Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]


 

Majjhima Nikāya
I. Mūlapaṇṇāsa
4. Mahā Yamaka Vagga

Sutta 33

Mahā Gopālaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][chlm][pts][than][upal] Evaɱ me sutaɱ:|| ||

Ekaɱ samayaɱ Bhagavā Sāvatthīyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ Bhagavā etad avoca:|| ||

2. "Ekādasahi bhikkhave aŋgehi samannāgato gopālako abhabbo gogaṇaɱ pariharituɱ phātikatuɱ.|| ||

Katamehi ekādasahi?|| ||

Idha, bhikkhave, gopālako||
na rūpaññū hoti,||
na lakkhaṇa-kusalo hoti,||
na āsāṭikaɱ sāṭetā hoti,||
na vaṇaɱ paṭicchādetā hoti,||
na dhūmaɱ kattā hoti,||
na titthaɱ jānāti,||
na pītaɱ jānāti,||
na vīthiɱ jānāti,||
na gocara-kusalo hoti,||
anavase-sadohī ca hoti,||
ye te usabhā gopitaro gopariṇāyakā te na atireka pūjāya pūjetā hoti.|| ||

Imehi kho bhikkhave ekādasahi aŋgehi samannāgato gopālako abhabbo gogaṇaɱ pariharituɱ phātikatuɱ.|| ||

3. Evam eva ko bhikkhave ekādasahi dhammehi samannāgato bhikkhu abhabbo imasmiɱ Dhamma-Vinaye vuḍḍhiɱ virūḷhiɱ vepullaɱ āpajjituɱ.|| ||

Katamehi ekādasahi?|| ||

Idha, bhikkhave, bhikkhu||
na rūpaññū hoti,||
na lakkhaṇa-kusalo hoti,||
na āsāṭikaɱ sāṭetā hoti,||
na vaṇaɱ paṭicchādetā hoti,||
na dhūmaɱ kattā hoti,||
na titthaɱ jānāti,||
na pītaɱ jānāti,||
na vīthiɱ jānāti,||
na gocara-kusalo hoti,||
anavase-sadohī ca hoti,||
ye te bhikkhū therā rattaññū cira-pabba-jitā Saŋgha-pitaro Saŋghapariṇāyakā te na atirekapūjāya pūjetā hoti.|| ||

 


 

(1) Kathañ ca bhikkhave bhikkhu na rūpaññū hoti?|| ||

Idha, bhikkhave, bhikkhu|| ||

'Yaɱ kiñci rūpaɱ||
sabbaɱ rūpaɱ cattāri mahā-bhūtāni||
catunnañ ca mahā-bhūtānaɱ upādāya rūpan' ti|| ||

yathā-bhūtaɱ na-p-pajānāti.|| ||

Evaɱ kho bhikkhave bhikkhu na rūpaññū hoti.|| ||

(2) Kathañ ca bhikkhave bhikkhu||
na lakkhaṇa-kusalo hoti?|| ||

Idha, bhikkhave, bhikkhu|| ||

'Kamma-lakkhaṇo bālo,||
kamma-lakkhaṇo paṇḍito' ti|| ||

yathā-bhūtaɱ na-p-pajānāti.|| ||

Evaɱ kho bhikkhave bhikkhu na lakkhaṇa-kusalo hoti.|| ||

(3) Kathañ ca bhikkhave bhikkhu na āsāṭikaɱ sāṭetā hoti?|| ||

Idha, bhikkhave, bhikkhu||
uppannaɱ kāma-vitakkaɱ adhivāseti||
nappajahati||
na vinodeti||
na vyantī-karoti||
na anabhāvaɱ gameti.|| ||

Uppannaɱ vyāpāda-vitakkaɱ adhivāseti||
nappajahati||
na vinodeti||
na vyantī-karoti||
na anabhāvaɱ gameti.|| ||

Uppannaɱ vihiɱsā-vitakkaɱ adhivāseti||
nappajahati||
na vinodeti||
na vyantī-karoti||
na anabhāvaɱ gameti.|| ||

Uppannuppanne pāpake akusale dhamme adhivāseti||
[221] nappajahati||
na vinodeti||
na vyantī-karoti||
na anabhāvaɱ gameti.|| ||

