Khuddaka Nikaya


[Home]  [Sutta Indexes]  [Glossology]  [Site Sub-Sections]


 

Dhamma-Pada Pāḷi

Namo tassa Bhagavato arahato sammā sambuddhassa.

Public Domain

Adapted from the 1995 edition of the digital version of the Sri Lanka Buddha Jayanti Tripitaka Series.|| ||

 


[1]

1. Yamaka Vagga

Index Than

 

1. Mano-pubbaṅgamā dhammā mano-seṭṭhā mano-mayā,||
Manasā ce paduṭṭhena bhāsati vā karoti vā||
Tato naṃ dukkham anveti cakkaṃ va vahato padaṃ.|| ||

2. Mano-pubbaṅgamā dhammā mano-seṭṭhā mano-mayā,||
Manasā ce pasannena bhāsati vā karoti vā||
Tato naṃ sukham anveti chāyā va anapāyinī.|| ||

3. "Akkocchi maṃ avadhi maṃ ajini maṃ ahāsi me"||
Ye taṃ upanayhanti veraṃ tesaṃ na sammati.|| ||

[2] 4. "Akkocchi maṃ avadhi maṃ ajini maṃ ahāsi me"||
Ye taṃ na upanayhanti veraṃ tes'ūpasammati.|| ||

5. Na hi verena verāni sammant'idha kudācana||
Averena ca sammanti, esa dhammo sanantano.|| ||

6. Pare ca na vijānanti: "mayam ettha yamāmase"||
Ye ca tattha vijānanti tato sammanti medhagā.|| ||

7. Subhānupassiṃ viharantaṃ indriyesu asaṃvutaṃ||
Bhojanamhi cāmattaññuṃ kusītaṃ hīna-vīriyaṃ||
Taṃ ve pasahati Māro vāto rukkhaṃ va dubbalaṃ.|| ||

[3] 8. Asubhānupassiṃ viharantaṃ indriyesu susaṃ-vutaṃ||
Bhojanamhi ca mattaññuṃ saddhaṃ āraddha-vīriyaṃ||
Taṃ ve na-ppasahatī Māro vāto selaṃ va pabbataṃ.|| ||

9. Anikkasāvo kāsāvaṃ yo vatthaṃ paridahessati||
Apeto damasaccena na so kāsāvam arahati.|| ||

10. Yo ca vantakasāv'assa sīlesu susamāhito||
Upeto damasaccena sa ve kāsāvam arahati.|| ||

11. Asāre sāramatino sāre cāsāradassino||
Te sāraṃ nādhi-gacchanti micchā-saṃkappa-gocarā.|| ||

12. Sārañ ca sārato ñatvā asārañ ca asārato||
Te sāraṃ adhigacchanti sammā-saṃkappa-gocarā.|| ||

[4] 13. Yathā agāraṃ ducchannaṃ vuṭṭhi samativijjhati||
Evaṃ abhāvitaṃ cittaṃ rāgo samativijjhati.|| ||

14. Yathā agāraṃ succhannaṃ vuṭṭhi na samativijjhati||
Evaṃ subhāvitaṃ cittaṃ rāgo na samativijjhati.|| ||

15. Idha socati pecca socati||
pāpakārī ubhayattha socati||
So socati so vihaññati||
disvā kamma kiliṭṭham attano.|| ||

16. Idha modati pecca modati||
katapuñño ubhayattha modati||
So modati so pamodati||
disvā kamma visuddhim attano.|| ||

[5] 17. Idha tappati pecca tappati||
pāpakārī ubhayattha tappati||
"Pāpaṃ me katan" ti tappati||
bhiyyo tappati duggatiṃ gato.|| ||

18. Idha nandati pecca nandati||
katapuñño ubhayattha nandati,||
"Puññ me katan" ti nandati.||
bhiyyo nandati suggatiṃ gato.|| ||

19. Bahum pi ce sahitaṃ bhāsa-māno||
Na takkaro hoti naro pamatto||
Gopo va gāvo gaṇayaṃ paresaṃ||
Na bhāgavā sāmaññassa hoti.|| ||

[6] 20. Appam pi ce sahitaṃ bhāsa-māno||
Dhammassa hoti anuDhamma-cārī||
Rāgañ ca dosañ ca pahāya mohaṃ||
Sammappajāno su-vimutta-citto||
Anupādiyāno idha vā huraṃ vā||
Sa bhāgavā sāmaññassa hoti.|| ||

Yamaka Vagga Paṭhamo

[7]

§

 

2. Appamāda Vagga

Index Than

 

21. Appamādo amatapadaṃ pamādo maccuno padaṃ,||
Appamattā na mīyanti ye pamattā yathā matā.|| ||

22. Etaṃ visesato ñatvā appamādamhi paṇḍitā||
Appamāde pamodanti ariyānaṃ gocare ratā.|| ||

23. Te jhāyino sātatikā niccaṃ daḷha-parakkamā||
Phusanti dhīrā Nibbānaṃ yoga-k-khemaṃ anuttaraṃ.|| ||

24. Uṭṭhānavato satimato||
sucikammassa nisammakārino||
Saññatassa ca dhammajīvino||
appamattassa yaso'bhivaḍḍhati.|| ||

[8] 25. Uṭṭhānen'appamādena saññamena damena ca||
Dīpaṃ kayirātha medhāvī yaṃ ogho nābhikīrati.|| ||

26. Pamādam anuyuñjanti||
bālā dummedhino janā||
Appamādañ ca medhāvi||
dhanaṃ seṭṭhaṃ va rakkhati.|| ||

27. Mā pamādam anuyuñjetha mā kāmarati-santhavaṃ||
Appamatto hi jhāyanto pappoti vipulaṃ sukhaṃ.|| ||

28. Pamādaṃ appamādena yadā nudati paṇḍito||
Paññāpāsādam āruyha asoko sokiniṃ pajaṃ||
Pabbataṭṭho va bhummaṭṭhe dhīro bāle avekkhati.|| ||

[9] 29. Appamatto pamattesu suttesu bahujāgaro||
Abalassaṃ va sīghasso hitvā yāti sumedhaso.|| ||

30. Appamādena Maghavā devānaṃ seṭṭhataṃ gato,||
Appamādaṃ pasaṃ-santi pamādo garahito sadā.|| ||

31. Appamādarato bhikkhu pamāde bhaya-dassivā||
Saṅyojanaṃ aṇuṃ thūlaṃ ḍahaṃ aggī va gacchati.|| ||

32. Appamādarato bhikkhu pamāde bhaya-dassivā||
Abhabbo parihāṇāya nibbāṇass'eva santike.|| ||

Appamāda Vagga Dutiyo

 

§

[10]

3. Citta Vagga

Index Than

 

33. Phandanaṃ capalaṃ cittaṃ durakkhaṃ dunnivārayaṃ||
Ujuṃ karoti medhāvī usukāro va tejanaṃ.|| ||

34. Vārijo va thale khitto okamokata ubbhato||
Pariphandat'idaṃ cittaṃ Māra-dheyyaṃ pahātave.|| ||

35. Dunniggahassa lahuno yattha-kāmanipātino||
Cittassa damatho sādhu, cittaṃ dantaṃ sukhāvahaṃ.|| ||

36. Sududdasaṃ sunipunaṃ||
yattha-kāmanipātinaṃ||
Cittaṃ rakkhetha medhāvī,||
cittaṃ guttaṃ sukhāvahaṃ.|| ||

[11] 37. Dūraṅgamaṃ ekacaraṃ asarīraṃ guhāsayaṃ||
Ye cittaṃ saññamessanti mokkhanti Māra-bandhanā.|| ||

38. Anavatthika-cittassa Sad'Dhammaṃ avijānato||
Paripalava-pasādassa paññā na paripūrati.|| ||

39. Anava-s-suta-cittassa ananavāhata-cetaso||
Puñña-pāpapahīṇassa n'atthi jāgarato bhayaṃ.|| ||

40. Kumbhūpamaṃ kāyam imaṃ viditvā||
naga-rūpamaṃ cittam idaṃ ṭhapetvā||
Yodhetha Māraṃ paññā-vudhena||
jitañ ca rakkhe anivesano siyā.|| ||

[12] 41. Aciraṃ vat'ayaṃ kāyo paṭhaviṃ adhisessati||
Chuddho apeta-viññāṇo niratthaṃ va kaliṅgaraṃ.|| ||

42. Diso disaṃ yan taṃ kayirā verī vā pana verinaṃ||
Micchā-paṇihitaṃ cittaṃ pāpiyo naṃ tato kare.|| ||

43. Na taṃ mātā pitā kayirā aññe vā pi ca ñātakā||
Sammā-paṇihitaṃ cittaṃ seyyaso naṃ tato kare.|| ||

Citta Vagga Tatiyo

 

§

[13]

4. Puppha Vagga

Index Than

 

44. Ko imaṃ paṭhaviṃ vijessati||
Yamalokañ ca imaṃ sa-devakaṃ?||
Ko dhamma-padaṃ sudesitaṃ||
Kusalo puppham iva-pacessati?|| ||

45. Sekho paṭhaviṃ vicessati||
Yamalokañ ca imaṃ sa-devakaṃ||
Sekho dhamma-padaṃ sudesitaṃ||
Kusalo puppham iva-pacessati.|| ||

46. Pheṇūpamaṃ kāyam imaṃ viditvā||
Marīci-dhammaṃ abhisambudhāno||
Chetvāna Mārassa papupphakāni||
Adassanaṃ maccurājassa gacche.|| ||

[14] 47. Pupphāni h'eva pacinantaṃ||
vyāsatta-manasaṃ naraṃ||
Suttaṃ gāmaṃ mahogho va||
maccu ādāya gacchati.|| ||

48. Pupphāni h'eva pacinantaṃ vyāsatta-manasaṃ naraṃ||
Atittaṃ yeva kāmesu antako kurute vasaṃ.|| ||

49. Yathā pi bhamaro pupphaṃ||
vaṇṇagandhaṃ aheṭhayaṃ||
Paḷeti rasam ādāya||
evaṃ gāme munī care.|| ||

50. Na paresaṃ vilo-māni, na paresaṃ katākataṃ||
Attano va avekkheyya katāni akatāni ca.|| ||

[15] 51. Yathā pi ruciraṃ pupphaṃ vaṇṇa-vantaṃ agandhakaṃ||
Evaṃ subhā-sitā vācā aphalā hoti akubbato.|| ||

52. Yathā pi ruciraṃ pupphaṃ||
vaṇṇa-vantaṃ sagandhakaṃ||
Evaṃ subhā-sitā vācā||
saphalā hoti pakubbato.|| ||

53. Yathā pi puppharāsimhā kayirā mālāguṇe bahū||
Evaṃ jātena maccena kattabbaṃ kusalaṃ bahuṃ.|| ||

54. Na puppha-gandho paṭivātam eti||
na candanaṃ tagaraMallikā vā||
Satañ ca gandho paṭivātam eti||
sabbā disā sappuriso pavāti.|| ||

