Majjhima Nikaya


[Home]  [Sutta Indexes]  [Glossology]  [Site Sub-Sections]


 

Majjhima Nikāya
II. Majjhima-Paṇṇāsa
3. Paribbājaka Vagga

Sutta 75

Māgandiya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[501]

[1][chlm][pts][than][ntbb][upal][olds] Evaɱ me sutaɱ:|| ||

Ekaɱ samayaɱ Bhagavā Kurūsu viharati Kammāssa-dammaɱ nāma Kurūnaɱ nigamo Bhāradvāja-gottassa brāhmaṇassa agyāgāre tiṇa-santharake.|| ||

Atha kho Bhagavā pubbaṇha-samayaɱ nivāsetvā patta-cīvaraɱ ādāya Kammāssa-dammaɱ piṇḍāya pāvisi.|| ||

Kammāssadamme piṇḍāya caritvā pacchā-bhattaɱ piṇḍa-pāta-paṭikkanto yena aññataro vana-saṇḍo ten'upasankami divā-vihārāya.|| ||

Taɱ vana-saṇḍaɱ ajjhoga-hetvā aññatarasmiɱ rukkha-mūle divā-vihāraɱ nisīdi.|| ||

[502] Atha kho Māgandiyo paribbājako jaŋghā-vihāraɱ anucaŋkama-māno anuvicara-māno yena Bhāradvāja-gottassa brāhmaṇassa agy-ā-gāraɱ ten'upasankami.|| ||

Addasā kho Māgandiyo paribbājako Bhāradvāja-gottassa brāhmaṇassa agyāgāre tiṇa-santharakaɱ paññattaɱ,||
disvāna Bhāradvāja-gottaɱ brāhmaṇaɱ etad avoca:|| ||

'Kassa nv'ayaɱ bhoto Bhāradvājassa agyāgāre tiṇa-santharako paññatto.|| ||

Samaṇa-seyyā-rūpaɱ maññeti.|| ||

Atthi bho Māgandiya Samaṇo Gotamo Sakya-putto Sakya-kulā pabba-jito.|| ||

Taɱ kho pana bhavantaɱ Gotamaɱ evaɱ kalyāṇo kitti-saddo abbhu-g-gato:|| ||

'Iti pi so Bhagavā arahaɱ Sammā-Sam-Buddho vijjā-caraṇa-sampanno Sugato loka-vidū anuttaro purisa-damma-sārathī Satthā deva-manussānaɱ Buddho Bhagavā' ti.|| ||

Tassesā bhoto Gotamassa seyyā paññattāti.|| ||

Du-d-diṭṭhaɱ vata bho Bhāradvāja addasāma ye mayaɱ tassa bhoto Gotamassa bhūnahuno seyyaɱ addasāmāti.|| ||

'Rakkhass'etaɱ Māgandiya vācaɱ,||
rakkhass'etaɱ Māgandiya vācaɱ,||
bahū hi tassa bhoto Gotamassa khattiya-paṇḍitā pi brāhmaṇa-paṇḍitā pi gahapati-paṇḍitā pi samaṇa-paṇḍitā pi abhi-p-pasannā vinītā ariye ñāye dhamme kusale' ti.|| ||

Taɱ kissa hetu?|| ||

Evaɱ hi no sutte ocaratī ti.|| ||

Sace taɱ bhoto Māgandiyassa agaru āroceyyame taɱ samaṇassa Gotama-s-sāti.|| ||

Appo-s-sukko bhavaɱ Bhāradvājo vuttova naɱ vadeyyāti.|| ||

Assosi kho Bhagavā dibbāya sota-dhātuyā visuddhāya atikkanta mānusa-kāya Bhāradvāja-gottassa brāhmaṇassa Māgandiyena paribbājakena saddhiɱ imaɱ kathā-sallāpaɱ.|| ||

Atha kho Bhagavā sāyaṇha-samayaɱ patisallānā vuṭṭhito yena Bhāradvāja-gottassa brāhmaṇassa agy-ā-gāraɱ ten'upasankami.|| ||

Upasaŋkamitvā nisīdi paññatte tiṇa-santharake.|| ||

Atha kho Bhāradvāja-gotto brāhmaṇo yena Bhagavā ten'upasankami.|| ||

Upasaŋkamitvā Bhagavatā saddhiɱ sammodi,||
sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

Eka-m-antaɱ nisinnaɱ kho Bhāradvāja-gottaɱ brāhmaṇaɱ Bhagavā etad avoca:

'Ahu pana te Bhāradvāja Māgandiyena paribbājakena [503] saddhiɱ imaɱ yeva tiṇa-santharakaɱ ārabbha kocid-eva kathā-sallāpo' ti.|| ||

Evaɱ vutte Bhāradvāja-gotto brāhmaṇo saɱviggo loma-haṭṭha-jāto Bhagavantaɱ etad avoca:||
'Etad eva kho pana mayaɱ bhoto Gotamassa ārocetukāmā,||
atha ca pana bhavaɱ Gotamo anakkhātaɱ yeva akkhāsīti.|| ||

Ayañ ca h'idaɱ Bhagavato Bhāradvāja-gottena brāhmaṇena saddhiɱ antarā kathā vippakatā hoti.|| ||

Atha Māgandiyo paribbājako jaŋghā-vihāraɱ anucaŋkama-māno anuvicara-māno yena Bhāradvāja-gottassa brāhmaṇassa agy-ā-gāraɱ,||
yena Bhagavā ten'upasankami,||
upasankamitvā Bhagavatā saddhiɱ sammodi,||
sammodanīyaɱ kathaɱ sārāṇīyaɱ vīti-sāretvā eka-m-antaɱ nisīdi.|| ||

Eka-m-antaɱ nisinnaɱ kho Māgandiyaɱ paribbājakaɱ Bhagavā etad avoca.