Evaɱ kho bhikkhave bhikkhu na āsāṭikaɱ sāṭetā hoti.|| ||

(4) Kathañ ca bhikkhave bhikkhu na vaṇaɱ paṭicchādetā hoti?|| ||

Idha, bhikkhave, bhikkhu||
cakkhunā rūpaɱ disvā nimittaggāhī hoti anubyañjanaggāhī,||
yatvādhi-karaṇamenaɱ cakkhu'ndriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ tassa saɱvarāya na paṭipajjati,||
na rakkhati cakkhu'ndriyaɱ,||
cakkhu'ndriye na saɱvaraɱ āpajjati.|| ||

Sotena saddaɱ sutvā nimittaggāhī hoti anubyañjanaggāhī,||
yatvādhi-karaṇamenaɱ sot'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ tassa saɱvarāya na paṭipajjati,||
na rakkhati sot'indriyaɱ,||
sot'indriye na saɱvaraɱ āpajjati.|| ||

Ghānena gandhaɱ ghāyitvā nimittaggāhī hoti anubyañjanaggāhī,||
yatvādhi-karaṇamenaɱ ghān'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ tassa saɱvarāya na paṭipajjati,||
na rakkhati ghān'indriyaɱ,||
ghān'indriye na saɱvaraɱ āpajjati.|| ||

Jivhāya rasaɱ sāyitvā nimittaggāhī hoti anubyañjanaggāhī,||
yatvādhi-karaṇamenaɱ jivh'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ tassa saɱvarāya na paṭipajjati,||
na rakkhati jivh'indriyaɱ,||
jivh'indriye na saɱvaraɱ āpajjati.|| ||

Kāyena phoṭṭhabbaɱ phusitvā nimittaggāhī hoti anubyañjanaggāhī,||
yatvādhi-karaṇamenaɱ kāy'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ tassa saɱvarāya na paṭipajjati,||
na rakkhati kāy'indriyaɱ,||
kāy'indriye na saɱvaraɱ āpajjati.|| ||

Manasā dhammaɱ viññāya nimittaggāhī hoti anubyañjanaggāhī,||
yatvādhi-karaṇamenaɱ man'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ tassa saɱvarāya na paṭipajjati,||
na rakkhati man'indriyaɱ,||
man'indriye na saɱvaraɱ āpajjati.|| ||

Evaɱ kho bhikkhave bhikkhu na vaṇaɱ paṭicchādetā hoti.|| ||

(5) Kathañ ca bhikkhave bhikkhu na dhūmaɱ kattā hoti?|| ||

Idha, bhikkhave, bhikkhu||
yathā-sutaɱ yathā-pariyattaɱ dhammaɱ na vitthārena paresaɱ desetā hoti.|| ||

Evaɱ kho bhikkhave bhikkhu na dhūmaɱ kattā hoti.|| ||

(6) Kathañ ca bhikkhave bhikkhu na titthaɱ jānāti?|| ||

Idha, bhikkhave, bhikkhu||
ye te bhikkhū bahu-s-sutā āgatāgamā dhamma-dharā vinaya-dharā mātikā-dharā,||
te kālena kālaɱ upasankamitvā na paripucchati||
na paripañhati:|| ||

'Idaɱ bhante kathaɱ,||
imassa ko attho' ti?|| ||

Tassa te āyasmanto avivaṭañ c'eva na vivaranti,||
anuttānīkatañ ca na uttānīɱ karonti,||
aneka-vihitesu ca kaŋkhaṭṭhānīyesu dhammesu kaŋkhaɱ na paṭivinodenti.|| ||

Evaɱ kho bhikkhave bhikkhu na titthaɱ jānāti.|| ||

(7) Kathañ ca bhikkhave bhikkhu na pītaɱ jānāti?|| ||

Idha, bhikkhave, bhikkhu Tathāgata-p-pavedite Dhamma-Vinaye desiyamāne na labhati attha-vedaɱ,||
na labhati dhamma-vedaɱ,||
na labhati dhamm'ūpasaɱhitaɱ pāmojjaɱ.|| ||

Evaɱ kho bhikkhave bhikkhu na pītaɱ jānāti.|| ||

(8) Kathañ ca bhikkhave bhikkhu na vīthiɱ jānāti?|| ||

Idha, bhikkhave, bhikkhu||
ariyaɱ aṭṭhaŋgikaɱ Maggaɱ yathā-bhūtaɱ na-p-pajānāti.|| ||

