Majjhima Nikaya


[Site Map]  [Home]  [Sutta Indexes]  [Glossology]  [Site Sub-Sections]


 

Majjhima Nikāya
I. Mūlapaṇṇāsa
4. Mahā Yamaka Vagga

Sutta 34

Cūlā Gopālaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


 

[1][chlm][pts][upal] Evaɱ me sutaɱ:|| ||

Ekaɱ samayaɱ Bhagavā Vajjīsu viharati Ukkacelāyaɱ Gaŋgāya nadiyā tīre.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ Bhagavā etad avoca:|| ||

2. Bhūta-pubbaɱ bhikkhave Māgadhako gopālako duppañña-jātiko vassānaɱ pacchime māse sarada-samaye asamavekkhitvā Gaŋgāya nadiyā orimaɱ tīraɱ asamavekkhitvā pārimaɱ tīraɱ atitthen'eva gāvo patāresi uttaraɱ tīraɱ Suvidehānaɱ.|| ||

Atha kho bhikkhave gāvo majjhe Gaŋgāya nadiyā sote āmaṇḍaliyaɱ karitvā tatth'eva anayavyasanaɱ āpajjiɱsu.|| ||

Taɱ kissa hetu?|| ||

Tathā hi so bhikkhave Māgadhako gopālako duppañña-jātiko vassānaɱ pacchime māse sarada-samaye asamavekkhitvā Gaŋgāya nadiyā orimaɱ tīraɱ asamavekkhitvā pārimaɱ tīraɱ atitthen'eva gāvo patāresi uttaraɱ tīraɱ Suvidehānaɱ.|| ||

3. Evam eva kho bhikkhave ye hi keci samaṇā vā brāhmaṇā vā akusalā imassa lokassa,||
akusalā parassa lokassa,||
akusalā Māradheyyassa,||
akusalā a-Māradheyyassa,||
akusalā Maccudheyyassa,||
akusalā a-Maccudheyyassa,||
tesaɱ ye sotabbaɱ saddahātabbaɱ maññissanti,||
tesaɱ taɱ bhavissati dīgha-rattaɱ ahitāya dukkhāya.|| ||

4. Bhūta-pubbaɱ bhikkhave Māgadhako gopālako sappañña-jātiko vassānaɱ pacchime māse sarada-samaye samavekkhitvā Gaŋgāya nadiyā orimaɱ tīraɱ samavekkhitvā pārimaɱ tīraɱ titthen'eva gāvo patāresi uttaraɱ tīraɱ suvidehānaɱ.|| ||

So paṭhamaɱ patāresi ye te usabhā gopitaro gopariṇāyakā,||
te tiriyaɱ Gaŋgāya sotaɱ jetvā sotthinā pāraɱ agamaɱsu||
athāpare patāresi balavagāvo, dammagāvo,||
te pi tiriyaɱ Gaŋgāya sotaɱ jetvā sotthinā pāraɱ agamaɱsu;||
athāpare patāresi vacchatare vacchatariyo||
te pi tiriyaɱ Gaŋgāya sotaɱ jetvā sotthinā pāraɱ agamaɱsu;||
athāpare patāresi vacchake kisabalake,||
te pi tiriyaɱ Gaŋgāya sotaɱ jetvā sotthinā pāraɱ agamaɱsu.|| ||

Bhūta-pubbaɱ bhikkhave vacchako taruṇako tāvad-eva jātako mātu goravakena vuyhamāno,||
so pi tiriyaɱ Gaŋgāya sotaɱ jetvā sotthinā pāraɱ agamāsi.|| ||

Taɱ kissa hetu?|| ||

Tathā hi so bhikkhave Māgadhako gopālako [226] sappañña-jātiko vassānaɱ pacchime māse sarada-samaye samavekkhitvā Gaŋgāya nadiyā orimaɱ tīraɱ samavakkhitvā pārimaɱ tīraɱ titthen'eva gāvo patāresi uttaraɱ tīraɱ Suvidehānaɱ.|| ||

5. Evam eva kho bhikkhave ye hi keci samaṇā vā brāhmaṇā vā kusalā imassa lokassa,||
kusalā parassa lokassa,||
kusalā Māradheyyassa,||
kusalā a-Māradheyyassa,||
kusalā Maccudheyyassa,||
kusalā a-Maccudheyyassa,||
tesaɱ ye sotabbaɱ saddahātabbaɱ maññissanti,||
tesaɱ taɱ bhavissati dīgha-rattaɱ hitāya sukhāya.|| ||