Cakkhuɱ kho Māgandiya rūp-ā-rāmaɱ rūpa-rataɱ rūpa-sammuditaɱ.|| ||

Taɱ Tathāgatassa dantaɱ guttaɱ rakkhitaɱ saɱvutaɱ.|| ||

Tassa ca saɱvarāya dhammaɱ deseti.|| ||

Idaɱ nu te etaɱ Māgandiya sandhāya bhāsitaɱ:|| ||

'Bhūnahu Samaṇo Gotamo' ti.|| ||

Etad eva kho pana me bho Gotama sandhāya bhāsitaɱ:

'Bhūnahu Samaṇo Gotamo' ti.|| ||

Taɱ kissa hetu?|| ||

Evaɱ hi no sutte ocaratī ti.|| ||

Sotaɱ kho Māgandiya sadd-ā-rāmaɱ sadda-rataɱ sadda-sammuditaɱ.|| ||

Taɱ Tathāgatassa dantaɱ guttaɱ rakkhitaɱ saɱvutaɱ.|| ||

Tassa ca saɱvarāya dhammaɱ deseti.|| ||

Idaɱ nu te etaɱ Māgandiya sandhāya bhāsitaɱ:|| ||

'Bhūnahu Samaṇo Gotamo' ti.|| ||

Etad eva kho pana me bho Gotama sandhāya bhāsitaɱ:|| ||

'Bhūnahu Samaṇo Gotamo' ti.|| ||

Taɱ kissa hetu?|| ||

Evaɱ hi no sutte ocaratī ti.|| ||

Ghānaɱ kho Māgandiya gandh-ā-rāmaɱ gandha-rataɱ gandha-sammuditaɱ.|| ||

Taɱ Tathāgatassa dantaɱ guttaɱ rakkhitaɱ saɱvutaɱ.|| ||

Tassa ca saɱvarāya dhammaɱ deseti.|| ||

Idaɱ nu te etaɱ Māgandiya sandhāya bhāsitaɱ:|| ||

'Bhūnahu Samaṇo Gotamo' ti.|| ||

Etad eva kho pana me bho Gotama sandhāya bhāsitaɱ:|| ||

'Bhūnahu Samaṇo Gotamo' ti.|| ||

Taɱ kissa hetu?|| ||

Evaɱ hi no sutte ocaratī ti.|| ||

Jivhā kho Māgandiya ras-ā-rāmā rasā-rattā rasa-sammuditā.|| ||

Sā Tathāgatassa dantā guttā rakkhitā saɱvutā.|| ||

Tassā ca saɱvarāya dhammaɱ deseti.|| ||

Idaɱ nu te etaɱ Māgandiya sandhāya bhāsitaɱ:||
'Bhūnahu Samaṇo Gotamo' ti.|| ||

Etad eva kho pana me bho Gotama sandhāya bhāsitaɱ:|| ||

'Bhūnahu Samaṇo Gotamo' ti.|| ||

Taɱ kissa hetu?|| ||

Evaɱ hi no sutte ocaratī' ti.|| ||

Kāyo kho Māgandiya phoṭṭhabb'ārāmo phoṭṭhabba-rato phoṭṭhabba-sammudito.|| ||

So Tathāgatassa danto gutto rakkhito saɱvuto.|| ||

Tassa ca saɱvarāya dhammaɱ deseti.|| ||

Idaɱ nu te etaɱ Māgandiya sandhāya bhāsitaɱ:||
'Bhūnahu Samaṇo Gotamo' ti.|| ||

Etad eva kho pana me bho Gotama sandhāya bhāsitaɱ:|| ||

'Bhūnahu Samaṇo Gotamo' ti.|| ||

Taɱ kissa hetu?|| ||

Evaɱ hi no sutte ocaratī' ti.|| ||

Mano kho Māgandiya dhamm-ā-rāmo dhamma-rato dhamma-sammudito.|| ||

So Tathāgatassa danto gutto rakkhito saɱvuto.|| ||

Tassa ca saɱvarāya dhammaɱ deseti.|| ||

Idaɱ nu te etaɱ Māgandiya sandhāya bhāsitaɱ:|| ||

'Bhūnahu Samaṇo Gotamo' ti.|| ||

Etad eva kho pana me bho Gotama sandhāya bhāsitaɱ:|| ||

'Bhūnahu Samaṇo Gotamo' ti.|| ||

Taɱ kissa hetu?|| ||

Evaɱ hi no sutte ocaratī' ti.|| ||

Taɱ kiɱ maññasi Māgandiya idh'ekacco cakkhu- [504] viññeyyehi rūpehi paricārita-pubbo assa,||
iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

So aparena samayena rūpānaɱ yeva samudayañ ca atthaŋ-gamañ ca assādañ ca ādīnavañ ca nissaraṇañ ca yathā-bhūtaɱ viditvā rūpa-taṇhaɱ pahāya rūpa-pariḷāhaɱ paṭivinodetvā vigata-pipāso ajjhattaɱ vūpasanta-citto vihareyya.|| ||

Imassa pana te Māgandiya kimassa vacanīyanti:||
na kiñci bho Gotama.|| ||

Taɱ kiɱ maññasi Māgandiya?|| ||

Idh'ekacco sota-viññeyyehi saddehi paricārita-pubbo assa,||
iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

