Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
X. Dasaka-Nipāta
X: Upāsaka-Vagga

Sutta 95

Uttiya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[193]

[1][pts][than] Evaɱ me sutaɱ:|| ||

Atha kho Uttiyo paribbājako yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi.|| ||

Sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

Eka-m-antaɱ nisinno kho Uttiyo paribbājako Bhagavantaɱ etad avoca:|| ||

"Kin nu kho bho Gotama||
sassato loko,||
idam eva saccaɱ,||
mogham aññan" ti?|| ||

"Avyākataɱ kho evaɱ Uttiya mayā:||
sassato loko,||
idam eva saccaɱ,||
mogham aññan" ti.|| ||

"Kiɱ pana bho Gotama||
asassato loko,||
idam eva saccaɱ,||
mogham aññan" ti?|| ||

"Etam pi kho Uttiya avyākataɱ mayā:||
asassato loko,||
idam eva saccaɱ,||
mogham aññan" ti.|| ||

"Kin nū kho bho Gotama||
antavā loko,||
idam eva saccaɱ,||
mogham aññan" ti?|| ||

"Etam pi kho Uttiya avyākataɱ mayā||
antavā loko,||
idam eva saccaɱ,||
mogham aññan" ti|| ||

"Kin nū kho bho Gotama||
taɱ jīvaɱ taɱ sarīraɱ,||
idam eva saccaɱ,||
mogham aññan" ti?|| ||

"Etam pi kho Uttiya avyākataɱ mayā||
taɱ jīvaɱ taɱ sarīraɱ,||
idam eva saccaɱ,||
mogham aññan" ti|| ||

"Kin nū kho bho Gotama||
aññaɱ jīvaɱ,||
aññaɱ sarīraɱ,||
idam eva saccaɱ,||
mogham aññan" ti?|| ||

"Etam pi kho Uttiya avyākataɱ mayā||
aññaɱ jīvaɱ,||
aññaɱ sarīraɱ,||
idam eva saccaɱ,||
mogham aññan" ti|| ||

"Kin nū kho bho Gotama||
hoti Tathāgato param maraṇā,||
idam eva saccaɱ,||
mogham aññan" ti?|| ||

"Etam pi kho Uttiya avyākataɱ mayā||
hoti Tathāgato param maraṇā,||
idam eva saccaɱ,||
mogham aññan" ti|| ||

"Kin nū kho bho Gotama||
hoti ca na hoti ca Tathāgato param maraṇā,||
idam eva saccaɱ,||
mogham aññan" ti?|| ||

"Etam pi kho Uttiya avyākataɱ mayā||
hoti ca na hoti ca Tathāgato param maraṇā,||
idam eva saccaɱ,||
mogham aññan" ti|| ||

"Kin nū kho bho Gotama||
n'eva hoti na nahoti Tathāgato param maraṇā,||
idam eva saccaɱ,||
mogham aññan" ti?|| ||

"Etam pi kho Uttiya avyākataɱ mayā||
n'eva hoti na nahoti Tathāgato param maraṇā,||
idam eva saccaɱ,||
mogham aññan" ti|| ||

 

§

 

2. "Kin nu kho bho Gotama||
'sassato loko,||
idam eva saccaɱ,||
mogham aññan' ti||
iti puṭṭho samāno||
'avyākataɱ kho etaɱ Uttiya mayā:||
sassato loko,||
idam eva saccaɱ,||
mogham aññan' ti vadesi.|| ||

Kim pana bho Gotama||
'asassato loko,||
idam eva saccaɱ,||
mogham aññan' ti||
iti puṭṭho samāno||
'avyākataɱ kho etaɱ Uttiya mayā:||
asassato loko,||
idam eva saccaɱ,||
mogham aññan' ti vadesi.|| ||

Kin nu kho bho Gotama||
'antavā loko,||
idam eva saccaɱ,||
mogham aññan' ti||
iti puṭṭho samāno||
'avyākataɱ kho etaɱ Uttiya mayā:||
antavā loko,||
idam eva saccaɱ,||
mogham aññan' ti vadesi.|| ||

Kin nu kho bho Gotama||
'anantavā loko,||
idam eva saccaɱ,||
mogham aññan' ti||
iti puṭṭho samāno||
'avyākataɱ kho etaɱ Uttiya mayā:||
anantavā loko,||
idam eva saccaɱ,||
mogham aññan' ti vadesi.|| ||

Kin nu kho bho Gotama||
'taɱ jīvaɱ taɱ sarīraɱ,||
idam eva saccaɱ,||
mogham aññan' ti||
iti puṭṭho samāno||
'avyākataɱ kho etaɱ Uttiya mayā:||
taɱ jīvaɱ taɱ sarīraɱ,||
idam eva saccaɱ,||
mogham aññan' ti vadesi.|| ||

'Kin nu kho bho Gotama||
'aññaɱ jīvaɱ aññaɱ sarīraɱ,||
idam eva saccaɱ,||
mogham aññan' ti||
iti puṭṭho samāno||
'avyākataɱ kho etaɱ Uttiya mayā:||
aññaɱ jīvaɱ aññaɱ sarīraɱ,||
idam eva saccaɱ,||
mogham aññan' ti vadesi.|| ||

Kin nu kho bho Gotama||
'hoti Tathāgato param maraṇā,||
idam eva saccaɱ,||
mogham aññan' ti||
iti puṭṭho samāno||
'avyākataɱ kho etaɱ Uttiya mayā:||
hoti Tathāgato param maraṇā,||
idam eva saccaɱ,||
mogham aññan' ti vadesi.|| ||

