Majjhima Nikaya


[Home]  [Sutta Indexes]  [Glossology]  [Site Sub-Sections]


 

Majjhima Nikāya
II. Majjhima-Paṇṇāsa
1. Gahapati Vagga

Sutta 55

Jīvaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[368]

[1][chlm][pts][upal] Evaɱ me sutaɱ:|| ||

Ekaɱ samayaɱ Bhagavā Rājagahe viharati Jīvakassa Komārabhaccassa Ambavane.|| ||

Atha kho Jīvako Komārabhacco yena Bhagavā ten'upasankami upasankamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Jīvako Komārabhacco Bhagavantaɱ etad avoca:|| ||

Sutaɱ me taɱ bhante:|| ||

'Samaṇaɱ Gotamaɱ uddissa pāṇaɱ ārabhanti,||
taɱ Samaṇo Gotamo jānaɱ uddissakaṭaɱ maɱsaɱ paribhuñjati paṭiccakamman' ti.|| ||

Ye te bhante evam āhaɱsu:

'Samaṇaɱ Gotamaɱ uddissa pāṇaɱ ārabhanti||
taɱ Samaṇo Gotamo jānaɱ uddissakaṭaɱ maɱsaɱ paribhuñjati paṭiccakamman' ti,|| ||

kacci te bhante Bhagavato vutta-vādino,||
na ca Bhagavantaɱ abhūtena abbh'ācikkhanti,||
dhammassa cānudhammaɱ vyākaronti,||
na ca koci saha-dhammiko vādānuvādo gārayhaɱ ṭhānaɱ āga-c-chatī" ti?|| ||

[369] Ye te Jīvaka evam āhaɱsu:|| ||

'Samaṇaɱ Gotamaɱ uddissa pāṇaɱ ārabhanti,||
taɱ Samaṇo Gotamo jānaɱ uddissakaṭaɱ maɱsaɱ paribhuñjati paṭiccakamman' ti,|| ||

na me te vutta-vādino,||
abbh'ācikkhanti ca pana man te asatā abhūtena.|| ||

Tīhi kho ahaɱ Jīvaka ṭhānehi maɱsaɱ 'aparibhogan' ti vadāmi:||
diṭṭhaɱ||
sutaɱ||
parisaŋkitaɱ.|| ||

Imehi kho ahaɱ Jīvaka||
tīhi ṭhānehi maɱsaɱ 'aparibhogan' ti vadāmi.|| ||

Tīhi kho ahaɱ Jīvaka ṭhānehi maɱsaɱ 'paribhogan' ti vadāmi:||
adiṭṭhaɱ||
asutaɱ||
aparisaŋkitaɱ.

Imehi kho ahaɱ Jīvaka tīhi ṭhānehi maɱsaɱ 'paribhogan' ti vadāmi.|| ||

 


 

Idha Jīvaka, bhikkhu aññataraɱ gāmaɱ vā nigamaɱ vā upanissāya viharati.|| ||

So mettā-saha-gatena cetasā ekaɱ disaɱ pharitvā viharati.|| ||

Tathā dutiyaɱ||
tathā tatiyaɱ||
tathā catutthiɱ.|| ||

Iti uddham-adho tiriyaɱ sabbadhi sabbattatāya sabbā-vantaɱ lokaɱ mettā-saha-gatena cetasā vipulena mahaggatena appamāṇena averena avyāpajjhena pharitvā viharati.|| ||

Tam enaɱ gahapati vā gahapati-putto vā upasankamitvā svātanāya bhattena nimanteti.|| ||

Ākaŋkha-māno va Jīvaka bhikkhu adhivāseti.|| ||

So tassā rattiyā accayena pubbaṇha-samayaɱ nivāsetvā patta-cīvaram ādāya yena tassa gahapatissa vā gahapati-puttassa vā nivesanaɱ ten'upasankamati||
upasankamitvā paññatte āsane nisīdati.|| ||

Tam enaɱ so gahapati vā gahapati-putto vā paṇītena piṇḍa-pātena parivisati.|| ||

Tassa na evaɱ hoti:|| ||

Sādhu vata māyaɱ gahapati vā gahapati-putto vā paṇītena piṇḍa-pātena parivisati,||
aho vata māyaɱ gahapati vā gahapati-putto vā āyatim pi eva-rūpena paṇītena piṇḍa-pātena pariviseyyāti.|| ||

Evam pi'ssa na hoti.|| ||

So taɱ piṇḍa-pātaɱ agathito amucchito anajjhopanno ādīnava-dassāvī nissaraṇa-pañño paribhuñjati.|| ||

Taɱ kim maññasi Jīvaka?

