Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
VIII. Aṭṭhaka Nipāta
III: Gahapati-Vagga

Sutta 30

Anuruddha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[228]

[1][pts][than][bodh][olds] Evaɱ me sutaɱ:|| ||

Ekaɱ samayaɱ Bhagavā bhaggesu viharati Suɱsumāragire Bhesakalāvane Migadāye.|| ||

Tena kho pana samayen'āyasmā Anuruddho Cetīsu viharati Pācīnavaɱsadāye.|| ||

Atha kho āyasmato Anuruddhassa raho-gatassa patisallīnassa evaɱ cetaso parivitakko udapādi:|| ||

'App'icchassāyaɱ dhammo,||
nāyaɱ dhammo mah'icchassa.|| ||

Santuṭṭhassāyaɱ [229] dhammo,
nāyaɱ dhammo asantuṭṭhassa.|| ||

Pavivittassāyaɱ dhammo,
nāyaɱ dhammo sangaṇ'ik-ā-rāmassa.|| ||

Āraddha viriyassāyaɱ dhammo,
nāyaɱ dhammo kusītassa.|| ||

Upaṭṭhita-satissāyaɱ dhammo,||
nāyaɱ dhammo muṭṭhas-satissa.|| ||

Samāhitassāyaɱ dhammo,||
nāyaɱ dhammo asamāhitassa.|| ||

Paññā'vato ayaɱ dhammo,||
nāyaɱ dhammo duppaññassā' ti.|| ||

 

§

 

2. Atha kho Bhagavā āyasmato Anuruddhassa cetasā ceto parivitakkam aññāya||
seyyathā pi nāma balavā puriso sammiñjitaɱ vā bāhaɱ pasāreyya,||
pasāritaɱ vā bāhaɱ sammiñjeyya,||
evam eva Bhaggesu Suɱsumāragire Bhesakalāvane Migadāye antara-hito Cetīsu Pācīnavaɱsadāye āyasmato Anuruddhassa sammukhe pātu-r-ahosi.|| ||

Nisīdi Bhagavā paññatte āsane.|| ||

Āyasmā pi kho Anuruddho Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho āyasmantaɱ Anuruddhaɱ Bhagavā etad avoca:|| ||

3. "Sādhu sādhu Anuruddha,||
sādhu kho tvaɱ Anuruddha,||
satta mahāpurisa-vitakkaɱ vitakkesi:|| ||

App'icchassāyaɱ dhammo,||
nāyaɱ dhammo mah'icchassa.|| ||

Santuṭṭhassāyaɱ dhammo,
nāyaɱ dhammo asantuṭṭhassa.|| ||

Pavivittassāyaɱ dhammo,
nāyaɱ dhammo sangaṇ'ik-ā-rāmassa.|| ||

Āraddha viriyassāyaɱ dhammo,
nāyaɱ dhammo kusītassa.|| ||

Upaṭṭhitasatissāyaɱ dhammo,||
nāyaɱ dhammo muṭṭha-s-satissa.|| ||

Samāhitassāyaɱ dhammo,||
nāyaɱ dhammo asamāhitassa.|| ||

Paññā'vato ayaɱ dhammo,||
nāyaɱ dhammo duppaññassā ti.|| ||

Tena hi tvaɱ Anuruddha,||
imam pi aṭṭhamaɱ mahāpurisa-vitakkaɱ vitakkehi:|| ||

Nippapañc'ārāmassāyaɱ dhammo nippapañca-ratino,||
nāyaɱ dhammo papañc'ārāmassa papañca-ratino ti.|| ||

4. Yato kho tvaɱ Anuruddha,||
ime aṭṭha mahāpurisavitakke vitakkessasi,||
tato tvaɱ Anuruddha,||
yāva-d-eva ākaŋkhissasi —||
vivicc'eva kāmehi||
vivicca akusalehi dham- [230] mehi||
sa-vitakkaɱ sa-vicāraɱ viveka-jaɱ pīti-sukhaɱ||
paṭhamaɱ-jhānaɱ upasampajja viharissasi.|| ||

5. Yato kho tvaɱ Anuruddha,||
ime aṭṭha mahāpurisa vitakke vitakkessasi||
tato tvaɱ Anuruddha,||
yāva-d-eva ākaŋkhissasi —||
vitakka-vicārānaɱ vūpasamā||
ajjhattaɱ sampasādanaɱ||
cetaso ekodi-bhāvaɱ||
avitakkaɱ avicāraɱ||
samādhi-jaɱ pīti-sukhaɱ||
dutiyaɱ-jhānaɱ upasampajja viharissasi.|| ||