So aparena samayena saddānaɱ yeva samudayañ ca atthaŋ-gamañ ca assādañ ca ādīnavañ ca nissaraṇañ ca yathā-bhūtaɱ viditvā sadda-taṇhaɱ pahāya sadda-pariḷāhaɱ paṭivinodetvā vigata-pipāso ajjhattaɱ vūpasanta-citto vihareyya.|| ||

Imassa pana te Māgandiya kimassa vacanīyanti:||
na kiñci bho Gotama.|| ||

Taɱ kiɱ maññasi Māgandiya?|| ||

Idh'ekacco ghāna-viññeyyehi gandhehi paricārita-pubbo assa,||
iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

So aparena samayena gandhānaɱ yeva samudayañ ca atthaŋ-gamañ ca assādañ ca ādīnavañ ca nissaraṇañ ca yathā-bhūtaɱ viditvā gandha-taṇhaɱ pahāya gandha-pariḷāhaɱ paṭivinodetvā vigata-pipāso ajjhattaɱ vūpasanta-citto vihareyya.|| ||

Imassa pana te Māgandiya kimassa vacanīyanti:||
na kiñci bho Gotama.|| ||

Taɱ kiɱ maññasi Māgandiya?|| ||

Idh'ekacco jivhā-viññeyyehi rasehi paricārita-pubbo assa,||
iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

So aparena samayena rasānaɱ yeva samudayañ ca atthaŋ-gamañ ca assādañ ca ādīnavañ ca nissaraṇañ ca yathā-bhūtaɱ viditvā rasa-taṇhaɱ pahāya rasa-pariḷāhaɱ paṭivinodetvā vigata-pipāso ajjhattaɱ vūpasanta-citto vihareyya.|| ||

Imassa pana te Māgandiya kimassa vacanīyanti:|| ||

Na kiñci bho Gotama.|| ||

Taɱ kiɱ maññasi Māgandiya?|| ||

Idh'ekacco kāya-viññeyyehi phoṭṭhabbehi paricārita-pubbo assa,||
iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

So aparena samayena poṭṭhabbānaɱ yeva samudayañ ca atthaŋ-gamañ ca assādañ ca ādīnavañ ca nissaraṇañ ca yathā-bhūtaɱ viditvā phoṭṭhabba-taṇhaɱ pahāya phoṭṭhabba-pariḷāhaɱ paṭivinodetvā vigata-pipāso ajjhattaɱ vūpasanta-citto vihareyya.|| ||

Imassa pana te Māgandiya kimassa vacanīyanti:||
na kiñci bho Gotama.|| ||

Ahaɱ kho pana Māgandiya pubbe agāriya-bhūto samāno pañcahi kāma-guṇehi samappito samaŋgī-bhūto paricāresiɱ.|| ||

Cakkhu-viññeyyehi rūpehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Sota-viññeyyehi saddehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Ghāna-viññeyyehi gandhehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Jivhā-viññeyyehi rasehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Kāya-viññeyyehi phoṭṭhabbehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Tassa mayhaɱ Māgandiya tayo pāsādā ahesuɱ: eko vassiko eko hemantiko eko gimhiko.|| ||

So kho ahaɱ Māgandiya vassike pāsāde vassike cattāro māse nippurisehi turiyehi paricāraya-māno na heṭṭhā pāsādaɱ orohāmi.|| ||

So aparena samayena kāmānaɱ yeva samudayañ ca atthaɱ-gamañ ca assādañ ca ādīnavañ ca nissaraṇañ ca yathā-bhūtaɱ viditvā kāma-taṇhaɱ pahāya kāma-pariḷāhaɱ paṭivinodetvā vigata-pipāso ajjhattaɱ vūpasanta-citto viharāmi.|| ||

So aññe satte passāmi kāmesu avīta-rāge kāma-taṇhāhi khajja-māne kāma-pariḷāhena pariḍayha-māne kāme paṭisevante.|| ||

So tesaɱ na pihemi.|| ||

Na tattha abhiramāmi.|| ||

Taɱ kissa hetu?|| ||

Yā hayaɱ Māgandiya ratī aññatr'eva kāmehi aññatra akusalehi dhammehi api dibbaɱ [505] sukhaɱ samadhigayha tiṭṭhati,||
tāya ratiyā rama-māno hīnassa na pihemi.|| ||

Na tattha abhiramāmi.|| ||

Seyyathā pi Māgandiya gahapati vā gahapati-putto vā aḍḍho maha-d-dhano mahā-bhogo pañcahi kāma-guṇehi samppito samaŋgī-bhūto paricāreyya.|| ||

Cakkhu-viññeyyehi rūpehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Sota-viñañeyyehi saddehi iṭṭhehi kantehi manāpehi piyarūpehi kām'ūpasaɱhitehi rajanīyehi ghāna-viññeyyehi gandhehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Jivhā-viññeyyehi rasehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Kāya-viññeyyehi phoṭṭhabbehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

So kāyena su-caritaɱ caritvā vācāya su-caritaɱ caritvā manasā su-caritaɱ caritvā kāyassa bhedā param maraṇā sugatiɱ saggaɱ lokaɱ upapa-j-jeyya devānaɱ Tāvatiɱsānaɱ saha-vyataɱ.|| ||

So tattha nandane vane accharā-Sangha-parivuto dibbehi pañcahi kāma-guṇehi samappito samaŋgīto paricāreyya.|| ||

