Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
X. Dasaka-Nipāta
III. Mahā Vagga

Sutta 29

Paṭhama Kosala Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[59]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Yāvatā bhikkhave Kāsi Kosalā,||
yāvatā rañño Pasenadissa Kosalassa vijite,||
rājā tattha Pasenadī Kosalo rājā aggam akkhāyati.|| ||

Rañño pi kho bhikkhave Pasenadissa Kosalassa attheva aññathattaɱ,||
atthi vipariṇāmo.|| ||

Evaɱ passa bhikkhave sutavā ariya-sāvako tasmima pi nibbindati.|| ||

Tasmiɱ nibbindanto agge virajjati,||
pageva hīnasmiɱ.|| ||

 

§

 

3. Yāvatā bhikkhave candima-suriyā pariharanti,||
disā bhanti virocanā,||
tāva sahassadhā loko.|| ||

Tasmiɱ sahassadhā loke sahassaɱ candānaɱ,||
sahassaɱ suriyānaɱ,||
sahassaɱ sinerupabba-tarājānaɱ,||
sahassaɱ Jambudīpānaɱ,||
sahassaɱ aparagoyānānaɱ sahassaɱ uttaraKurūnaɱ,||
sahassaɱ pubbavidehānaɱ,||
cattāri mahā-samuddasahassāni,||
cattāri mahārājasahassāni,||
sahassaɱcātu-m-mahārājikānaɱ,||
sahassaɱ Tāvatiɱsānaɱ,||
sahassaɱ Yāmānaɱ,||
sahassaɱ Tusitānaɱ,||
sahassaɱ Nimmāṇaratīnaɱ,||
sahassaɱ Paranimmita-vasavattīnaɱ,||
sahassaɱ Brahma-lokānaɱ,||
yāvatā bhikkhave sahassī-loka-dhātu,||
Mahā-Brahmā tattha aggagam akkhāyati.|| ||

[60] Mahā-brahmuno pi kho bhikkhave attheva aññathattaɱ,||
atthivipariṇāmo evaɱ passaɱ bhikkhave sutavā ariya-sāvako tasmim pi nibbindati.|| ||

Tasmiɱ nibbindanto agge virajjati,||
pageva hīnasmiɱ.|| ||

 

§

 

4. Hoti kho so bhikkhave samayo,||
yaɱ ayaɱ loko saɱvaṭṭati,||
saɱvaṭṭamāne bhikkhave loke yebhuyyena sattā Ābhassara saŋvatta-nikā bhavanti,||
te tattha honti mano-mayā,||
pīti-bhakkhā sayaɱ pabhā antalikkhecarā subhaṭṭhāyino ciraɱ dīgham addhānaɱ tiṭṭhanti.|| ||

Saɱvaṭṭamāne bhikkhave loke Ābhassarā devā aggamakkhāyanti.|| ||

Ābhassarānam pi kho bhikkhave devānaɱ attheva aññathattaɱ.|| ||

Atthi vipariṇāmo,||
evaɱ passaɱ bhikkhave sutavā ariya-sāvako tasmim pi nibbindati.|| ||

Tasmiɱ nibbindanto agge virajjati,||
pageva hīnasmiɱ.|| ||

 

§

 

5. Dasa yimāni bhikkhave kasiṇ'āyatanāni.|| ||

Katamāni dasa?|| ||

Paṭhavi-kasiṇam eko sañjānāti uddhaɱ adho tiriyaɱ advayaɱ appamāṇaɱ.|| ||

Āpo-kasiṇam eko sañjānāti uddhaɱ adho,||
tiriyaɱ advayaɱ appamāṇaɱ.|| ||

Tejo-kasiṇam eko sañjānāti uddhaɱ adho,||
tiriyaɱ advayaɱ appamāṇaɱ.|| ||

Vāyo-kasiṇam eko sañjānāti uddhaɱ adho,||
tiriyaɱ advayaɱ appamāṇaɱ.|| ||

Nīla-kasiṇam eko sañjānāti uddhaɱ adho,||
tiriyaɱ advayaɱ appamāṇaɱ.|| ||

Pīta-kasiṇam eko sañjānāti uddhaɱ adho,||
tiriyaɱ advayaɱ appamāṇaɱ.|| ||

Lohita-kasiṇam eko sañjānāti uddhaɱ adho,||
tiriyaɱ advayaɱ appamāṇaɱ.|| ||

Odāta-kasiṇam eko sañjānāti uddhaɱ adho,||
tiriyaɱ advayaɱ appamāṇaɱ.|| ||

Ākāsa-kasiṇam eko sañjānāti uddhaɱ adho,||
tiriyaɱ advayaɱ appamāṇaɱ.|| ||

Viññāṇa-kasiṇam eko sañjānāti uddhaɱ adho tiriyaɱ advayaɱ appamāṇaɱ imāni kho bhikkhave dasa kasiṇāni.|| ||