Evaɱ kho bhikkhave bhikkhu na vīthiɱ jānāti.|| ||

(9) Kathañ ca bhikkhave bhikkhu na gocara-kusalo hoti?|| ||

Idha, bhikkhave, bhikkhu cattāro sati-paṭṭhāne yathā-bhūtaɱ na-p-pajānāti.|| ||

Evaɱ [222] kho bhikkhave bhikkhu na gocara-kusalo hoti.|| ||

(10) Kathañ ca bhikkhave bhikkhu anavase-sadohī hoti?|| ||

Idha, bhikkhave, bhikkhuɱ saddhā gahapatikā abhihaṭṭhuɱ pavārenti cīvara-piṇḍa-pāta-senāsana-gilāna-paccaya-bhesajja-parikkhārehi,||
tatra bhikkhu na mattaɱ||
na jānāti paṭi-g-gahaṇāya.|| ||

Evaɱ kho bhikkhave bhikkhu anavase-sadohī hoti.|| ||

(11) Kathañ ca bhikkhave bhikkhu ye te bhikkhū therā rattaññū cira-pabba-jitā Saŋgha-pitaro Saŋghapariṇāyakā,||
te na atirekapūjāya pūjetā hoti?|| ||

Idha, bhikkhave, bhikkhu||
ye te bhikkhū therā rattaññū cira-pabba-jitā Saŋgha-pitaro Saŋghapariṇāyakā,||
tesu na mettaɱ kāya-kammaɱ pacc'upaṭṭhāpeti āvī c'eva raho ca,||
na mettaɱ vacī-kammaɱ pacc'upaṭṭhāpeti āvī c'eva raho ca,||
na mettaɱ mano-kammaɱ pacc'upaṭṭhāpeti āvī c'eva raho ca.|| ||

Evaɱ kho bhikkhave bhikkhu||
ye te bhikkhū therā rattaññū cira-pabba-jitā Saŋgha-pitaro Saŋghapariṇāyakā,||
te na atirekapūjāya pūjetā hoti.|| ||

Imehi kho bhikkhave ekādasahi dhammehi samannāgato bhikkhu abhabbo imasmiɱ Dhamma-Vinaye vuḍḍhiɱ virūḷhiɱ vepullaɱ āpajjituɱ.|| ||

 


 

4. Ekādasahi bhikkhave aŋgehi samannāgato gopālako bhabbo gogaṇaɱ pariharituɱ phātikatuɱ.|| ||

Katamehi ekādasahi?|| ||

Idha, bhikkhave, gopālako||
rūpaññū hoti,||
lakkhaṇa-kusalo hoti,||
āsāṭikaɱ sāṭetā hoti,||
vaṇaɱ paṭicchādetā hoti,||
dhūmaɱ kattā hoti,||
titthaɱ jānāti,||
pītaɱ jānāti,||
vīthiɱ jānāti,||
gocara-kusalo hoti,||
sāvassedohī ca hoti,||
ye te usabhā gopitaro gopariṇāyakā,||
te atirekapūjāya pūjetā hoti.|| ||

Imehi kho bhikkhave ekādasahi aŋgehi samannāgato gopālako bhabbo gogaṇaɱ pariharituɱ phātikatuɱ.|| ||

5. Evam eva kho bhikkhave ekādasahi dhammehi samannāgato bhikkhu bhabbo imasmiɱ Dhamma-Vinaye vuḍḍhiɱ virūḷhiɱ vepullaɱ āpajjituɱ.|| ||

Katamehi ekādasahi?|| ||

Idha, bhikkhave, bhikkhu||
rūpaññū hoti,||
lakkhaṇa-kusalo hoti,||
āsāṭikaɱ sāṭetā hoti,||
vaṇaɱ paṭicchādetā hoti,||
dhūmaɱ kattā hoti,||
titthaɱ jānāti,||
pītaɱ jānāti,||
vīthīɱ jānāti,||
gocara-kusalo hoti,||
sāvasesadohī ca hoti,||
ye te bhikkhū therā rattaññū cira-pabba-jitā Saŋgha-pitaro Saŋghapariṇāyakā||
te atirekapūjāya pūjetā hoti.|| ||