So passeyya gahapatiɱ vā gahapati-puttaɱ vā pañcahi kāma-guṇehi samappitaɱ samaŋgī-bhūtaɱ paricāraya-mānaɱ.|| ||

Taɱ kiɱ maññasi Māgandiya,||
api nu so deva-putto nandane vane accharā-Sangha-parivuto dibbehi pañcahi kāma-guṇehi samappito samaŋgī-bhūto paricāraya-māno amussa gahapatissa vā gahapati-puttassa vā piheyya mānusakānaɱ vā pañcannaɱ kāma-guṇānaɱ,||
mānusakehi vā kāmehi āvaṭṭeyyāti.|| ||

No h'idaɱ bho Gotama,||
taɱ kissa hetu:||
mānusakehi bho Gotama kāmehi dibbā kāmā abhikkantatarā paṇītatarā cā ti.|| ||

Evam eva kho ahaɱ Māgandiya pubbe agāriya-bhūto samāno pañcahi kāma-guṇehi samappito samaŋgī-bhūto paricāresiɱ:||
cakkhu-viññeyyehi rūpehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Sota-viñañeyyehi saddehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Ghāna-viññeyyehi gandhehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Jivhā-viññeyyehi rasehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Kāya-viññeyyehi phoṭṭhabbehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

So aparena samayena kāmānaɱ yeva samudayañ ca atthaŋ-gamañ ca assādañ ca ādīnavañ ca nissaraṇañ ca yathā-bhūtaɱ viditvā kāma-taṇhaɱ pahāya kāma-pariḷāhaɱ paṭivinodetvā vigata-pipāso ajjhattaɱ vūpasanta-citto viharāmi.|| ||

So aññe satte passāmi kāmesu avīta-rāge kāma-taṇhāhi khajja-māne kāma-pariḷāhena [506] pariḍayha-māne kāme paṭisevante.|| ||

So tesaɱ na pihemi,||
na tattha abhiramāmi.|| ||

Taɱ kissa hetu?|| ||

Yā ha'yaɱ Māgandiya rati aññatr'eva kāmehi aññatra akusalehi dhammehi api dibbaɱ sukhaɱ samadigayha tiṭṭhati,||
tāya ratiyā rama-māno hīnassa na pihemi.|| ||

Na tattha abhiramāmi.|| ||

Seyyathā pi Māgandiya kuṭṭhī puriso arugatto pakka-gatto kimīhi khajja-māno nakhehi vaṇa-mukhāni vippatacchamāno aŋg'ārakāsuyā kāyaɱ paritāpeyya,||
tassa mitt-ā-maccā ñāti-sāḷo-hitā bhisakkaɱ salla-kattaɱ upaṭṭh-ā-peyyuɱ,||
tassa so bhsakko salla-katto bhesajjaɱ kareyya,||
so taɱ bhesajjaɱ āgamma kuṭṭhehi parimucceyya arogo assa sukhī serī sayaɱvasī yena kām'aŋgamo.|| ||

So aññaɱ kuṭṭhiɱ purisaɱ passeyya aru-gattaɱ pakka-gattaɱ kimīhi khajja-mānaɱ nakhehi vaṇa-mukhāni vippatacchamānaɱ aŋg'ārakāsuyā kāyaɱ paritāpentaɱ.|| ||

Taɱ kiɱ maññasi Māgandiya,||
'api nu so puriso amussa kuṭṭhi'ssa purisassa piheyya,||
aŋg'ārakāsuyā vā bhesajja-paṭisevanāya vā' ti.|| ||

No h'idaɱ bho Gotama.|| ||

Taɱ kissa hetu?|| ||

Roge hi bho Gotama sati bhesajjena karaṇīyaɱ hoti,||
roge asati bhesajjena karaṇīyaɱ na hotī' ti.|| ||

Evam eva kho ahaɱ Māgandiya pubbe agāriya-bhūto samāno pañcahi kāma-guṇehi samappito samaŋgī-bhūto paricāresiɱ.|| ||

Cakkhu-viññeyyehi rūpehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Sota-viñañeyyehi saddehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Ghāna-viññeyyehi gandhehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Jivhā-viññeyyehi rasehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

Kāya-viññeyyehi phoṭṭhabbehi iṭṭhehi kantehi manāpehi piyarūpehi kām'ūpasaɱhitehi rajanīyehi.|| ||

So aparena samayena kāmānaɱ yeva samudayañ ca atthaŋ-gamañ ca assādañ ca ādīnavañ ca nissaraṇañ ca yathā-bhūtaɱ|| ||

Viditvā kāma-taṇhaɱ pahāya kāma-pariḷāhaɱ paṭivinodetvā vigata-pipāso ajjhattaɱ vūpasanta-citto viharāmi.|| ||

So aññe satte passāmi kāmesu avīta-rāge kāma-taṇhāhi khajja-māne kāma-pariḷāhena pariḍayha-māne kāme paṭisevante.|| ||

So tesaɱ na pihemi,||
na tattha abhiramāmi.|| ||

Taɱ kissa hetu?|| ||

Yā ha'yaɱ Māgandiya rati aññatr'eva kāmehi aññatra akusalehi dhammehi api dibbaɱ sukhaɱ samadigayha tiṭṭhati,||
tāya ratiyā rama-māno hīnassa na pihemi.|| ||

Na tattha abhiramāmi.

