Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
X. Dasaka-Nipāta
VIII: Ākaŋkha-Vagga

Sutta 75

Migasālā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[137]

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Atha kho āyasmā Ānando pubbaṇha-samayaɱ nivāsetvā patta-cīvaram ādāya yena Migasālāya upāsikāya nivesanaɱ ten'upasankami.|| ||

Upasaŋkamitvā paññatte āsane nisīdi.|| ||

Atha kho Migasālā upāsikā yen'āyasmā Ānando ten'upasankami.|| ||

Upasaŋkamitvā āyasmantaɱ Ānandaɱ abhivādetvā eka-m-antaɱ nisīdi.|| ||

Eka-m-antaɱ nisinnā kho Migasālā upāsikā āyasmantaɱ Ānandaɱ etad avoca:|| ||

2. "Kathaɱ-kathaɱ nāmo ayaɱ bhante Ānanda Bhagavatā [138] dhammo desito aññeyyo,||
yatra hi nāma brahma-cārī ca abrahma-cārī ca ubho sama-sama-gatikā bhavissanti abhisamparāyaɱ?|| ||

Pitā me bhante Purāṇo brahma-cārī ahosi ārā-cārī virato methunā gāma-dhammā.|| ||

So kāla-kato Bhagavatā vyākato||
'Sakad'āgāmī satto Tusitaɱ kāyaɱ upapanno' ti.|| ||

Pettā piyo me bhante Isidatto abrahma-cārī ahosi sadāra-santuṭṭho,||
so pi kāla-kato Bhagavatā vyākato||
'Sakad'āgāmī satto Tusitaɱ kāyaɱ upapanno' ti.|| ||

Kathaɱ-kathaɱ nāmo ayaɱ bhante Ānanda Bhagavatā dhammo desito aññeyyo,||
yatra hi nāma brahma-cārī ca abrahma-cārī ca ubho sama-sama-gatikā bhavissanti abhisamparāyan" ti?|| ||

"Evaɱ kho pan'etaɱ bhagini Bhagavatā vyākatan" ti.|| ||

 

§

 

3. Atha kho āyasmā Ānando Migasālāya upāsikāya nivesane piṇḍa-pātaɱ gahetvā uṭṭhāy āsanā pakkāmi.|| ||

Atha kho āyasmā Ānando pacchā-bhattaɱ piṇḍa-pāta-paṭikkanto yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Ānando Bhagavantaɱ etad avoca:|| ||

"Idh'āhaɱ bhante pubbaṇha-samayaɱ nivāsetvā patta-cīvaram ādāya yena Migasālāya upāsikāya nivesanaɱ ten'upasankami.|| ||

Upasaŋkamitvā paññatte āsane nisīdiɱ.|| ||

Atha kho bhante Migasālā upāsikā yen'āhaɱ ten'upasankami.|| ||

Upasaŋkamitvā maɱ abhivādetvā eka-m-antaɱ nisidi.|| ||

Eka-m-antaɱ nisinnā kho bhante Migasālā upāsikā maɱ etad avoca:|| ||

'Kathaɱ-kathaɱ nāmo ayaɱ bhante Ānanda Bhagavatā dhammo [139] desito aññeyyo,||
yatra hi nāma brahma-cārī ca abrahma-cārī ca ubho sama-sama-gatikā bhavissanti abhisamparāyaɱ?|| ||

Pitā me bhante Purāṇo brahma-cārī ahosi ārā-cārī virato methunā gāma-dhammā.|| ||

So kāla-kato Bhagavatā vyākato||
'Sakad'āgāmī satto Tusitaɱ kāyaɱ upapanno' ti.|| ||

Pettā piyo me bhante Isidatto abrahma-cārī ahosi sadāra-santuṭṭho,||
so pi kāla-kato Bhagavatā vyākato||
'Sakad'āgāmī satto Tusitaɱ kāyaɱ upapanno' ti.|| ||

Kathaɱ-kathaɱ nāmo ayaɱ bhante Ānanda Bhagavatā dhammo desito aññeyyo,||
yatra hi nāma brahma-cārī ca abrahma-cārī ca ubho sama-sama-gatikā bhavissanti abhisamparāyan ti?|| ||

