Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
X. Dasaka-Nipāta
X: Upāsaka-Vagga

Sutta 94

Vajjiyamāhita Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[189]

[1][pts][than] Evaɱ me sutaɱ:|| ||

Ekaɱ samayaɱ Bhagavā Campāyaɱ viharati Gaggārāya pokkharaṇiyā tīre.|| ||

Atha kho Vajjiyamāhito gahapati divā divassa Campāyā ni-k-khami Bhagavantaɱ dassanāya.|| ||

Atha kho Vajjiyamāhitassa gahapatissa etad ahosi:|| ||

"Akālo kho tāva Bhagavantaɱ dassanāya,||
patisallīno Bhagavā,||
mano-bhāvanīyānam pi bhikkhūnaɱ akālo dassanāya,||
patisallānā mano-bhāvanīyā bhikkhu.|| ||

Yan nū nāhaɱ yena añña-titthiyānaɱ paribbājakānaɱ ārāmo ten'upasankameyyan" ti?|| ||

Atha kho Vajjiyamāhito gahapati yena añña-titthiyānaɱ paribbājakānaɱ ārāmo ten'upasankami.|| ||

2. Tena kho pana samayena añña-titthiyā paribbājakā saŋgamma samāgamma unnādino uccā-saddā mahā-saddā aneka-vihitaɱ tiracchāna-kathaɱ kathentā nisinnā honti.|| ||

Addasaɱsu kho te añña-titthiyā paribbājakā Vajjiyamāhitaɱ gahapatiɱ durato va āga-c-chantaɱ.|| ||

Disvā aññam-aññaɱ saṇṭhapesuɱ:|| ||

"Appa-saddā bhonto hontu,||
mā bhonto saddam akattha.|| ||

Ayaɱ Vajjiyamāhito gahapati āga-c-chati,||
samaṇassa Gotamassa sāvako.|| ||

Yāvatā kho [190] pana samaṇassa Gotamassa sāvakā gihī odāta-vasanā Campāyaɱ paṭivasanti,||
ayaɱ tesaɱ aññataro Vajjiyamāhito gahapati.|| ||

AAppa-sadda-kāmā kho pana te ayasmanto appa-saddavinītā appa-saddassa vaṇṇavādino.|| ||

App eva nāma appa-saddaɱ parisaɱ viditvā upasankamitabbaɱ maññeyyā" ti.|| ||

Atha kho te añña-titthiyā paribbājakā tuṇhī ahesuɱ.|| ||

3. Atha kho Vajjiyamāhito gahapati yena te paribbājakā ten'upasankami.|| ||

Upasaŋkamitvā tehi añña-titthiyehi paribbājakehi saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

 

§

 

Eka-m-antaɱ nisinnaɱ kho Vajjiyamāhitaɱ gahapatiɱ te paribbājakā etad avocuɱ:|| ||

"Saccaɱ kira gahapati,||
Samaṇo Gotamo sabbaɱ tapaɱ garahati,||
sabbaɱ tapassiɱ lūkh-ā-jīviɱ ekaɱ-sena upakkosati upavadatī" ti?|| ||

"Na kho bhante Bhagavā sabbaɱ tapaɱ garahati,||
na pi sabbaɱ tapassiɱ lūkh-ā-jīviɱ ekaɱ-sena upakkosati upavadati.|| ||

Gārayhaɱ kho pana bhante Bhagavā garahati,||
pāsaɱsiyaɱ pasaɱsati,||
gārayhaɱ kho pana bhante Bhagavā garahanto,||
pāsaɱsīyaɱ pasaɱsanto vibhajjavādo Bhagavā||
na so Bhagavā ettha ekaɱ savādo" ti.|| ||

4. Evaɱ vutte aññataro paribbājako Vajjiyamāhitaɱ gahapatiɱ etad avoca:|| ||

"Āgamehi tvaɱ gahapati,||
yassa tvaɱ samaṇassa Gotamassa vaṇṇaɱ bhāsasi,||
so samaṇo Gotamo venayiko appa-ñ-ñattiko" ti?|| ||

"Ettha p'āhaɱ bhante āyasmante vakkhāmi saha dhammena:|| ||

'Idaɱ kusalan' ti bhante Bhagavatā paññattaɱ||
'Idaɱ akusalan' ti bhante Bhagavatā paññattaɱ.|| ||

Iti kusal-ā-kusalaɱ Bhagavā paññāpayamāno sappa-ñ-ñattiko Bhagavā,||
na so Bhagavā venayiko appa-ñ-ñattiko" ti.|| ||

Evaɱ vutte te paribbājakā [191] tuṇhī-bhūtā maŋku-bhūtā patta-k-khandhā adho-mukhā pajjhāyante appaṭibhānā nisīdiɱsu.|| ||

5. Atha kho Vajjiyamāhito gahapati te paribbājake tuṇhī-bhūte maŋku-bhūte patta-k-khandhe adho-mukhe pajjhāyante appaṭibhāne viditvā uṭṭhāy āsanā yena Bhagavā ten'upasankami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Vajjiyamāhito gahapati yāvatako ahosi tehi añña-titthiyehi paribbājakehi saddhiɱ kathā-sallāpo taɱ sabbaɱ Bhagavato ārocesi.|| ||