6. Seyyathā pi, bhikkhave, ye te usabhā gopitaro gopariṇāyakā tiriyaɱ Gaŋgāya sotaɱ jetvā sotthinā pāraɱ agamaɱsu,||
evam eva kho, bhikkhave,||
ye te bhikkhū arahanto khīṇ'āsavā vusitavanto kata-karaṇīyā ohita-bhārā anuppatta-sadatthā parikkhīṇa-bhava-saŋyojanā samma-d-aññā vimuttā,||
te pi tiriyaɱ Mārassa sotaɱ jetvā sotthinā pāraɱ gatā.|| ||

7. Seyyathā pi te bhikkhave balavagāvo dammagāvo tiriyaɱ Gaŋgāya sotaɱ jetvā sotthinā pāraɱ agamaɱsu,||
evam eva kho, bhikkhave,||
ye te bhikkhū pañcannaɱ orambhāgiyānaɱ saŋyojanānaɱ parikkhayā opapātikā tattha parinibbāyino anāvatti-dhammā tasmā lokā, te pi tiriyaɱ Mārassa sotaɱ jetvā sotthinā pāraɱ gamissanti.|| ||

8. Seyyathā pi te bhikkhave vacchatarā vacchatariyo tiriyaɱ Gaŋgāya sotaɱ jetvā sotthinā pāraɱ agamaɱsu,||
evam eva kho, bhikkhave,||
ye te bhikkhū tiṇṇaɱ saŋyojanānaɱ parikkhayā rāga-dosa-mohānaɱ tanuttā sakadāgāmino sakideva imaɱ lokaɱ āgantvā dukkhassantaɱ karissanti, te pi tiriyaɱ Mārassa sotaɱ jetvā sotthinā pāraɱ gamisnti.|| ||

9. Seyyathā pi te bhikkhave vacchakā kisabalakā tiriyaɱ Gaŋgāya sotaɱ jetvā sotthinā pāraɱ agamaɱsu,||
evam eva kho, bhikkhave,||
ye te bhikkhū tiṇṇaɱ saŋyojanānaɱ parikkhayā Sotāpannā avinipāta-dhammā sambodhi-parāyanā,||
te pi tiriyaɱ Mārassa sotaɱ jetvā sotthinā pāraɱ gamissanti.|| ||

10. Seyyathā pi so bhikkhave vacchako taruṇako tāvad-eva jātako mātu goravakena vuyhamāno tiriyaɱ Gaŋgāya sotaɱ jetvā sotthinā pāraɱ agamāsi,||
evam eva kho, bhikkhave,||
ye te bhikkhū dhammānusārino saddhānusārino,||
te pi tiriyaɱ Mārassa sotaɱ jetvā sotthinā pāraɱ gamissanti.|| ||

11. Ahaɱ kho pana bhikkhave [227] kusalo imassa lokassa,||
kusalo parassa lokassa,||
kusalo Māradheyyassa,||
kusalo a-Māradheyyassa,||
kusalo Maccudheyyassa,||
kusalo a-Maccudheyyassa||
tassa mayhaɱ bhikkhave ye sotabbaɱ saddahātabbaɱ maññissanti,||
tesaɱ taɱ bhavissati dīgha-rattaɱ hitāya sukhāyāti.|| ||

12. Idam avoca Bhagavā||
idaɱ vatvā Sugato athāparaɱ etad avoca Satthā:|| ||

"Ayaɱ loko paraloko jānatā suppakāsito,
Yañ ca Mārena samappattaɱ appattaɱ yañ ca Maccunā.|| ||

Sabbaɱ lokaɱ abhiññāya sambuddhena pajānatā,
Vivaṭaɱ amatadvāraɱ khemaɱ Nibbānapattiyā.|| ||

Chinnaɱ pāpimato sotaɱ viddhastaɱ vinaḷīkataɱ,
Pāmujjabahulā hotha khemaɱ patthetha bhikkhavo" ti.|| ||

Cūḷagopālakasuttaɱ catutthaɱ


Contact:
E-mail
Copyright Statement