Evaɱ vutte ahaɱ bhante Migasālaɱ upāsikaɱ etad avocaɱ:|| ||

'Evaɱ kho pan'etaɱ bhagini Bhagavatā vyākatan'" ti.|| ||

"Kā c'Ānanda Migasālā upāsikā bālā avyattā ambhakā ambhakapaññā?|| ||

Ke ca purisa-puggala-paro-pariye ñāṇe!|| ||

 

§

 

Dasa yime Ānanda puggalo santo saŋvijj'amānā lokasmi.|| ||

Katame dasa?|| ||

4. Idh'Ānanda ekacco puggalo du-s-sīlo hoti,||
tañ ca cetovimuttiɱ paññā-vimuttiɱ yathā-bhūtaɱ na-p-pajānāti,||
yatth'assa taɱ du-s-sīlyaɱ aparisesaɱ nirujjhati.|| ||

Tassa savaṇena pi akataɱ hoti,||
bāhu-saccena pi akataɱ hoti,||
diṭṭhiyā pi appaṭi-viddhaɱ hoti,||
sāmayikam pi vimuttiɱ na labhati.|| ||

So kāyassa bhedā param maraṇā hānāya pareti no visesāya,||
hāna-gāmī yeva hoti||
no visesa-gāmī.|| ||

5. Idha pan'Ānanda ekacco puggalo du-s-sīlo hoti,||
tañ ca cetovimuttiɱ paññā-vimuttiɱ yathā-bhūtaɱ pajānāti,||
[140] yatth'assa taɱ du-s-sīlyaɱ aparisesaɱ nirujjhati.|| ||

Tassa savaṇena pi kataɱ hoti,||
bāhu-saccena pi kataɱ hoti,||
diṭṭhiyā pi suppaṭi-viddhaɱ hoti,||
sāmayikam pi vimuttiɱ labhati.|| ||

So kāyassa bhedā param maraṇā visesāya pareti,||
no hānāya,||
visesa-gāmī yeca hoti,||
no hāna-gāmī.|| ||

Tatr'Ānanda pamāṇikā pamiṇanti:|| ||

'Imassā pi te'va dhammā,||
aparassā pi te'va dhammā,||
kasmā n'esaɱ eko hīno,||
eko paṇīto' ti?|| ||

Taɱ hi tesaɱ Ānanda hoti dīgha-rattaɱ ahitāya dukkhāya.|| ||

Tatr'Ānanda yavāyaɱ puggalo du-s-sīlo hoti,||
tañ ca ceto-vimuttiɱ paññā-vimuttiɱ yathā-bhūtaɱ pajānāti,||
yatth'assa taɱ du-s-sīlyaɱ aparisesaɱ nirujjhati.|| ||

Tassa savaṇena pi kataɱ hoti,||
bāhu-saccena pi kataɱ hoti,||
diṭṭhiyā pi suppaṭi-viddhaɱ hoti,||
sāmayikam pi vimuttiɱ labhati.|| ||

Ayaɱ Ānanda puggalo amunā purimena puggalena abhikkantaro ca paṇitataro ca.|| ||

Taɱ kissa hetu?|| ||

Imaɱ hi Ānanda puggalaɱ Dhamma-soto nibbahati.|| ||

Tad antaraɱ ko jāneyya aññatra Tathāgatena?|| ||

Tasmā ti h'Ānanda mā puggalesu pamāṇikā ahuvattha,||
mā puggalesu pamāṇaɱ gaṇhattha.|| ||

Khaññati h'Ānanda puggalo puggalesu pamāṇaɱ gaṇhanto,||
ahaɱ c'Ānanda puggalesu pamāṇaɱ gaṇheyyaɱ,||
yo vā pan'assa mādiso.|| ||

 

§

 

[141] 6. Idha pan'Ānanda ekacco puggalo sīlavā hoti,||
tañ ca ceto-vimuttiɱ paññā-vimuttiɱ yathā-bhūtaɱ na-p-pajānāti,||
yatth'assa taɱ sīlaɱ aparisesaɱ nirujjhati.|| ||

Tassa savaṇena pi akataɱ hoti,||
bāhu-saccena pi akataɱ hoti,||
diṭṭhiyā pi appaṭi-viddhaɱ hoti,||
sāmayikam pi vimuttiɱ na labhati.|| ||

