Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
VIII. Atthaka Nipāta
IX. Sati-Vagga

Sutta 89

Paṭisāraṇiya-Kamma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[346]

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Aṭṭhahi bhikkhave dhammehi samannāgatassa bhikkhuno ākaŋkha-māno saŋgho paṭisāraṇiyakammaɱ kareyya.|| ||

Katamehi aṭṭhahi?|| ||

Gihīnaɱ alābhāya parisakkati,||
gihīnaɱ anatthāya parisakkati,||
gihīnaɱ akkosati paribhāsati,||
gihī gihīhi vibhedeti,||
Buddhassa avaṇṇaɱ bhāsati,||
Dhammassa avaṇṇaɱ bhāsati,||
Saŋghassa avaṇṇaɱ bhāsati,||
dhammikañ ca gihīpaṭissavaɱ na saccāpeti.|| ||

Imehi kho bhikkhave aṭṭhahi dhammehi samannāgatassa bhikkhuno ākaŋkha-māno saŋgho paṭisāraṇīya kammaɱ kareyya.|| ||

 

§

 

Aṭṭhahi bhikkhave dhammehi samannāgatassa bhikkhuno ākaŋkha-māno saŋgho paṭisāraṇiya kammaɱ paṭippassamheyya.|| ||

Katamehi aṭṭhahi?|| ||

Na gihīnaɱ alābhāya parisakkati,||
na gihīnaɱ anatthāya parisakkati,||
na gihīnaɱ akkosati paribhāsati,||
na gihī gihīhi vibhedeti,||
Buddhassa vaṇṇaɱ bhāsati,||
Dhammassa [347] vaṇṇaɱ bhāsati,||
Saŋghassa vaṇṇaɱ bhāsati,||
dhammikañ ca gihīpaṭissavaɱ saccāpeti.|| ||

Imehi kho bhikkhave aṭṭhahi dhammehi samannāgatassa bhikkhuno ākaŋkha-māno saŋgho paṭisāraṇīya kammaɱ paṭippassamheyyā" ti.|| ||

 


Contact:
E-mail
Copyright Statement