Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
X. Dasaka-Nipāta
IV. Upāli Vagga

Sutta 33

Upasampadā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[72]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho āyasmā Upāli yena Bhagavā ten'upasankami.|| ||

Upasaɱkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Upāli Bhagavantaɱ etad avoca:|| ||

"Katī hi nu kho bhante dhammehi samannāgatena bhikkhunā upasampādetabban" ti?|| ||

"Dasahi kho Upāli dhammehi samannāgatena bhikkhunā upasampādetabbaɱ.|| ||

Katamehi dasahi?|| ||

 

§

 

2. Idh'Upāli bhikkhu sīlavā hoti,||
Pātimokkha-saŋvara-saɱvuto viharati,||
ācāra-gocara-sampananno,||
anumattesu vajjesu bhaya-dassāvī samādāya sikkhati sikkhā-padesu.|| ||

Bahu-s-suto hoti suta-dharo suta-sannī-cayo,||
ye te dhammā ādi-kalyāṇā majjhe-kalyāṇā pariyosāna-kalyāṇā sātthaɱ savyañ janā,||
kevala-paripuṇṇaɱ parisuddhaɱ Brahma-cariyaɱ abhivadanti,||
tathā-rūpāssa dhammā bahu-s-sutā honti dhatā vacasā paricitā manas-ā-nupekkhitā diṭṭhiyā suppaṭi-viddhā.|| ||

Pātimokkhaɱ kho pan'assa vitthārena svāgataɱ hoti su-vibhattaɱ su-p-pavattaɱ su-vinicchitaɱ suttaso anuvyañjanaso.|| ||

Paṭibalo hoti gilānaɱ upaṭṭhātuɱ vā upa-ṭ-ṭh-ā-petuɱ vā.|| ||

Paṭibalo hoti anabhiratiɱ vūpakāsetuɱ vā vūpakās-ā-petuɱ vā.|| ||

Paṭibalo hoti uppannaɱ kukkuccaɱ dhammato vinodetuɱ.|| ||

Paṭibalo hoti uppannaɱ diṭṭhi-gataɱ dhammato vivecetuɱ.|| ||

Paṭibalo hoti adhisīle sam-ā-dapetuɱ.|| ||

Paṭibalo hoti adhicitte sam-ā-dapetuɱ.|| ||

Paṭibalo hoti adhipaññāya sam-ā-dapetuɱ.|| ||

Imehi kho Upāli dasahi dhammehi samannāgatena bhikkhunā upasampādetabban" ti.|| ||

 


Contact:
E-mail
Copyright Statement