Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
X. Dasaka-Nipāta
XI: Samaṇa-Saññā-Vagga

Sutta 104

Bīja Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][pts][than] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Micchā-diṭṭhikassa bhikkhave purisa puggalassa micchā saɱkappassa||
- micchā vāc'assa||
- micchā kammantassa||
- micchā ājīvassa||
- micchā vāyāmassa||
- micchā satissa||
- micchā samādhissa||
- micchā ñāṇissa||
- micchā vimuttissa||
yañ c'eva kāya-kammaɱ yathā diṭṭhi samattaɱ samādinnaɱ,||
yañ ca vacī-kammaɱ yathā diṭṭhi samattaɱ samādinnaɱ||
yañ ca mano-kammaɱ yathā diṭṭhi samattaɱ samādinnaɱ,||
yā ca cetanā yā ca patthanā,||
yo ca paṇidhi,||
ye ca sankhārā,||
sabbe te dhammā,||
aniṭṭhāya akantāya amanāpāya ahitāya dukkhāya saŋvattanti.|| ||

Taɱ kissa hetu?|| ||

Diṭṭhi hi bhikkhave pāpikā.|| ||

Seyyathā pi, bhikkhave, nimbabījaɱ vā kosātakī bījaɱ tittakālābu bījaɱ vā allāya paṭhaviyā nikkhittaɱ [213] yañ c'eva paṭhavirasaɱ upādiyati.|| ||

Yañ ca āporasaɱ upādiyati.|| ||

Sabbaɱ taɱ tittakattāya kaṭukattāya asātattāya saŋvattanti.|| ||

Taɱ kissa hetu?|| ||

Bījaɱ hi bhikkhave pāpakaɱ.|| ||

Evam eva kho bhikkhave micchā-diṭṭhikassa purisa puggalassa||
- micchā saɱkappassa||
- micchā vāc'assa||
- micchā kammantassa||
- micchā ājīvassa||
- micchā vāyāmassa||
- micchā satissa||
- micchā samādhissa||
- micchā ñāṇissa||
- micchā vimuttissa||
yañ c'eva kāya-kammaɱ yathā diṭṭhi samattaɱ samādinnaɱ,||
yañ ca vacī-kammaɱ yathā diṭṭhi samattaɱ samādinnaɱ||
yañ ca mano-kammaɱ yathā diṭṭhi samattaɱ samādinnaɱ,||
yā ca cetanā yā ca patthanā,||
yo ca paṇidhi,||
ye ca sankhārā,||
sabbe te dhammā,||
aniṭṭhāya akantāya amanāpāya ahitāya dukkhāya saŋvattanti.|| ||

Taɱ kissa hetu?|| ||

Diṭṭhi hi bhikkhave pāpikā.|| ||

 

§

 

Sammā-diṭṭhikassa bhikkhave purisa-puggalassa||
- sammā saɱkappassa||
- sammā vāc'assa||
- sammā kammantassa||
- sammā ājīvassa||
- sammā vāyāmassa||
- sammā satissa||
- sammā samādhissa||
- sammā ñāṇissa||
- sammā vimuttissa||
yañc'eva kāya-kammaɱ yathā diṭṭhi samattaɱ samādinnaɱ,||
yañ ca vacī-kammaɱ yathā diṭṭhi samattaɱ samādinnaɱ||
yañ ca mano-kammaɱ yathā diṭṭhi samattaɱ samādinnaɱ,||
yā ca cetanā,||
yā ca patthanā yo ca paṇidhi,||
ye ca sankhārā sabbe te dhammā iṭṭhāya kantāya manāpāya hitāya sukhāya saŋvattanti.|| ||

Taɱ kissa hetu?|| ||

Diṭṭhi hi bhikkhave bhaddikā.|| ||

Seyyathā pi, bhikkhave,||
ucchubījaɱ vā sā'i bījaɱ vā muddikā bījaɱ vā allāya paṭhaviyā nikkhittaɱ yañ c'eva paṭhavirasaɱ upādiyati,||
yañ ca āporasaɱ upādiyati,||
sabbaɱ taɱ sātattāya madhurattāya asecanakattāya saŋvattati.|| ||

Taɱ kissa hetu?|| ||

Bījaɱ hi bhikkhave bhaddakaɱ.|| ||

Evam eva kho bhikkhave||
sammā diṭṭhikassa purisa-puggalassa||
sammā saɱkappassa||
- sammā vāc'assa||
- sammā kammantassa||
- [214] sammā ājīvassa||
- sammā vāyāmassa||
- sammā satissa||
- sammā samādhissa||
- sammā ñāṇassa||
- sammā vimuttissa||
yañ c'eva kāya-kammaɱ yathā diṭṭhi samattaɱ samādinnaɱ,||
yañ ca vacī-kammaɱ yathā diṭṭhi samattaɱ samādinnaɱ||
yañ ca mano-kammaɱ yathā diṭṭhi samattaɱ samādinnaɱ,||
yā ca cetanā,||
yā ca patthanā||
yo ca paṇidhi,||
ye ca sankhārā||
sabbe te dhammā iṭṭhāya kantāya manāpāya hitāya sukhāya saŋvattanti.|| ||

Taɱ kissa hetu?|| ||

Diṭṭhi hi bhikkhave bhaddikā" ti.|| ||

 


Contact:
E-mail
Copyright Statement