So kāyassa bhedā param maraṇā hānāya pareti,||
no visesaɱ||
hāna-gāmī yeva hoti,||
no visesa-gāmī.|| ||

7. Idha pan'Ānanda ekacco puggalo sīlavā hoti,||
tañ ca cetovimuttiɱ paññā-vimuttiɱ yathā-bhūtaɱ pajānāti,||
yatth'assa taɱ sīlaɱ aparisesaɱ nirujjhati.|| ||

Tassa savaṇena pi kataɱ hoti,||
bāhu-saccena pi kataɱ hoti,||
diṭṭhiyā pi paṭividdhaɱ hoti,||
sāmayikam pi vimuttiɱ labhati.|| ||

So kāyassa bhedā param maraṇā visesāya pareti,||
no hānāya,||
visesa-gāmī yeca hoti,||
no hāna-gāmī.|| ||

Tatr'Ānanda pamāṇikā pamiṇanti:|| ||

'Imassā pi te'va dhammā,||
aparassā pi te'va dhammā,||
kasmā n'esaɱ eko hīno,||
eko paṇīto' ti?|| ||

Taɱ hi tesaɱ Ānanda hoti dīgha-rattaɱ ahitāya dukkhāya.|| ||

Tatr'Ānanda yavāyaɱ puggalo du-s-sīlo hoti,||
tañ ca ceto-vimuttiɱ paññā-vimuttiɱ yathā-bhūtaɱ pajānāti,||
yatth'assa taɱ du-s-sīlyaɱ aparisesaɱ nirujjhati.|| ||

Tassa savaṇena pi kataɱ hoti,||
bāhu-saccena pi kataɱ hoti,||
diṭṭhiyā pi suppaṭi-viddhaɱ hoti,||
sāmayikam pi vimuttiɱ labhati.|| ||

Ayaɱ Ānanda puggalo amunā purimena puggalena abhikkantaro ca paṇitataro ca.|| ||

Taɱ kissa hetu?|| ||

Imaɱ hi Ānanda puggalaɱ Dhamma-soto nibbahati.|| ||

Tad antaraɱ ko jāneyya aññatra Tathāgatena?|| ||

Tasmā ti h'Ānanda mā puggalesu pamāṇikā ahuvattha,||
mā puggalesu pamāṇaɱ gaṇhattha.|| ||

Khaññati h'Ānanda puggalo puggalesu pamāṇaɱ gaṇhanto,||
ahaɱ c'Ānanda puggalesu pamāṇaɱ gaṇheyyaɱ,||
yo vā pan'assa mādiso.|| ||

 

§

 

8. Idha pan'Ānanda ekacco puggalo nibbarāgo hoti,||
tañ ca cetovimuttiɱ paññā-vimuttiɱ yathā-bhūtaɱ na-p-pajānāti,||
yatth'assa so rāgo apariseso nirujjhati.|| ||

Tassa savaṇenapitha akataɱ hoti,||
bāhu-saccena pi akataɱ hoti,||
diṭṭhiyāpi apaṭividdhaɱ hoti,||
sāmayikam pi vimuttiɱ na labhati.|| ||

So kāyassa bhedā param maraṇā hānāya pareti,||
no visesaɱ||
hāna-gāmī yeva hoti,||
no visesa-gāmī.|| ||

9. Idha pan'Ānanda ekacco puggalo nibbarāgo hoti,||
tañ ca ceto vimuttiɱ paññā-vimuttiɱ yathā-bhūtaɱ pajānāti,||
yatth'assa so rāgo apariseso nirujjhati.|| ||

Tassa savaṇena pi kataɱ hoti,||
bāhu-saccena pi kataɱ hoti,||
diṭṭhiyā pi paṭividdhaɱ hoti,||
sāmayikam pi vimuttiɱ labhati.|| ||

So [142] So kāyassa bhedā param maraṇā visesāya pareti,||
no hānāya,||
visesa-gāmī yeca hoti,||
no hāna-gāmī.|| ||

Tatr'Ānanda pamāṇikā pamiṇanti:|| ||

'Imassā pi te'va dhammā,||
aparassā pi te'va dhammā,||
kasmā n'esaɱ eko hīno,||
eko paṇīto' ti?|| ||