[16] 55. Candanaṃ tagaraṃ vā pi uppalaṃ atha vassikī||
Etesaṃ gandha-jātānaṃ sīlagandho anuttaro.|| ||

56. Appamatto ayaṃ gandho yā'yaṃ tagaracandanī||
Yo ca sīla-vataṃ gandho vāti devesu uttamo.|| ||

57. Tesaṃ sampanna-sīlānaṃ appamāda-vihārinaṃ||
Sammadaññā-vimuttānaṃ Māro Maggaṃ na vindati.|| ||

58. Yathā saṅkāra-dhānasmiṃ ujjhitasmiṃ mahā-pathe padumaṃ tattha jāyetha sucigandhaṃ manoramaṃ.|| ||

59. Evaṃ saṅkāra-bhūtesu andhabhūte puthujjane||
Atirocati paññāya Sammā-Sambuddha-sāvako.|| ||

Puppha Vagga Catuttho

 

§

[17]

5. Bāla Vagga

Index Than

 

60. Dīghā jāgarato ratti dīghaṃ santassa yojanaṃ||
Dīgho bālānaṃ saṃsāro Sad'Dhamma avijānataṃ.|| ||

61. Carañ ce nādhigaccheyya seyyaṃ sadisam attano||
Ekacariyaṃ daḷhaṃ kayirā n'atthi bāle sahāyatā.|| ||

62. Puttā m'atthi dhanaṃ m'atthi iti bālo vihaññati||
Attā hi attano n'atthi kuto puttā kuto dhanaṃ.|| ||

63. Yo bālo maññati bālyaṃ paṇaḍito vā pi tena so,||
Bālo ca paṇḍitamānī sa ve bālo ti vuccati.|| ||

[18] 64. Yāva-jīvam pi ce bālo paṇḍitaṃ payirupāsati||
Na so dhammaṃ vijānāti dabbī sūparasaṃ yathā.|| ||

65. Muhuttam api ce viññū paṇḍitaṃ payirupāsati||
Khippaṃ dhammaṃ vijānāti jivhā sūparasaṃ yathā.|| ||

66. Caranti bālā dummedhā amitten'eva attanā||
Karontā pāpakaṃ kammaṃ yaṃ hoti kaṭukapphalaṃ.|| ||

67. Na taṃ kammaṃ kataṃ sādhu yaṃ katvā anutappati||
Yassa assumukho rodaṃ vipākaṃ paṭisevati.|| ||

68. Tañ ca kammaṃ kataṃ sādhu yaṃ katvā nānutappati||
Yassa patīto sumano vipākaṃ paṭisevati.|| ||

[19] 69. Madhuvā maññati bālo||
yāva pāpaṃ na paccati||
Yadā ca paccati pāpaṃ||
atha bālo dukkhaṃ nigacchati.|| ||

70. Māse māse kusaggena bālo bhuñjetha bhojanaṃ||
Na so saṅkhata-dhammānaṃ kalaṃ nāgghati soḷasiṃ.|| ||

71. Na hi pāpaṃ kataṃ kammaṃ||
sajju khīraṃ va muccati||
ḍahantaṃ bālam anveti||
bhasmācchanno va pāvako.|| ||

72. Yāvad eva anatthāya ñattaṃ bālassa jāyati||
Hanti bālassa sukkaṃsaṃ muddham assa vipātayaṃ.|| ||

73. Asataṃ bhāvanam iccheyya||
purekkhārañ ca bhikkhusu||
Āvāsesu ca issariyaṃ||
pūjā parakulesu ca.|| ||

74. "Mam'eva kata maññantū gihī pabba-jitā ubho,||
Mam'eva ativasā assu kiccākiccesu kismici",||
Iti bālassa saṃkappo, icchā māno ca vaḍḍhati.|| ||

75. Aññā hi lābhūpanisā aññā Nibbāna-gāminī,||
Evam etaṃ abhiññāya bhikkhu Buddhassa sāvako||
Sakkāraṃ nābhinandeyya vivekam anubrūhaye.|| ||

Bāla vagga Pañcamo

 

§

[22]

6. Paṇḍita Vagga

Index Than

 

76. Nidhinaṃ va pavattāraṃ yaṃ passe vajjadassinaṃ||
Niggayhavādiṃ medhāviṃ tādisaṃ paṇḍitaṃ bhaje||
Tādisaṃ bhajamānassa seyyo hoti na pāpiyo.|| ||

77. Ovadeyyanusāseyya asabbhā ca nivāraye,||
Sataṃ hi so piyo hoti asataṃ hoti appiyo.|| ||

78. Na bhaje pāpake mitte na bhaje purisādhame,||
Bhajetha mitte kalyāṇe bhajetha purisuttame.|| ||

79. Dhamma-pīti sukhaṃ seti vi-p-pasannena cetasā,||
Ariyappavedite dhamme sadā ramati paṇḍito.|| ||

80. Udakaṃ hi nayanti nettikā||
usukārā namayanti tejanaṃ||
[23] Dāruṃ namayanti tacchakā||
attāṇaṃ damayanti paṇḍitā.|| ||

81. Selo yathā ekaghano vātena na samīrati||
Evaṃ nindāpasaṃsāsu na samiñjanti paṇḍitā.|| ||

82. Yathā pi rahado gambhīro vi-p-pasanno anāvilo||
Evaṃ dhammāni sutvāna vip-pasīdanti paṇḍitā.|| ||

83. Sabbattha ve sappurisā vajanti||
na kāmakāmā lapayanti santo||
Sukhena phuṭṭhā atha vā dukkhena||
na uccāvacaṃ paṇḍitā dassayanti.|| ||

[24] 84. Na atta-hetu na parassa-hetu||
Na puttam-icche na dhanaṃ na raṭṭhaṃ||
Na iccheyya adhammena samiddhim attano||
Sa sīlavā paññavā dhammiko siyā.|| ||

85. Appakā te manussesu ye janā pāragāmino,||
Athāyaṃ itarā pajā tīram evānudhāvati.|| ||

86. Ye ca kho sammadakkhāte||
dhamme dhamm-ā-nuvattino||
Te janā pāram essanti||
maccudheyyaṃ suduttaraṃ.|| ||

87. Kaṇhaṃ dhammaṃ vippahāya||
sukkaṃ bhāvetha paṇḍito||
Okā anokaṃ āgamma||
viveke yattha dūramaṃ.|| ||

[25] 88. Tatr-ā-bhiratim iccheyya, hitvā kāme akiñ cano||
Pariyodapeyya attāṇaṃ citta-klesehi paṇḍito.|| ||

89. Yesaṃ sambodhi-aṅgesu sammā cittaṃ subhāvitaṃ||
Ādāna-paṭinissagge anupādāya ye ratā||
Khīṇ'āsavā jutimanto te loke parinibbutā.|| ||

Paṇḍita Vagga Chaṭṭho

 

§

[26]

7. Arahanta Vagga

Index Than

 

90. Gataddhino visokassa vippamuttassa sabbadhi||
Sabba-ganthappahīṇassa pariḷāho na vijjati.|| ||

91. Uyyuñjanti satimanto na nikete ramanti te||
Haṃsā va pallalaṃ hitvā okamoka jahanti te.|| ||

92. Yesaṃ sannicayo n'atthi ye pariññātabhojanā||
Suññato animitto ca vimokkho yesaṃ gocaro||
Ākāse va sakuntānaṃ gati tesaṃ durannayā|| ||

93. Yassāsavā parikkhīṇā āhāre ca anissito||
Suññato animitto ca vimokkho yassa gocaro||
Ākāse va sakuntānaṃ padaṃ tassa durannayaṃ.|| ||

[27] 94. Yass'indriyāni samathaṃ gatāni||
assā yathā sārathinā sudantā||
Pahīṇamānassa anāsavassa||
Devā pi tassa pihayanti tādino.|| ||

95. Paṭhavisamo no virujjhati||
indakhīlūpamo tādi subbato||
Rahado va apetakaddamo||
saṃsārā na bhavanti tādino.|| ||

96. Santaṃ tassa manaṃ hoti santā vācā ca kamma ca||
Sammadaññā vimuttassa upasantassa tādino.|| ||

97. Assaddho akataññū ca sandhicchedo ca yo naro||
Hatāvakāso vantāso sa ve uttamaporiso.|| ||

[28] 98. Gāme vā yadi vāraññe||
ninne vā yadi vā thale||
Yatth'Arahanto viharanti||
taṃ bhūmiṃ rāmaṇeyyakaṃ.|| ||

99. Ramaṇīyāni araññāni, yattha na ramatī jano||
Vītarāgā ramissanti, na te kāmagavesino.|| ||

Arahanta Vagga Sattamo

 

§

[29]

8. Sahassa Vagga

Index Than

 

100. Sahassam api ce vācā anattha-padasaṃhitā||
Ekaṃ attha-padaṃ seyyo yaṃ sutvā upasammati.|| ||

101. Sahassam api ce gāthā antthapadasaṃhitā||
Ekaṃ gāthāpadaṃ seyyo yaṃ sutvā upasammati.|| ||

102. Yo ca gāthāsataṃ bhāse anattha-padasaṃhitaṃ||
Ekaṃ dhamma-padaṃ seyyo yaṃ sutvā upasammati.|| ||

103. Yo sahassaṃ sahassena saṅgāme mānuse jine||
Ekañ ca jeyya-m-attāṇaṃ sa ve saṅgāmajuttamo.|| ||

[30] 104. Attā have jitaṃ seyyo yā c'āyaṃ itarā pajā||
Attadantassa posassa niccaṃ saññatacārino.|| ||

105. N'eva devo na gandhabbo na Māro saha Brahmunā||
Jitaṃ apajitaṃ kayirā tathā-rūpassa jantuno.|| ||

106. Māse māse sahassena yo yajetha sataṃ samaṃ||
Ekañ ca bhāvit'attāṇaṃ muhuttam api pūjaye||
Sā yeva pūjanā seyyo yañ ce vassa-sataṃ hutaṃ.|| ||

107. Yo ca vassa-sataṃ jantu aggiṃ paricare vane||
Ekañ ca bhāvit'attāṇaṃ muhuttam api pūjaye||
Sā yeva pūjanā seyyo yañ ce vassa-sataṃ hutaṃ.|| ||

[31] 108. Yaṃ kiñci yiṭṭhañ ca hutaṃ ca loke||
Saṃvaccharaṃ yajetha puññapekkho||
Sabbam pi taṃ na catubhāgam eti||
Abhivādanā ujjugatesu seyyo.|| ||