6. "Sādhu sādhu gahapati.|| ||

Evaɱ kho te gahapati mogha-purisā kālena kālaɱ saha dhammena su-niggahitaɱ niggahetabbā.|| ||

'Nāhaɱ gahapati sabbaɱ tapaɱ tapitabban' ti vadāmi.|| ||

'Na pan'āhaɱ gahapati sabbaɱ tapaɱ na tapitabban' ti vadāmi.|| ||

'Nāhaɱ gahapati sabbaɱ samādānaɱ samādātabban' ti vadāmi.|| ||

'Na pan'āhaɱ gahapati sabbaɱ samādānaɱ na samādātabban' ti vadāmi.|| ||

'Nāhaɱ gahapati sabbaɱ padhānaɱ padahitabban' ti vadāmi.|| ||

'Na pan'āhaɱ gahapati sabbaɱ padhānaɱ na padahitabban' ti vadāmi.|| ||

'Nāhaɱ gahapati sabbo paṭinissaggo paṭinissajitabbo' ti vadāmi.|| ||

'Na pan'āhaɱ gahapati sabbo paṭinissaggo na paṭinissajitabbo' ti vadāmi.|| ||

'Nāhaɱ gahapati sabbā vimutti vimuccitabbā' ti vadāmi.|| ||

'Na pan'āhaɱ gahapati sabbā vimutti na vimuccitabbā' ti vadāmi.|| ||

7. 'Yaɱ hi gahapati tapaɱ tapato||
akusalā dhammā abhivaḍḍhanti||
kusalā dhammā parihāyanti,||
eva-rūpaɱ tapaɱ na tapitabban' ti vadāmi.|| ||

'Yañ ca khvāssa gahapati tapaɱ tapato||
akusalā dhammā parihāyanti||
kusalā [192] dhammā abhivaḍḍhanti,||
eva-rūpaɱ tapaɱ tapitabban' ti vadāmi.|| ||

'Yaɱ hi gahapati samādānaɱ samādiyato||
akusalā dhammā abhivaḍḍhanti,||
kusalā dhammā parihāyanti,||
eva-rūpaɱ samādānaɱ na samāditabban' ti vadāmi.|| ||

'Yañ ca khvāssa gahapati samādānaɱ samādiyato||
akusalā dhammā parihāyanti,||
kusalā dhammā abhivaḍḍhanti,||
eva-rūpaɱ samādānaɱ samāditabban' ti vadāmi.|| ||

'Yaɱ hi gahapati padhānaɱ padahato||
akusalā dhammā abhivaḍḍhanti,||
kusalā dhammā parihāyanti,||
eva-rūpaɱ padhānaɱ na padahitabban' ti vadāmi.|| ||

'Yañ ca khvāssa gahapati padhānaɱ padahato||
akusalā dhammā parihāyanti,||
kusalā dhammā abhivaḍḍhanti,||
eva-rūpaɱ padhānaɱ padahitabban' ti vadāmi.|| ||

'Yaɱ gahapati paṭinissaggaɱ paṭinissajjayato akusalā dhammā abhivaḍḍhanti,||
kusalā dhammā parihāyanti,||
eva-rūpo paṭinissaggo paṭinissajitabbo' ti vadāmi.|| ||

'Yañ ca khvāssa gahapati paṭinisaggaɱ paṭinisajjayato||
akusalā dhammā parihāyanti,||
kusalā dhammā abhivaḍḍhanti,||
eva-rūpo paṭinissaggo na paṭinissajitabbo' ti vadāmi.|| ||

'Yaɱ hi gahapati vimuttiɱ vimuccayato||
akusalā dhammā abhivaḍḍhanti,||
kusalā dhammā parihāyanti,||
eva-rūpā vimutti na vimuccitabba' ti vadāmi.|| ||

'Yañ ca khvāssa gahapati vimuttiɱ vimuccayato||
akusalā dhammā parihāyanti,||
kusalā dhammā abhivaḍḍhanti,||
eva-rūpā vimutti vimuccitabbā' ti vadāmī" ti.|| ||

Atha kho Vajjiyamāhito gahapati Bhagavatā dhammiyā kathāya sanda-s-sito samāda-pito samutte-jito sampahaɱ-sito uṭṭhāy āsanā Bhagavantaɱ abhivādetvā padakkhiṇaɱ katvā pakkāmi.|| ||

8. Atha kho Bhagavā acira-pakkante Vajjiyamāhite gahapatimhi bhikkhu āmantesi:|| ||

"Yo pi so bhikkhave bhikkhu dīgha-rattaɱ apparajakkho imasmiɱ Dhamma-Vinaye,||
so pi evam eva añña-titthiye paribbājake saha dhammena suniggatahiɱ niggaṇheyya,||
yathā taɱ Vajjiyamāhitena gahapatinā niggahītā" ti.|| ||

 


Contact:
E-mail
Copyright Statement