Api nu so bhikkhu tasmiɱ samaye attavyābādhāya vā ceteti,||
paravyābādhāya vā ceteti,||
ubhayavyāvādhāya vā cetetī" ti?|| ||

"No h'etaɱ bhante."|| ||

"Nanu so Jīvaka bhikkhu tasmiɱ samaye anavajjaɱ yeva āhāraɱ āhāretī" ti.|| ||

"Evaɱ bhante.|| ||

Sutaɱ me taɱ bhante,||
'Brahmā mettā-vihārī' ti.|| ||

Tam me idaɱ bhante Bhagavā sakkhi diṭṭho,||
Bhagavā hi bhante mettā-vihārī" ti.|| ||

"Yena kho Jīvaka rāgena||
yena [370] dosena||
yena mohena||
vyāpādavā assa,||
so rāgo||
so doso||
so moho||
Tathāgatassa pahīno ucchinna-mūlo tālā-vatthu-kato anabhāva-kato āyatiɱ anuppāda-dhammo.|| ||

Sace kho te Jīvakaɱ idaɱ sandhāya bhāsitaɱ,||
anujānāmi te etan" ti.|| ||

"Etad eva kho pana me bhante sandhāya bhāsitaɱ."|| ||

"Idha Jīvaka bhikkhu aññataraɱ gāmaɱ vā nigamaɱ vā upanissāya viharati.|| ||

So karuṇā-saha-gatena cetasā ekaɱ disaɱ pharitvā viharati.|| ||

Tathā dutiyaɱ||
tathā tatiyaɱ||
tathā catutthiɱ.|| ||

Iti uddham-adho tiriyaɱ sabbadhi sabbattatāya sabbā-vantaɱ lokaɱ karuṇā-saha-gatena cetasā vipulena mahaggatena appamāṇena averena avyāpajjhena pharitvā viharati.|| ||

Tam enaɱ gahapati vā gahapati-putto vā upasankamitvā svātanāya bhattena nimanteti.|| ||

Ākaŋkha-māno va Jīvaka bhikkhu adhivāseti.|| ||

So tassā rattiyā accayena pubbaṇha-samayaɱ nivāsetvā patta-cīvaram ādāya yena tassa gahapatissa vā gahapati-puttassa vā nivesanaɱ ten'upasankamati||
upasankamitvā paññatte āsane nisīdati.|| ||

Tam enaɱ so gahapati vā gahapati-putto vā paṇītena piṇḍa-pātena parivisati.|| ||

Tassa na evaɱ hoti:|| ||

Sādhu vata māyaɱ gahapati vā gahapati-putto vā paṇītena piṇḍa-pātena parivisati,||
aho vata māyaɱ gahapati vā gahapati-putto vā āyatim pi eva-rūpena paṇītena piṇḍa-pātena pariviseyyāti.|| ||

Evam pi'ssa na hoti.|| ||

So taɱ piṇḍa-pātaɱ agathito amucchito anajjhopanno ādīnava-dassāvī nissaraṇa-pañño paribhuñjati.|| ||

Taɱ kim maññasi Jīvaka?

Api nu so bhikkhu tasmiɱ samaye attavyābādhāya vā ceteti,||
paravyābādhāya vā ceteti,||
ubhayavyāvādhāya vā cetetī" ti?|| ||

"No h'etaɱ bhante."|| ||

"Nanu so Jīvaka bhikkhu tasmiɱ samaye anavajjaɱ yeva āhāraɱ āhāretī" ti.|| ||

"Evaɱ bhante.|| ||

Sutaɱ me taɱ bhante,||
'Brahmā karuṇā-vihārī' ti.|| ||

Tam me idaɱ bhante Bhagavā sakkhi diṭṭho,||
Bhagavā hi bhante karuṇā-vihārī" ti.|| ||

"Yena kho Jīvaka rāgena||
yena dosena||
yena mohena||
vyāpādavā assa,||
so rāgo||
so doso||
so moho||
Tathāgatassa pahīno ucchinna-mūlo tālā-vatthu-kato anabhāva-kato āyatiɱ anuppāda-dhammo.|| ||