Kin nu kho bho Gotama||
'na hoti Tathāgato param maraṇā,||
idam eva saccaɱ,||
mogham aññan' ti||
iti puṭṭho samāno||
'avyākataɱ kho etaɱ Uttiya mayā:||
na hoti Tathāgato param maraṇā,||
idam eva saccaɱ,||
mogham aññan' ti vadesi.|| ||

Kin nu kho bho Gotama||
'hoti ca na hoti ca Tathāgato param maraṇā,||
idam eva saccaɱ,||
mogham aññan' ti||
iti puṭṭho samāno||
'avyākataɱ kho etaɱ Uttiya mayā:||
hoti ca na hoti ca Tathāgato param maraṇā,||
idam eva saccaɱ,||
mogham aññan' ti vadesi.|| ||

Kin nu kho bho Gotama||
'n'eva hoti na na hoti Tathāgato param maraṇā,||
idam eva saccaɱ,||
mogham aññan' ti||
iti puṭṭho [194] samāno||
'avyākataɱ kho etaɱ Uttiya mayā:||
n'eva hoti na na hoti Tathāgato param maraṇā,||
idam eva saccaɱ,||
mogham aññan' ti vadesi.|| ||

Atha kiñcarahi bhotā Gotamena vyākatan" ti?|| ||

 

§

 

"Abhiññāya kho ahaɱ Uttiya sāvakānaɱ dhammaɱ desemi sattānaɱ visuddhiyā soka-pari-d-davānaɱ samati-k-kamāya dukkha-domanassānaɱ atthaŋ-gamāya ñāyassa adhigamāya Nibbānassa saccikiriyāyā" ti.|| ||

"Yaɱ pan'etaɱ bhavaɱ Gotamo abhiññāya||
abhiññāya sāvakānaɱ dhammaɱ deseti sattānaɱ visuddhiyā soka-pari-d-davānaɱ samati-k-kamāya dukkha-domanassānaɱ atthaŋ-gamāya ñāyassa adhigamāya Nibbānassa sacchi-kiriyāya,||
sabbo vā tena loko nīyyissati? upaḍḍho vā? tibhāgo vā" ti?|| ||

Evaɱ vutte Bhagavā tuṇhī ahosi.|| ||

3. Atha kho āyasmato Ānandassa etad ahosi:|| ||

"Mā h'evaɱ kho Uttiyo paribbājako pāpakaɱ diṭṭhi-gataɱ paṭilabhi:|| ||

'Sabba-sāmukkaɱsikaɱ vata me Samaṇo Gotamo pañhaɱ puṭṭho saɱsādeti,||
no vissajjeti,||
na nūna visahatī' ti?|| ||

Tad assa Uttiyassa paribbājakassa dīgha-rattaɱ ahitāya dukkhāyā" ti.|| ||

Atha kho āyasmā Ānando Uttiyaɱ paribbājakaɱ etad avoca:|| ||

4. "Tena h'āvuso Uttiya upaman te karissāmi||
upamāyam idh'ekacce viññū purisā bhāsitassa atthaɱ ājānanti.|| ||

Seyyathā pi āvuso Uttiya rañño paccantimaɱ nagaraɱ daḷhuddāpaɱ daḷhapākāratoraṇaɱ ekadvāraɱ.|| ||

Tatr'assa dovāriko paṇḍito vyatto medhāvī aññātānaɱ nivāretā,||
[195] ñātānaɱ pavesetā,||
so tassa nagarassa samantā anupariyāyapathaɱ anukkama-māno na passeyya pākāra-sandhiɱ vā pākāra-vivaraɱ vā antamaso biḷāranissakkanamattam pi,||
no ca khavassa evaɱ ñāṇaɱ hoti:|| ||

'Ettakā pāṇā imaɱ nagaraɱ pavisanti vā ni-k-khamanti vā' ti.|| ||

Atha khvassa evam ettha hoti:|| ||

'Ye kho keci oḷārikā pāṇā imaɱ nagaraɱ pavisanti vā ni-k-khamanti vā,||
sabbe te iminā dvārena pavisanti va ni-k-khamanti vā' ti.|| ||

Evam eva kho āvuso Uttiya na taɱ Tathāgatassa evaɱ ussukkataɱ hoti||
'sabbo vā tena loko nīyyissati,||
upaḍḍho vā tibhāgo vā" ti.|| ||

Atha kho evam ettha Tathāgatassa hoti:|| ||

'Ye kho keci lokamhā nīyiɱsu vā||
nīyyanti vā||
nīyyissanti vā,||
sabbe te pañca nīvaraṇe pahāya||
cetaso upakkilese paññāya||
dubbalī-karaṇe catūsu sati-paṭṭhānesu supaṭṭhita-cittā||
satta bojjhaŋge yathā-bhūtaɱ bhāvetvā||
evam ete lokamhā nīyiɱsu vā nīyyanti vā nīyyissanti vā' ti.|| ||

Yad eva kho tvaɱ āvuso Uttiya Bhagavantaɱ pañhaɱ apucchi,||
tad eva taɱ pañhaɱ Bhagavantaɱ aññena pariyāyena apucchi.|| ||

Tasmā te taɱ Bhagavā na vyākāsī" ti.|| ||

 


Contact:
E-mail
Copyright Statement