Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
X. Dasaka-Nipāta
VII. Yamaka Vagga

Sutta 62

Taṇhā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[116]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Purimā bhikkhave koṭi||
na paññāyati bhava-taṇhāya:|| ||

'Ito pubbe bhava-taṇhā nāhosi,||
atha pacchā sambhavī' ti.|| ||

Evañ c'etaɱ bhikkhave vuccati,||
atha ca pana paññāyati:|| ||

'Ida-paccayā bhava-taṇhā' ti.|| ||

 

§

 

Bhava-taṇham p'ahaɱ bhikkhave s-ā-hāraɱ vadāmi,||
no an-āhāraɱ.|| ||

Ko c'āhāro bhava-taṇhāya?|| ||

'Avijjā'||
ti'ssa vacanīyaɱ.|| ||

Avijjam p'ahaɱ bhikkhave s-ā-hāraɱ vadāmi,||
no an-āhāraɱ.|| ||

Ko c'āhāro avijjāya?|| ||

'Pañca nīvaraṇā'||
ti'ssa vacanīyaɱ.|| ||

Pañca p'ahaɱ bhikkhave nīvaraṇe s-ā-hāre vadāmi,||
no an-āhāre.|| ||

Ko c'āhāro pañcannaɱ nivaraṇānaɱ?|| ||

'Tīṇi du-c-caritānī'||
ti'ssa vacanīyaɱ.|| ||

Tīṇi p'ahaɱ bhikkhave du-c-caritāni s-ā-hārāni vadāmi,||
no an-āhārāni.|| ||

Ko c'āhāro tiṇṇannaɱ du-c-caritānaɱ?|| ||

'Indriyā-saŋvaro'||
ti'ssa vacanīyaɱ.|| ||

Indriyā-saŋvaram p'ahaɱ bhikkhave s-ā-hāraɱ vadāmi,||
no an-āhāraɱ.|| ||

Ko c'āhāro Indriyā-saŋvarassa?|| ||

'Asatā-sampajaññan'||
ti'ssa vacanīyaɱ.|| ||

Asatā-sampajaññan p'ahaɱ bhikkhave s-ā-hāraɱ vadāmi,||
no an-āhāraɱ.|| ||

Ko c'āhāro asatā-sampajaññassa?|| ||

'Ayoniso-mana-sikāro'||
ti'ssa vacanīyaɱ.|| ||

Ayoniso-mana-sikāram p'ahaɱ bhikkhave s-ā-hāraɱ vadāmi,||
no an-āhāraɱ.|| ||

Ko c'āhāro ayoniso-mana-sikārassa?|| ||

A-s-saddhiyan||
ti'ssa vacanīyaɱ.|| ||

A-s-saddhiyam p'ahaɱ bhikkhave s-ā-hāraɱ vadāmi,||
no an-āhāraɱ.|| ||

Ko c'āhāro assaddhiyassa?|| ||

'A-sad'Dhamma-savaṇan'||
ti'ssa vacanīyaɱ.|| ||

A-sad'Dhamma-savaṇam p'ahaɱ bhikkhave s-ā-hāraɱ vadāmi,||
no an-āhāraɱ.|| ||

Ko c'āhāro asad'Dhamma-savaṇassa?|| ||

'A-sappurisa-saɱsevo'||
ti'ssa vacanīyaɱ.|| ||

 

§

 

