Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
X. Dasaka-Nipāta
XII: Paccorohaṇī-Vagga

Sutta 119

Paṭhama Paccorohaṇī Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[233]

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tena kho pana samayena Jāṇussoṇī brāhmaṇo tadah'uposathe sīsaɱ nahāto navaɱ khomayugaɱ nivattho allaɱ [234] kusamuṭṭhiɱ ādāya Bhagavato avidūre eka-m-antaɱ ṭhito hoti.|| ||

Addasā kho Bhagavā Jāṇussoṇiɱ brāhmaṇaɱ tadah'uposathe sīsaɱ nahātaɱ navaɱ khomayugaɱ nivatthaɱ allaɱ kusamuṭṭhiɱ ādāya avidūre eka-m-antaɱ ṭhitaɱ,||
disvā Jāṇussoṇiɱ brāhmaṇaɱ etad avoca:|| ||

"Kiɱ nu kho tvaɱ brāhmaṇa,||
tadah'uposathe sīsaɱ nahāto navaɱ khomayugaɱ nivattho allaɱ kusamuṭṭhiɱ ādāya eka-m-antaɱ ṭhito?|| ||

Kiɱ nu kho ajja brāhmaṇa-kulassā" ti?|| ||

"Paccorohaṇī bho Gotama,||
ajja brāhmaṇa-kulassā" ti.|| ||

"Yathā-kathaɱ pana brāhmaṇa,||
brāhmaṇānaɱ paccorohaṇī hotī" ti?|| ||

'Idha bho Gotama, brāhmaṇā tadah'uposathe sīsaɱ nahātā navaɱ khomayugaɱ nivatthā allena gomayena paṭhaviɱ opuñchitvā haritehi kusehi pattharitvā antarā ca velaɱ antarā ca agy-ā-gāraɱ seyyaɱ kappenti.|| ||

Te taɱ rattiɱ ti-k-khattuɱ paccu-ṭṭhāya pañjalikā aggiɱ namassanti:|| ||

'Paccorohāma bhavantaɱ,||
paccorohāma bhavantan' ti.|| ||

Pahūtena ca sappitelena navanītena aggiɱ santappenti,||
tassā ca rattiyā accayena paṇītena khādanīyena bhojanīyena brāhmaṇe santappenti.|| ||

Evaɱ kho bho Gotama,||
brāhmaṇānaɱ paccorohaṇī hotī" ti.|| ||

"Aññathā kho brāhmaṇa,||
brāhmaṇānaɱ paccorohaṇī,||
aññathā ca pana ariyassa vinaye paccorohaṇī hotī" ti.|| ||

"Yathā-kathaɱ pana bho Gotama,||
ariyassa vinaye paccorohaṇī hotī?|| ||

Sādhu me bhavaɱ Gotamo tathā dhammaɱ desetu,||
yathā ariyassa vinaye paccorohaṇī hotī" ti.|| ||

"Tena hi brāhmaṇa, suṇāhi,||
sādhukaɱ mana-sikarohi,||
bhāsissāmī" ti.|| ||

"Evaɱ bho" ti kho Jāṇussoṇi brāhmaṇo Bhagavato paccassosi,||
Bhagavā etad avoca:|| ||

 

§

 

[235] 3. "Idha brāhmaṇa, ariya sāvako itī paṭisañcikkhati:|| ||

'Micchā-diṭṭhiyā kho pāpako vipāko diṭṭhe c'eva dhamme abhisamparāyañ cā' ti|| ||

So iti paṭisaŋkhāya micchā-diṭṭhiɱ pajahati,||
micchā-diṭṭhiyā paccorohati.|| ||

"Micchā-saŋkappassa kho pāpako vipāko diṭṭhe c'eva dhamme abhisamparāyañ cā" ti|| ||

So iti paṭisaŋkhāya micchā-saŋkappaɱ pajahati, micchā-saŋkappā paccorohati.|| ||

"Micchā-vācāya kho pāpako vipāko diṭṭhe c'eva dhamme, abhisamparāyañ cā" ti.|| ||

So iti paṭisaŋkhāya micchā-vācaɱ pajahati, micchā-vācāya paccorohati.|| ||

"Micchā-kammantassa kho pāpako vipāko diṭṭhe c'eva dhamme, abhisamparāyañ cā" ti.|| ||

So iti paṭisaŋkhāya micchā-kammantaɱ pajahati, micchā-kammantā paccorohati.|| ||

"Micchā-ājīvassa kho pāpako vipāko diṭṭhe c'eva dhamme abhisamparāyañ cā" ti.|| ||

So iti paṭisaŋkhāya micchā-ājīvaɱ pajahati, micchā-ājīvā paccorohati.|| ||

"Micchā-vāyāmassa kho pāpako vipāko diṭṭhe c'eva dhamme abhisamparāyañ cā" ti.|| ||

So iti paṭisaŋkhāya micchā-vāyāmaɱ pajahati, micchā-vāyāmā paccorohati.|| ||

"Micchā-satiyā kho pāpako vipāko diṭṭhe c'eva dhamme abhisamparāyañ cā" ti.|| ||

So iti paṭisaŋkhāya micchā-satiɱ pajahati, micchā-satiyā paccorohati.|| ||

"Micchā-samādhissa kho pāpako vipāko diṭṭhe c'eva dhamme abhisamparāyañ cā" ti.|| ||

So iti paṭisaŋkhāya micchā-samādhiɱ pajahati, micchā-samādhimhā paccorohati.|| ||

"Micchā-ñāṇassa kho pāpako vipāko diṭṭhe c'eva dhamme abhisamparāyañ cā" ti.|| ||

So iti paṭisaŋkhāya micchā-ñāṇaɱ pajahati, micchā-ñāṇā paccorohati.|| ||

"Micchā-vimuttiyā kho pāpako vipāko diṭṭhe c'eva dhamme abhisamparāyañ cā" ti.|| ||

So iti paṭisaŋkhāya micchā-vimuttiɱ pajahati, micchā-vimuttiyā paccorohati.|| ||

Evaɱ kho brāhmaṇa, ariyassa vinaye paccorohaṇī hotī ti.|| ||

 

§

 

4. Aññathā bho Gotama, brāhmaṇānaɱ paccorohaṇī,||
aññathā ca pana ariyassa vinaye paccorohaṇī hotī||
imissā ca kho bho Gotama,||
ariyassa vinaye paccorohaṇiyā brāhmaṇānaɱ paccorohaṇi kalaɱ nāgghati soḷasiɱ.|| ||

[236] Abhikkantaɱ bho Gotama||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya,||
paṭi-c-channaɱ vā vivareyya,||
mūlhassa vā Maggaɱ ācikkheyya,||
andha-kāre vā tela-pajjotaɱ dhāreyya,||
'cakkhu-manto rūpāni dakkhintī ti.|| ||

Evam eva bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu Sanghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

 


Contact:
E-mail
Copyright Statement