dhammo,||
yaɱ disvā disvā bhikkhū imasmiɱ Dhamma-Vinaye abhiramanti.|| ||

Ime kho bhikkhave, imasmiɱ Dhamma-Vinaye aṭṭha acchariyā abbhutā dhammā,||
ye disvā disvā bhikkhū imasmiɱ Dhamma-Vinaye abhiramantī ti.|| ||

 


Contact:
E-mail
Copyright Statement