[507] Seyyathā pi Māgandiya kuṭṭhī puriso arugatto pakka-gatto kimīhi khajja-māno nakhehi vaṇa-mukhāni vippatacchamāno aŋg'ārakāsuyā kāyaɱ paritāpeyya.|| ||

Tassa mitt-ā-maccā ñāti-sāḷo-hitā bhisakkaɱ salla-kattaɱ upaṭṭh-ā-peyyuɱ.|| ||

Tassa so bhsakko salla-katto bhesajjaɱ kareyya.|| ||

So taɱ bhesjaɱ āgamma kuṭṭhehi parimucceyya.|| ||

Arogo assa sukhī serī sayaɱvasī yena kām'aŋgamo.|| ||

Tam enaɱ dve balavanto purisā nānā bāhāsu gahetvā aŋg'ārakāsuɱ upakaḍḍheyyuɱ.|| ||

Taɱ kiɱ maññasi Māgandiya,||
api nu so puriso iti cīti c'eva kāyaɱ sannāmeyyā' ti.|| ||

Evaɱ bho Gotama.|| ||

Taɱ kissa hetu?|| ||

'Asu hi bho Gotama aggi dukkha-samphasso c'eva mah-ā-bhitāpo ca mahā-pariḷāhocā' ti.|| ||

Taɱ kiɱ maññasi Māgandiya?|| ||

Idān'eva nu kho so aggi dukkha-samphasso c'eva mah-ā-bhitāpo ca mahā-pariḷāho ca,||
udāhu pubbe pi so aggi dukkha-samphasso c'eva mah-ā-bhitāpo ca mahā-pariḷāho cā ti.|| ||

Idāni c'eva bho Gotama so aggi dukkha-samphasso c'eva mah-ā-bhitāpo ca mahā-pariḷāho ca.|| ||

Pubbe pi so aggi dukkha-samphasso c'eva mah-ā-bhitāpo ca mahā-pariḷāho ca,||
asuhi ca bho Gotama kuṭṭhī puriso arugatto pakka-gatto kimīhi khajja-māno nakhehi vaṇa-mukhāni vippatacchamāno upahat-indriyo dukkha-samphasseyeva aggismiɱ sukham iti viparīta-saññaɱ pacca-latthāti.|| ||

Evam eva kho Māgandiya atītam pi addhānaɱ kāmā dukkha-samphassā c'eva mah-ā-bhitāpā ca mahā-pariḷāhā ca.|| ||

Anāgatam pi addhānaɱ kāmā dukkha-samphassā c'eva mah-ā-bhitāpā ca mahā-pariḷāhā ca,||
etarahi pi pacc'uppannaɱ addhānaɱ kāmā dukkha-samphassā c'eva mah-ā-bhitāpā ca mahā-pariḷāhā ca.|| ||

Ime ca Māgandiya sattā kāmesu avīta-rāgā kāma-taṇhāhi khajja-mānā kāma-pariḷāhena pariḍayha-mānā upahat-indriyā dukkha-samphassesveva kāmesu sukham iti viparīta-saññaɱ pacca-latthuɱ.|| ||

Seyyathā pi Māgandiya kuṭṭhī puriso arugatto pakka-gatto kimīhi khajja-māno nakhehi vaṇa-mukhāni vippatacchamāno aŋg'ārakāsuyā kāyaɱ paritāpeti.|| ||

Yathā yathā kho Māgandiya asu kuṭṭhī puriso arugatto pakka-gatto kimīhi khajja-māno nakhehi vaṇa-mukhāni vippatacchamāno aŋg'ārakāsuyā kāyaɱ paritāpeti,||
tathā tathāssa tāni vaṇa-mukhāni [508] asucitarāni c'eva honti du-g-gandhatarāni ca pūtikatarāni ca.|| ||

Hoti c'eva kāci sātamattā assādamattā yad idaɱ vaṇa-mukhānaɱ kaṇḍūvana-hetu.|| ||

Evam eva kho Māgandiya sattā kāmesu avīta-rāgā kāma-taṇhāhi khajja-mānā kāma-pariḷāhena pariḍayha-mānā kāme paṭisevanti.|| ||

Yathā yathā kho Māgandiya sattā kāmesu avīta-rāgā kāma-taṇhāhi khajja-mānā kāma-pariḷāhena pariḍayha-mānā kāme paṭisevanti,||
tathā tathā tesaɱ sattānaɱ kāma-taṇhā c'eva pavaḍḍhati,||
kāma-pariḷāhena ca pariḍayhanti.|| ||

Hoti c'eva kāci sātamattā assādamattā yad idaɱ pañca kāma-guṇe paṭicca.|| ||

Taɱ kiɱ maññasi Māgandiya?|| ||

Api nu te diṭṭho vā suto vā rājā vā rāja-mahā-matto vā pañcahi kāma-guṇehi samappito samaŋgī-bhūto paricāraya-māno kāma-taṇhaɱ a-p-pahāya kāma-pariḷāhaɱ appaṭi-vinodetvā vigata-pipāso ajjhattaɱ vūpasanta-citto vihāsi vā,||
viharati vā,||
viharissati vāti.|| ||

No h'idaɱ bho Gotama.|| ||

Sādhu Māgandiya, mayā pi kho etaɱ Māgandiya n'eva diṭṭhaɱ na sutaɱ rājā vā rāja-mahā-matto vā pañcahi kāma-guṇehi samappito samaŋgī-bhūto paricāraya-māno kāma-taṇhaɱ a-p-pahāya kāma-pariḷāhaɱ appaṭi-vinodetvā vigata-pipāso ajjhattaɱ vūpasanta-citto vihāsi vā,||
viharati vā,||
viharissati vā.|| ||