109. Abhivādanasīlissa||
niccaṃ vaddhāpacāyino||
Cattāro dhammā vaḍḍhanti:||
āyu vaṇṇo sukhaṃ balaṃ.|| ||

110. Yo ca vassa-sataṃ jīve du-s-sīlo asamāhito||
Ekāhaṃ jīvitaṃ seyyo sīlavantassa jhāyino.|| ||

111. Yo ca vassa-sataṃ jīve duppañño asamāhito||
Ekāhaṃ jīvitaṃ seyyo paññavantassa jhāyino.|| ||

[32] 112. Yo ca vassa-sataṃ jīve kusīto hīnavīriyo||
Ekāhaṃ jīvitaṃ seyyo viriyam ārabhato daḷhaṃ.|| ||

113. Yo ca vassa-sataṃ jīve apassaṃ udayavyayaṃ||
Ekāhaṃ jīvitaṃ seyyo passato udayavyayaṃ.|| ||

114. Yo ca vassa-sataṃ jīve apassaṃ amataṃ padaṃ||
Ekāhaṃ jīvitaṃ seyyo passato amataṃ padaṃ.|| ||

115. Yo ca vassa-sataṃ jīve apassaṃ dhammam uttamaṃ||
Ekāhaṃ jīvitaṃ seyyo passato dhammam uttamaṃ.|| ||

Sahassa Vagga Aṭṭhamo

 

§

[33]

9. Pāpa Vagga

Index Than

 

116. Abhitvaretha kalyāṇe pāpā cittaṃ nivāraye,||
Dandhaṃ hi karoto puññaṃ pāpasmiṃ ramatī mano.|| ||

117. Pāpañ ce puriso kayirā||
na taṃ kayirā puna-p-punaṃ,||
Na tamhi chandaṃ kayirātha,||
dukkho pāpassa uccayo.|| ||

118. Puññañ ce puriso kayirā||
kayirāth'enaṃ puna-p-punaṃ,||
Tamhi chandaṃ kayirātha,||
sukho puññassa uccayo.|| ||

119. Pāpo pi passati bhadraṃ||
yāva pāpaṃ na paccati,||
Yadā ca paccati pāpaṃ||
atha pāpo pāpāni passati.|| ||

[34] 120. Bhadro pi passati pāpaṃ||
yāva bhadraṃ na paccati||
Yadā ca paccati bhadraṃ||
atha bhadro bhadrāni passati.|| ||

121. Māppamaññetha pāpassa "Na man taṃ āgamissati",||
Udabindunipātena udakumbho pi pūrati,||
Bālo pūrati pāpassa thokathokam pi ācinaṃ.|| ||

122. Māppamaññetha puññassa "Na maṃ taṃ āgamissati",||
Udabindunipātena udakumbho pi pūrati,||
Dhīro pūrati puññassa thokathokam pi ācinaṃ.|| ||

[35] 123. Vāṇijo va bhayaṃ Maggaṃ appasattho maha-d-dhano||
Visaṃ jīvit-u-kāmo va pāpāni parivajjaye.|| ||

124. Pāṇimhi ce vaṇo nāssa hareyya pāṇinā visaṃ||
Nābbaṇaṃ visam anveti, n'atthi pāpaṃ akubbato.|| ||

125. Yo appaduṭṭhassa narassa dussati||
Suddhassa posassa an-aṅgaṇassa||
Tam eva bālaṃ pacceti pāpaṃ||
Sukhumo rajo paṭivātaṃ va khitto.|| ||

126. Gabbham eke upapajjanti Nirayaṃ pāpa-kammino,||
Saggaṃ sugatino yanti parinibbanti anāsavā.|| ||

[36] 127. Na antalikkhe na samuddamajjhe||
Na pabbatānaṃ vivaraṃ pavissa||
Na vijjatī so jagatippadeso||
Yatthaṭthito muñceyya pāpa-kammā.|| ||

128. Na antalikkhe na samuddamajjhe||
Na pabbatānaṃ vivaraṃ pavissa||
Na vijjati so jagatippadeso||
Yatthaṭthitaṃ nappasahetha maccu.|| ||

Pāpa Vagga Navamo

 

§

[37]

10. Daṇaḍa Vagga

Index Than

 

129. Sabbe tasanti daṇaḍassa sabbe bhāyanti maccuno,||
Attānaṃ upamaṃ katvā na haneyya na ghātaye.|| ||

130. Sabbe tasanti daṇaḍassa sabbesaṃ jīvitaṃ piyaṃ,||
Attānaṃ upamaṃ katvā na haneyya na ghātaye.|| ||

131. Sukhakāmāni bhūtāni yodaṇḍena vihiṃsati||
Attano sukham esāno pecca so na labhate sukhaṃ.|| ||

132. Sukhakāmāni bhūtāni yodaṇḍena na hiṃsati||
Attano sukham esāno pecca so labhate sukhaṃ.|| ||

[38] 133. Mā voca pharusaṃ kañci vuttā paṭivadeyyu taṃ,||
Dukkhā hi sārambhakathā paṭidaṇḍā phuseyyu taṃ.|| ||

134. Sa ce neresi attāṇaṃ kaṃso upahato yathā||
Esa patto si nibbāṇaṃ sārambho te na vijjati.|| ||

135. Yathā daṇḍena gopālo gāvo pāceti gocaraṃ||
Evaṃ jarā ca maccu ca āyuṃ pācenti pāṇinaṃ.|| ||

136. Atha pāpāni kammāni karaṃ bālo na bujjhati,||
Sehi kammehi dummedho aggidaḍḍho va tappati.|| ||

137. Yo daṇḍena adaṇḍesu||
appaduṭṭhesu dussati||
Dasannam aññataraṃ ṭhānaṃ||
khippam eva nigacchati.|| ||

[39] 138. Vedanaṃ pharusaṃ jāniṃ sarīrassa ca bhedanaṃ||
Garukaṃ vā pi ābādhaṃ cittakkhepaṃ va pāpuṇe.|| ||

139. Rājato vā upassaggaṃ||
abbha-k-khānaṃ va dāruṇaṃ||
Parikkhayaṃ va ñātīnaṃ||
bhogānaṃ va pabhaṅguṇaṃ|| ||

140. Athav'āssa agārāni aggi ḍahati pāvako||
Kāyassa bhedā duppañño Nirayaṃ so uppajjati.|| ||

141. Na naggacariyā na jaṭā na paṃkā||
Nānāsakā thaṇḍilasāyikā vā||
Rājo va jallaṃ ukkuṭikappadhānaṃ||
Sodhenti maccaṃ avitiṇṇakaṃkhaṃ.|| ||

[40] 142. Alaṃkato ce pi samaṃ careyya||
Santo danto niyato brahma-cārī||
Sabbesu bhūtesu nidhāya daṇḍaṃ||
So brāhmaṇo so samaṇo sa bhikkhu.|| ||

143a. Hirīnisedho puriso koci lokasmiṃ vijjati||
Yo nindaṃ apabodhati asso bhadro kasām iva.|| ||

143b. Asso yathā bhadro kasāniviṭṭho||
Ātāpino saṃvegino bhavātha.|| ||

[41] 144. Saddhāya sīlena ca vīriyena ca||
Samādhinā dhamma-vinicchayena ca||
Sampanna-vijjā-caraṇā patissatā||
Pahassatha dukkham idaṃ anappakaṃ.|| ||

145. Udakaṃ hi nayanti nettikā||
usukārā namayanti tejanaṃ||
Dāruṃ namayanti tacchakā||
attāṇaṃ damayanti subbatā.|| ||

Daṇḍa Vagga Dasamo

 

§

[42]

11. Jarā Vagga

Index Than

 

146. Ko nu hāso kim ānando niccaṃ pajjalite sati,||
Andhakārena onaddhā padīpaṃ na gavessatha.|| ||

147. Passa citta-kataṃ bimbaṃ arukāyaṃ samussitaṃ||
Āturaṃ bahu-saṅkappaṃ yassa n'atthi dhuvaṃ ṭhiti.|| ||

148. Parijiṇṇam idaṃ rūpaṃ roganiḍḍhaṃ pabhaṅguraṃ||
Bhijjati pūtisandeho maraṇantaṃ hi jīvitaṃ.|| ||

149. Yān'imāni apa-t-thāni alāpūn'eva sārade||
Kāpotakāni aṭṭhīni tāni disvāna kā rati.|| ||

[43] 150. Aṭṭhīnaṃ nagaraṃ kataṃ maṃsa-lohitalepanaṃ||
Yattha jarā ca maccu ca māno makkho ca ohito.|| ||

151. Jīranti ve rāja rathā sucittā||
Atho sarīram pi jaraṃ upeti||
Satañ ca dhammo na jaraṃ upeti||
Santo have sabbhi pavedayanti.|| ||

152. Appassutāyaṃ puriso balivaddo va jīrati,||
Maṃsāni tassa vaḍḍhanti paññā tassa na vaḍḍhati.|| ||

153. Aneka-jāti-saṃsāraṃ sandhāvissaṃ anibbisaṃ||
Gahakārakaṃ gavesanto, dukkhā jāti puna-p-punaṃ.|| ||

[44] 154. Gahakāraka diṭṭho si puna gehaṃ na kāhasi,||
Sabbā ete phāsukā bhaggā gahakaūṭaṃ visaṃkhitaṃ||
Visaṅkhāragataṃ cittaṃ taṇhānaṃ khayam ajjhagā.|| ||

155. Acaritvā Brahma-cariyaṃ aladdhā yobbane dhanaṃ||
Jiṇṇakoñ cā va jhāyanti khīṇamacche va pallale.|| ||

156. Acaritvā Brahma-cariyaṃ aladdhā yobbane dhanaṃ||
Senti cāpātikhīṇā va purāṇāni anutthunaṃ.|| ||

Jarā Vagga Ekādasamo

 

§

[45]

12. Atta Vagga

Index Than

 

157. Attānañ ce piyaṃ jaññā rakkheyya naṃ surakkhitaṃ,||
Tiṇṇam aññataraṃ yāmaṃ paṭijaggeyya paṇḍito.|| ||

158. Attānam eva paṭhamaṃ patirūpe nivesaye,||
Ath'aññam anusāseyya, na kilisseyya paṇḍito.|| ||

159. Attānañ ce tathā kayirā yath'aññam anusāsati||
Sudanto vata dammetha, attā hi kira duddamo.|| ||

160. Attā hi attano nātho, ko hi nātho paro siyā;||
Attanā hi sudantena nāthaṃ labhati dullabhaṃ.|| ||

161. Attanā va kataṃ pāpaṃ||
attajaṃ attasambhavaṃ||
[46] Abhimatthati dummedhaṃ||
vajiraṃ v'amhamayaṃ maṇiṃ.|| ||

162. Yassa accanta-du-s-sīlyaṃ māluvā sālam iv'otataṃ||
Karoti so tath'attāṇaṃ yathā naṃ icchatī diso.|| ||

163. Sukarāni asādhūni attano ahitāni ca,||
Yaṃ ve hitañ ca sādhuñ ca taṃ ve parama-dukkaraṃ.|| ||

164. Yo sāsanaṃ arahataṃ ariyānaṃ dhamma-jīvinaṃ||
Paṭikkosati dummedho diṭṭhiṃ nissāya pāpikaṃ||
Phalāni kaṭṭhakasseva attaghaññāya phallati.|| ||