6. Yato kho tvaɱ Anuruddha,||
ime aṭṭha mahāpurisa vitakke vitakkessasi||
tato tvaɱ Anuruddha,||
yāva-d-eva ākaŋkhissasi —||
pītiyā ca virāgā||
upekkhako ca viharissasi||
sato ca sampajāno||
sukhañ ca kāyena paṭisaŋvedissasi,||
yaɱ taɱ ariyā ācikkhanti:||
'Upekkhako satimā sukha-vihārī' ti||
tatiyaɱ-jhānaɱ upasampajja viharissasi.|| ||

7. Yato kho tvaɱ Anuruddha,||
ime aṭṭha mahāpurisa vitakke vitakkessasi,||
tato tvaɱ Anuruddha,||
yāva-d-eva ākaŋkhissasi —||
sukhassa ca pahānā||
dukkhassa ca pahānā||
pubb'eva somanassa-domanassānaɱ atthaŋ-gamā||
adukkha-m-asukhaɱ||
upekkhā-sati-pārisuddhiɱ||
catutthaɱ-jhānaɱ upasampajja viharissasi.|| ||

8. Yato kho tvaɱ Anuruddha,||
ime ca aṭṭha mahāpurisa vitakke vitakkessasi,||
imesañ ca catunnaɱ jhānānaɱ ābhiceta-sikānaɱ||
diṭṭha-dhamma-sukha-vihārānaɱ||
nikāma-lābhī bhavissasi,||
akiccha-lābhī,||
akasira-lābhī,||
tato tuyhaɱ Anuruddha,||
seyyathā pi nāma gahapatissa vā gahapati-puttassa vā nānārattānaɱ dussānaɱ dussakaraṇḍako pūro,||
evam eva te paɱsukulaɱ cīvarānaɱ khāyissati,||
santuṭṭhassa viharato,||
ratiyā,||
aparitassāya,||
phāsu-vihārāya,||
okkamanāya Nibbānassa.|| ||

[231] 9. Yato kho tvaɱ Anuruddha,||
ime ca aṭṭha mahāpurisa vitakke vitakkessasi,||
imesañ ca catunnaɱ jhānānaɱ ābhiceta-sikānaɱ diṭṭha-dhamma-sukha-vihārānaɱ||
nikāma-lābhī bhavissasi,||
akiccha-lābhī||
akasira-lābhī,||
tato tuyhaɱ Anuruddha,||
seyyathā pi nāma gahapatissa vā gahapati-puttassa vā||
sālīnaɱ odano vicita-kāḷako||
aneka-sūpo aneka-vyañjano,||
evam eva te piṇḍiyālopabhojanānaɱ khāyissati,||
santuṭṭhassa viharato||
ratiyā,||
aparitassāya,||
phāsu-vihārāya||
okkamanāya Nibbānassa.|| ||

10. Yato kho tvaɱ Anuruddha,||
ime ca aṭṭha mahāpurisa vitakke vitakkessasi,||
imesañ ca catunnaɱ jhānānaɱ ābhiceta-sikānaɱ diṭṭha-dhamma-sukha-vihārānaɱ||
nikāma-lābhī bhavissasi,||
akiccha-lābhī||
akasira-lābhī,||
tato tuyhaɱ Anuruddha,||
seyyathā pi nāma gahapatissa vā gahapati-puttassa vā||
kuṭāgāraɱ ullitāvalittaɱ nivātaɱ phussitaggaḷaɱ pihitavātapānaɱ,||
evam eva te rukkha-mūlasen'āsanānaɱ khāyissati||
santuṭṭhassa viharato||
ratiyā,||
aparitassāya,||
phāsu-vihārāya||
okkamanāya Nibbānassa.|| ||

11. Yato kho tvaɱ Anuruddha,||
ime ca aṭṭha mahāpurisa vitakke vitakkessasi,||
imesañ ca catunnaɱ jhānānaɱ ābhiceta-sikānaɱ diṭṭha-dhamma-sukha-vihārānaɱ||
nikāma-lābhī bhavissasi,||
akiccha-lābhī||
akasira-lābhī,||
tato tuyhaɱ Anuruddha,||
seyyathā pi nāma gahapatissa vā gahapati-puttassa vā||
pallaŋko goṇa-katthato paṭikatthato paṭalika-t-thato kādalimiga-pavara-pacc'attharaṇo sa-uttaracchado ubhato lohita-kūpadhāno,||
evam eva te tiṇa-santhārako sayanāsanānaɱ khāyissati||
santuṭṭhassa viharato||
ratiyā,||
aparitassāya,||
phāsu-vihārāya||
okkamanāya Nibbānassa.|| ||

