Vammika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

[1][chlm][pts][upal][olds][swe] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tena kho pana samayen'āyasmā Kumāra Kassapo andhavane viharati.|| ||

Atha kho aññatarā devatā abhikkantāya rattiyā abhikkanta-vaṇṇā kevala-kappaɱ Andhavanaɱ obhāsetvā yen'āyasmā KumāraKassapo ten'upasankami,||
Upasaŋkamitvā eka-m-antaɱ aṭṭhāsi.||
Eka-m-antaɱ ṭhitā kho sā devatā āyasmantaɱ KumāraKassapaɱ etad avoca:|| ||

[2][pts][upal][olds][swe] Bhikkhu, bhikkhu, ayaɱ vammiko rattiɱ dhūpāyati divā pajjalati.|| ||

Brāhmaṇo evam āha:||
'Abhikkhaṇa su medha satthaɱ ādāyā' ti.|| ||

Abhikkhaṇanto su medho satthaɱ ādāya addasa laŋgiɱ:||
'Laŋgī bhadante' ti.|| ||

Brāhmaṇo evam āha:||
Ukkhipa laŋgiɱ.||
'Abhikkhaṇa su medha satthaɱ ādāyā' ti.|| ||

Abhikkhaṇanto su medho satthaɱ ādāya addasa uddhumāyikaɱ:||
'Uddhumāyikā bhadante' ti.|| ||

Brāhmaṇo evam āha:||
Ukkhipa uddhumāyikaɱ.||
'Abhikkhaṇa su medha satthaɱ ādāyā' ti.|| ||

Abhikkhaṇanto su medho satthaɱ ādāya addasa dvidhāpathaɱ.||
'Dvidhāpatho bhadante' ti.|| ||

Brāhmaṇo evam āha:||
[143] Ukkhipa dvidhāpathaɱ.|| ||

'Abhikkhaṇa su medha satthaɱ ādāyā' ti.|| ||

Abhikkhaṇanto su medho satthaɱ ādāya addasa caŋgavāraɱ.||
'Caŋgavāraɱ bhadante' ti.|| ||

Brāhmaṇo evam āha:||
Ukkhipa caŋgavāraɱ.||
'Abhikkhaṇa su medha satthaɱ ādāyā' ti.|| ||

Abhikkhaṇanto su medho satthaɱ ādāya addasa kummaɱ.||
'Kummo bhadante' ti.|| ||

Brāhmaṇo evam āha:||
Ukkhipa kummaɱ.||
'Abhikkhaṇa su medha satthaɱ ādāyā' ti.|| ||

Abhikkhaṇanto su medho satthaɱ ādāya addasa asisūnaɱ.||
'Asisūnā bhadante' ti.|| ||

Brāhmaṇo evam āha:||
Ukkhipa asisūnaɱ.||
'Abhikkhaṇa su medha satthaɱ ādāyā' ti.|| ||

Abhikkhaṇanto su medho satthaɱ ādāya addasa maɱsapesiɱ.||
'Maɱsapesī bhadante' ti.|| ||

Brāhmaṇo evam āha:||
Ukkhipa maɱsapesiɱ.||
'Abhikkhaṇa su medha satthaɱ ādāyā' ti.|| ||

Abhikkhaṇanto su medho satthaɱ ādāya addasa nāgaɱ.||
'Nāgo bhadante' ti.|| ||

Brāhmaṇo evam āha:||
Tiṭṭhatu nāgo.||
Mā nāgaɱ ghaṭṭesi.||
Namo karohi nāgassā'tī.|| ||

[3][pts][upal][olds][swe] Ime kho tvaɱ bhikkhu pañhe Bhagavantaɱ upasankamitvā puccheyyāsi.||
Yathā te Bhagavā vyākaroti tathā naɱ dhāreyyāsi.|| ||

Nāhaɱ taɱ bhikkhu passāmi sa-devake loke sa-mārake sabrahmake sa-s-samaṇa-brāhmaṇiyā pajāya sadeva-manussāya yo imesaɱ pañhānaɱ veyyā-karaṇena cittaɱ ārādheyya aññatra Tathāgatena vā Tathāgata-sāvakena vā ito vā pana sutvā' ti.|| ||

Idam avoca sā devatā idaɱ vatvā tatthe'vantara-dhāyi.|| ||

[4][pts][upal][olds][swe] Atha kho āyasmā Kumāra Kassapo tassā rattiyā accayena yena Bhagavā ten'upasankami upasankamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Kumāra Kassapo Bhagavantaɱ etad avoca:||
Imaɱ bhante rattiɱ aññatarā devatā abhikkantāya rattiyā abhikkanta-vaṇṇā kevala-kappaɱ andhavanaɱ obhāsetvā yen'āhaɱ ten'upasankami. Upasaŋkamitvā eka-m-antaɱ aṭṭhāsi. Eka-m-antaɱ ṭhitā kho bhante sā devatā maɱ etad avoca.|| ||

Bhikkhu, bhikkhu, ayaɱ vammiko rattiɱ dhūpāyati divā pajjalati.|| ||

Brāhmaṇo evam āha:||
'Abhikkhaṇa su medha satthaɱ ādāyā' ti.|| ||

Abhikkhaṇanto su medho satthaɱ ādāya addasa laŋgiɱ:||
'Laŋgī bhadante' ti.|| ||

Brāhmaṇo evam āha:||
Ukkhipa laŋgiɱ,||
abhikkhaṇa su medha satthaɱ ādāyā' ti.|| ||

Abhikkhaṇanto su medho satthaɱ ādāya addasa uddhumāyikaɱ:||
'Uddhumāyikā bhadante' ti.|| ||

Brāhmaṇo evam āha:||
Ukkhipa uddhumāyikaɱ.||
'Abhikkhaṇa su medha satthaɱ ādāyā' ti.|| ||

Abhikkhaṇanto su medho satthaɱ ādāya addasa dvidhāpathaɱ.||
'Dvidhāpatho bhadante' ti.|| ||

Brāhmaṇo evam āha:||
Ukkhipa dvidhāpathaɱ.|| ||