Sace kho te Jīvakaɱ idaɱ sandhāya bhāsitaɱ,||
anujānāmi te etan" ti.|| ||

"Etad eva kho pana me bhante sandhāya bhāsitaɱ."|| ||

Idha Jīvaka bhikkhu aññataraɱ gāmaɱ vā nigamaɱ vā upanissāya viharati,||
so muditā-saha-gatena cetasā ekaɱ disaɱ pharitvā viharati.|| ||

Tathā dutiyaɱ||
tathā tatiyaɱ||
tathā catutthiɱ.|| ||

Iti uddham-adho tiriyaɱ sabbadhi sabbattatāya sabbā-vantaɱ lokaɱ muditā-saha-gatena cetasā vipulena mahaggatena appamāṇena averena avyāpajjhena pharitvā viharati.|| ||

Tam enaɱ gahapati vā gahapati-putto vā upasankamitvā svātanāya bhattena nimanteti.|| ||

Ākaŋkha-māno va Jīvaka bhikkhu adhivāseti.|| ||

So tassā rattiyā accayena pubbaṇha-samayaɱ nivāsetvā patta-cīvaram ādāya yena tassa gahapatissa vā gahapati-puttassa vā nivesanaɱ ten'upasankamati||
upasankamitvā paññatte āsane nisīdati.|| ||

Tam enaɱ so gahapati vā gahapati-putto vā paṇītena piṇḍa-pātena parivisati.|| ||

Tassa na evaɱ hoti:|| ||

Sādhu vata māyaɱ gahapati vā gahapati-putto vā paṇītena piṇḍa-pātena parivisati,||
aho vata māyaɱ gahapati vā gahapati-putto vā āyatim pi eva-rūpena paṇītena piṇḍa-pātena pariviseyyāti.|| ||

Evam pi'ssa na hoti.|| ||

So taɱ piṇḍa-pātaɱ agathito amucchito anajjhopanno ādīnava-dassāvī nissaraṇa-pañño paribhuñjati.|| ||

Taɱ kim maññasi Jīvaka?

Api nu so bhikkhu tasmiɱ samaye attavyābādhāya vā ceteti,||
paravyābādhāya vā ceteti,||
ubhayavyāvādhāya vā cetetī" ti?|| ||

"No h'etaɱ bhante."|| ||

"Nanu so Jīvaka bhikkhu tasmiɱ samaye anavajjaɱ yeva āhāraɱ āhāretī" ti.|| ||

"Evaɱ bhante.|| ||

Sutaɱ me taɱ bhante,||
'Brahmā muditā-vihārī' ti.|| ||

Tam me idaɱ bhante Bhagavā sakkhi diṭṭho,||
Bhagavā hi bhante muditā-vihārī" ti.|| ||

"Yena kho Jīvaka rāgena||
yena dosena||
yena mohena||
vyāpādavā assa,||
so rāgo||
so doso||
so moho||
Tathāgatassa pahīno ucchinna-mūlo tālā-vatthu-kato anabhāva-kato āyatiɱ anuppāda-dhammo.|| ||

Sace kho te Jīvakaɱ idaɱ sandhāya bhāsitaɱ,||
anujānāmi te etan" ti.|| ||

"Etad eva kho pana me bhante sandhāya bhāsitaɱ."|| ||

Idha Jīvaka bhikkhu aññataraɱ gāmaɱ vā nigamaɱ vā upanissāya viharati,||
so upekkhā-saha-gatena cetasā ekaɱ disaɱ pharitvā viharati.|| ||

Tathā dutiyaɱ||
tathā tatiyaɱ||
tathā catutthiɱ.|| ||

Iti uddham-adho tiriyaɱ sabbadhi sabbattatāya sabbā-vantaɱ lokaɱ muditā-saha-gatena cetasā vipulena mahaggatena appamāṇena averena avyāpajjhena pharitvā viharati.|| ||

Tam enaɱ gahapati vā gahapati-putto vā upasankamitvā svātanāya bhattena nimanteti.|| ||

Ākaŋkha-māno va Jīvaka bhikkhu adhivāseti.|| ||

So tassā rattiyā accayena pubbaṇha-samayaɱ nivāsetvā patta-cīvaram ādāya yena tassa gahapatissa vā gahapati-puttassa vā nivesanaɱ ten'upasankamati||
upasankamitvā paññatte āsane nisīdati.|| ||

Tam enaɱ so gahapati vā gahapati-putto vā paṇītena piṇḍa-pātena parivisati.|| ||

Tassa na evaɱ hoti:|| ||

Sādhu vata māyaɱ gahapati vā gahapati-putto vā paṇītena piṇḍa-pātena parivisati,||
aho vata māyaɱ gahapati vā gahapati-putto vā āyatim pi eva-rūpena paṇītena piṇḍa-pātena pariviseyyāti.|| ||

Evam pi'ssa na hoti.|| ||

So taɱ piṇḍa-pātaɱ agathito amucchito anajjhopanno ādīnava-dassāvī nissaraṇa-pañño paribhuñjati.|| ||

Taɱ kim maññasi Jīvaka?