Atha kho Māgandiya ye hi keci samaṇā vā brāhmaṇā vā vigata-pipāsā ajjhattaɱ vūpasanta-cittā vihaɱsu1 vā,||
viharanti vā,||
viharissati vā.|| ||

Sabb'ete kāmānaɱ yeva samudayañ ca atthaŋ-gamañ ca assādañ ca ādīnavañ ca nissaraṇañ ca yathā-bhūtaɱ viditvā kāma-taṇhaɱ pahāya kāma-pariḷāhaɱ paṭivinodetvā vigata-pipāsā ajjhattaɱ vūpasanta-cittā vihaɱsu1 vā,||
viharanti vā,||
vihari-s-santi vāti.|| ||

Atha kho Bhagavā tāyaɱ velāyaɱ imaɱ udānaɱ udānesi:|| ||

'Ārogya-paramā lābhā||
Nibbānaɱ paramaɱ sukhaɱ,||
Aṭṭhaŋgiko ca maggānaɱ||
khemaɱ amata-gāminanti.|| ||

Evaɱ vutte Māgandiyo paribbājako Bhagavantaɱ etad avoca:|| ||

'Acchariyaɱ bho Gotama,||
abbhutaɱ bho Gotama,||
yāva su-bhāsitañ ci'daɱ bhotā Gotamena:|| ||

[509] 'Ārogya-paramā lābhā||
Nibbānaɱ paramaɱ sukhan' ti.|| ||

Mayā pi kho etaɱ bho Gotama sutaɱ pubba-kānaɱ paribbājakānaɱ ācariya-pācariyānaɱ bhāsa-mānānaɱ:|| ||

'Ārogya-paramā lābhā||
Nibbānaɱ paramaɱ sukhan' ti.|| ||

Ta-y-idaɱ bho Gotama sametī ti.|| ||

Yampana te etaɱ Māgandiya sutaɱ pubba-kānaɱ paribbājakānaɱ ācariya-pācariyānaɱ bhāsa-mānānaɱ:|| ||

'Ārogya-paramā lābhā||
Nibbānaɱ paramaɱ sukhan' ti.|| ||

'Kataman-taɱ ārogyaɱ,||
kataman-taɱ Nibbānan' ti.|| ||

Evaɱ vutte Māgandiyo paribbājako sakān'eva sudaɱ gattāni pāṇinā anomajjati.|| ||

Idantaɱ bho Gotama ārogyaɱ,||
idantaɱ Nibbānaɱ.|| ||

Ahaɱ hi bho Gotama etarahi arogo sukhī,||
na maɱ kiñci ābādhayatī' ti.|| ||

Seyyathā pi Māgandiya jaccandho puriso,||
so na passeyya kaṇha-sukkāni rūpāni,||
na passeyya nīlakāni rūpāni,||
na passeyya pītakāni rūpāni,||
na passeyya lohita-kāni rūpāni,||
na passeyya mañjeṭṭha-kāni rūpāni,||
na passeyya sama-visamaɱ,||
na passeyya tāraka-rūpāni,||
na passeyya candima-suriye,||
so suṇeyya cakkhu-mato bhāsa-mānassa:||
'chekaɱ vata bho odātaɱ vatthaɱ abhirūpaɱ nimmalaɱ sucinti.|| ||

So odāta-pariyesanaɱ careyya.|| ||

Tam enaɱ aññataro puriso tela-masi-katena sāhuḷacīvarena vañceyya:|| ||

Idan te amho purisa odātaɱ vatthaɱ abhirūpaɱ nimmalaɱ sucinti.|| ||

So taɱ paṭigaṇheyya,||
paṭiggahetvā pārupeyya,||
pārupitvā atta-mano atta-mana-vācaɱ nicchāreyya:|| ||

'Chekaɱ vata bho odātaɱ vatthaɱ abhirūpaɱ nimmalaɱ sucin' ti.|| ||

Taɱ kiɱ maññasi Māgandiya?|| ||

Api nu so jaccandho puriso jānanto passanto amuɱ tela-masi-kataɱ sāhuḷa-cīvaraɱ paṭigaṇheyya,||
paṭiggahetvā pārupeyya,||
pārupitvā atta-mano atta-mana-vācaɱ nicchāreyya:||
'chekaɱ vata bho odātaɱ vatthaɱ abhirūpaɱ nimmalaɱ suci'nti,||
udāhu cakkhu-mato saddāyāti.|| ||

Ajānanto hi bho Gotama apassanto so jaccandho puriso amuɱ tela-masi-kataɱ sāhuḷa-cīvaraɱ paṭigaṇheyya,||
paṭiggahetvā pārupeyya,||
pārupitvā atta-mano atta-mana-vācaɱ nicchāreyya:|| ||

[510] Chekaɱ vata bho odātaɱ vatthaɱ abhirūpaɱ nimmalaɱ sucinti,||
cakkhu-mate saddhāyāti.|| ||

Evam eva kho Māgandiya añña-titthiyā paribbājakā andhā ackkhukā,||
ajānantā ārogyaɱ,||
apassantā Nibbānaɱ.|| ||

Atha ca pani'maɱ gāthaɱ bhāsanti.|| ||

'Ārogya paramā lābhā Nibbānaɱ paramaɱ sukhan' ti.|| ||

Pubba-kehesā Māgandiya arahantehi Sammā-Sam-Buddhehī gāthā bhāsitā.|| ||

'Ārogya-paramā lābhā Nibbānaɱ paramaɱ sukhaɱ,||
Aṭṭhaŋgiko ca maggānaɱ khemaɱ amata-gāminan' ti.|| ||