3. Iti kho bhikkhave a-sappurisa-saɱsevo paripuro||
asad'Dhamma-savaṇaɱ paripūreti.|| ||

-◦-

A-sad'Dhamma-savaṇaɱ paripūraɱ||
assaddhiyaɱ paripūreti.|| ||

-◦-

A-s-saddhiyaɱ paripūraɱ||
ayoniso-mana-sikāraɱ paripūreti.|| ||

-◦-

Ayoniso-mana-sikāro paripūro||
asatā-sampajaññaɱ paripūreti.|| ||

-◦-

A-satā-sampajaññaɱ paripūraɱ||
Indriyā-saŋvaraɱ paripūreti.|| ||

-◦-

Indriyā-saŋvaro paripūro||
tīṇi du-c-caritāni paripūreti.|| ||

-◦-

Tīṇi du-c-caritāni paripūrāni||
pañca nīvaraṇe paripūrenti.|| ||

-◦-

Pañca nīvaraṇā paripūrā||
avijjaɱ paripūrenti.|| ||

-◦-

Avijjā paripūrā||
Bhava-taṇhaɱ paripūreti.|| ||

Evam etissā bhava-taṇhāya āhāro hoti||
evañ ca pāripūri.|| ||

4. Seyyathā pi, bhikkhave,||
upari pabbate thulla-phusitake deve vassante deve gala-galāyante taɱ udakaɱ yathāninnaɱ pavattamānaɱ pabbata-kandara-padara-sākhā paripūreti,||
pabbata-kandara-padara-sākha paripūrā||
kussūbbhe paripūrenti,||
kussubbhā paripūrā||
mahāsobhe paripūrenti,||
mahā-sobbhā paripūrā||
kunnadiyo paripūrenti,||
kunnadiyo paripūrā||
mahā-nadiyo paripūrenti,||
mahā-nadiyo paripūrā||
mahā-samuddaɱ sāgaraɱ paripūrenti.|| ||

Evam etassa mahā-samuddassa sāgarassa āhāro hoti||
evañ ca pāripūrī.|| ||

Evam eva kho bhikkhave a-sappurisa-saɱsevo paripūro||
asad'Dhamma-savanaɱ paripūreti||
asad'Dhamma-savanaɱ paripūraɱ||
assaddhiyaɱ paripūreti,||
assaddhiyaɱ paripūraɱ||
ayoniso-mana-sikāraɱ paripūreti,||
ayoniso-mana-sikāro paripūro||
asatā-sampajaññaɱ paripūreti,||
asatā-sampajaññaɱ paripūraɱ||
Indriyā-saŋvaraɱ paripūreti,||
Indriyā-saŋvaro paripūro||
tīṇi du-c-caritāni paripūreti,||
tīṇi du-c-caritāni paripūrāni||
pañca nīvaraṇe paripūrenti,||
pañca nīvaraṇā paripūrā||
avijjaɱ paripūrenti,||
avijjā paripūrā,||
Bhava-taṇhaɱ paripūreti.|| ||

Evam etissā bhava-taṇhāya āhāro hoti||
evañ ca pāripūri.|| ||

 

§

 