[232] 12. Yato kho tvaɱ Anuruddha,||
ime ca aṭṭha mahāpurisavitakke vitakkessasi,||
imesañ ca catunnaɱ jhānānaɱ ābhiceta-sikānaɱ diṭṭha-dhamma-sukha-vihārānaɱ||
nikāma-lābhī bhavissasi,||
akiccha-lābhī||
akasira-lābhī,||
tato tuyhaɱ Anuruddha,||
seyyathā pi nāma gahapatissa vā gahapati-puttassa vā||
nānā bhesajjāni,||
seyyath'īdaɱ:||
sappi navanītaɱ telaɱ madhu phāṇītaɱ||
evam eva te pūtimuttaɱ bhesajjānaɱ khāyissati||
santuṭṭhassa viharato||
ratiyā,||
aparitassāya,||
phāsu-vihārāya||
okkamanāya Nibbānassa.|| ||

13. Tena hi tvaɱ Anuruddha,||
āyatikam pi vassāvāsaɱ idh'eva Cetīsu Pācīnavaɱsadāye vihareyyāsī" ti.|| ||

"Evaɱ bhante" ti kho āyasmā Anuruddho Bhagavato paccassosi.|| ||

Atha kho Bhagavā āyasmantaɱ Anuruddhaɱ iminā ovādena ovaditvā seyyathā pi nāma balavā puriso sammiñjitaɱ vā bāhaɱ pasāreyya pasāritaɱ vā bāhaɱ sammiñjeyya,||
evam eva Cetīsu Pācīnavaɱsadāye antara-hito Bhaggesu Suɱsumāragire Bhesakaḷāvane Migadāye pātu-r-ahosi.|| ||

Nisīdi Bhagavā paññatte āsane.|| ||

 

§

 

Nisajja kho Bhagavā bhikkhū āmantesi:|| ||

14. "Aṭṭha kho bhikkhave,||
mahāpurisavitakke desissāmi.

Taɱ suṇātha||
sādhukaɱ manasi karotha||
bhāsissāmī" ti.|| ||

"Evaɱ bhante" ti kho te bhikkhū Bhagavato paccassosuɱ.|| ||

Bhagavā etad avoca:|| ||

"Katame ca bhikkhave, aṭṭha mahāpurisa vitakkā?|| ||

15. App'icchassāyaɱ, bhikkhave, dhammo,||
nāyaɱ dhammo mah'icchassa.|| ||

Santuṭṭhassāyaɱ, bhikkhave, dhammo,
nāyaɱ dhammo asantuṭṭhassa.|| ||

Pavivittassāyaɱ, bhikkhave, dhammo,
nāyaɱ dhammo sangaṇ'ik-ā-rāmassa.|| ||

Āraddha viriyassāyaɱ, bhikkhave, dhammo,
nāyaɱ dhammo kusītassa.|| ||

Upaṭṭhitasatissāyaɱ, bhikkhave, dhammo,||
nāyaɱ dhammo muṭṭha-s-satissa.|| ||

Samāhitassāyaɱ, bhikkhave, dhammo,||
nāyaɱ dhammo asamāhitassa.|| ||

Paññā'vato ayaɱ, bhikkhave, dhammo,||
||
[233] nāyaɱ dhammo duppaññassā.|| ||

Nippapañc'ārāmassāyaɱ, bhikkhave, dhammo nippapañca-ratino,||
nāyaɱ dhammo papañc'ārāmassa papañca-ratino.|| ||

 

§

 

16. 'Apapicchassāyaɱ bhikkhave,||
dhammo nāyaɱ dhammo mah'icchassā' ti.|| ||

Iti kho pan'etaɱ vuttaɱ.|| ||

Kiñ c'etaɱ paṭicca vuttaɱ?|| ||

17.Idha bhikkhave bhikkhu appiccho samāno||
'"appiccho" ti maɱ jāneyyun' ti na icchati,||
santuṭṭho samāno||
'"santuṭṭho" ti maɱ jāneyyun' ti na icachati,||
pavivitto samāno||
'"pavivitto" ti maɱ jāneyyun' ti na icchati,||
āraddha-viriyo samāno||
'"āraddha-viriyo" ti maɱ jāneyyun' ti na icchati,||
upaṭṭhita-sati samāno||
'"upaṭṭhitasatī" ti maɱ jāneyyun' ti na icachati,||
samāhito samāno||
'"samāhito" ti maɱ jāneyyun' ti na icchati,||
paññavā samāno||
'"paññavā" ti maɱ jāneyyun' ti na icchati,||
ni-p-papañc-ā-rāmo samāno||
'"nippapaññārāmo" ti maɱ jāneyyun' ti na icchati.|| ||

