Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
X. Dasaka-Nipāta
V. Akkosa Vagga

Sutta 47

Mahāli Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[86]

[1][pts] Evaɱ me sutaɱ:|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgāra-sālāyaɱ.|| ||

Atha kho Mahāli licchavī yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Mahāli Lacchavi Bhagavantaɱ etad avoca:|| ||

"Ko nu kho bhante hetu,||
ko paccayo,||
pāpassa kammassa kiriyāya,||
pāpassa kammassa pavattiyā" ti?|| ||

"Lobho kho Mahāli hetu,||
lobho paccayo||
pāpassa kammassa kiriyāya,||
pāpassa kammassa pavattiyā.|| ||

Doso kho Mahāli hetu,||
doso paccayo,||
pāpassa kammassa kiriyāya,||
pāpassa kammassa pavattiyā.|| ||

Moho kho Mahāli hetu,||
moho paccayo||
pāpassa kammassa kiriyāya,||
pāpassa kammassa pavattiyā.|| ||

Ayoniso-mana-sikāro kho Mahāli hetu,||
ayoniso-mana-sikāro [87] paccayo||
pāpassa kammassa kiriyāya,||
pāpassa kammassa pavattiyā.|| ||

Micchā paṇihitaɱ kho Mahāli cittaɱ hetu,||
micchā paṇihitaɱ cittaɱ paccayo||
pāpassa kammassa kiriyāya||
pāpassa kammassa pavattiyā.|| ||

Ayaɱ kho Mahāli hetu,||
ayaɱ paccayo||
pāpassa kammassa kiriyāya,||
pāpassa kammassa pavattiyā" ti.|| ||

 

§

 

"Ko pana bhante hetu,||
ko paccayo||
kalyāṇassa kammassa kiriyāya,||
kalyāṇassa kammassa pavattiyā" ti?|| ||

"Alobho kho Mahāli hetu,||
alobho paccayo||
kalyāṇassa kammassa kiriyāya,||
kalyāṇassa kammassa pavattiyā.|| ||

Adoso kho Mahāli hetu,||
adoso paccayo||
kalyāṇassa kammassa kiriyāya,||
kalyāṇassa kammassa pavattiyā.|| ||

Amoho kho Mahāli hetu,||
amoho paccayo||
kalyāṇassa kammassa kiriyāya,||
kalyāṇassa kammassa pavattiyā.|| ||

Yoniso mana-sikāro kho Mahāli hetu,||
yoniso mana-sikāro paccayo||
kalyāṇassa kammassa kiriyāya,||
kalyāṇassa kammassa pavattiyā.|| ||

Sammāpaṇihitaɱ kho Mahāli cittaɱ hetu,||
sammāpaṇihitaɱ cittaɱ paccayo,||
kalyāṇassa kammassa kiriyāya,||
kalyāṇassa kammassa pavattiyā.|| ||

Ayaɱ kho Mahāli hetu ayaɱ paccayo,||
kalyāṇassa kammassa kiriyāya,||
kalyāṇassa kammassa pavattiyā.|| ||

 

§

 

Ime ca kho Mahāli dasa dhammā loke na saŋvijjeyyuɱ,||
na yidaɱ paññāyetha:||
adhamma-cariyā visama-cariyā ti vā,||
Dhamma-cariyā sama-cariyā ti vā.|| ||

Yasmā ca kho Mahāli||
ime dasa dhammā loke saŋvijjanti,||
tasmā paññāyati adhamma-cariyā visama-cariyā ti vā||
Dhamma-cariyā sama-cariyā ti vā" ti.|| ||

 


Contact:
E-mail
Copyright Statement