[47] 165. Attanā va kataṃ pāpaṃ attanā saṃkilissati,||
Attanā akataṃ pāpaṃ attanā va visujjhati,||
Suddhi asuddhi paccattaṃ nāñño aññaṃ visodhaye.|| ||

166. Attadatthaṃ paratthena bahunā pi na hāpaye,||
Attadattham abhiññāya sadatthapasuto siyā.|| ||

Atta Vagga Dvādasamo

 

§

[48]

13. Loka Vagga

Index Than

 

167. Hīnaṃ dhammaṃ na seveyya pamādena na saṃvase||
Micchā-diṭṭhiṃ na seveyya na siyā loka-vaḍḍhano.|| ||

168. Uttiṭṭhe na-ppamajjeyya dhammaṃ su-caritaṃ care,||
Dhammacārī sukhaṃ seti asmiṃ loke paramhi ca.|| ||

169. Dhammaṃ care su-caritaṃ na naṃ du-c-caritaṃ care,||
Dhammacārī sukhaṃ seti asmiṃ loke paramhi ca.|| ||

170. Yathā bubbulakaṃ passe yathā passe marīcikaṃ||
Evaṃ lokaṃ avekkhantaṃ maccurājā na passati.|| ||

[49] 171. Etha passath'imaṃ lokaṃ cittaṃ rāja-rathūpamaṃ||
Yattha bālā visīdanti, n'atthi saṃgo vijānataṃ.|| ||

172. Yo ca pubbe pamajjitvā pacchā so na-ppamajjati||
So imaṃ lokaṃ pabhāseti abbhā mutto va candimā.|| ||

173. Yassa pāsaṃ kataṃ kammaṃ kusalena pithīyati||
So imaṃ lokaṃ pabhāseti abbhā mutto va candimā.|| ||

174. Andhabhūto ayaṃ loko tanuk'ettha vipassati,||
Sakunto jālamutto va appo saggāya gacchati.|| ||

175. Haṃsādiccapathe yanti ākāse yanti iddhiyā||
Niyyanti dhīrā lokamhā jitvā Māraṃ savāhanaṃ.|| ||

[50] 176. Ekaṃ dhammaṃ atītassa musā-vādissa jantūno||
Vitiṇṇaparalokassa n'atthi pāpaṃ akāriyaṃ.|| ||

177. Na ve kadariyā deva-lokaṃ vajanti||
bālā have na-ppasaṃ-santi dānaṃ,||
Dhīro ca dānaṃ anumodamāno||
Ten'eva so hoti sūkhī parattha.|| ||

178. Paṭhavyā ekarajjena saggassa gamanena vā||
Sabba-lokādhipaccena sot'āpatti-phalaṃ varaṃ.|| ||

Loka Vagga Terasamo

 

§

[51]

14. Buddha Vagga

Index Than

 

179. Yassa jitaṃ nāvajīyati||
jitam assa no yāti koci loke,||
Tam buddham ananta-gocaraṃ||
apadaṃ kena padena nessatha.|| ||

180. Yassa jālinī visattikā||
taṇhā n'atthi kuhiñ ci netave||
Tam buddham ananta-gocaraṃ||
apadaṃ kena padena nessatha.|| ||

181. Ye jhānapasutā dhīrā nekkhammūpasame ratā||
Devā pi tesaṃ pihayanti sambuddhānaṃ satīmataṃ.|| ||

182. Kiccho manussapaṭi-lābho,||
kicchaṃ macchāna jīvitaṃ,||
Kicchaṃ Sad'Dhamma-savanaṃ,||
kiccho Buddhānaṃ uppādo.|| ||

[52] 183. Sabba-pāpassa akaraṇaṃ kusalassa upasampadā||
Sacitta-pariyoda-panaṃ etaṃ Buddhāna sāsanaṃ.|| ||

184. Khantī paramaṃ tapo titikkhā,||
Nibbāṇaṃ paramaṃ vadanti Buddhā||
Na hi pabba-jito parūpaghātī||
Samaṇo hoti paraṃ viheṭhayanto.|| ||

185. Anūpavādo anūpaghāto Pātimokkhe ca saṃvaro||
Mattaññutā ca bhattasmiṃ pantañ ca sayanāsanaṃ||
Adhicitte ca āyogo etaṃ Buddhāna sāsanaṃ.|| ||

[53] 186. Na kahāpaṇavassena titti kāmesu vijjati,||
"Appassādā dukkhā kāmā" iti viññāya paṇḍito.|| ||

187. Api dibbesu kāmesu ratiṃ so nādhigacchati,||
Taṇha-k-khayarato hoti Sammā-Sambuddhasā-vako.|| ||

188. Bahuṃ ve saraṇaṃ yanti pabbatāni vanāni ca||
Ārāmarukkha-cetyāni manussā bhayatajjitā.|| ||

189. N'etaṃ kho saraṇaṃ khemaṃ,||
n'etaṃ saraṇam uttamaṃ,||
N'etaṃ saraṇam āgamma,||
sabba-dukkhā pamuccati.|| ||

[54] 190. Yo ca Buddhañ ca Dhammañ ca||
Saṅghañ ca saraṇaṃ gato||
cattāri ariya-saccāni||
samma-p-paññāya passati.|| ||

191. Dukkhaṃ dukkha-samuppādaṃ||
dukkhassa ca ati-k-kamaṃ||
Ariyañ c'aṭṭhaṅgikaṃ Maggaṃ||
dukkh'ūpasama-gāminaṃ.|| ||

192. Etaṃ kho saraṇaṃ khemaṃ etaṃ saraṇam uttamaṃ||
Etaṃ saraṇam āgamma sabba-dukkhā pamuccati.|| ||

[55] 193. Dullabho purisājañño na so sabbattha jāyati,||
Yattha so jāyati dhīro taṃ kūlaṃ sukham edhati.|| ||

194. Sukho Buddhānaṃ uppādo sukhā sad'Dhamma-desanā||
Sukhā saṃghassa sāmaggī samaggānaṃ tapo sukho.|| ||

195. Pūjārahe pūjayato Buddhe yadi va sāvake||
Papañ ca samati-k-kante tiṇṇasoka-pariddave.|| ||

196. Te tādise pūjayato nibbute akutobhaye||
Na sakkā puññaṃ saṃkhātuṃ im'ettam api kenaci.|| ||

Buddha Vagga Cuddasamo

 

§

[56]

15. Sukha Vagga

Index Than

 

197. Susukhaṃ vata jīvāma verinesu averino||
Verinesu manussesu viharāma averino.|| ||

198. Susukhaṃ vata jīvāma āturesu anāturā,||
Āturesu manussesu viharāma anāturā.|| ||

199. Susukhaṃ vata jīvāma ussūkesu anussukā||
Ussukesu manussesu viharāma anussukā.|| ||

200. Susukhaṃ vata jīvāma yesaṃ no n'atthi kiñ canaṃ||
Pītibhakkhā bhavissāma devā Ābhassarā yathā.|| ||

[57] 201. Jayaṃ veraṃ pasavati dukkhaṃ seti parājito,||
Upasanto sukhaṃ seti hitvā jayaparājayaṃ.|| ||

202. N'atthi rāgasamo aggi,||
n'atthi dosasamo kali,||
n'atthi khandhādisā dukkhā,||
n'atthi santiparaṃ sukhaṃ.|| ||

203. Jighacchāparamā rogā,||
saṅkhāra paramā dukkhā,||
Etaṃ ñatvā yathā-bhūtaṃ||
nibbāṇaṃ paramaṃ sukhaṃ.|| ||

204. Ārogya-paramā lābhā, santuṭṭhi-paramaṃ dhanaṃ||
Vissāsa-paramā ñātī, nibbāṇaṃ paramaṃ sukhaṃ.|| ||

[58] 205. Paviveka-rasaṃ pītvā rasaṃ upasamassa ca||
Niddaro hoti nippāpo dhamma-pītirasaṃ pivaṃ.|| ||

206. Sāhu dassanam ariyānaṃ sannivāso sadā sukho,||
Adassanena bālānaṃ niccam eva sukhī siyā.|| ||

207. Bāla-saṅgata-cārī hi dīgham addhāna socati,||
Dukkho bālehi saṅvāso amitteneva sabbadā,||
Dhīro ca sukha-saṅvāso ñātīnaṃ va samāgamo.|| ||

208. Dhīrañ ca paññañ ca bahu-s-sutañ ca||
Dhorayyasīlaṃ vatavantam āriyaṃ||
Taṃ tādisaṃ sappurisaṃ sumedhaṃ||
Bhajetha nakkhattapathaṃ va candimā.|| ||

Sukha Vagga Paṇṇarasamo

 

§

[60]

16. Piya Vagga

Index Than

 

209. Ayoge yuñjaṃ attāṇaṃ yogasmiñ ca ayojayaṃ||
Atthaṃ hitvā piyaggāhī pihet'attānuyoginaṃ.|| ||

210. Mā piyehi samāgañchī||
appiyehi kudācanaṃ,||
Piyānaṃ adassanaṃ dukkhaṃ||
appiyānañ ca dassanaṃ.|| ||

211. Tasmā piyaṃ na kayirātha piyāpāyo hi pāpako,||
Ganthā tesaṃ na vijjanti yesaṃ n'atthi piy-ā-p-piya-m.|| ||

212. Piyato jāyatī soko piyato jāyatī bhayaṃ,||
Piyato vippamuttassa n'atthi soko kuto bhayaṃ.|| ||

[61] 213. Pemato jāyatī soko pemato jāyatī bhayaṃ,||
Pemato vippamuttassa n'atthi soko kuto bhayaṃ.|| ||

214. Ratiyā jāyatī soko ratiyā jāyatī bhayaṃ||
Ratiyā vippamuttassa n'atthi soko kuto bhayaṃ.|| ||

215. Kāmato jāyatī soko kāmato jāyatī bhayaṃ,||
Kāmato vippamuttassa n'atthi soko kuto bhayaṃ.|| ||

216. Taṇhāya jāyatī soko taṇhāya jāyatī bhayaṃ,||
Taṇhāya vippamuttassa n'atthi soko kuto bhayaṃ.|| ||

[62] 217. Sīla-dassana-sampannaṃ dhamm'aṭṭhaṃ saccavedinaṃ||
Attano kamma kubbānaṃ taṃ jano kurute piyaṃ.|| ||