Taɱ hi tesaɱ Ānanda hoti dīgha-rattaɱ ahitāya dukkhāya.|| ||

Tatr'Ānanda yavāyaɱ puggalo du-s-sīlo hoti,||
tañ ca ceto-vimuttiɱ paññā-vimuttiɱ yathā-bhūtaɱ pajānāti,||
yatth'assa taɱ du-s-sīlyaɱ aparisesaɱ nirujjhati.|| ||

Tassa savaṇena pi kataɱ hoti,||
bāhu-saccena pi kataɱ hoti,||
diṭṭhiyā pi suppaṭi-viddhaɱ hoti,||
sāmayikam pi vimuttiɱ labhati.|| ||

Ayaɱ Ānanda puggalo amunā purimena puggalena abhikkantaro ca paṇitataro ca.|| ||

Taɱ kissa hetu?|| ||

Imaɱ hi Ānanda puggalaɱ Dhamma-soto nibbahati.|| ||

Tad antaraɱ ko jāneyya aññatra Tathāgatena?|| ||

Tasmā ti h'Ānanda mā puggalesu pamāṇikā ahuvattha,||
mā puggalesu pamāṇaɱ gaṇhattha.|| ||

Khaññati h'Ānanda puggalo puggalesu pamāṇaɱ gaṇhanto,||
ahaɱ c'Ānanda puggalesu pamāṇaɱ gaṇheyyaɱ,||
yo vā pan'assa mādiso.|| ||

 

§

 

10. Idha pan'Ānanda ekacco puggalo kodhano hoti,||
tañ ca ceto-vimuttiɱ paññā-vimuttiɱ yathā-bhūtaɱ na-p-pajānāti||
yatth'assa so kodho apariseso nirujjhati.|| ||

Tassa savaṇena pi akataɱ hoti,||
bāhu-saccena pi akataɱ hoti,||
diṭṭhiyā pi appaṭi-viddhaɱ hoti,||
sāmayikam pi vimuttiɱ na labhati.|| ||

So kāyassa bhedā param maraṇā hānāya pareti,||
no visesaɱ||
hāna-gāmī yeva hoti,||
no visesa-gāmī.|| ||

11. Idha pan'Ānanda ekacco puggalo kodhano hoti,||
tañ ca ceto-vimuttiɱ paññā-vimuttiɱ yathā-bhūtaɱ pajānāti||
yatth'assa so kodho apariseso nirujjhati.|| ||

Tassa savaṇena pi kataɱ hoti,||
bāhu-saccena pi kataɱ hoti,||
diṭṭhiyā pi paṭividdhaɱ hoti,||
sāmayikam pi vimuttiɱ labhati.|| ||

So kāyassa bhedā param maraṇā visesāya pareti,||
no hānāya,||
visesa-gāmī yeca hoti,||
no hāna-gāmī.|| ||

Tatr'Ānanda pamāṇikā pamiṇanti:|| ||

'Imassā pi te'va dhammā,||
aparassā pi te'va dhammā,||
kasmā n'esaɱ eko hīno,||
eko paṇīto' ti?|| ||

Taɱ hi tesaɱ Ānanda hoti dīgha-rattaɱ ahitāya dukkhāya.|| ||

Tatr'Ānanda yavāyaɱ puggalo du-s-sīlo hoti,||
tañ ca ceto-vimuttiɱ paññā-vimuttiɱ yathā-bhūtaɱ pajānāti,||
yatth'assa taɱ du-s-sīlyaɱ aparisesaɱ nirujjhati.|| ||

Tassa savaṇena pi kataɱ hoti,||
bāhu-saccena pi kataɱ hoti,||
diṭṭhiyā pi suppaṭi-viddhaɱ hoti,||
sāmayikam pi vimuttiɱ labhati.|| ||

Ayaɱ Ānanda puggalo amunā purimena puggalena abhikkantaro ca paṇitataro ca.|| ||

Taɱ kissa hetu?|| ||

Imaɱ hi Ānanda puggalaɱ Dhamma-soto nibbahati.|| ||

Tad antaraɱ ko jāneyya aññatra Tathāgatena?|| ||

Tasmā ti h'Ānanda mā puggalesu pamāṇikā ahuvattha,||
mā puggalesu pamāṇaɱ gaṇhattha.|| ||

