Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
X. Dasaka-Nipāta
XII: Paccorohaṇī-Vagga

Sutta 115

Tatiya Adhamma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[224]

[1][pts] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Adhammo ca bhikkhave veditabbo,||
dhammo ca,||
anattho ca veditabbo attho ca,||
adhammañ ca viditvā Dhammañ ca,||
anatthañ ca viditvā atthañ ca,||
yathā dhammo||
yathā attho [225]||
tathā paṭipajjitabban" ti.|| ||

Idam avoca Bhagavā||
idaɱ vatvā Sugato uṭṭhāy āsanā vihāraɱ pāvisi.|| ||

 

§

 

3. Atha kho tesaɱ bhikkhūnaɱ acira-pakkantassa||
Bhagavato etad ahosi:|| ||

"Idaɱ kho no āvuso Bhagavā saŋkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho.|| ||

'Adhammo ca bhikkhave veditabbo,||
dhammo ca,||
anattho ca veditabbo attho ca,||
adhammañ ca viditvā Dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban' ti.|| ||

Ko nu kho imassa Bhagavatā saŋkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajeyyā" ti?|| ||

 

§

 

Atha kho tesaɱ bhikkhunaɱ etad ahosi:|| ||

"Ayaɱ kho āyasmā Ānando Satthu c'eva saɱvaṇṇito,||
sambhāvito ca viññūnaɱ sabrahma-cārīnaɱ,||
pahoti cāyasmā Ānando imassa Bhagavatā saŋkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajituɱ.|| ||

Yan nūna mayaɱ yen'āyasmā Ānando ten'upasankameyyāma.|| ||

Upasaŋkamitvā āyasmantaɱ Ānandaɱ etam atthaɱ puccheyyāma.|| ||

Yathā no āyasmā Ānando vyākarissati,||
tathā naɱ dhāressāmā" ti.|| ||

4. Atha kho te bhikkhu yen'āyasmā Ānando ten'upasankamiɱsu.|| ||

Upasaŋkamitavā āyasmatā Ānandena saddhiɱ sammodiɱsu,||
sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdiɱsu.|| ||

Eka-m-antaɱ nisinnā kho te bhikkhu āyasmantaɱ Ānandaɱ etad avocuɱ:|| ||

"Idaɱ kho no āvuso Ānanda Bhagavā saŋkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho:|| ||

'Adhammo ca bhikkhave veditabbo,||
dhammo ca,||
anattho ca veditabbo||
attho ca,||
adhammañ ca viditvā Dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban' ti.|| ||

Tesaɱ no āvuso amhākaɱ acira-pakkantassa Bhagavato etad ahosi:|| ||

'Idaɱ kho no āvuso Bhagavā [226] saŋkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho:|| ||

"Adhammo ca bhikkhave veditabbo,||
dhammo ca,||
anattho ca veditabbo||
attho ca,||
adhammañ ca viditvā Dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban" ti.|| ||

Ko nu kho imassa Bhagavatā saŋkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajeyyā' ti?|| ||

Tesaɱ no āvuso amhākaɱ etad ahosi:|| ||

'Ayaɱ kho āyasmā Ānando satthū c'eva saɱvaṇṇito sambhāvito ca viññūnaɱ sabrahma-cārīnaɱ,||
pahoti cāyasmā Ānando imassa Bhagavatā saŋkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajituɱ.|| ||

Yan nūna mayaɱ yen'āyasmā Ānando ten'upasankameyyāma,||
upasankamitvā āyasmantaɱ Ānandaɱ etam atthaɱ puccheyyāma.|| ||

Yathā no āyasmā Ānando vyākarissati,||
tathā naɱ dhāreyyāmā' ti.|| ||

Vibhajitu āyasmā Ānando" ti.|| ||

5. "Seyyathā pi āvuso puriso sāratthiko sāragavesī sārapariyesanaɱ cara-māno mahato rūkkhassa tiṭṭhato sāravato ati-k-kamm eva mūlaɱ ati-k-kamma khandhaɱ sākhāpalāse sāraɱ pariyesitabbaɱ maññeyya,||
evaɱ sampadam idaɱ.|| ||

Āyasmantānaɱ satthari sammukhī-bhūte taɱ Bhagavantaɱ atisitvā amhe etam atthaɱ paṭipucchitabbaɱ maññatha.|| ||

So h'āvuso Bhagavā jānaɱ jānāti,||
passaɱ passati,||
cakkhu-bhūto||
ñāṇa-bhūto||
dhamma-bhūto||
brahma-bhūto||
vattā pavattā atthassa ninnetā amatassa dātā dhammassāmī Tathāgato.|| ||

So c'eva pan'etassa kālo ahosi,||
yaɱ tumhe Bhagavantaɱ yeva upasankamitvā [227] etam atthaɱ puccheyyātha.|| ||