Api nu so bhikkhu tasmiɱ samaye attavyābādhāya vā ceteti,||
paravyābādhāya vā ceteti,||
ubhayavyāvādhāya vā cetetī" ti?|| ||

"No h'etaɱ bhante."|| ||

"Nanu so Jīvaka bhikkhu tasmiɱ samaye anavajjaɱ yeva āhāraɱ āhāretī" ti.|| ||

"Evaɱ bhante.|| ||

Sutaɱ me taɱ bhante,||
'Brahmā muditā-vihārī' ti.|| ||

Tam me idaɱ bhante Bhagavā sakkhi diṭṭho,||
Bhagavā hi bhante muditā-vihārī" ti.|| ||

"Yena kho Jīvaka rāgena||
yena dosena||
yena mohena||
vyāpādavā assa,||
so rāgo||
so doso||
so moho||
Tathāgatassa pahīno ucchinna-mūlo tālā-vatthu-kato anabhāva-kato āyatiɱ anuppāda-dhammo.|| ||

Sace kho te Jīvakaɱ idaɱ sandhāya bhāsitaɱ,||
anujānāmi [371] te etan" ti.|| ||

"Etad eva kho pana me bhante sandhāya bhāsitaɱ."|| ||

Yo kho Jīvaka Tathāgataɱ vā Tathāgata-sāvakaɱ vā uddissa pāṇaɱ ārabhati||
so pañcahi ṭhānehi bahuɱ apuññaɱ pasavati:|| ||

Yam pi so evam āha:|| ||

'Gacchatha amukaɱ nāma pāṇaɱ ānethā' ti.|| ||

Iminā paṭhamena ṭhānena bahuɱ apuññaɱ pasavati.|| ||

Yam pi so pāṇo galappavedhakena ānīyamāno dukkhaɱ domanassaɱ paṭisaŋvedeti.|| ||

Iminā dutiyena ṭhānena bahuɱ apuññaɱ pasavati.|| ||

Yam pi so evam āha:|| ||

'Gacchatha imaɱ pāṇaɱ ārabhatā' ti.|| ||

Iminā tatiyena ṭhānena bahuɱ apuññaɱ pasavati.|| ||

Yam pi so pāṇo ārabhiyamāno dukkhaɱ domanassaɱ paṭisaŋvedeti.|| ||

Iminā catutthena ṭhānena bahuɱ apuññaɱ pasavati.|| ||

Yam pi so Tathāgataɱ vā Tathāgata-sāvakaɱ vā akappiyena āsādeti.|| ||

Iminā pañcamena ṭhānena bahuɱ apuññaɱ pasavati.|| ||

Yo kho Jīvaka Tathāgataɱ vā Tathāgata-sāvakaɱ vā uddissa pāṇaɱ ārabhati||
so imehi pañcahi ṭhānehi bahuɱ apuññaɱ pasavatī" ti.|| ||

Evaɱ vutte Jīvako komārabhacco Bhagavantaɱ etad avoca:|| ||

"Acchariyam bhante!|| ||

Abbhutam bhante!|| ||

Kappiyaɱ vata bhante bhikkhū āhāraɱ āhārenti.|| ||

Anavajjaɱ vata bhante bhikkhū āhāraɱ āhārenti.|| ||

Abhikkantaɱ bhante!|| ||

Abhikkantaɱ bhante!|| ||

Seyyathā pi bho Gotama nikkujjitaɱ vā ukkujjeyya,||
paṭi-c-channaɱ vā vīvareyya,||
mūḷhassa vā Maggaɱ ācikkheyya' andha-kāre vā tela-pajjotaɱ dhāreyya,||
'cakkhu-manto rūpāni dakkhintī' ti,||
evam eva bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi||
Dhammañ ca||
bhikkhu-Saŋghañ ca.|| ||

Upāsakaɱ maɱ bhavaɱ Gotamo dhāretu ajja-t-agge pāṇupetaɱ saraṇaɱ gatan" ti.|| ||

Jīvakasuttaɱ pañcamaɱ


Contact:
E-mail
Copyright Statement