Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
X. Dasaka-Nipāta
IV. Upāli Vagga

Sutta 36

Saŋgha-Sāmaggi Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[74]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho āyasmā Upāli yena Bhagavā ten'upasankami.|| ||

Upasaɱkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Upāli Bhagavantaɱ etad avoca:|| ||

"'Saŋgha-sāmaggi Saŋgha-sāmaggī' ti bhante vuccati.|| ||

Kittāvatā nu kho bhante saŋgho samaggo hotī" ti?|| ||

 

§

 

[1] "Idh'Ūpāli bhikkhu adhammaɱ||
'adhammo' ti dīpenti,||

[2] dhammaɱ 'dhammo' ti dīpenti,||

[3] avinayaɱ 'avinayo' ti dīpenti,||

[4] vinayaɱ 'vinayo' ti dīpenti,||

[5] abhāsitaɱ alapitaɱ Tathāgatena 'abhāsitaɱ alapitaɱ Tathāgatenā' ti dīpenti,||

[6] bhāsitaɱ lapitaɱ Tathāgatena 'bhāsitaɱ lapitaɱ Tathāgatenā' ti dīpenti,||

[7] anāciṇṇaɱ Tathāgatena 'anāciṇṇaɱ Tathāgatenā' ti dīpenti,||

[8] āciṇṇaɱ Tathāgatena 'āciṇṇaɱ Tathāgatenā' ti dīpenti,||

[9] apaññattaɱ Tathāgatena 'apaññattaɱ Tathāgatenā' ti dīpenti,||

[10] paññattaɱ Tathāgatena 'paññattaɱ Tathāgatenā' ti dīpenti.|| ||

Te imehi dasahi vatthūhi na avakassanti,||
na vavakassanti,||
na āvenikammāni karonti,||
na āveniPātimokkhaɱ uddisanti.|| ||

Ettāvatā kho Upāli saŋgho samaggo hotī" ti.|| ||

 


Contact:
E-mail
Copyright Statement