'App'icchassāyaɱ dhammo,||
nāyaɱ dhammo mah'icchassā' ti.|| ||

Iti yaɱ taɱ vuttaɱ.|| ||

Idam etaɱ paṭicca vuttaɱ.|| ||

 

§

 

18. 'Santuṭṭhassāyaɱ bhikkhave, dhammo,||
nāyaɱ dhammo asantuṭṭhassā' ti.|| ||

Iti kho pan'etaɱ vuttaɱ.|| ||

Kiñ c'etaɱ paṭicca vuttaɱ?|| ||

19. Idha bhikkhave, bhikkhu santuṭṭho hoti itar'ītara-cīvara-piṇḍa-pāta-sen'āsana-gilāna-paccaya-bhesajja-parikkhārena.|| ||

'Santuṭṭhassāyaɱ bhikkhave, dhammo,||
nāyaɱ dhammo asaṭṭhantussā' ti.|| ||

Iti yaɱ taɱ vuttaɱ.|| ||

Idam etaɱ paṭicca vuttaɱ.|| ||

 

§

 

20. 'Pavivittassāyaɱ bhikkhave, dhammo,||
nāyaɱ dhammo sangaṇ'ik-ā-rāmassā' ti.|| ||

Iti kho pan'etaɱ vuttaɱ.|| ||

Kiñ c'etaɱ paṭicca vuttaɱ?|| ||

21. Idha bhikkhave, bhikkhuno pavivittassa viharato bhavanti||
upasankamitāro bhikkhū||
bhikkhūniyo,||
upāsakā||
upāsikāyo||
rājāno||
rāja-mahā-mattā||
titthiyā||
titthiyasāvakā.|| ||

Tatra bhikkhu viveka-ninnena cittena||
viveka-poṇena||
viveka-pabbhārena||
vivekaṭṭhena||
nekkhammābhiratena||
aññadatthu uyyojanika-paṭisaɱyuttaɱ yeva kathaɱ kattā hoti.|| ||

'Pavi- [234] vittassāyaɱ bhikkhave, dhammo,||
nāyaɱ dhammo sangaṇ'ik-ā-rāmassā' ti.|| ||

Iti yaɱ taɱ vuttaɱ.|| ||

Idam etaɱ paṭicca vuttaɱ.|| ||

 

§

 

22. 'Āraddha-viriyassāyaɱ bhikkhave, dhammo,||
nāyaɱ dhammo kusītassā' ti.|| ||

Iti kho pan'etaɱ vuttaɱ.|| ||

Kiñ c'etaɱ paṭicca vuttaɱ?|| ||

23. Idha bhikkhave, bhikkhu āraddha-viriyo viharati
akusalānaɱ dhammānaɱ pahānāya
kusalānaɱ dhammānaɱ upasampadāya
thāmavā
daḷha-parakkamo
anikkhitta-dhuro kusalesu dhammesu.|| ||

'Āraddha-viriyassāyaɱ bhikkhave, dhammo||
nāyaɱ dhammo kusītassā' ti.|| ||

Iti yaɱ taɱ vuttaɱ.|| ||

Idam etaɱ paṭicca vuttaɱ.|| ||

 

§

 

24. 'Upaṭṭhitasatissāyaɱ bhikkhave, dhammo,||
nāyaɱ dhammo muṭṭha-s-satissā' ti.|| ||

Iti kho pan'etaɱ vuttaɱ.|| ||

Kiñ c'etaɱ paṭicca vuttaɱ?|| ||

25. Idha bhikkhave, bhikkhu satimā hoti paramena sati-nepakkena samannāgato cira-katam pi cira-bhāsitam pi saritā anussaritā.|| ||

'Upaṭṭhitasatissāyaɱ bhikkhave, dhammo,||
nāyaɱ dhammo muṭṭha-s-satissā' ti.|| ||

Iti yaɱ taɱ vuttaɱ.|| ||

Idam etaɱ paṭicca vuttaɱ.|| ||

 

§

 

26. 'Samāhitassāyaɱ bhikkhave, dhammo,
nāyaɱ dhammo asamāhitassā' ti.|| ||

Iti kho pan'etaɱ vuttaɱ.|| ||

Kiñ c'etaɱ paṭicca vuttaɱ?|| ||

27. Idha bhikkhave, bhikkhu vivicc'eva kāmehi||
vivicca akusalehi dhammehi||
sa-vitakkaɱ||
sa-vicāraɱ viveka-jaɱ pīti-sukhaɱ||
paṭhamaɱ-jhānaɱ upasampajja viharati.|| ||