218. Chanda-jāto anakkhāte manasā ca phuṭo siyā||
Kāmesu ca appaṭibaddha-citto uddhaṃ soto ti vuccati.|| ||

219. Cirappavāsiṃ purisaṃ dūrato sotthim āgataṃ||
Ñātimittā suhajjā ca abhinandanti āgataṃ.|| ||

220. Tath'eva kata-puññam pi asmā lokā paraṃ gataṃ||
Puññāni patigaṇhanti piyaṃ ñātīva āgataṃ.|| ||

Piya Vagga Soḷasamo

 

§

[63]

17. Kodha Vagga

Index Than

 

221. Kodhaṃ jahe vippajaheyya mānaṃ||
saṃyojanaṃ sabbam ati-k-kameyya||
taṃ nāma-rūpasmim asajja-mānaṃ||
akiñ canaṃ nānupatanti dukkhā.|| ||

222. Yo ve uppatitaṃ kodhaṃ rathaṃ bhantaṃ va dhāraye||
Tam ahaṃ sārathiṃ brūmi, rasmggāho itaro jano.|| ||

223. A-k-kodhena jine kodhaṃ asādhuṃ sādhunā jine||
Jine kadariyaṃ dānena saccena alika-vādinaṃ.|| ||

224. Saccaṃ bhaṇe na kujjheyya dajjā appasmi yācito||
Etehi tīhi ṭhānehi gacche devāna santike.|| ||

[64] 225. Ahiṃsakā ye munayo niccaṃ kāyena saṃvutā||
Te yanti accutaṃ ṭhānaṃ yattha gantvā na socare.|| ||

226. Sadā jāgaramānānaṃ ahorattānusikkhinaṃ||
Nibbāṇaṃ adhimuttānaṃ atthaṃ gacchanti āsavā.|| ||

227. Porāṇam etaṃ Atula n'etaṃ ajjatanām iva:||
Nindanti tuṇhim āsīnaṃ nindanti bahubhāṇinaṃ||
Mitabhāṇim pi nindanti, n'atthi loke anindito.|| ||

[65] 228. Na cāhu na ca bhavissati na c'etarahi vijjati||
Ekantaṃ nindito poso ekantaṃ vā pasaṃsito.|| ||

229. Yañ ce viññū pasaṃ-santi anuvicca suve suve||
Acchidda-vuttiṃ medhāviṃ paññā-sīla-samāhitaṃ.|| ||

230. Nekkhaṃ jambonadasseva ko taṃ ninditum arahati,||
Devā pi naṃ pasaṃ-santi, Brahmunā pi pasaṃsito.|| ||

231. Kāyappakopaṃ rakkheyya kāyena saṃvuto siyā,||
Kāya-du-c-caritaṃ hitvā kāyena su-caritaṃ care.|| ||

232. Vacī-pakopaṃ rakkheyya vācāya saṃvuto siyā,||
Vacī-du-c-caritaṃ hitvā vācāya su-caritaṃ care.|| ||

[66] 233. Manopakopaṃ rakkheyya manasā saṃvuto siyā,||
Mano-du-c-caritaṃ hitvā manasā su-caritaṃ care.|| ||

234. Kāyena saṃvutā dhīrā atho vācāya saṃvutā||
Manasā saṃvutā dhīrā te ve suparisaṃvutā.|| ||

Kodha Vagga Sattarasamo

 

§

[67]

18. Mala Vagga

Index Than

 

235. Paṇḍupalāso va dāni si||
Yama-purisā pi ca taṃ upaṭṭhitā,||
Uyyogamukhe ca tiṭṭhasi||
patheyyam pi ca te na vijjati.|| ||

236. So karohi dīpam attano||
khippaṃ vāyama paṇḍito bhava||
Niddhantamalo an-aṅgaṇo||
dibbaṃ ariyabhūmim ehisi.|| ||

237. Upanītavayo va dāni si||
sampayāto si Yamassa santike,||
Vāso pi ca te n'atthi antarā||
pātheyyam pi ca te na vijjati.|| ||

238. So karohi dīpam attano||
khippa vāyama paṇḍito bhava,||
Niddhantamalo an-aṅgaṇo||
na punaṃ jātijaraṃ upehisi.|| ||

[68] 239. Anupubbena medhāvī thokathokaṃ khaṇe khaṇe||
Kammāro rajatass'eva niddhame malam attano.|| ||

240. Ayasā va malaṃ samuṭṭhitaṃ||
taduṭṭhāya tam eva khādati||
Evaṃ atidhonacārinaṃ||
sakakammāni nayanti duggatiṃ.|| ||

241. Asajjhāyamalā mantā, anuṭṭhāna-malā gharā,||
Malaṃ vaṇṇassa kosajjaṃ, pamādo rakkhato malaṃ.|| ||

[69] 242. Malitthiyā du-c-caritaṃ maccheraṃ dadato malaṃ||
Malā ve pāpakā dhammā asmiṃ loke paramhi ca.|| ||

243. Tato malā malataraṃ avijjā paramaṃ malaṃ,||
Etaṃ malaṃ pahatvāna nimmalā hotha bhikkhavo.|| ||

244. Sujīvaṃ ahirikena kākasūrena dhaṃsinā||
Pakkhandinā pagabbhena saṃkiliṭṭhena jīvitaṃ.|| ||

245. Hirimatā ca dujjīvaṃ niccaṃ sucigavesinā||
Alīnen'apagabbhena suddhājīvena passatā.|| ||

246. Yo pāṇam atimāpeti musā-vādañ ca bhāsati||
Loke adinnaṃ ādiyati paradāraṃ ca gacchati,|| ||

[70] 247. Surāmerayapānañ ca yo naro anuyuñjati||
Idh'eva-m-eso lokasmiṃ mūlaṃ khaṇati attano.|| ||

248. Evam bho purisa jānāhi:||
pāpa-dhammā asaññatā,||
Mā taṃ lobho adhammo ca||
ciraṃ dukkhāya randhayuṃ.|| ||

249. Dadanti ve yathā-saddhaṃ yathā-pasādanaṃ jano,||
Tattha yo maṅku bhavati paresaṃ pānabhojane||
Na so divā vā rattiṃ vā samādhiṃ adhigacchati.|| ||

250. Yassa c'etaṃ samucchannaṃ||
mūla-ghaccaṃ samūhataṃ||
Sa ve divā vā rattiṃ vā||
samādhiṃ adhigacchati.|| ||

[71] 251. N'atthi rāgasamo aggi n'atthi dosasamo gaho||
n'atthi mohasamaṃ jālaṃ n'atthi taṇhāsamā nadī.|| ||

252. Sudassaṃ vajjam aññesaṃ attano pana duddasaṃ,||
Paresaṃ hi so vajjāni opuṇāti yathā bhūsaṃ,||
Attano pana chādeti kaliṃ va kitavā saṭho.|| ||

253. Paravajjānupassissa niccaṃ ujjhānasaññino||
Āsavā tassa vaḍḍhanti ārā so āsava-k-khayā.|| ||

254. Ākāse ca padaṃ n'atthi samaṇo n'atthi bāhiro,||
Papañ cā bhiratā pajā nippapañ cā Tathāgatā.|| ||

255. Ākāse padaṃ n'atthi||
samaṇo n'atthi bāhiro||
[72] Saṅkhārā sassatā n'atthi||
n'atthi Buddhānaṃ iñjitaṃ.|| ||

Mala Vagga Aṭṭhārasamo

 

§

[73]

19. Dhammaṭṭha Vagga

Index Than

 

256. Na tena hoti dhammaṭṭho yen'atthaṃ sahasā naye,||
Yo ca atthaṃ anatthañ ca ubho niccheyya paṇḍito.|| ||

257. Asāhasena dhammena samena nayatī pare||
Dhammassa gutto medhāvī dhammaṭṭho ti pavuccati.|| ||

258. Na tena paṇḍito hoti yāvatā bahu bhāsati,||
Khemī averī abhayo paṇḍito ti pavuccati.|| ||

259. Na tāvatā dhamma-dharo yāvatā bahu bhāsati,||
Yo ca appam pi sutvāna dhammaṃ kāyena passati||
Sa ve dhamma-dharo hoti yo dhammaṃ na-ppamajjati.|| ||

260. Na tena thero hoti yen'assa palitaṃ siro,||
Paripakko vayo tassa mogha-jiṇṇo ti vuccati.|| ||

261. Yamhi saccañ ca dhammo ca ahiṃsā saññamo damo||
Sa ve vantamalo dhīro thero ti pavuccati.|| ||

[74] 262. Na vākkaraṇa-mattena vaṇṇa-pokkha-ratāya vā||
Sādhurūpo naro hoti issukī maccharī saṭho.|| ||

263. Yassa ce taṃ samucchinnaṃ||
mūla-ghaccaṃ samūhataṃ||
Sa vanta-doso medhāvī||
sādhurūpo ti vuccati.|| ||

264. Na muṇḍakena samaṇo abbato alikaṃ bhaṇaṃ||
Icchālobha-samāpanno samaṇo kiṃ bhavissati.|| ||

265. Yo ca sameti pāpāni aṇuṃ thūlāni sabbaso||
Samitattā hi pāpānaṃ samaṇo ti pavuccati.|| ||

[75] 266. Na tena bhikkhū hoti yāvatā bhikkhate pare,||
Vissaṃ dhammaṃ samādāya bhikkhu hoti na tāvatā.|| ||

267. Yo'dha puññañ ca pāpañ ca bāhetvā Brahma-cariyavā||
Saṅkhāya loke carati sa ve bhikkhū ti vuccati.|| ||

268. Na monena muni hoti mūḷharūpo aviddasu,||
Yo ca tulaṃ va paggayha varam ādāya paṇḍito.|| ||

269. Pāpāni parivajjeti sa manī tena so muni,||
Yo munāti ubho loke muni tena pavuccati.|| ||

270. Na tena ariyo hoti yena pāṇāni hiṃsati||
Ahiṃsā sabba-pāṇānaṃ ariyo ti pavuccati.|| ||

[76] 271. Na sīla-b-batamattena bāhu-saccena vā puna||
Atha vā samādhi-lābhena vivicca-sayanena vā.|| ||

272. Phusāmi nekkhamma-sukhaṃ aputhu-j-janase-vitaṃ||
Bhikkhu vissāsa māpādi appatto āsava-k-khayaṃ.|| ||

Dhammaṭṭha Vaggo Ekūnavīsatimo

 

§

[77]

20. Magga Vagga

Index Than

 