Sā etarahi anupubbena puthu-j-jana-gatā.|| ||

Ayaɱ kho pana Māgandiya kāyo roga-bhūto gaṇḍa-bhūto salla-bhūto agha-bhūto ābādha-bhūto.|| ||

So tvaɱ imaɱ kāyaɱ roga-bhūtaɱ gaṇḍa-bhūtaɱ salla-bhūtaɱ agha-bhūtaɱ ābādha-bhūtaɱ||
'idaɱ taɱ bho Gotama ārogyaɱ idaɱ taɱ Nibbāna'nti vadesi.|| ||

Taɱ hi te Māgandiya ariyaɱ cakkhuɱ n'atthi yena tvaɱ ariyena cakkhunā ārogyaɱ jāneyyāsi,||
Nibbānaɱ passeyyāsīti.|| ||

Evaɱ pasanno ahaɱ bhoto Gotamassa,||
pahoti me bhavaɱ Gotamo tathā dhammaɱ desetuɱ,||
yathā'haɱ ārogyaɱ jāneyyaɱ,||
Nibbānaɱ passeyyan' ti.|| ||

Seyyathā pi Māgandiya jaccandho puriso,||
so na passeyya kaṇha-sukkāni rūpāni,||
na passeyya nīlakāni rūpāni,||
na passeyya pītakāni rūpāni,||
na passeyya lohita-kāni rūpāni,||
na passeyya mañjeṭṭha-kāni rūpāni,||
na passeyya sama-visamaɱ,||
na passeyya tāraka-rūpāni,||
na passeyya candima-suriye,||
tassa mitt-ā-maccā ñāti-sāḷo-hitā bhisakkaɱ salla-kattaɱ upaṭṭh-ā-peyyuɱ.|| ||

Tassa so bhsakko salla-katto bhesajjaɱ kareyya.|| ||

So taɱ bhesajjaɱ āgamma na cakkhūni uppādeyya,||
na cakkhūni visodheyya.|| ||

Taɱ kiɱ maññasi Māgandiya,||
nanu so vejjo yāva-d-eva kilamathassa vighātassa bhāgī assā' ti.|| ||

Evaɱ bho Gotama.|| ||

Evam eva kho Māgandiya ahañ c'eva te Dhammaɱ deseyyaɱ idantaɱ ārogyaɱ,||
idantaɱ Nibbānanti.|| ||

So tvaɱ ārogyaɱ na jāneyyāsi,||
Nibbānaɱ na passeyyāsi.|| ||

So mam'assa kilamatho,||
sā mam'assa vihesā' ti.|| ||

[511] Evaɱ pasanno ahaɱ bhoto Gotamassa,||
pahoti me bhavaɱ Gotamo tathā dhammaɱ desetuɱ,||
yathā'haɱ ārogya jāneyyaɱ Nibbānaɱ passeyyanti.|| ||

Seyyathā pi Māgandiya jaccandho puriso so na passeyya kaṇha-sukkāni rūpāni,||
na passeyya nīlakāni rūpāni,||
na passeyya pītakāni rūpāni,||
na passeyya lohita-kāni rūpāni,||
na passeyya mañjeṭṭha-kāni rūpāni,||
na passeyya sama-visamaɱ,||
na passeyya tāraka-rūpāni,||
na passeyya candima-suriye.|| ||

So suṇeyya cakkhu-mato bhāsa-mānassa 'chekaɱ vata bho odātaɱ vatthaɱ abhirūpaɱ nimmalaɱ sucin' ti.|| ||

So odāta-pariyesanaɱ careyya.|| ||

Tamenaññataro puriso tela-masi-katena sāhuḷacīvarena vañceyya,||
idan te ambho purisa odātaɱ vatthaɱ abhirūpaɱ nimmalaɱ sucinti.|| ||

So taɱ paṭigaṇheyya,||
paṭiggahetvā pārupeyya.|| ||

Tassa mitt-ā-maccā ñāti-sāḷo-hitā bhisakkaɱ salla-kattaɱ upaṭṭh-ā-peyyuɱ.|| ||

Tassa so bhsakko salla-katto bhesajjaɱ kareyya: uddha-virecanaɱ adho-virecanaɱ añjanaɱ paccañjanaɱ natthu-kammaɱ.|| ||

So taɱ bhesajjaɱ āgamma cakkhūni uppādeyya,||
cakkhūni visodheyya.|| ||

Tassa saha cakkhu-p-pādā yo amusmiɱ tela-masi-kate sāhuḷacīvare chanda-rāgo,||
so pahīyetha.|| ||

Tañ ca naɱ purisaɱ amittato pi daheyya.|| ||

Paccatthikato pi daheyya.|| ||

Api ca jīvitā voropetabbaɱ maññeyya,||
'dīgha-rattaɱ vata bho ahaɱ iminā purisena tela-masi-katena sāhuḷacīvarena nikato vañcito paluddho.|| ||

'Idan te ambho purisa odātaɱ vatthaɱ chekaɱ abhirūpaɱ nimmalaɱ sucinti.|| ||

Evam eva kho Māgandiya ahañ c'eva te Dhammaɱ deseyyaɱ:||
'idantaɱ ārogyaɱ,||
idantaɱ Nibbānan' ti.|| ||