5. Vijjā-vimuttim p'ahaɱ bhikkhave s-ā-hāraɱ vadāmi,||
no an-āhāraɱ.|| ||

Ko c'āhāro vijjā-vimuttiyā?|| ||

'Satta bojjhaŋgā'||
ti'ssa vacanīyaɱ.|| ||

Satta p'ahaɱ bhikkhave bojjhaŋge s-ā-hāre vadāmi,||
no an-āhāre.|| ||

Ko c'āhāro sattannaɱ bojjhaŋgānaɱ?|| ||

'Cattāro sati-paṭṭhānā'||
ti'ssa vacanīyaɱ.|| ||

Cattāro p'ahaɱ bhikkhave sati-paṭṭhāne s-ā-hāre vadāmi,||
no an-āhāre.|| ||

Ko c'āhāro catunnaɱ sati-paṭṭhānānaɱ?|| ||

'Tīṇi sucaritānī'||
[115] ti'ssa vacanīyaɱ.|| ||

Tīṇi p'ahaɱ bhikkhave sucaritāni s-ā-hārāni vadāmi,||
no an-āhārāni.|| ||

Ko c'āhāro tiṇṇannaɱ sucaritānaɱ?|| ||

'Indriya-saŋvaro'||
ti'ssa vacanīyaɱ.|| ||

Indriya-saŋvaram p'ahaɱ bhikkhave s-ā-hāraɱ vadāmi,||
no an-āhāraɱ.|| ||

Ko c'āhāro indriya-saŋvarassa?|| ||

'Sati-sampajaññan'||
ti'ssa vacanīyaɱ.|| ||

Sati-sampajaññam p'ahaɱ bhikkhave s-ā-hāraɱ vadāmi,||
no an-āhāraɱ.|| ||

Ko c'āhāro sati-sampajaññassa?|| ||

'Yoniso-mana-sikāro'||
ti'ssa vacanīyaɱ.|| ||

Yoniso-mana-sikāram p'ahaɱ bhikkhave s-ā-hāraɱ vadāmi,||
no an-āhāraɱ.|| ||

Ko c'āhāro yoniso-mana-sikārassa?|| ||

'Saddhā'||
ti'ssa vacanīyaɱ.|| ||

Saddham p'ahaɱ bhikkhave s-ā-hāraɱ vadāmi,||
no an-āhāraɱ.|| ||

Ko c'āhāro saddhāya?|| ||

'Sad'Dhamma-savanan'||
ti'ssa vacanīyaɱ|| ||

Sad'Dhamma-savanam p'ahaɱ bhikkhave s-ā-hāraɱ vadāmi,||
no an-āhāraɱ.|| ||

Ko c'āhāro sad'Dhamma-savanassa?|| ||

'Sappurisa-saɱsevo'||
ti'ssa vacanīyaɱ.|| ||

6. Iti kho bhikkhave sappurisa-saɱsevo paripūro||
sad'Dhamma-savanaɱ paripūreti,||
sad'Dhamma-savanaɱ paripūraɱ||
saddhaɱ paripūreti,||
saddhā paripūrā||
yoniso-mana-sikāraɱ paripūreti,||
yoniso-mana-sikāro paripūro||
sati-sampajaññaɱ paripūreti,||
sati-sampajaññaɱ paripūraɱ||
indriya-saŋvaraɱ paripūreti,||
indriya-saŋvaro paripūro||
tīṇi sucaritāni paripūreti,||
tīṇi sucaritāni paripūrāni||
cattāro sati-paṭṭhāne paripūrenti,||
cattāro sati-paṭṭhānā paripūrā||
satta-bojjh-a-ŋge paripūrenti,||
satta-bojjh-a-ŋgā paripūrā||
vijjā-vimuttiɱ paripūrenti.|| ||

Evam etissā vijjā-vimuttiyā āhāro hoti||
evañ ca pāripūri.|| ||

7. Seyyathā pi, bhikkhave,||
upari pabbate thulla-phusitake deve vassante deve gala-galāyante taɱ udakaɱ yathāninnaɱ pavattamānaɱ pabbata-kandara-padara-sākhā paripūreti,||
pabbata-kandara-padara-sākha paripūrā||
kussūbbhe paripūrenti,||
kussubbhā paripūrā||
mahāsobhe paripūrenti,||
mahā-sobbhā paripūrā||
kunnadiyo paripūrenti,||
kunnadiyo paripūrā||
mahā-nadiyo paripūrenti,||
mahā-nadiyo paripūrā||
mmahā-samuddaɱ sāgaraɱ paripūrenti.|| ||

Evam etassa mahā-samuddassa sāgarassa āhāro hoti||
evañ ca pāripūrī.|| ||

Evam eva kho bhikkhave||
sappurisa-saɱsevo paripūro||
sad'Dhamma-savanaɱ paripūreti,||
sad'Dhamma-savanaɱ paripūraɱ||
saddhaɱ paripūreti,||
saddhā paripūrā||
yoniso-mana-sikāraɱ paripūreti,||
yoniso-mana-sikāro paripūro||
sati-sampajaññaɱ paripūreti,||
sati-sampajaññaɱ paripūraɱ||
indriya-saŋvaraɱ paripūreti,||
indriya-saŋvaro paripūro||
tīṇi sucaritāni paripūreti,||
tīṇi sucaritāni paripūrāni||
cattāro sati-paṭṭhāne paripūrenti,||
cattāro sati-paṭṭhānā paripūrā||
satta-bojjh-a-ŋge paripūrenti,||
satta-bojjh-a-ŋgā paripūrā||
vijjā-vimuttiɱ paripūrenti.|| ||

Evam etissā vijjā-vimuttiyā āhāro hoti||
evañ ca pāripūrī" ti.|| ||

 


Contact:
E-mail
Copyright Statement