Etad aggaɱ bhikkhave imesaɱ dasannaɱ kasiṇ'āyatanānaɱ yad idaɱ viññāṇa-kasiṇameko sañjānāti uddhaɱ adho tiriyaɱ advayaɱ appamāṇaɱ,||
evaɱ-saññinopi kho bhikkhave santi sattā.|| ||

Evaɱ saññīnam pi bhikkhave sattānaɱ attheva aññathattaɱ,||
atthi vipariṇāmo.|| ||

Evaɱ [61] passaɱ bhikkhave sutavā ariya-sāvako tasmimpi nibbindati.|| ||

Tasmiɱ nibbindanto agge virajjati,||
pageva hīnasmiɱ.|| ||

 

§

 

6. Aṭṭh'imāni bhikkhave abhibh'āyatanāni,||
katamāni.|| ||

Aṭṭha ajjhattaɱ rūpa-saññī eko bahiddhā rūpāni passati parittāni suvaṇṇa dubbaṇṇāni.|| ||

'Tāni Abhibhuyya jānāmi passāmī' ti||
evaɱ-saññī hoti idaɱ paṭhamaɱ abhibh'āyatanaɱ.|| ||

Ajjhattaɱ rūpa-saññī ekobahiddhā rūpāni passati appamāṇāni suvaṇṇa dubbaṇṇāni,||
tāni Abhibhuyya jānāmi,||
passāmī'ti evaɱ saññī hoti.|| ||

Idaɱ dutiyaɱ abhibh'āyatanaɱ.|| ||

Ajjhattaɱ arūpa-saññī eko bahiddhā rūpāni passati parittāni su-vaṇṇa-du-b-baṇṇāni,||
'tāni Abhibhuyya jānāmi,||
passāmī' ti||
evaɱ saññī hoti.|| ||

Idaɱ tatiyaɱ abhibh'āyatanaɱ.|| ||

Ajjhattaɱ arūpa-saññī eko bahiddhā rūpāni passati appamāṇāni su-vaṇṇa-du-b-baṇṇāni,||
'tāni Abhibhuyya jānāmi passāmī' ti||
evaɱ saññī hoti idaɱ catutthaɱ abhibh'āyatanaɱ.|| ||

Ajjhattaɱ arūpa-saññī eko bahiddhā rūpāni passati nīlāni nīla-vaṇṇāni nīla nidassanāni nīla nibhāsāni.|| ||

Seyyathā pi nāma ummā pupphaɱ nīlaɱ nīlavaṇṇaɱ nīladassanaɱ nīlani-bhāsaɱ.|| ||

Seyyathā pi vā pana taɱ vatthaɱ bārāṇaseyyakaɱ ubhatobhāga vimaṭṭhaɱ nīlaɱ nīlavaṇṇaɱ nīladassanaɱ nīla nibhāsaɱ.|| ||

Evam eva ajjhattaɱ arūpa-saññī eko bahiddhā rūpāni passati nīlāni nīla-vaṇṇāni nīlani-dassanāni.|| ||

'Tāni Abhibhuyya jānāmi,||
passāmī' ti evaɱ saññī hoti,||
imaɱ pañcamaɱ abhibh'āyatanaɱ.|| ||

Ajjhattaɱ arūpa-saññī eko bahiddhā rūpāni passati pītāni pīta-vaṇṇāni pītani-dassanāni,||
pītani-bhāsāni.|| ||

Seyyathā pi nāma kaṇikārapupphaɱ pītaɱ pītaɱvaṇṇaɱ pītani-dassanaɱ nīlani-bhāsaɱ.|| ||

Seyyathā pi vā pana taɱ vatthaɱ [62] bārāṇaseyyakaɱ ubhatobhāga vimaṭṭhaɱ nīlaɱ nīlavaṇṇaɱ vimaṭṭhaɱ pītaɱ pītavaṇṇaɱ pītani-dassanaɱ pītani-bhāsaɱ.|| ||

