Aŋguttara Nikāya


[Home]  [Sutta Indexes]  [Glossology]  [Site Sub-Sections]


 

Aŋguttara Nikāya
X. Dasaka-Nipāta
XVII: Jāṇussoṇi-Vagga

Sutta 167

Brāhmaṇa Pacc'Orohaṇī Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[249]

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

2. Tena kho pana samayena Jāṇussoṇī brāhmaṇo tadah'uposathe sīsaɱ nahāto navaɱ khomayugaɱ nivattho allaɱ kusamuṭṭhiɱ ādāya Bhagavato avidūre eka-m-antaɱ ṭhito hoti.|| ||

Addasā kho Bhagavā Jāṇussoṇiɱ brāhmaṇaɱ tadah'uposathe sīsaɱ nahātaɱ navaɱ khomayugaɱ nivatthaɱ allaɱ kusamuṭṭhiɱ ādāya avidūre eka-m-antaɱ ṭhitaɱ,||
disvā Jāṇussoṇiɱ brāhmaṇaɱ etad avoca:|| ||

"Kiɱ nu kho tvaɱ brāhmaṇa,||
tadah'uposathe sīsaɱ nahāto navaɱ khomayugaɱ nivattho allaɱ kusamuṭṭhiɱ ādāya eka-m-antaɱ ṭhito?|| ||

Kiɱ nu kho ajja brāhmaṇa-kulassā" ti?|| ||

"pacc'orohaṇī bho Gotama,||
ajja brāhmaṇa-kulassā" [250] ti.|| ||

"Yathā-kathaɱ pana brāhmaṇa,||
brāhmaṇānaɱ pacc'orohaṇī hotī" ti?|| ||

"Idha bho Gotama, brāhmaṇā tadah'uposathe sīsaɱ nahātā navaɱ khomayugaɱ nivatthā allena gomayena paṭhaviɱ opuñchitvā haritehi kusehi pattharitvā antarā ca velaɱ antarā ca agy-ā-gāraɱ seyyaɱ kappenti.|| ||

Te taɱ rattiɱ ti-k-khattuɱ paccu-ṭṭhāya pañjalikā aggiɱ namassanti|| ||

'pacc'orohāma bhavantaɱ,||
pacc'orohāma bhavantan' ti.|| ||

Pahūtena ca sappitelena navanītena aggiɱ santappenti,||
tassā ca rattiyā accayena paṇītena khādanīyena bhojanīyena brāhmaṇe santappenti.|| ||

Evaɱ kho bho Gotama,||
brāhmaṇānaɱ pacc'orohaṇī hotī" ti.|| ||

"Aññathā kho brāhmaṇa,||
brāhmaṇānaɱ pacc'orohaṇī,||
aññathā ca pana ariyassa vinaye pacc'orohaṇī hotī" ti.|| ||

"Yathā-kathaɱ pana bho Gotama,||
ariyassa vinaye pacc'orohaṇī hotī?|| ||

Sādhu me bhavaɱ Gotamo tathā dhammaɱ desetu,||
yathā ariyassa vinaye pacc'orohaṇī hotī" ti.|| ||

 

§

 

"Tena hi brāhmaṇa, suṇāhi,||
sādhukaɱ mana-sikarohi,||
bhāsissāmī" ti.|| ||

"Evaɱ bho" ti kho Jāṇussoṇi brāhmaṇo Bhagavato paccassosi,||
Bhagavā etad avoca:|| ||

 

§

 

3. "Idha brāhmaṇa ariya-sāvako iti paṭisañcikkhati:|| ||

'Pāṇāti-pātassa kho pāpako vipāko diṭṭhe c'eva dhamme abhisamparāyañ cā' ti.|| ||

So iti paṭisaŋkhāya pāṇāti-pātaɱ pajahati,||
pāṇāti-pātā pacc'orohati.|| ||

'Adinn'ādānassa kho pāpako vipāko diṭṭhe c'eva dhamme abhisamparāyañ cā' ti.|| ||

So iti paṭisaŋkhāya adinn'ādānaɱ pajahati,||
adinn'ādānā pacc'orohati.|| ||

'Kāmesu micchā-cārassa kho pāpako vipāko diṭṭhe c'eva dhamme abhisamparāyañ cā' ti.|| ||

So iti paṭisaŋkhāya kāmesu micchā-cāraɱ pajahati,||
kāmesu micchā-cārā pacc'orohati.|| ||

'Musā-vādassa kho pāpako vipāko diṭṭhe c'eva dhamme abhisamparāyañcāti cā' ti.|| ||

So iti [251] paṭisaŋkhāya musā-vādaɱ pajahati||
musā-vādā pacc'orohati.|| ||

'Pisunāya vācāya kho pāpako vipāko diṭṭhe c'eva dhamme abhisamparāyañ cā' ti.|| ||

So iti paṭisaŋkhāya pisunaɱ vācaɱ pajahati,||
pisunāya vācāya pacc'orohati.|| ||

'Pharusāya vācāya kho pāpako vipāko diṭṭhe c'eva dhamme abhisamparāyañ cā' ti.|| ||

So iti paṭisaŋkhāya pharusaɱ vācaɱ pajahati,||
pharusāya vācāya pacc'orohati.|| ||

'Sampha-p-palāpassa kho pāpako vipāko diṭṭhe c'eva dhamme abhisamparāyañ cā' ti.|| ||

So iti paṭisaŋkhāya sampha-p-palāpaɱ pajahati,||
samphappalāpā pacc'orohati.|| ||

'Abhijjhāya kho pāpako vipāko diṭṭhe c'eva dhamme abhisamparāyañ cā' ti.|| ||

So iti paṭisaŋkhāya abhijjhaɱ pajahati,||
abhijjhāya pacc'orohati.|| ||

'Vyāpādassa kho pāpako vipāko diṭṭhe c'eva dhamme abhisamparāyañ cā' ti.|| ||

So iti paṭisaŋkhāya vyāpādaɱ pajahati,||
vyāpādā pacc'orohati.|| ||

'Micchā-diṭṭhiyā kho pāpako vipāko diṭṭhe c'eva dhamme abhisamparāyañ cā' ti.|| ||

So iti paṭisaŋkhāya micchā-diṭṭhiɱ pajahati,||
micchā-diṭṭhiyā pacc'orohati.|| ||

Evaɱ kho brāhmaṇa, ariyassa vinaye pacc'orohaṇī hotī" ti.|| ||

 

§

 

4. "Aññathā bho Gotama, brāhmaṇānaɱ pacc'orohaṇī,||
aññathā ca pana ariyassa vinaye pacc'orohaṇī hotī||
imissā ca kho bho Gotama,||
ariyassa vinaye pacc'orohaṇiyā brāhmaṇānaɱ pacc'orohaṇi kalaɱ nāgghati soḷasiɱ.|| ||

Abhikkantaɱ bho Gotama||
abhikkantaɱ bho Gotama.|| ||

Seyyathā pi bho Gotama nikkujjitaɱ vā ukkujjeyya,||
paṭi-c-channaɱ vā vivareyya,||
mūlhassa vā Maggaɱ ācikkheyya,||
andha-kāre vā tela-pajjotaɱ dhāreyya,||
'cakkhu-manto rūpāni dakkhintī' ti.|| ||

Evam eva bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

 


Contact:
E-mail
Copyright Statement