 


 

(1) Kathañ ca bhikkhave bhikkhu rūpaññū hoti?|| ||

Idha, bhikkhave, bhikkhu|| ||

'Yaɱ kiñci rūpaɱ,||
sabbaɱ rūpaɱ||
cattāri [223] mahā-bhūtāni||
catunnañ ca mahā-bhūtānaɱ upādāya rūpan' ti|| ||

yathā-bhūtaɱ pajānāti.|| ||

Evaɱ kho bhikkhave bhikkhu rūpaññū hoti.|| ||

(2) Kathañ ca bhikkhave bhikkhu lakkhaṇa-kusalo hoti?|| ||

Idha, bhikkhave, bhikkhu|| ||

'Kamma-lakkhaṇo bālo,||
kamma-lakkhaṇo paṇḍito' ti|| ||

yathā-bhūtaɱ pajānāti.|| ||

Evaɱ kho bhikkhave bhikkhu lakkhaṇa-kusalo hoti.|| ||

(3) Kathañ ca bhikkhave bhikkhu āsāṭikaɱ sāṭetā hoti?|| ||

Idha, bhikkhave, bhikkhu||
uppannaɱ kāma-vitakkaɱ nādhi-vāseti,||
pajahati vinodeti vyantī-karoti anabhāvaɱ gameti||
uppannaɱ vyāpāda-vitakkaɱ nādhi-vāseti,||
pajahati vinodeti vyantī-karoti anabhāvaɱ gameti||
uppannaɱ vihiɱsā-vitakkaɱ nādhi-vāseti,||
pajahati vinodeti vyantī-karoti anabhāvaɱ gameti||
uppannuppanne pāpake akusale dhamme nādhi-vāseti||
pajahati vinodeti vyantī-karoti anabhāvaɱ gameti.|| ||

Evaɱ kho bhikkhave bhikkhu āsāṭikaɱ sāṭetā hoti.|| ||

(4) Kathañ ca bhikkhave bhikkhu vaṇaɱ paṭicchādetā hoti?|| ||

Idha, bhikkhave, bhikkhu cakkhunā rūpaɱ disvā||
na nimittaggāhī hoti||
nānuvyañjanaggāhī,||
yatvādhi-karaṇamenaɱ cakkhu'ndriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati cakkhu'ndriyaɱ,||
cakkhu'ndriye saɱvaraɱ āpajjati.|| ||

Sotena saddaɱ sutvā na nimittaggāhī hoti nānuvyañjanaggāhī,||
yatvādhi-karaṇamenaɱ sot'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati sot'indriyaɱ,||
sot'indriye saɱvaraɱ āpajjati.|| ||

Ghānena gandhaɱ ghāyitvā na nimittaggāhī hoti nānuvyañjanaggāhī,||
yatvādhi-karaṇamenaɱ ghān'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati ghān'indriyaɱ,||
ghān'indriye saɱvaraɱ āpajjati.|| ||

Jivhāya rasaɱ sāyitvā na nimittaggāhī hoti nānuvyañjanaggāhī,||
yatvādhi-karaṇamenaɱ jivh'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati jivh'indriyaɱ,||
jivh'indriye saɱvaraɱ āpajjati.|| ||

Kāyena phoṭṭhabbaɱ phusitvā na nimittaggāhī hoti nānuvyañjanaggāhī,||
yatvādhi-karaṇamenaɱ kāy'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati kāy'indriyaɱ,||
kāy'indriye saɱvaraɱ āpajjati.|| ||

Manasā dhammaɱ viññāya na nimittaggāhī hoti nānuvyañjanaggāhī,||
yatvādhi-karaṇamenaɱ man'indriyaɱ asaɱvutaɱ viharantaɱ abhijjhā-domanassā pāpakā akusalā dhammā anvāssaveyyuɱ,||
tassa saɱvarāya paṭipajjati,||
rakkhati man'indriyaɱ,||
man'indriye saɱvaraɱ āpajjati.|| ||

Evaɱ kho bhikkhave bhikkhu vaṇaɱ paṭicchādetā hoti.|| ||

(5) Kathañ ca bhikkhave bhikkhu dhūmaɱ kattā hoti?|| ||

Idha, bhikkhave, bhikkhu||
yathā-sutaɱ yathā-pariyattaɱ dhammaɱ vitthārena paresaɱ desetā hoti.|| ||

