Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
X. Dasaka-Nipāta
IV. Upāli Vagga

Sutta 37

Paṭhama Ānanda Saŋgha-Bheda Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[75]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho āyasmā Ānanda yena Bhagavā ten'upasankami.|| ||

Upasaɱkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Ānanda Bhagavantaɱ etad avoca:|| ||

"Saŋgha-bhedo Saŋgha-bhedo" ti bhante vuccati.|| ||

Kittāvatā nukho bhante saŋgho bhinno hotī" ti?|| ||

"Idh'Ānanda bhikkhu adhammaɱ 'dhammo' ti dipenti,||

dhammaɱ 'adhammo' ti dīpenti,||

avinayaɱ 'vinayo' ti dīpenti,||

vinayaɱ 'avinayo' ti dīpenti,||

abhāsitaɱ alapitaɱ Tathāgatena 'bhāsitaɱ lapitaɱ Tathāgatenā' ti dīpenti,||

bhāsitaɱ lapitaɱ Tathāgatena 'abhāsitaɱ alapitaɱ Tathāgatenā' ti dīpenti,||

anāciṇṇaɱ Tathāgatena 'āciṇṇaɱ Tathāgatenā' ti dīpenti,||

āciṇṇaɱ Tathāgatena 'anāciṇṇaɱ Tathāgatenā' ti dīpenti,||

appaññattaɱ Tathāgatena 'paññattaɱ Tathāgatenā' ti dīpenti,||

paññattaɱ Tathāgatena, 'appaññattaɱ Tathāgatenā' ti dīpenti.|| ||

Te imehi dasahi vatthūhi avakassanti,||
vavakassanti,||
āveni kammāni karonti,||
āveni Pātimokkhaɱ uddisanti.|| ||

Ettāvatā kho Ānanda saŋgho bhinno hotī" ti.|| ||

 


Contact:
E-mail
Copyright Statement