273. Maggān'aṭṭhaṅgiko seṭṭho saccānaṃ caturo padā,||
Virāgo seṭṭho dhammānaṃ divipadānañ ca cakkhumā.|| ||

274. Es'eva Maggo n'att'añño||
dassanassa visuddhiyā,||
Etaṃ hi tumhe paṭipajjatha||
Mārass'etaṃ pamohanaṃ.|| ||

275. Etaṃ hi tumhe paṭipannā||
dukkhass'antaṃ karissatha,||
Akkhāto ve mayā Maggo||
aññāya sallasatthanaṃ.|| ||

276. Tumhehi kiccaṃ ātappaṃ, akkhātāro Tathāgatā,||
Paṭipannā pamokkhanti jhāyino Māra-bandhanā.|| ||

[78] 277. "Sabbe saṅkhārā aniccā" ti yadā paññāya passati||
Atha nibbindati dukkhe, esa Maggo visuddhiyā.|| ||

278. "Sabbe saṅkhārā dukkhā" ti yadā paññāya passati||
Atha nibbindati dukkhe, esa Maggo visuddhiyā.|| ||

279. "Sabbe dhammā anattā" ti yadā paññāya passati||
Atha nibbindati dukkhe, esa Maggo visuddhiyā.|| ||

280. Uṭṭhāna-kālamhi anuṭṭhahāno||
Yuvā balī ālasiyaṃ upeto||
Saṃsanna-saṅkappamano kusīto||
Paññāya Maggaṃ alaso na vindati.|| ||

[79] 281. Vācānurakkhī manasā susaṃvuto||
Kāyena ca akusalaṃ na kayirā||
Ete tayo kamma-pathe visodhaye,||
Ārādhaye Maggaṃ isippaveditaṃ.|| ||

282. Yogā ve jāyati bhūri ayogā bhūri-saṅkhayo||
Etaṃ dvedhā-pathaṃ ñatvā bhavāya vibhavāya ca||
Tath'attāṇaṃ niveseyya yathā bhūri pavaḍḍhati.|| ||

283. Vanaṃ chindatha, mā rukkhaṃ,||
vanato jāyatī bhayaṃ,||
Chetvā vanaṃ vanathañ ca||
nibbanā hotha bhikkhavo.|| ||

[80] 284. Yāvaṃ vanatho na chijjati anumatto pi narassa nārisu||
Paṭibaddhamano va tāva so vaccho khīrapako va mātari.|| ||

285. Ucchinda sineham attano||
kumudaṃ sāradikaṃ va pāṇinā,||
SantiMaggam eva brūhaya||
nibbāṇaṃ sugatena desitaṃ.|| ||

286. Idha vassaṃ vasissāmi idha hemanta gimbhisu||
Iti bālo vicinteti antarāyaṃ na bujjhati.|| ||

[81] 287. Taṃ puttapasu-sammattaṃ vyāsatta-manasaṃ naraṃ||
Suttaṃ gāmaṃ mahogho va maccu ādāya gacchati.|| ||

288. Na santi puttā tāṇāya na pitā na pi bandhavā||
Antakenādhi-pannassa n'atthi ñātisu tāṇatā.|| ||

289. Etam attha-vasaṃ ñatvā paṇḍito sīla-saṃvuto||
Nibbāṇa-gamanaṃ Maggaṃ khippam eva visodhaye.|| ||

Magga Vagga Vīsatimo.|| ||

 

§

[82]

21. Pakiṇṇaka Vagga

Index Than

 

290. Mattā-sukha-pariccāgā||
passe ce vipulaṃ sukhaṃ||
Caje mattā-sukhaṃ dhīro||
sampassaṃ vipulaṃ sukhaṃ.|| ||

291. Paradukkh'ūpadānena yo attano sukham icchati||
Verasaṃ-saggasaṃ-saṭṭho verā so na parimuccati.|| ||

292. Yaṃ hi kiccaṃ apaviddhaṃ akiccaṃ pana kayirati||
Unnaḷānaṃ pamattāṇaṃ tesaṃ vaḍḍhanti āsavā.|| ||

293. Yesañ ca susamāraddhā niccaṃ kāya-gatā sati||
Akiccaṃ te na sevanti kicce sātaccakārino||
Satānaṃ sampajānānaṃ atthaṃ gacchanti āsavā.|| ||

294. Mātaraṃ pitaraṃ hantvā rājāno dve ca khattiye||
Raṭṭhaṃ sānuvaraṃ hantvā anīgho yāti brāhmaṇo.|| ||

295. Mātaraṃ pitaraṃ hantvā rājāno dve ca sottiye||
Veyyaggha-pañcamaṃ hantvā anīgho yāti brāhmaṇo.|| ||

296. Suppa-buddaṃ pabujjhanti sadā Gotama-sāvakā||
Yesaṃ divā ca ratto ca niccaṃ Buddha-gatā sati.|| ||

297. Suppa-buddaṃ pabujjhanti sadā Gotama-sāvakā||
Yesaṃ divā ca ratto ca niccaṃ Dhamma-gatā sati.|| ||

298. Suppa-buddaṃ pabujjhanti sadā Gotama-sāvakā||
Yesaṃ divā ca ratto ca niccaṃ Saṅgha-gatā sati.|| ||

[84] 299. Suppa-buddaṃ pabujjhanti sadā Gotama-sāvakā||
Yesaṃ divā ca ratto ca niccaṃ kāya-gatā sati.|| ||

300. Suppa-buddaṃ pabujjhanti sadā Gotama-sāvakā||
Yesaṃ divā ca ratto ca ahiṃsāya rato mano.|| ||

301. Suppa-buddaṃ pabujjhanti sadā Gotama-sāvakā||
yesaṃ divā ca ratto ca bhāvanāya rato mano.|| ||

302. Duppabbajjaṃ du-r-abhiramaṃ durāvāsā gharā dukkhā||
Dukkho'samāna-saṅvāso, dukkh'ānupatit'addhagu||
Tasmā na c'addhagu siyā dukkh'ānupatito siyā.|| ||

303. Saddho sīlena sampanno yasobhoga-samappito||
Yaṃ yaṃ padesaṃ bhajati tattha tatth'eva pūjito.|| ||

[85] 304. Dūre santo pakāsanti himavanto va pabbato,||
Asant'ettha na dissanti ratti-khittā yathā sarā.|| ||

305. Ekāsanaṃ ekaseyyaṃ eko caram atandito||
Eko damayam attāṇaṃ vanante ramito siyā.|| ||

Pakiṇṇaka Vagga Ekavīsatimo.|| ||

 

§

[86]

22. Niraya Vagga

Index Than

 

306. Abhūta-vādī Nirayaṃ upeti||
yo vā pi katvā na karomi c'āha||
Ubho pi te pecca samā bhavanti||
nihīnakammā manujā parattha.|| ||

307. Kāsāvakaṇṭhā bahavo pāpa-dhammā asaññatā,||
Pāpā pāpehi kammehi Nirayaṃ te upapajjare.|| ||

308. Seyyo ayoguḷo bhutto tatto aggisikhūpamo||
yañ ce bhūñjeyya du-s-sīlo raṭṭhapiṇḍaṃ asaññato.|| ||

309. Cattāri ṭhānāni naro pamatto||
Āpajjati paradārūpasevī:||
Apuñña-lābhaṃ na nikāmaseyyaṃ||
Nindaṃ tatiyaṃ Nirayaṃ catutthaṃ.|| ||

[87] 310. Apuñña-lābho ca gatī ca pāpikā||
Bhītassa bhītāya ratī ca thokikā||
Rājā ca daṇḍaṃ garukaṃ paṇeti,||
Tasmā naro paradāraṃ na seve.|| ||

311. Kuso yathā duggahito hattham evānukantati||
Sāmaññaṃ dupparāmaṭṭhaṃ Nirayāy'upakaḍḍhati.|| ||

312. Yaṃ kiñci sithilaṃ kammaṃ||
saṃkiliṭṭhañ ca yaṃ vataṃ||
Saṃkassaraṃ Brahma-cariyaṃ||
na taṃ hoti maha-p-phalaṃ.|| ||

[88] 313. Kayirā ce kayirāth'enaṃ daḷham enaṃ parakkame,||
Saṭhilo hi paribbājo bhiyyo ākirate rajaṃ.|| ||

314. Akataṃ dukkataṃ seyyo pacchā tapati dukkataṃ,||
Katañ ca sukataṃ seyyo yaṃ katvā nānutappati.|| ||

315. Nagaraṃ yathā paccantaṃ guttaṃ santara-bāhiraṃ||
Evaṃ gopetha attāṇaṃ, khaṇo ve mā upaccagā,||
Khaṇātītā hi socanti Nirayamhi samappitā.|| ||

316. Alajjitāye lajjanti lajjitāye na lajjare||
Micchā-diṭṭhi-samādānā sattā gacchanti duggatiṃ.|| ||

[89] 317. Abhaye bhaya-dassino bhaye cābhaya-dassino||
Micchā-diṭṭhi-samādānā sattā gacchanti duggatiṃ.|| ||

318. Avajje vajja-matino vajje cāvajja-dassino||
Micchā-diṭṭhi-samādānā sattā gacchanti duggatiṃ.|| ||

319. Vajjañ ca vajjato ñatvā avajjaṃ ca avajjato||
Sammā-diṭṭhi-samādānā sattā gacchanti suggatiṃ.|| ||

Niraya Vagga Dvāvīsatimo.|| ||

 

§

[90]

23. Nāga Vagga

Index Than

 

320. Ahaṃ nāgo va saṅgāme cāpāto patitaṃ saraṃ||
Ativākyaṃ titikkhissaṃ du-s-sīlo hi bahujjano.|| ||

321. Dantaṃ nayanti samitiṃ dantaṃ rājā'bhirūhati||
Danto seṭṭho manussesu yo'tivākyaṃ titikkhati.|| ||

322. Varam assatarā dantā ājānīyā ca sindhavā||
Kuñjarā ca mahā-nāgā, attadanto tato varaṃ.|| ||

323. Na hi etehi yānehi gaccheyya agataṃ disaṃ||
Yath'attanā sudantena danto dantena gacchati.|| ||

324. Dhanapālako nāma kuñjaro||
kaṭukappabhedano dunnivārayo||
Baddho kabalaṃ na bhuñjati,||
sumarati nāga-vanassa kuñjaro.|| ||

325. Middhī yadā hoti mahagghaso ca||
niddāyitā samparivattasāyī||
Mahā-varāho va nivāpapuṭṭho||
puna-p-punaṃ gabbham upeti mando.|| ||

326. Idaṃ pure cittam acāri cārikaṃ||
Yenicchakaṃ yatthakāmaṃ yathā sukhaṃ||
Tad ajj'ahaṃ niggahessāmi yoniso||
Hatthippabhinnaṃ viya aṃkusaggaho.|| ||