Vitakka-vicārānaɱ vūpasamā||
ajjhattaɱ sampasādanaɱ||
cetaso ekodi-bhāvaɱ||
avitakkaɱ||
avicāraɱ samādhi-jaɱ pīti-sukhaɱ||
dutiyaɱ-jhānaɱ upasampajja viharati.|| ||

Pītiyā ca virāgā||
upekkhako ca viharati,||
sato ca sampajāno||
sukhaɱ ca kāyena paṭisaŋvedeti||
yaɱ taɱ ariyā ācikkhanti||
'Upekkhako satimā sukha-vihārī' ti||
tatiyaɱ-jhānaɱ upasampajja viharati.|| ||

Sukhassa ca pahānā||
dukkhassa ca pahānā||
pubb'eva somanassa-domanassānaɱ atthaŋ-gamā||
adukkha-m-asukhaɱ||
upekkhā-sati-pārisuddhiɱ||
catutthaɱ-jhānaɱ upasampajja viharati.|| ||

'Samāhitassāyaɱ bhikkhave, dhammo,||
nāyaɱ dhammo asamāhitassā' ti.|| ||

Iti yaɱ taɱ vuttaɱ.|| ||

Idam etaɱ paṭicca vuttaɱ.|| ||

 

§

 

28. 'Paññavato ayaɱ bhikkhave, dhammo,
nāyaɱ dhammo duppaññassā' ti.|| ||

Iti kho pan'etaɱ vuttaɱ.|| ||

Kiñ c'etaɱ paṭicca vuttaɱ?|| ||

29. Idha bhikkhave, bhikkhu paññavā hoti||
uday'attha-gāminiyā paññāya||
samannāgato ariyāya nibbedhi-kāya sammā-dukkha-k-khaya-gāminiyā.|| ||

'Paññavato ayaɱ bhikkhave, dhammo,||
nāyaɱ dhammo duppaññassā' ti.|| ||

Iti yaɱ taɱ vuttaɱ.|| ||

Idam etaɱ paṭicca vuttaɱ.|| ||

 

§

 

[235] 30. 'Nippapañc'ārāmassāyaɱ bhikkhave, dhammo, nippapañca-ratino,||
nāyaɱ dhammo papañc'ārāmassa papañca-ratino' ti.|| ||

Iti kho pan'etaɱ vuttaɱ.|| ||

Kiñ c'etaɱ paṭicca vuttaɱ?|| ||

31. Idha bhikkhave bhikkhuno papañca-nirodhe cittaɱ||
pakkhandati||
pasīdati,||
santiṭṭhati||
vimuccati.|| ||

'Nippapañc'ārāmassāyaɱ bhikkhave, dhammo||
nippapañca-ratino,||
nāyaɱ dhammo papañc'ārāmassa||
papañca-ratino' ti.|| ||

Iti yaɱ taɱ vuttaɱ.|| ||

Idam etaɱ paṭicca vuttaɱ.|| ||

 

§

 

Atha kho āyasmā Anuruddho āyatikam pi vassāvāsaɱ tatth'eva Cetīsu Pācīnavaɱsadāye vihāsi.|| ||

Atha kho āyasmā Anuruddho||
eko||
vūpakaṭṭho||
appamatto||
ātāpī||
pahit'atto viharanto||
na cirass'eva yass'atthāya kula-puttā samma-d-eva agārasmā anagāriyaɱ pabbajanti,||
tad anuttaraɱ Brahma-cariya pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

'Khīṇā jāti,||
vusitaɱ Brahma-cariyaɱ,||
kataɱ karaṇīyaɱ,||
nāparaɱ ittatthāyā' ti abbhaññāsi.|| ||

Aññataro ca pan'āyasmā Anuruddho arahataɱ ahosi.|| ||

Atha kho āyasmā Anuruddho Arahattappatto tāyaɱ velāyaɱ imā gāthāyo abhāsi.|| ||

 


 

Mama saŋkappam aññāya Satthā loke anuttaro,||
Mano-mayena kāyena iddhiyā upasankami,|| ||

Yathā me ahu saŋkappo tato uttari desayī,||
Nippapaɱ ca rato Buddho nippapaɱ ca adesayi.|| ||

Tassāhaɱ dhammam aññāya vihāsiɱ sāsane rato,||
Tisso vijjā anuppattā, kataɱ Buddhassa sāsanaɱ ti.|| ||

 


Contact:
E-mail
Copyright Statement