Yathā vo Bhagavā vyākareyya,||
tathā naɱ dhāreyyathā" ti.|| ||

6. "Addhāvuso Ānanda Bhagavā jānaɱ jānāti,||
passaɱ passati,||
cakkhu-bhūto||
ñāṇa-bhūto||
dhamma-bhūto||
brahma-bhūto||
vattā pavattā atthassa ninnetā amatassa dātā dhammasāmi Tathāgato.|| ||

So c'eva panetassa kālo ahosi,||
yaɱ mayaɱ Bhagavantaɱ yeva upasankamitvā etam atthaɱ puccheyyāma.|| ||

Yathā no Bhagavā vyākareyya,||
tathā naɱ dhāreyyāma.|| ||

Api c'āyasmā Ānando Satthu c'eva saɱvaṇṇito,||
sambhāvito ca viññūnaɱ sabirahmacārīnaɱ,||
pahoti c'āyasmā Ānando imassa Bhagavatā saŋkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajituɱ.|| ||

Vibhajat'āyasmā Ānando agarukaritvā" ti.|| ||

 

§

 

7. "Tena h'āvuso suṇātha sādhukaɱ manasi-karotha bhāsissāmī" ti.|| ||

"Evam āvuso" ti kho te bhikkhu āyasmato Ānandassa paccassosuɱ.|| ||

Āyasmā Ānando etad avoca:|| ||

"Yaɱ kho no āvuso Bhagavā saŋkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho|| ||

'Adhammo ca bhikkhave veditabbo,||
dhammo ca,||
anattho ca veditabbo||
attho ca,||
adhammañ ca viditvā Dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban' ti.|| ||

Katamo c'āvuso adhammo,||
katamo ca dhammo,||
katamo ca anattho,||
katamo ca attho?|| ||

"Micchā-diṭṭhi āvuso adhammo,
sammā-diṭṭhi dhammo,||
ye ca micchā-diṭṭhi-paccayā aneke pāpakā akusalā dhammā sambhavanti,
ayaɱ anattho,||
sammā-diṭṭhi-paccayā ca aneke kusalā dhammā bhāvanā-pāripūriɱ gacchanti,
ayaɱ attho.|| ||

Micchā-saŋkappo āvuso adhammo,||
sammā-saŋkappo dhammo,||
ye ca micchā-saŋkappa-paccayā aneke pāpakā akusalā dhammā sambhavanti,
ayaɱ anattho,||
sammā-saŋkappa-paccayā ca aneke kusalā dhammā bhāvanā-pāripūriɱ gacchanti,||
ayaɱ attho.|| ||

Micchā-vācā āvuso adhammo,||
sammā-vācā [228] dhammo,||
ye ca micchā-vācā-paccayā ca aneke akusalā dhammā sambhavanti,
ayaɱ anattho,||
sammā-vācā-paccayā ca aneke kusalā dhammā bhāvanā-pāripūriɱ gacchanti,||
ayaɱ attho.|| ||

Micchā-kammanto āvuso adhammo,||
sammā-kammanto dhammo,||
ye ca micchā-kammanta-paccayā aneke pāpakā akusalā dhammā sambhavanti,
ayaɱ anattho,||
sammā-kammanta-paccayā ca aneke kusalā dhammā bhāvanā-pāripūriɱ gacchanti, ayaɱ attho.|| ||

Micchā-ājīvo āvuso adhammo,||
sammā-ājīvo dhammo,||
ye ca micchā-ājīva-paccayā aneke pāpakā akusalā dhammā sambhavanti,
ayaɱ anattho,||
sammā-ājīva-paccayā ca aneke kusalā dhammā bhāvanā-pāripūriɱ gacchanti,||
ayaɱ attho.|| ||

Micachā-vāyāmo āvuso adhammo,||
sammā-vāyāmo dhammo,||
ye ca micchā-vāyāma-paccayā aneke pāpākā akusalā dhammā sambhavanti,
ayaɱ anattho,||
sammā-vāyāma-paccayā ca aneke kusalā dhammā bhāvanā-pāripūriɱ gacchanti,||
ayaɱ attho.|| ||

Micchā-sati āvuso adhammo,||
sammā-sati dhammo,||
ye ca micchā-sati-paccayā aneke pāpakā akusalā dhammā sambhavanti,
ayaɱ anattho,||
sammā-sati-paccayā ca aneke kusalā dhammā bhāvanā-pāripūriɱ gacchanti,||
ayaɱ attho.|| ||

Micchā-samādhi āvuso adhammo,||
sammā-samādhi dhammo,||
ye ca micchā-samādhi-paccayā aneke pāpakā akusalā dhammā sambhavanti,
ayaɱ anattho,||
sammā-samādhi-paccayā aneke kusalā dhammā bhāvanā-pāripūriɱ gacchanti,||
ayaɱ attho.|| ||