327. Appamādaratā hotha, sacittam anurakkhatha,||
Duggā uddharath'attāṇaṃ paṃke sanno va kuñjaro.|| ||

[92] 328. Sace labhetha nipakaṃ sahāyaṃ||
Saddhiṃ caraṃ sādhu vihāri dhīraṃ||
Abhibhuyya sabbāni parissayāni||
Careyya ten'atta-mano satīmā.|| ||

329. No ce labhetha nipakaṃ sahāyaṃ||
Saddhiṃ caraṃ sādhu vihāri dhīraṃ||
Rājā va raṭṭhaṃ vijitaṃ pahāya||
Eko care mātaṅg'araññe va nāgo.|| ||

330. Ekassa caritaṃ seyyo,||
n'atthi bāle sahāyatā,||
Eko care na ca pāpāni kayirā||
Appo-s-sukko mātaṅg'araññe va nāgo.|| ||

[93] 331. Atthamhi jātamhi sukhā sahāyā||
Tuṭṭhī sukhā yā itarītarena,||
Puññaṃ sukhaṃ jīvita-saṅkhayamhi,||
Sabbassa dukkhassa sukhaṃ pahāṇaṃ.|| ||

332. Sukhā matteyyatā loke atho petteyyatā sukhā,||
Sukhā sāmaññatā loke atho brahmaññatā sukhā.|| ||

333. Sukhaṃ yāva jarā sīlaṃ||
sukhā saddhā pati-ṭ-ṭhitā||
Sukho paññāya paṭilābho||
pāpānaṃ akaraṇaṃ sukhaṃ.|| ||

Nāga Vagga Tevīsatimo

 

§

[94]

24. Taṇhā Vagga

Index Than

 

334. Manujassa pamatta-cārino||
taṇhā vaḍḍhati māluvā viya,||
So palavati hurāhuraṃ||
phalam icchaṃ va vanasmiṃ vānaro.|| ||

335. Yaṃ esā sahatī jammī taṇhā loke visattikā||
Sokā tassa pavaḍḍhanti abhivaṭṭhaṃ va bīraṇaṃ.|| ||

336. Yo c'etaṃ sahatī jammiṃ taṇhaṃ loke duraccayaṃ||
Sokā tamhā papatanti udabindū va pokkharā.|| ||

337. Taṃ vo vadāmi bhaddaṃ vo yāvant'ettha samāgatā||
Taṇhāya mūlaṃ khaṇatha usīrattho va bīraṇaṃ||
Mā vo naḷaṃ va soto va Māro bhañji puna-p-punaṃ.|| ||

[95] 338. Yathā pi mūle anupaddave daḷhe||
Chinno pi rukkho punar eva rūhati||
Evam pi taṇhānusaye anūhate||
Nibbatti dukkham idaṃ puna-p-punaṃ.|| ||

339. Yassa cha-t-tiṃsati sotā manāpassavanā bhūsā||
Vāhā vahanti duddiṭṭhiṃ saṅkappā rāganissitā.|| ||

340. Savanti sabbadhā sotā, latā ubbhijja tiṭṭhati||
Tañ ca disvā lataṃ jātaṃ mūlaṃ paññāya chindatha.|| ||

341. Saritāni sinehitāni ca||
somanassāni bhavanti jantuno||
Te sātasitā sukhesino||
te ve jāti jarūpagā narā.|| ||

[96] 342. Tasiṇāya purakkhatā pajā||
parisappanti saso va bādhito,||
Saṅyojana-saṅgasattakā||
dukkham upenti puna-p-punaṃ cirāya.|| ||

343. Tasiṇāya purakkhatā pajā||
parisappanti saso va bādhito,||
Tasmā tasiṇaṃ vinodaye||
bhikkhu ākaṅkha virāgam attano.|| ||

344. Yo nibbanatho vanādhimutto||
vanamutto vanam eva dhāvati||
Taṃ puggalam eva passatha:||
mutto bandhanam eva dhāvati.|| ||

[97] 345. Na taṃ daḷhaṃ bandhanam āhu dhīrā||
Yad āyasaṃ dārujaṃ pabbajañ ca||
Sārattarattā maṇikuṇḍalesu||
Puttesu dāresu ca yā apekhā,|| ||

346. Etaṃ daḷhaṃ bandhanam āhu dhīrā||
Ohārinaṃ sithilaṃ duppamuñcaṃ||
Etam pi chetvāna paribbajanti||
Anapekkhino kāma-sukhaṃ pahāya.|| ||

347. Ye rāga-rattānupatanti sotaṃ||
Sayaṃ kataṃ makkaṭako va jālaṃ||
Etam pi chetvāna vajanti dhīrā||
Anapekkhino sabba-dukkhaṃ pahāya.|| ||

[98] 348. Muñca pure muñca pacchato||
majjhe muñca bhavassa pāragū||
Sabbattha vimutta-mānaso||
na puna jātijaraṃ upehisi.|| ||

349. Vitakka-pamathitassa jantuno||
tibba-rāgassa subhānupassino||
Bhiyyo taṇhā pavaḍḍhati,||
esa kho daḷhaṃ karoti bandhanaṃ.|| ||

350. Vitakkupasame ca yo rato||
asubhaṃ bhāvayati sadā sato||
Esa kho vyantikāhiti||
esa-cchecchati Māra-bandhanaṃ.|| ||

[99] 351. Niṭṭhaṃ gato asantāsī vītataṇho an-aṅgaṇo||
Acchidda bhava-sallāni antimo'yaṃ samussayo.|| ||

352. Vītataṇho anādāno nirutti-padakovido||
Akkharānaṃ sannipātaṃ jaññā pubbaparāni ca||
Sa ve antimasārīro mahā-pañño mahā-puriso ti vuccati.|| ||

353. Sabb'ābhibhū sabba-vidū'ham asmi||
Sabbesu dhammesu anūpalitto||
Sabbañjaho taṇha-k-khaye vimutto||
Sayaṃ abhiññāya kam uddiseyyaṃ.|| ||

354. Sabba-dānaṃ dhamma-dānaṃ jināti||
Sabbaṃ rasaṃ dhamma-raso jināti||
Sabbaṃ ratiṃ dhamma-ratī jināti||
Taṇha-k-khayo sabba-dukkhaṃ jināti.|| ||

[100] 355. Hananti bhogā dummedhaṃ no ve pāragavesino,||
Bhoga-taṇhāya dummedho hanti aññe va attanāṃ.|| ||

356. Tiṇa-dosāni khettāni, rāga-dosā ayaṃ pajā,||
Tasmā hi vīta-rāgesu dinnaṃ hoti maha-p-phalaṃ.|| ||

357. Tiṇa-dosāni khettāni, dosa-dosā ayaṃ pajā,||
Tasmā hi vītadosesu dinnaṃ hoti maha-p-phalaṃ.|| ||

358. Tiṇa-dosāni khettāni, moha-dosā ayaṃ pajā||
Tasmā hi vīta-mohesu dinnaṃ hoti maha-p-phalaṃ.|| ||

359. Tiṇa-dosāni khettāni, icchā-dosā ayaṃ pajā||
Tasmā hi vigaticchesu dinnaṃ hoti maha-p-phalaṃ.|| ||

Taṇhā Vagga Catu-vīsatimo

 

§

[101]

25. Bhikkhu Vagga

Index Than

 

360. Cakkhunā saṃvaro sādhu, sādhu sotena saṃvaro,||
Ghāṇena saṃvaro sādhu, sādhu jivhāya saṃvaro.|| ||

361. Kāyena saṃvaro sādhu, sādhu vācāya saṃvaro,||
Manasā saṃvaro sādhu, sādhu sabbattha saṃvaro,||
Sabbattha saṃvuto bhikkhu sabba-dukkhā pamuccati.|| ||

362. Hattha-saññato pādasaññato||
Vācāya saññato saññatuttamo||
Ajjhattarato samāhito||
Eko sanTusito tam āhu bhikkhuṃ.|| ||

363. Yo mukhasaññato bhikkhu mantabhāṇī anuddhato||
Atthaṃ dhammaṃ ca dīpeti madhuraṃ tassa bhāsitaṃ.|| ||

[102] 364. Dhammārāmo dhamma-rato||
dhammaṃ anuvicintayaṃ||
Dhammaṃ anussaraṃ bhikkhu||
Sad'Dhammā na parihāyati.|| ||

365. Salābhaṃ nātimaññeyya nāññesaṃ pihayaṃ care,||
Aññesaṃ pihayaṃ bhikkhu samādhiṃ nādhi-gacchati.|| ||

366. Appalābho pi ce bhikkhu salābhaṃ nātimaññati||
Taṃ ve devā pasaṃ-santi suddhājīviṃ atanditaṃ.|| ||

367. Sabbaso nāma-rūpasmiṃ yassa n'atthi mamāyitaṃ||
Asatā ca na socati sa ve bhikkhū ti vuccati.|| ||

[103] 368. Mettā-vihārī yo bhikkhū||
pasanno buddha-sāsane||
Adhigacche padaṃ santaṃ||
saṅkhār'ūpasamaṃ sukhaṃ.|| ||

369. Siñca bhikkhu imaṃ nāvaṃ, sittā te lahum essati,||
Chetvā rāgaṃ ca dosañ ca tato nibbāṇam ehisi.|| ||

370. Pañca chinde pañca jahe pañca vuttari bhāvaye,||
Pañca-saṅgātigo bhikkhu oghatiṇṇo ti vuccati.|| ||

371. Jhāya bhikkhu mā ca pāmado||
Mā te kāma-guṇe bhamassu cittaṃ,||
Mā lohaguḷaṃ gilī pamatto,||
Mā kandi 'dukkham idan' ti ḍayha-māno.|| ||

[104] 372. N'atthi jhānaṃ apaññassa paññā n'atthi ajhāyato,||
Yamhi jhānaṃ ca paññā ca sa ve nibbāṇa-santike.|| ||

373. Suññāgāraṃ paviṭṭhassa santa-cittassa bhikkhuno||
Amānusī rati hoti sammā dhammaṃ vipassato.|| ||

374. Yato yato sammasati khandhānaṃ udayabbayaṃ||
Labhati pītipāmojjaṃ amataṃ taṃ vijānataṃ.|| ||

375. Tatrāyam ādi bhavati idha paññassa bhikkhuno||
Indriya-gutti santuṭṭhī Pātimokkhe ca saṃvaro,||
mitte bhajassu kalyāṇe suddhājīve atandite.|| ||

[105] 376. Paṭisanthāravutt'assa ācārakusalo siyā,||
Tato pāmojjabahulo dukkhass'antaṃ karissati.|| ||

