Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
VIII. Aṭṭhaka Nipāta
V. Uposatha Vagga

Sutta 47

Visākha-Manāpa-Kāyika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[267]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Pubbārāme Migāra-mātu pāsāde.|| ||

Atha kho Visākhā Migāra-mātā yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho Visākhaɱ Migāra-mātaraɱ Bhagavā etad avoca:|| ||

2. Aṭṭhahi kho Visākhe, dhammehi samannāgato mātu-gāmo kāyassa bhedā param maraṇā manāpa-kāyikānaɱ devānaɱ saha-vyataɱ uppajjati.|| ||

Katamehi aṭṭhahi?|| ||

 

§

 

3. Idha Visākhe, mātu-gāmo yassa mātā-pitaro bhattuno denti,||
attha-kāmā hitesino anukampakā anukampaɱ upādāya,||
tassa hoti pubb'uṭṭhāyinī pacchā-nipātinī kiŋkārapaṭissāvinī manāpacārinī piyavādinī.|| ||

4. Ye te bhattu garuno honti,||
'mātā' ti vā 'pitā' ti vā 'samaṇa-brāhmaṇā' ti vā,||
te sakkaroti garukaroti māneti pūjeti abbhāgate ca āsanodakena paṭipūjeti.|| ||

5. Ye te bhattu abbhantara kammantā 'uṇṇā' ti vā 'kappāsā' ti vā||
tattha dakkhā hoti analasā tatrupāyāya vīmaɱsāya samannāgatā alaŋ kātuɱ alaɱ saɱvidhātuɱ.|| ||

6. Yo so bhatatu abbhantaro antojano 'dāsā' ti vā 'pessā' ti vā,||
'kamma-karā' ti vā,||
tesaɱ katañ ca katato jānāti,||
akatañ ca akatato jānāti,||
gilāna-kānañ ca bal-ā-balaɱ jānāti,||
khādanīyaɱ bhojanīyañ c'assa paccaɱsena saɱvibhajati.|| ||

7. Yaɱ hattu āharati dhanaɱ vā dhaññaɱ vā rajataɱ vā jāta-rūpaɱ vā,||
taɱ ārakkhena guttiyā sampādeti,||
tattha ca hoti adhuttī athenī asonḍī avināsikā.|| ||

8. Upāsikā kho pana hoti Buddhaɱ saraṇaɱ gatā,||
dhammaɱ saraṇaɱ gatā||
Saŋghaɱ saraṇaɱ gatā.|| ||

9. Sīla-vatī kho pana hoti pāṇāti-pātā paṭiviratā,||
adinn'ādānā paṭiviratā||
kāmesu micchā-cārā paṭiviratā||
musā-vādā paṭiviratā||
surā-mera-yamajja-pamā-daṭṭhānā paṭiviratā.|| ||

10. Cāgavatī kho pana hoti vigata-mala-maccherena cetasā agāraɱ ajjhāvasati mutta-cāgā payata-pāṇī vossagga-ratā yā cayogā dānasaɱvihāragaratā.|| ||

11. Imehi kho Visākhe, aṭṭhahi dhammehi samangato mātu-gāmo kāyassa bhedā param maraṇā manāpa-kāyikānaɱ devānaɱ saha-vyataɱ upapajjatī ti.|| ||

 


 

Yo naɱ bharati sabbadā niccaɱ ātāpī ussuko,||
Taɱ sabba-kāmadaɱ posaɱ bhattāraɱ nātimaññati.|| ||

Na cāpi sotthī bhattāraɱ issāvādena rosaye,||
Bhattu ca garuno sabbe patipūjeti paṇḍitā.|| ||

Uṭṭhāyikā analasā saŋgahitaparijjanā,||
Bhattu manāpaɱ carati sambhataɱ anurakkhati.|| ||

Yā evaɱ vattatī nārī bhattu chandavasānugā,||
Manāpā nāma te devā yattha sā upapajjatī ti.|| ||

 


Contact:
E-mail
Copyright Statement