Evaɱ kho bhikkhave bhikkhu dhūmaɱ kattā hoti.|| ||

(6) Kathañ ca bhikkhave bhikkhu titthaɱ jānāti?|| ||

Idha, bhikkhave, bhikkhu ye te bhikkhū bahu-s-sutā āgatāgamā dhamma-dharā vinaya-dharā mātikā-dharā,||
te kālena kālaɱ upasankamitvā paripucchati paripañhati:|| ||

'Idaɱ bhante kathaɱ,||
imassa ko attho' ti?|| ||

Tassa te āyasmanto avivaṭañ c'eva vivaranti,||
anuttānīkatañ ca uttānīɱ karonti,||
aneka-vihitesu ca kaŋkhaṭṭhānīyesu dhammesu kaŋkhaɱ paṭivinodenti.|| ||

Evaɱ kho bhikkhave bhikkhu titthaɱ jānāti.|| ||

(7) Kathañ ca bhikkhave [224] bhikkhu pītaɱ jānāti?|| ||

Idha, bhikkhave, bhikkhu Tathāgata-p-pavedite Dhamma-Vinaye desiyamāne labhati attha-vedaɱ,||
labhati dhamma-vedaɱ,||
labhati dhamm'ūpasaɱhitaɱ pāmojjaɱ.|| ||

Evaɱ kho bhikkhave bhikkhū pītaɱ jānāti.|| ||

(8) Kathañ ca bhikkhave bhikkhu vīthiɱ jānāti?|| ||

Idha, bhikkhave, bhikkhu ariyaɱ aṭaŋgikaɱ Maggaɱ yathā-bhūtaɱ pajānāti.|| ||

Evaɱ kho bhikkhave bhikkhu vīthiɱ jānāti.|| ||

(9) Kathañ ca bhikkhave bhikkhu gocara-kusalo hoti?|| ||

Idha, bhikkhave, bhikkhu cattāro sati-paṭṭhāne yathā-bhūtaɱ pajānāti.|| ||

Evaɱ kho bhikkhave bhikkhu gocara-kusalo hoti.|| ||

(10) Kathañ ca bhikkhave bhikkhu sāvasesadohī hoti?|| ||

Idha, bhikkhave, bhikkhuɱ saddhā gahapatikā abhihaṭṭhuɱ pavārenti cīvara-piṇḍa-pāta-senāsana-gilāna-paccaya-bhesajja-parikkhārehi||
tatra bhikkhu mattaɱ jānāti paṭi-g-gahaṇāya.|| ||

Evaɱ kho bhikkhave bhikkhu sāvasesadohī hoti.|| ||

(11) Kathañ ca bhikkhave bhikkhu ye te bhikkhū therā rattaññū cira-pabba-jitā Saŋgha-pitaro Saŋghapariṇāyakā,||
te atīrekapūjāya pūjetā hoti?|| ||

Idha, bhikkhave, bhikkhu||
ye te bhikkhū therā rattaññū cira-pabba-jitā Saŋgha-pitaro Saŋghapariṇāyakā,||
tesu mettaɱ kāya-kammaɱ pacc'upaṭṭhāpeti āvī c'eva raho ca,||
mettaɱ vacī-kammaɱ pacc'upaṭṭhāpeti āvī c'eva raho ca,||
mettaɱ mano-kammaɱ pacc'upaṭṭhāpeti āvī c'eva raho ca.|| ||

Evaɱ kho bhikkhave bhikkhu ye te bhikkhū therā rattaññū cira-pabba-jitā Saŋgha-pitaro Saŋghapariṇāyakā,||
te atirekapūjāya pūjetā hoti.|| ||

Imehi kho bhikkhave ekādasahi dhammehi samannāgato bhikkhu bhabbo imasmiɱ Dhamma-Vinaye vuḍḍhiɱ virūḷhiɱ vepullaɱ āpajjitunti.|| ||

Idam avoca Bhagavā.|| ||

Attamanā te bhikkhū Bhagavato bhāsitaɱ abhinandunti.|| ||

Mahāgopālakasuttaɱ tatiyaɱ


Contact:
E-mail
Copyright Statement