Evam evaɱ ajjhattaɱ arūpa-saññī eko bahiddhā rūpāni passati pītaɱ pīta-vaṇṇāni pītani-dassanāni pītani-bhāsāni.|| ||

'Tāni Abhibhuyya jānāmi,||
passāmī' ti||
evaɱ saññī hoti idaɱ chaṭṭhaɱ abhibh'āyatanaɱ.|| ||

Ajjhattaɱ arūpa-saññī eko bahiddhā rūpāni passati lohita-kāni lohitaka-vaṇṇāni lohitakani-dassanāni lohitakani-bhāsāni.|| ||

Seyyathā pi nāma bandhujīvakapupphaɱ lohitakaɱ lohitakavaṇṇaɱ lohitakani-dassanaɱ lohitakani-bhāsaɱ.|| ||

Seyyathā pi vā pana taɱ vatthaɱ bārāṇaseyyakaɱ ubhatobhāgavimaṭṭhaɱ lohitakaɱ lohitavaṇṇaɱ lohitakani-dassanaɱ lohitaka nibhāsaɱ.|| ||

Evam evaɱ ajjhattaɱ arūpa-saññī eko bahiddhā rūpāni passati lohita-kāni lohitaka-vaṇṇāni lohitaka nidassanāni lohitaka nibhāsāni tāni Abhibhuyya jānāmi,||
passāmī' ti||
evaɱ saññī hoti idaɱ sattamaɱ abhibh'āyatanaɱ.|| ||

Ajjhattaɱ arūpa-saññī eko bahiddhā rūpāni passati odātāni odāta-vaṇṇāni odātani-dassanāni odāta nibhāsāni.|| ||

Seyyathā pi nāma osadhītārakā odātā odāta-vaṇṇā odātanidasasanā odātani-bhāsā.|| ||

Seyyathā pi vā pana taɱ vatthaɱ bārāṇaseyyakaɱ ubhatobhāgavimaṭṭhaɱ odātaɱ odātavaṇṇaɱ odātani-dassanaɱ odātani-bhāsaɱ evam evaɱ ajjhattaɱ arūpa-saññī eko bahiddhā rūpāni passati odātāni odāta-vaṇṇāni odātani-dassanāni odātani-bhāsāni.|| ||

'Tāni Abhibhuyya jānāmi,||
passāmī'ti evaɱ-saññī hoti idaɱ aṭṭhamaɱ abhibh'āyatanaɱ.|| ||

Imāni kho bhikkhave aṭṭha abhibh'āyatanāni.|| ||

Etad aggaɱ bhikkhave imesaɱ aṭṭhantaɱ abhibh'āyatanānaɱ yad idaɱ ajjhattaɱ arūpa-saññī eko bahiddhā rūpāni passati odātāni odāta-vaṇṇāni odātani-dassanāni odātani-bhāsāni.|| ||

Tāni Abhibhuyya jānāmi passāmīti evaɱ saññī hoti.|| ||

Evaɱ saññino pi kho bhikkhave santi sattā.|| ||

Evaɱ saññīnam pi kho bhikkhave sattānaɱ attheva [63] aññathattaɱ,||
atthi vipariṇāmo,||
evaɱ passaɱ bhikkhave sutavā ariya-sāvako tasmim pi nibbindati.|| ||

Tasmiɱ nibbindanto agge virajjati,||
pageva hīnasmiɱ.|| ||

 

§

 

7. Catasso imā bhikkhave paṭipadā.|| ||

Katamā catasso?|| ||

Dukkhā paṭipadā dandhābhiññā,||
dukkhā paṭipadā khippābhiññā,||
sukhā paṭipadā dandhābhiññā,||
sukhā paṭipadā khippābhiññā.|| ||

Imā kho bhikkhave catasso paṭipadā.|| ||

Etad aggaɱ bhikkhave imāsaɱ catunnaɱ paṭipadānaɱ yad idaɱ sukhā paṭipadā khippābhiññā.|| ||

Evaɱ paṭi-pannā pi kho bhikkhave santi sattā.|| ||

Evaɱ paṭi-pannānam pi kho bhikkhave sattānaɱ attheva aññathattaɱ,||
atthi vipariṇāmo.|| ||

Evaɱ passaɱ bhikkhave sutavā ariya-sāvako tasmimpi nibbindati.|| ||

Tasmiɱ nibbindanto agge virajjati,||
pageva hīnasmiɱ.|| ||

 

§

 