So tvaɱ ārogyaɱ jāneyyāsi,||
Nibbānaɱ passeyyāsi.|| ||

Tassa te saha cakkhu-p-pādā yo pañca-supādāna-k-khandhesu chanda-rāgo,||
so pahīyetha,||
api ca te evam assa dīgha-rattaɱ vata bho ahaɱ iminā cittena nikato vañcito paluddho,||
ahaɱ hi rūpaɱ yeva upādiyamāno upādiyiɱ,||
vedanaɱ yeva upādiyamāno upādiyiɱ,||
saññaɱ yeva upādiyamāno upādiyiɱ,||
sankhāre yeva upādiyamāno upādiyiɱ,||
viññāṇaɱ yeva upādiyamāno upādiyiɱ.|| ||

Tassa me upādāna-paccayā bhavo,||
bhava paccayā jāti,||
jāti-paccayā jarā-maraṇaɱ soka-parideva-dukkha-domanass- [512] upāyāsā sambhavanti.|| ||

Evam etassa kevalassa dukkha-k-khandhassa samudayo hotī' ti.|| ||

Evaɱ pasanno ahaɱ bhoto Gotamassa:||
pahoti me bhavaɱ Gotamo tathā dhammaɱ desetuɱ,||
yathā'haɱ imamhā āsanā anandho vuṭṭhaheyyan' ti.|| ||

Tena hi tvaɱ Māgandiya sappurise bhajeyyāsi,||
yato kho tvaɱ Māgandiya sappurise bhajissasi,||
tato tvaɱ Māgandiya Sad'Dhammaɱ sossasi.|| ||

Yato kho tvaɱ Māgandiya Sad'Dhammaɱ sossasi,||
tato tvaɱ Māgandiya Dhamm-ā-nu-Dhammaɱ paṭipajjissasi.|| ||

Yato kho tvaɱ Māgandiya Dhamm-ā-nu-Dhammaɱ paṭipajjissasi,||
tato tvaɱ Māgandiya sāmaɱ yeva ñassasi,||
sāmaɱ dakkhisi.|| ||

Ime rogā gaṇḍā sallā,||
idha rogā gaṇḍā sallā aparisesā nirujjhanti,||
tassa me upādāna-nirodhā bhava-nirodho,||
bhava-nirodhā jāti-nirodho,||
jāti-nirodhā jarā-maraṇaɱ soka-parideva-dukkha-domanass'upāyāsā nirujjhanti,||
evam etassa kevalassa dukkha-k-khandhassa nirodho hotī' ti.|| ||

Evaɱ vutte Māgandiyo paribbājako Bhagavantaɱ etad avoca:|| ||

Abhikkantaɱ bho Gotama abhikkantaɱ bho Gotama,||
seyyathā pi bho Gotama nikkujjitaɱ vā ukkujjeyya,||
paṭi-c-channaɱ vā vivareyya,||
mūḷhassa vā Maggaɱ ācikkheyya'||
andha-kāre vā tela-pajjotaɱ dhāreyya,||
'cakkhu-manto rūpāni dakkhintī' ti,||
evam evaɱ bhotā Gotamena aneka-pariyāyena dhammo pakāsito.|| ||

Es'āhaɱ bhavantaɱ Gotamaɱ saraṇaɱ gacchāmi Dhammañ ca bhikkhu-sanghañ ca.|| ||

Labheyyāhaɱ bhoto Gotamassa santike pabbajjaɱ,||
labheyyaɱ upasampadan' ti.|| ||

Yo kho Māgandiya añña-titthiyapubbo imasmiɱ Dhamma-Vinaye ākankhati pabbajjaɱ,||
ākankhati upasampadaɱ,||
so cattāro māse parivasati,||
catunnaɱ māsānaɱ accayena āraddha-cittā bhikkhū pabbā-jenti,||
upasampādenti bhikkhu-bhāvāya.|| ||

Api ca mettha puggalace-mattatā viditāti.|| ||

Sapaca bhante añña-titthiya-pubbā imasmiɱ Dhamma-Vinaye ākaŋkhantā pabbajjaɱ ākaŋkhantā upasampadaɱ,||
cattāro māse parivasanti,||
catunnaɱ māsānaɱ accayena āraddha-cittā bhikkhū pabbā-jenti.|| ||

Upasampādenti bhikkhu-bhāvāya.|| ||

Ahaɱ cattāri vassāni parivasissāmi.|| ||

Catunnaɱ maɱ vassānaɱ accayena āraddha-cittā bhikkhū pabbājentu,||
upasampādentu bhikkhu [513] bhāvāyāti.|| ||

Alattha kho Māgandiyo paribbājako Bhagavato santike pabbajjaɱ,||
alattha upasampadaɱ.|| ||

Acir'ūpasampanno kho pan'āyasmā Māgandiyo eko vūpakaṭṭho appamatto ātāpī pahit'atto viharanto na cirass'eva yass'atthāya kula-puttā samma-d-eva agārasmā anagāriyaɱ pabbajanti,||
tad anuttaraɱ Brahma-cariya pariyosānaɱ diṭṭhe'va dhamme sayaɱ abhiññā sacchi-katvā upasampajja vihāsi.|| ||

Khīṇā jāti,||
vusitaɱ Brahma-cariyaɱ,||
kataɱ karaṇīyaɱ,||
nāparaɱ itthattāyā ti abbhaññāsi.|| ||

Aññataro ca kho pan'āyasmā Māgandiyo arahataɱ ahosī ti.|| ||

Māgandiya Suttaɱ Pañcamaɱ|| ||


Contact:
E-mail
Copyright Statement