Khaññati h'Ānanda puggalo puggalesu pamāṇaɱ gaṇhanto,||
ahaɱ c'Ānanda puggalesu pamāṇaɱ gaṇheyyaɱ,||
yo vā pan'assa mādiso.|| ||

 

§

 

12. Idha pan'Ānanda ekacco puggalo uddhato hoti,||
tañ ca ceto-vimuttiɱ paññā-vimuttiɱ yathā-bhūtaɱ na-p-pajānāti,||
yatth'assa taɱ uddhaccaɱ aparisesaɱ nirujjhati.|| ||

Tassa savaṇena pi akataɱ hoti,||
bāhu-saccena pi akataɱ hoti,||
diṭṭhiyā pi appaṭi-viddhaɱ hoti,||
sāmayikam pi vimuttiɱ na labhati.|| ||

So kāyassa bhedā param maraṇā hānāya pareti,||
no visesaɱ||
hāna-gāmī yeva hoti,||
no visesa-gāmī.|| ||

13. Idha pan'Ānanda ekacco puggalo uddhato hoti,||
tañ ca ceto-vimuttiɱ paññā-vimuttiɱ yathā-bhūtaɱ pajānāti,||
yatth'assa taɱ uddhaccaɱ aparisesaɱ nirujjhati.|| ||

Tassa savaṇena pi kataɱ hoti,||
bāhu-saccena pi kataɱ hoti,||
diṭṭhiyā pi [143] paṭividdhaɱ hoti,||
sāmayikam pi vimuttiɱ labhati.|| ||

So kāyassa bhedā param maraṇā visesāya pareti,||
no hānāya,||
visesa-gāmī yeca hoti,||
no hāna-gāmī.|| ||

Tatr'Ānanda pamāṇikā pamiṇanti:|| ||

'Imassā pi te'va dhammā,||
aparassā pi te'va dhammā,||
kasmā n'esaɱ eko hīno,||
eko paṇīto' ti?|| ||

Taɱ hi tesaɱ Ānanda hoti dīgha-rattaɱ ahitāya dukkhāya.|| ||

Tatr'Ānanda yavāyaɱ puggalo du-s-sīlo hoti,||
tañ ca ceto-vimuttiɱ paññā-vimuttiɱ yathā-bhūtaɱ pajānāti,||
yatth'assa taɱ du-s-sīlyaɱ aparisesaɱ nirujjhati.|| ||

Tassa savaṇena pi kataɱ hoti,||
bāhu-saccena pi kataɱ hoti,||
diṭṭhiyā pi suppaṭi-viddhaɱ hoti,||
sāmayikam pi vimuttiɱ labhati.|| ||

Ayaɱ Ānanda puggalo amunā purimena puggalena abhikkantaro ca paṇitataro ca.|| ||

Taɱ kissa hetu?|| ||

Imaɱ hi Ānanda puggalaɱ Dhamma-soto nibbahati.|| ||

Tad antaraɱ ko jāneyya aññatra Tathāgatena?|| ||

Tasmā ti h'Ānanda mā puggalesu pamāṇikā ahuvattha,||
mā puggalesu pamāṇaɱ gaṇhattha.|| ||

Khaññati h'Ānanda puggalo puggalesu pamāṇaɱ gaṇhanto,||
ahaɱ c'Ānanda puggalesu pamāṇaɱ gaṇheyyaɱ,||
yo vā pan'assa mādiso.|| ||

 

§

 

Kā c'Ānanda Migasālā upāsikā bālā avyattā ambhakā ambaka-paññā,||
ke ca purisa-puggala-paro-pariye ñāṇe.|| ||

Ime kho Ānanda dasa puggalā santo saŋvijj'amānā lokasmi.|| ||

14. Yathā-rūpena Ānanda sīlena Purāṇo samannāgato ahosi,||
tathā-rūpena sīlena Isidatto samannāgato abhavissa||
na yidha Purāṇo Isidattassa gatim pi aññassa.|| ||

[144] Yathā-rūpāya ca Ānanda paññāya Isidatto samannāgato ahosi,||
tathā-rūpāya paññāya Purāṇo samannāgate abhavissa,||
na yidha Isidatto Purāṇassa gatim pi aññassa.|| ||

Iti kho Ānanda ime puggalā ubho ek'aŋga-hīnā ti.|| ||

 


Contact:
E-mail
Copyright Statement