8. Catasso imā bhikkhave saññā.|| ||

Katamā catasso?|| ||

Parittameko sañjānāti,||
mahaggatameko sañjānāti,||
appamāṇameko sañjānāti||
'N'atthi kiñcī' ti||
Ākiñ caññ'āyatanameko sañjānāti,||
imā kho bhikkhave catasso saññā.|| ||

Etad aggaɱ bhikkhave imāsaɱ catunnaɱ saññānaɱ yad idaɱ||
'N'atthi kiñcī' ti||
Ākiñ caññ'āyatanameko sañjānāti.|| ||

Evaɱ saññino pi kho bhikkhave santi sattā.|| ||

Evaɱ saññīnam pi kho bhikkhave sattānaɱ attheva aññathattaɱ,||
atthi vipariṇāmo evaɱ passaɱ bhikkhave Sutavā,||
ariya-sāvako tasmimpi nibbindati.|| ||

Tasmiɱ nibbindanto agge virajjati,||
pageva hīnasmiɱ.|| ||

 

§

 

9. Etad aggaɱ bhikkhave bāhirakānaɱ diṭṭhi-gatānaɱ yad idaɱ no c'assaɱ:|| ||

'No ca me siyā,||
na bhavissāmi,||
na me bhavissantī' ti.|| ||

Evaɱ diṭṭhino bhikkhave etaɱ pāṭikaŋkhaɱ:||
yā cāyaɱ bhave appaṭikulyatā:|| ||

sā c'assa [64] na bhavissati,||
yā cāyaɱ bhava-nirodhe pāṭikulyatā,||
sā c'assa na bhavissatī ti.|| ||

Evaɱ diṭṭhino pi kho bhikkhave santi sattā.|| ||

Evaɱ diṭṭhinam pi kho bhikkhave sattānaɱ attheva aññathattaɱ,||
atthi vipariṇāmo.|| ||

Evaɱ passaɱ bhikkhave sutavā ariya-sāvako tasmimpi nibbindati.|| ||

Tasmiɱ nibbindanto agge virajjati,||
pageva hīnasmiɱ.|| ||

 

§

 

10. Santi, bhikkhave, eke samaṇa-brāhmaṇā paramattha-visuddhiɱ paññā-penti.|| ||

Etad aggaɱ bhikkhave paramattha-visuddhiɱ paññā-pentānaɱ yad idaɱ sabbaso Ākiñcaññ'āyatanaɱ samati-k-kamma N'eva-saññā-nā-saññ'āyatanaɱ upasampajja viharati.|| ||

Te tad abhiññāya tassa sacchi-kiriyāya dhammaɱ desenti.|| ||

Evaɱ vādino pi kho bhikkhave santi sattā.|| ||

Evaɱ vādīnam pi kho bhikkhave sattānaɱ attheva aññathattaɱ,||
atthi vipariṇāmo.|| ||

Evaɱ passaɱ bhikkhave sutavā ariya-sāvako tasmim pi nibbindati,||
tasmiɱ nibbindanto agge virajjati.|| ||

Pageva hīnasmiɱ.|| ||

11. Santi, bhikkhave, eke samaṇa-brāhmaṇā paramadiṭṭha-dhammanibbānāvādā.|| ||

Te paramadiṭṭha-dhammaɱ Nibbānaɱ paññā-penti.|| ||

Etad aggaɱ bhikkhave paramadiṭṭha-dhamma Nibbānaɱ paññā-pentānaɱ yad idaɱ channaɱ phass'āyatanānaɱ samudayañ ca attha-gamañ ca assādañ ca ādīnavañ ca nissaraṇañ ca yathā-bhūtaɱ viditvā anupādā vimokkho.|| ||

Evaɱ vādiɱ kho maɱ bhikkhave evamakkhāyiɱ.|| ||

Eke samaṇa-brāhmaṇā asatā tucchā musā abhutena abbhāvikkhanti:|| ||

'Na Samaṇo Gotamo kāmānaɱ pariññaɱ paññāpeti.|| ||

Na rūpānaɱ pariññaɱ paññāpeti,||
na vedanānaɱ pariññaɱ paññāpetī' ti.|| ||

[65] Kāmānaɱ kho ahaɱ bhikkhave pariññaɱ paññā-pemi,||
rūpānañca pariññaɱ paññā-pemi,||
vedanānañca pariññaɱ paññā-pemi diṭṭhe'va dhamme nicchāto nibbuto sītibhūto anupādā pari-Nibbānaɱ paññāpemī" ti.|| ||

 


Contact:
E-mail
Copyright Statement