377. Vassikā viya pupphāni maddavāni pamuñcati||
Evaṃ rāgaṃ ca dosaṃ ca vippamuñ c'etha bhikkhavo.|| ||

378. Santa-kāyo santa-vāco santavā susamāhito||
Vanta-lokāmiso bhikkhu upasanto ti vuccati.|| ||

379. Attanā coday'attāṇaṃ paṭimāse attam attanā,||
So attagutto satimā sukhaṃ bhikkhu vihāhisi.|| ||

[106] 380. Attā hi attano nātho attā hi attano gati,||
Tasmā saññamay'attāṇaṃ assaṃ bhadraṃ va vāṇijo.|| ||

381. Pāmojja-bahulo bhikkhu||
pasanno Buddha-sāsane||
Adhigacche padaṃ santaṃ||
saṅkhār'ūpasamaṃ sukhaṃ.|| ||

382. Yo have daharo bhikkhu yuñjati Buddha-sāsane||
So imaṃ lokaṃ pabhāseti abbhā mutto va candimā.|| ||

Bhikkhu Vagga Pañcavīsatimo

 

§

[107]

26. Brāhmaṇa Vagga

Index Than

 

383. Chinda sotaṃ parakkamma, kāme panuda brāhmaṇa,||
Saṅkhārānaṃ khayaṃ ñatvā akataññū si brāhmaṇa.|| ||

384. Yadā dvayesu dhammesū pāragū hoti brāhmaṇo||
Ath'assa sabbe saṃyogā atthaṃ gacchanti jānato.|| ||

385. Yassa pāraṃ apāraṃ vā||
pārāpāraṃ na vijjati||
Vītaddaraṃ visaṃyuttaṃ tam ahaṃ brūmi brāhmaṇaṃ.|| ||

386. Jhāyiṃ virajam āsīnaṃ||
katakiccaṃ anāsavaṃ||
Uttamatthaṃ anuppattaṃ||
tam ahaṃ brūmi brāhmaṇaṃ.|| ||

[108] 387. Divā tapati ādicco, rattiṃ ābhāti candimā,||
Sannaddho khattiyo tapati, jhāyī tapati brāhmaṇo,||
Atha sabbam ahorattiṃ Buddho tapati tejasā.|| ||

388. Bāhitapāpo ti brāhmaṇo
sama-cariyā samaṇo ti vuccati.||
Pabbājaym attano malaṃ||
tasmā pabba-jito ti vuccati.|| ||

389. Na brāhmaṇassa pahareyya||
nāssa muñcetha brāhmaṇo,||
Dhī brāhmaṇassa hantāraṃ,||
tato dhī y'assa muñcati.|| ||

[109] 390. Na brāhmaṇass'etad akiñci seyyo||
Yadā nisedho manaso piyehi,||
Yato yato hiṃsamano nivattati||
Tato tato sammati-m-eva dukkhaṃ.|| ||

391. Yassa kāyena vācāya manasā n'atthi dukkataṃ||
Saṃvutaṃ tīhi ṭhānehi tam ahaṃ brūmi brāhmaṇaṃ.|| ||

392. Yamhā dhammaṃ vijāneyya||
Sammā-Sambuddha-desitaṃ||
Sakkaccaṃ taṃ namasseyya||
aggihuttaṃ va brāhmaṇo.|| ||

393. Na jaṭāhi na gottena||
na jaccā hoti brāhmaṇo,||
Yamhi saccañ ca dhammo ca||
so sucī so va brāhmaṇo.|| ||

[110] 394. Kin te jaṭāhi dummedha, kin te ajinasāṭiyā||
Abbhantaraṃ te gahaṇaṃ, bāhiraṃ parimajjasi.|| ||

395. Paṃsukūladharaṃ jantūṃ||
kisaṃ dhamani-santhataṃ||
Ekaṃ vanasmiṃ jhāyantaṃ||
tam ahaṃ brūmi brāhmaṇaṃ.|| ||

396. Na c'āhaṃ brāhmaṇaṃ brūmi||
yonijaṃ matti-sambhavaṃ||
Bhovādī nāma so hoti||
sa ve hoti sakiñ cano,||
Akiñ canaṃ anādānaṃ||
tam ahaṃ brūmi brāhmaṇaṃ.|| ||

[111] 397. Sabba-saṃyojanaṃ chetvā||
yo ve na paritassati||
Saṅgātigaṃ visaṃyuttaṃ||
tam ahaṃ brūmi brāhmaṇaṃ.|| ||

398. Chetvā naddhiṃ varattañ ca||
sandāmaṃ sahanukkamaṃ||
Ukkhittapaḷighaṃ Buddhaṃ||
tam ahaṃ brūmi brāhmaṇaṃ.|| ||

399. Akkosaṃ vadhabandhañ ca aduṭṭho yo titikkhati||
Khantī-balaṃ balānīkaṃ tam ahaṃ brūmi brāhmaṇaṃ.|| ||

400. A-k-kodhanaṃ vata-vantaṃ sīla-vantaṃ anussutaṃ||
Dantaṃ antimasārīraṃ tam ahaṃ brūmi brāhmaṇaṃ.|| ||

[112] 401. Vāri pokkharapatte va āragge-r-iva sāsapo||
Yo na lippati kāmesu tam ahaṃ brūmi brāhmaṇaṃ.|| ||

402. Yo dukkhassa pajānāti||
idh'eva khayam attano||
Pannabhāraṃ visaṃyuttaṃ||
tam ahaṃ brūmi brāhmaṇaṃ.|| ||

403. Gambhīra-paññaṃ medhāviṃ||
Magg-ā-magga ssa kovidaṃ||
Uttamatthaṃ anuppattaṃ||
tam ahaṃ brūmi brāhmaṇaṃ.|| ||

404. Asaṃsaṭṭhaṃ gahaṭṭhehi anāgārehi c'ūbhayaṃ||
Anokāsariṃ app'icchaṃ tam ahaṃ brūmi brāhmaṇaṃ.|| ||

[113] 405. Nidhāya daṇḍaṃ bhūtesu tasesu thāvaresu ca||
Yo na hanti na ghāteti tam ahaṃ brūmi brāhmaṇaṃ.|| ||

406. Aviruddhaṃ viruddhesu attadaṇḍesu nibbutaṃ||
Sādānesu anādānaṃ tam ahaṃ brūmi brāhmaṇaṃ.|| ||

407. Yassa rāgo ca doso ca māno makkho ca pātito||
Sāsapo-r-iva āraggā tam ahaṃ brūmi brāhmaṇaṃ.|| ||

408. Akakkasaṃ viññapaniṃ giraṃ saccaṃ udīraye||
Yāya nābhisaje kañci tam ahaṃ brūmi brāhmaṇaṃ.|| ||

409. Yo'dha dīghaṃ va rassaṃ vā||
aṇuṃ thūlaṃ subhāsubhaṃ||
Loke adinnaṃ nādiyati tam ahaṃ brūmi brāhmaṇaṃ.|| ||

[114] 410. Āsā yassa na vijjanti||
asmiṃ loke paramhi ca||
Nirāsayaṃ visaṃyuttaṃ||
tam ahaṃ brūmi brāhmaṇaṃ.|| ||

411. Yassālayā na vijjanti||
aññāya akathaṃ-kathī||
Amatogadhaṃ anuppattaṃ||
tam ahaṃ brūmi brāhmaṇaṃ.|| ||

412. Yo'dha puññañ ca pāpañ ca||
ubho saṅgaṃ upaccagā||
Asokaṃ virajaṃ suddhaṃ||
tam ahaṃ brūmi brāhmaṇaṃ.|| ||

[115] 413. Candaṃ va vimalaṃ suddhaṃ||
vi-p-pasannam anāvilaṃ||
Nandī-bhava-parikkhīṇaṃ||
tam ahaṃ brūmi brāhmaṇaṃ.|| ||

414. Yo imaṃ paḷipathaṃ duggaṃ||
saṃsāraṃ moham accagā||
Tiṇṇo pāragato jhāyī||
anejo akathaṃ-kathī||
Anupādāya nibbuto||
tam ahaṃ brūmi brāhmaṇaṃ.|| ||

415. Yo'dha kāme pahātvāna||
anāgāro paribbaje||
Kāma-bhava-parikkhīṇaṃ||
tam ahaṃ brūmi brāhmaṇaṃ.|| ||

[116] 416. Yo'dha taṇhaṃ pahātvāna||
anāgāro paribbaje||
Taṇhā-bhava-parikkhīṇaṃ||
tam ahaṃ brūmi brāhmaṇaṃ.|| ||

417. Hitvā mānusakaṃ yogaṃ||
dibbaṃ yogaṃ upaccagā||
Sabba-yoga-visaṃyuttaṃ||
tam ahaṃ brūmi brāhmaṇaṃ.|| ||

418. Hitvā ratiṃ ca aratiṃ ca||
sītibhūtaṃ nirūpadhiṃ||
Sabba-lokābhibhuṃ vīraṃ||
tam ahaṃ brūmi brāhmaṇaṃ.|| ||

419. Cutiṃ yo vedi sattāṇaṃ||
upapattiñ ca sabbaso||
Asattaṃ Sugataṃ Buddhaṃ||
tam ahaṃ brūmi brāhmaṇaṃ.|| ||

[117] 420. Yassa gatiṃ na jānanti devā gandhabba-mānusā||
Khīṇ'āsavaṃ Arahantaṃ tam ahaṃ brūmi brāhmaṇaṃ.|| ||

421. Yassa pure ca pacchā ca majjhe ca n'atthi kiñ canaṃ||
Akiñ canaṃ anādānaṃ tam ahaṃ brūmi brāhmaṇaṃ.|| ||

422. Usabhaṃ pavaraṃ vīraṃ||
mahesiṃ vijit'āvinaṃ||
Anejaṃ nhātakaṃ Buddhaṃ||
tam ahaṃ brūmi brāhmaṇaṃ.|| ||

423. Pubbe-nivāsaṃ yo vedī saggāpāyañ ca passati||
Atho jātikkhayaṃ patto abhiññāvosito muni||
Sabba-vosita-vosānaṃ tam ahaṃ brūmi brāhmaṇaṃ.|| ||

Brāhmaṇa Vagga Chabbīsatimo

 

§

 

Vagguddānaṃ

1a. Yamakaṃ appamādaṃ cittaṃ||
pupphaṃ bālena paṇḍitaṃ||
Arahantaṃ sahassena||
pāpaṃ daṇḍena, te dasa.|| ||

2a. Jarā attā ca loko ca||
Buddhaṃ sukhaṃ piyena ca||
Kodhaṃ malañ ca dhamm'aṭṭhaṃ||
Magga-vaggena vīsati.|| ||

3a. Pakiṇṇaṃ Nirayo nāgo||
taṇhāṃ bhikkhu ca brāhmaṇo,||
Ete chabbīsatī vaggā||
desitādicca-bandhunā.|| ||

Dhammapada Pāḷi Niṭṭhitā

 


Copyright Statement