Micchā-ñāṇaɱ āvuso adhammo,||
sammā-ñāṇaɱ dhammo,||
ye ca micchā-ñāṇaɱpaccayā aneke pāpakā akusalā dhammā sambhavanti,
ayaɱ anattho,||
sammā-ñāṇaɱpaccayā ca aneke kusalā dhammā bhāvanā-pāripūriɱ gacchanti,||
ayaɱ attho.|| ||

Micchā-vimutti āvuso adhammo,||
sammā-vimuttidhammo,||
ye ca micchā-vimutti-paccayā aneke pāpakā akusalā dhammā sambhavanti,
ayaɱ anattho,||
sammā-vimutti-paccayā ca aneke kusalā dhammā bhāvanā-pāripūriɱ gacchanti,||
ayaɱ attho.|| ||

Yaɱ kho no āvuso Bhagavā saŋkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho:|| ||

'Adhammo ca bhikkhave veditabbo,||
dhammo ca,||
anattho ca veditabbo||
attho ca,||
adhammañ ca viditvā Dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban' ti.|| ||

Imassa kho ahaɱ āvuso Bhagavatā saŋkhittena uddesassa uddiṭṭhassa vitthārena atthaɱ avibhattassa evaɱ vitthārena atthaɱ ājānāmi.|| ||

Ākaŋkamānā ca pana tumhe āvuso Bhagavantaɱ yeva upasankamitvā etam atthaɱ puccheyyātha.|| ||

Yathā vo Bhagavā vyākaroti||
tathā naɱ dhāreyyathā" ti.|| ||

 

§

 

"Evam āvuso" ti||
kho te bhikkhu āyasmato Ānandassa bhāsitaɱ abhinan'ditvā anumo-ditvā uṭṭhāy āsanā yena Bhagavā ten'upasankamiɱsu.|| ||

Upasaɱkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinnā kho te bhikkhu Bhagavantaɱ etad avocuɱ:|| ||

9. "Yaɱ kho no bhante Bhagavā saŋkhittena uddesaɱ uddisitvā vitthārena atthaɱ avibhajitvā uṭṭhāy āsanā vihāraɱ paviṭṭho|| ||

'Adhammo ca bhikkhave veditabbo,||
dhammo ca,||
anattho ca veditabbo||
attho ca,||
adhammañ ca viditvā Dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban' ti.|| ||

Tesaɱ no bhante amhākaɱ acira-pakkantassa Bhagavato etad ahosi:|| ||

"Idaɱ kho no āvuso Bhagavā saŋkhittena uddesaɱ uddisitvā [229] vitthārena atthaɱ avibhajitvā uṭṭhāy āsanā vihāraɱ paviṭṭho|| ||

'Adhammo ca bhikkhave veditabbo||
dhammo ca,||
anattho ca veditabbo||
attho ca,||
adhammañ ca viditvā Dhammañ ca,||
anatthañ ca viditvā atthañ ca,||
yathā dhammo||
yathā attho||
tathā paṭipajjitabban' ti.|| ||

Ko nu kho imassa Bhagavatā saŋkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajeyyā" ti?|| ||

Tesaɱ no bhante amhākaɱ etad ahosi:|| ||

"Ayaɱ kho āyasmā Ānando Satthu c'eva saɱvaṇṇito,||
sambhāvito ca viññūnaɱ sabrahma-cārīnaɱ,||
pahoti c'āyasmā Ānando imassa Bhagavatā saŋkhittena uddesassa uddiṭṭhassa vitthārena atthaɱ avibhattassa vitthārena atthaɱ vibhajituɱ.|| ||

Yan nūna mayaɱ yen'āyasmā Ānando ten'upasankameyyāma,||
upasankamitvā āyasmā Ānandaɱ etam atthaɱ puccheyyāma.|| ||

Yathā no āyasmā Ānando vyākarissati,||
tathā naɱ dhāressāmā ti.|| ||

Atha kho mayaɱ bhante yen'āyasmā Ānando ten'upasankamimha,||
upasankamitvā āyasmantaɱ Ānandaɱ etam atthaɱ apucchimha.|| ||

Tesaɱ no bhante āyasmatā Ānandena||
imehi ākārehi||
imehi padehi||
imehi vyañjanehi attho suvibhatto" ti.|| ||

10. "Sādhu sādhu bhikkhave||
paṇḍito bhikkhave Ānando,||
mahā-pañño bhikkhave Ānando||
Maɱ ce pi tumhe bhikkhave upasankamitvā etam atthaɱ puccheyyātha,||
aham pi c'etaɱ evam eva vyākaryeyaɱ.|| ||

Yathā taɱ Ānandena vyākataɱ||
eso cetassa attho,||
evañ ca naɱ dhāreyyāthā" ti.|| ||

 


Contact:
E-mail
Copyright Statement